【on.cc東網專訊】英聯盃16強韋斯咸對車路士，場內爆冷打得精彩，但講到吸引力，都唔及場外大激鬥喎！場波就由韋斯咸贏2比1晉級，但呢場話晒係倫敦打吡，嚟到「鎚仔隊」個今季新用嘅倫敦奧林匹克球場，兩班球迷就梗係格外激動啦！

據英國傳媒報道，兩幫球迷喺場外已經有衝突，而喺開波之後就愈嘈愈激，有球迷喺半場放相上網，影到有球迷頭部畀銀仔掟穿，搞到成頭血，核凸到爆呀！有球迷向電台爆料，話場內球迷打到好似70年代嘅英格蘭暴徒球迷一樣，除咗掟銀仔同膠樽之外，有人甚至拆埋張凳去掟敵對球迷，基本上喺場內任何物件都成為咗武器，喺兩邊球迷區互掟。該球迷仲話，當時觀眾席有唔夠保安，班警察又只係行行企企，乜都唔理，佢話如果唔係後尾有防暴警察入場制止暴亂，否則最後有人死都唔出奇咁話喎！

場波去到最後5分鐘，兩邊球迷再爆大衝突，搞到防暴警察直頭要清走一區觀察席，將兩邊球迷徹底分開，不過同時間，都有球迷突破分隔區，走去對方球迷區前面挑釁，繼而又打過，場面堅恐怖。

韋斯咸賽後就發聲明，譴責今次事件，仲話如果認得出邊個球迷搞事，唔排除會罰佢終生禁止入場睇波添！車路士領隊干地就話睇唔到事件發生，但就話為事件覺得難過喎！

SO東波同你追實體壇每個精彩時刻！　
http://on.fb.me/1PWMCFH