是咁的, 我同女朋友拍左拖差唔多兩年, 佢成日都發埋d 無謂脾氣, 不過好就好在講講下自己知錯, 識得扮下可憐, 咁我咪原諒下佢lo…



記得有一次佢發晒爛渣咁, 話我掛住打機唔理佢喎, 唉屌, 邊有男人唔打機嫁…

「咁你可唔可以每日指定時間打俾我傾一陣丫?」佢把聲好似幾激動。

「呀大佬, 我好難先等得齊班fd online 打機嫁, 有乜可能同你傾電話唔理佢地呀...」

「咁臨訓前呢?」

「打機呢d 野, 一個唔覺意就打到好夜, 到時你都訓左啦...」我有d 唔耐煩。

「咁我唔訓住, 等你打完機再傾一陣先訓丫...」佢又扮可憐...

「唉是但你啦, 你鍾意等就等...」



又有一次同佢出街, 佢無啦啦話我件衫好得意, 係咁掀起我件衫。 叫左佢幾次唔好咁做, 佢都繼續掀, 咁我咪掀返佢件衫囉, 我屌丫, 佢居然喊呀!

「你又喊乜鬼呀...」

「嗚… 有冇搞錯… 掀人件衫...」佢一邊喊一邊講。

「你掀我又得, 我掀返你又喊, 你講下道理好喎!」

「咁人地女仔黎嫁嘛!」

我冇理佢, 擰轉面就行。佢就一路喊一路跟喺我後面。

十五分鐘後, 都行左幾條街, 佢終於上前攬住我。

見佢咁可憐個樣, 唉, 錫返, 冇事啦。



中學畢業後, 佢入左護士學校, 功課上堂等等都好忙, 咁我咪搵其他女仔傾下計, 點知佢咁都要管…

「點解呀! 點解你要同人地傾計呀!」

「下… 傾下閒計, 有乜咁出奇呀...」

「傾閒計會傾到問人地個bra 咩cup 嘅!」嘩, 好似好有火。

「點解你會知… 哦! 你login 我facebook 黎睇!」嚇到我個心都離一離。

「我問你呀! 點解你要同人地傾埋d 咁嘅野呀!」

「咁你想點樣丫?」

「我要你以後唔同呢個女仔傾計!」

「好囉...」呢個要求都幾過份, 不過我又係理虧, 唯有應承住先啦。



當然我仍然堅持自我, 覺得同人地傾下計冇乜大不了, 最錯就係錯在唔記得改password。

一星期後…

「陳嘉俊! 你應承過我以後唔同人地傾計嫁!」咦, 響我全朵喎。

「喂喂, 咁傾下計真係冇乜問題嘛...」

「你係咪唔鍾意我啦?」

「唔係...」

「陳嘉俊! 我以後唔會再為左你而喊! 今次係最後一次! 我話嘅!」

哈哈, 聽住先啦, 過幾日咪又黎過…




兩年後...

「喂, 其實disney 有咩好玩?」

「冇咩特別, 不過以前氣氛幾好, 而家好多中國人坐石階。」佢把聲冇乜點變。

「冇咩特別你又咁鍾意去… 我女朋友又係, 成日想我同佢去。」

冇錯, 我地後來分開左, 佢變左我ex。然後各自搵到另一半。

「去一次都ok 嘅其實都。」

「喂, 其實我以前是咪好霸道。」

「er… 少少啦… 比較顧自己多d 囉...」

「諗返起以前次次鬧交都係你認錯先, 雖然唔記得係咪次次都係你唔岩, 不過每次都係你屈服。而家個女朋友, 就算我主動和好, suggest 埋解決方法, 佢都唔領情, 繼續發爛渣。」

「細路女嘛… 你咪由佢撒下嬌囉… 我嗰陣肯同你和好, 係因為驚你真係會唔睬我, 就算嗰件事令我好唔開心都好。」

「我知呀。」我開始後悔以前對佢咁差。

「不過我以前都有唔啱嘅。」

「我真係唔知佢有幾想同我繼續行, 有時想好好地同佢傾下, 佢即刻變晒樣: 『哦! 即係我錯啦! 好! 我錯晒!』咁樣點同佢傾落去。」

「所以我真係幾好, 好似係。」

「雖然講出黎會俾你自high, 不過呢方面你真係幾好。」

「佢可能係未大個姐… 不過我不嬲都就得人嘅。」

「唉, 希望佢快d 大個女...」

「哈哈, 估唔到你都會做呢d 角色, 你大個仔了。」

「唔係點, 唔通好有型咁飛左佢咩...」

「你受唔到可以咁做嫁~ Btw 我訓了, 聽日返早。」

「早抖啦bye。」

「你加油啦, 隨時sharing 冇問題! 早抖!」

- 完 -