http://hk.apple.nextmedia.com/news/art/20150815/19256584

早前去日本接受訪問，被當地媒體封為「學民女神」的周庭，自從佔領運動後、入咗浸大後就少咗曝光，不過佢前日喺facebook自爆，原來呢半年做大學生外，仲「下凡」做兼職打工，兼且係去茶餐廳做侍應。佢最近決定唔再做，仲喺fb寫咗篇文，分享兼職生涯嘅見聞。

搞社運獲老闆尊重
其實早喺今年2月，已經有人話喺一間餐廳見過周庭做兼職，仲讚佢好有禮貌、做嘢好叻、把聲好聽。有網民見周庭出post後，亦留言話幫襯時第一眼即認出周庭，有街坊仲話好開心，因為「一落樓下就見到女神」喎。
周庭雖然係第一次正式打工，但周庭都話易上手，至少未試過打爛嘢，佢喺文入面都有話，最惡頂係有時遇到啲用主僕方式對侍應的冇禮貌客人喎，又慶幸喺返工時，未試過有藍絲到場搞事，因為佢最唔想就係影響到間餐廳，又透露老闆請佢時，其實都知佢係邊個，話會尊重佢對社會事務的參與，覺得最重要係佢返工時努力做嘢喎。
問到有冇粉絲認出佢後捉住佢傾偈，周庭就話有但唔算好多，因為做侍應時，同客對話時間好少，大部份時間都係低頭落單喎。周庭又承認，曾有食客要求合照，但佢以返緊工為由婉拒咗。
咁點解做得好哋哋要辭工？周庭話雖然已辭去學民思潮發言人一職，但至今仍然係學民核心成員，所以經常要開會，但呢份工每晚都要返4粒鐘，佢怕時間分配唔到，所以日前已辭職，話會專注做英文補習，透露現已有10個學生，嚟緊都有排忙喎。