【on.cc東網專訊】世盃外歐洲區今晨上演最瘋狂一幕，波斯尼亞球星迪斯高發狂除人褲賞「月」喎！講緊係今晨H組波斯尼亞作客希臘場波，話說踢到75分鐘，迪斯高畀希臘後衛柏柏斯達夫普路斯死纏爛打想搶腳下球，後者仲出到拉衫扯褲嘅茅招，先將呢位羅馬射手拉低。雖然球證已經即時吹咗犯規，但迪斯高唔忿氣，就將跨開腳企喺佢身上嘅柏柏斯達夫普路斯條褲發狂除低，場面超爆笑。成單嘢都認真小學雞，不過雙方之後就愈來愈多人埋嚟抽水，最後球證就畀多面黃牌迪斯高，兩黃變一紅趕佢出場，而希臘另一名守將柏柏杜普路斯就因為偷雞摑人，同樣領紅被逐，最後希臘仲要完場前整個世界波逼和波斯尼亞1比1，迪斯高肯定喺更衣室激到紮紮跳呀！

片及圖：http://hk.on.cc/hk/bkn/cnt/sport/20161114/bkn-20161114070833046-1114_00882_001.html