中三果一年，我讀Ａ班，可以話係果級既精英班。我讀既中學係BAND1，自然會叫學生努力啲讀書。的而

且確，我地班有好多人都好比心機讀書，為求揀到自己想讀既科，當時既我仲係混混噩噩，冇話咩用心

讀書，好多野都係懶懶行，但偏偏有啲小聰明，學既野好快上手，所以一直都係班上中游既位置。

中三下學期開始，我比班主任調左去窗口位，而我心入面既刺，亦都係喺果時開始出現。

坐我隔離係個書蟲，日日攞住本書黎讀，果日教咩佢就讀咩，人人小息午息落去Canteen，得佢一個戇居

居坐喺度咪書，同佢坐左成半年計都唔知有冇傾多過廿句。點都好，佢唔係重點，只係係咁意提下。我

真正想提既，係坐正我前面果個女仔，中三我第一次同佢同班，果個女仔叫慧，我平時都係單字叫佢，

雖然個個都叫佢英文名Michelle，但我偏偏唔鐘意叫人個英文名。加上叫「慧」果字同「喂」差唔多音

，「喂，慧。」我咁樣嗌佢，感覺夠哂有趣。慧佢讀書唔算叻，但份人就好多野講，上堂好似乖乖女咁

唔出聲，一有人聊佢即刻雞啄唔斷，有時真係嫌佢幾煩。佢雖然性格粗枝大葉，但眼大大臉大大咁，當

時15歲既佢睇落好似12,13歲咁，睇落幾可愛。

當我第一日調去呢個位既時侯，第一時間就想走。原因無他，我啲friends全部同我坐得好遠，我坐喺班

房既左面，佢地喺哂右面，搞到我上堂冇水吹。我份人不嬲好少聊人傾計，坐新位既第一日更加係靜左

半日，悶到我嘔。

午息返到黎，一坐埋位就差啲嚇親，點解我張枱寫滿哂音符？自細對音樂冇興趣既我睇到一頭霧水，一

開始諗係我班friends玩鳩我，但係佢地成個午息都同我一齊，點畫？

我望一望隔離隻書蟲，「喂，李新傑，知唔知邊個喺我張枱畫野？」李新傑係書蟲個名，費時直接叫佢

書蟲。書蟲望左我一眼，再望一望前面，就繼續dup低個頭，睇佢本死人化學書。

我望前面，就見到慧同佢死黨阿敏一齊，兩個陰陰咀笑望住我。

我大概估到咩事，即刻行前問佢地兩個做咩。

「你地兩個畫我張枱？」我一邊問佢地，一邊指住我張枱。

「冇呀，冇呀。」阿敏笑笑口咁，一睇就知咩事。

「無端端做咩畫我張枱，陣間有排擦。」我望一望張枱，原來仲係黑色原子筆黎，真係比佢地玩死。

「哈哈哈哈哈哈～～」突然慧笑到停唔到口，我當堂呆左。

「你識唔識睇架，呢個鋼琴譜黎架。」慧拍一拍我膊頭。
「如果你估到呢首係咩歌，最多我請你飲野賠罪。」慧笑住同我講，臉頰泛起酒渦。

「你話架，我音樂不嬲好勁。」我懶係野咁，查實望住成枱豆豉諗到R哂頭。

「收皮啦，你細細個音樂就好水皮架啦！連牧童笛都唔識吹。」阿敏串我，佢自小學三年班就識佢，可

以話係青梅竹馬。

「冇你咁好氣。」我坐返低，望住一枱既音符。就連之後果堂數學堂，我都喺度研究個琴譜，研究既其間，慧

成日都會無端端擰轉頭望住我，然後笑住咁望返前面。

「諗左成堂數學堂，都唔知乜黎。」我心諗。「呀咪住...」

Engine

放左學之後，我叫左我個friend傑仔，佢雖然細細粒，但鋼琴有八級，真係天生我材必有用。

「喂傑仔，你知唔知呢堆咩黎？」

「琴譜囉。」

「呢個我都知，我係想知呢首咩歌呀。」

「呢段野咁熟口面既..呀我記得喇！係...ehh...」

「...」

「唔記得左咩名，但記得個旋律，呢段係chorus黎。」

「唉！傑哥幫下手啦。」

「做咩咁緊張？話時話你張枱無端端做咩有琴譜？」

「屌咪問啦。」

「兄弟都唔講得？」

「....」

「唔講就算。今晚返去幫你搵搵，搵到比條link你啦。」

「..唔該。」

Dododo！

我個MSN響起，我click入去，係傑仔。



https://youtube.com/watch?v=RBlcZMSdU3g


「係呢段啦。記得請飲野。」傑仔send左一條link黎。

「thanks！」

我上網查返呢首歌既琴譜，一睇，果然同佢今日畫既琴譜一樣。知道左答案既我，反而多左一個問題：

點解佢地要喺我張枱畫琴譜？成件事古古怪怪。

「都係聽日先算。」我off左MSN之後就走去沖涼訓覺。

今日晨咁早就醒左，個天落住微微雨，但係我七點三就返到學校。因為太早，課室都唔比入住，唯有入

canteen坐下。

一入到去，人好少，最多得兩三個人，多數都係高form。搵唔到熟人既我只好坐埋一邊。

突然，一樓既音樂室突然傳出鋼琴聲。坐近樓梯既我聽得好清楚，呢首歌係琴日傑仔send比我果首，亦

姐係慧同阿敏喺我張枱畫既琴譜既歌。好奇既我即刻行上樓梯，睇下發生咩事。

一行入音樂室，鋼琴聲即刻停左。坐喺鋼琴前面既慧望住我。

「俾你嚇死。我以為係阿sir或者miss黎左。」慧擰翻轉個頭，繼續彈琴。

「估唔到你又彈得唔差喎。」我搵個位坐低。

「唔我睇我咁丫，我鋼琴都有八級架。」慧陽光般微笑著咁答我，相反窗外既雨反而落大左。

「話時話，點解你要喺我張枱畫譜？」我問佢，佢停低左彈奏。

「咁你知唔知我琴日畫既譜係咩歌？」

「你依家彈緊呢首囉。」

「犀利喎，一日就搵到答案。」

「係咪請我飲野？」

「冇咁易，你知唔知呢首歌歌名係咩？」

「鬼知咩，歌名係日文黎。但好似有幾隻中文字，咩明日...」

「明日晴れるかな...中文名係『明日會是晴天嗎？』」慧望一望出面愈來愈大既雨。

「你又識日文？」我聽到佢講日文呆左下。

「識少少啦。」佢笑一笑。「喂..咁你又估下聽日係唔係好天？」慧望住我。

「聽日一定會好天既...」我用廣告名言回答佢。

「你點知架？」笑左一笑既佢都用返廣告名言回答我。

「因為我睇左天氣報告..」我即刻作出懶搞笑既回應。

「好好笑喎...」點知慧笑都冇笑。

「屌，柒左。」心入面屌左聲既我唯有戇居居咁打圓場。「搞下gag姐，諗左成晚架，比下面啦。」

「諗左成晚先諗啲咁既gag你都好失敗。」慧串到我體無完膚。

鐘聲響起。

「都七點半啦，返課室啦同學。」我柒到無地自容，快步行出音樂室。

「我執返好啲野先，你上去先。」

臨走既一刻，我眼尾睄到慧喺度偷笑，佢笑起上黎有酒渦，睇落好可愛。

「睇落好可愛」，係我對慧嘅第一印象。

一返上課室，已經見到書蟲坐左喺位讀書。今日係數學書。

我施施然坐返埋位，見到成枱樂譜，忽然醒起一樣野。

「點解慧要喺我張枱畫譜。」諗極都諗唔明既我決定等慧返黎先問佢。

喺慧返黎之前，阿敏返左黎先。

「黑色原子筆黎架擦唔甩架啦，換過張枱啦。」阿敏坐喺慧個位，望住我張枱。

「唔換啦，廢時煩。」我口就咁講，其實心入面係想keep住啲琴譜。

「喂係喎話時話，點解你地兩個要畫我張枱？」我問阿敏。

「冇～我地見你調左新位好似好悶咁，咪比畫啲野你睇下，解下悶。」阿敏笑住講。

「你知我音樂不嬲廢..」我細細聲咁講。

「係呀，所以我地本來諗住你一睇到就會即刻換過張枱，點知冇。」

「咁..你知唔知呢首咩歌？」

「知呀。但想我話比你知，冇咁易。」

「我知答案啦。我係想知點解你地會喺我張枱畫呢首歌嘅譜。」

「你知唔知呢首歌講咩？」

「唔知喎..」

「算啦冇野。」

「....」
「係呢..你同果個女仔，幾時識架？」我好奇咁問佢。

「Michelle？好似係中一同班到依家。」阿敏中一，二都同我唔同班。

「哦...」

「做咩呀？鐘意人呀？」阿敏笑住咁問我，但睇落好似有啲嬲，可能係我敏感左。

「痴線！」我即刻否認。

同時間，慧佢返左黎。

「傾緊啲咩？」慧走過黎，坐喺阿敏隔離。

「講緊你畫啲野囉。」我回應，望住慧。

「唔係我..」慧講講下野，班主任林sir入左課室，阿敏同慧即刻返自己位。

「你岩岩講咩？」我問前面既慧。

「算啦費事講。」慧好似面有難色。

「搞乜..？」我心入面又多左個問號。

第一，二堂係悶到嘔嘅Bio堂，聽住個五十幾歲嘅阿叔講書真係悶到想死。一望到隔離隻書蟲係咁抄notes，上堂更加難頂。百無聊賴嘅我即刻搵慧搭嗲。

「喂，你今朝講『唔係我』，姐係點？啲譜唔係你畫？」我拍一拍慧既膊頭。

「吓，算係啦。」慧模稜兩可咁答我。

「算係？姐係點？」我比佢啲答案搞到一頭霧水。

「姐係阿敏畫架囉..雖然我提議既。」

「無端端畫我張枱？仲要係你提議？話時話我地好似係第一年同班咋喎，你又會整蠱我？」

「午息果陣，你出左去食野，我同阿敏咪傾下計囉。傾傾下無端端傾到你，佢話見你換左新位好似好悶咁，所以我就提議話不如搵啲野玩下你，就係咁。」

「你話呢啲屎橋阿敏諗就話姐，估唔到你又會諗啲咁爛嘅橋，仲要用原子筆畫，擦唔到。」

「妖，中一中二果陣我成日都聽阿敏提起你，但果陣又唔識你。直至升到中三同你同班，咪玩下你囉，點知你咁小器咁唔玩得。」

「邊度有小器？我有話你唔畫得我張枱咩？」

「咁姐係之後都畫得？」

「..唔係。」

「哈～」慧笑左一聲就擰返轉面。

「份人幾古惑」，係我對慧嘅第二印象。

留名支持

午息食完飯返黎，望到同琴日一樣嘅樂譜，等我仲以為佢地又會畫野。

我望一望坐埋一齊既慧同阿敏，同琴日一樣陰陰咀望住我笑。

「今次又搞乜？」覺得奇奇怪怪嘅我，醒返起陣間果兩堂英文有功課，即刻攞本英文書出黎做。

「仆你個街！」一拎本英文書出黎，我即刻鬧左聲，慧同阿敏隨即爆笑。

成本英文書封面都係漫畫公仔。仲要用Marker畫。書蟲望一望我本書，又dup低頭睇返佢本英文書，但咀角陰陰咀咁笑，我見到都想打柒佢。

「又玩乜呀？」我拎住本書行去慧同阿敏果度。

「又係你話唔畫枱。咁咪畫你本英文書囉。」慧笑到眼水都出埋咁濟。

「玩野咩..個死人陳卓峰又鬧我一獲架啦！..」陳卓峰係我地英文阿sir，煩到仆街。
「呢啲公仔又咩意思呀？」我問佢地兩個，佢地又keep住笑，唔同我講。

笑多十幾秒，佢地終於出聲。

「聽日有VA堂呀，題目好似係漫畫。咪拎你本書練習下囉。」慧指住上面啲公仔。「拿我地仲有幫佢地改名架，呢個公主叫阿敏，個勇士叫阿慧，隻怪獸叫阿頌。」慧笑住咁同我講，隔黎阿敏又係笑到停唔到。

「唉屌。」我冇佢地咁好氣，坐返埋位諗定解釋。

放學，個個都返哂屋企，得我一個留喺課室。

原因唔使問，陳卓峰要我留堂反省，仲比左成堆練習我做。

一路做嘅我一路喺度諗點解我要認哂係我做，唔拉埋佢地兩個落水，依家得我一個留低，有啲後悔。

「做得好辛苦咁喎。」突然有人拍我膊頭，望一望，係慧同阿敏。

「..做乜唔走？」我擰返轉頭，繼續做我嘅passive voice練習。

「仲以為你會踢爆係我地兩個做添，估唔到你居然認哂咁傻仔。」慧。

「你想我報串？呢啲小學雞野我先唔做。少少練習鬼會難到我，係哂時間啲姐。」

「成日懶係野咁。我仲記得小學五年班果陣，我整蠱鼻屎仔，扔左佢個筆袋去垃圾桶。明明你得個睇字，鼻屎仔同老師報串你竟然攬哂上身，後尾仲好似通知家長同記左小過。」阿敏講返啲小學往事，老老實實我自己都唔記得呢件事。

「好少事姐..老豆打左我幾鎚就冇左件事。」我扮哂冇野咁，其實果陣比老豆打完喊到仆街。

「你呀，好心咪咁好人啦，我地玩你都唔還手，仲嬲都冇嬲。」慧同我講，一時之間我都唔知答咩好。

「男人老狗比女人蝦好樣衰架嘛，阿頌細細個已經好要面子。」阿敏笑笑口咁講。

「咪阻住哂啦，返屋企啦。有排都未做完呀。」

「使唔使幫手呀，我地兩個英文唔差架喎。」慧。

「唔使呀，走啦。」

「車。..」
「話時話，你睇唔睇劇架。」慧問我。

「咩劇？TVB？」我份人不嬲唔鐘意睇劇，只係食飯時係咁意睇睇，就連依家夜晚播緊咩劇都唔知。

「唔係呀。講緊日劇呀。」慧。

「日劇咁鬼無聊，女人先鐘意睇。」老老實實我又真係冇睇過日劇，因為真係冇興趣。

「唔識貨。」慧講左句就拎走我一份練習。
「你幾點on MSN？我做完今晚比答案你，你聽日抄返。」

「你有我MSN？」

「我問阿敏咪得囉。係咁啦，掰掰。」講完呢句慧就同阿敏走左。

「唔想欠人人情」，呢個係我對慧嘅第三印象。

我返到屋企已經七點幾，食埋飯大約八點半即刻開電腦，即刻見到有個交友邀請。

「‵慧－。」少少符號帶點MK嘅名，應該係慧，我accept左個邀請。

Dododo！

「做完喇。依家打返啲答案比你。」慧喺收到我accept嘅瞬間，即刻就搵我。

「唔該。」
「話時話，你今日做咩問我有冇睇日劇？」我問。

「1,A 2,A 3,C 4,D 5,B.......」佢send緊答案黎，完全冇答我問題。

「喂....答我問題啦。」

「31,C 32,D 33,A 34,B 35,C..OK搞掂，應該都岩八成。」慧終於打完答案。

「喂答我問題啦。」我已經send左呢句野五次。

「咩問題？」慧問返我轉頭。

「..你今日做咩問我有冇睇日劇？」

「吓。冇呀，你唔知琴日阿敏畫果個琴譜係一個日劇嘅主題曲黎咩。」

「真係唔知喎，套野講咩架。」

「....你search吓咪知囉。唔係少少野都唔做呀？」

「ok..我依家search。」

打開browser，click入google打「明日晴」，冇幾耐就出左「明日晴れるかな　桑田佳祐　求婚大作戰　主題曲」

「明日晴....係歌名，桑田佳祐應該係歌手名，求婚大作戰..睇黎呢個就係劇名。」我click入求婚大作戰嘅wiki。

「岩瀨健（山下智久 飾）出席青梅竹馬吉田禮（長澤雅美 飾）和大學教授多田哲也（藤木直人 飾）的婚禮。婚禮上放映著一張張相片，使健後悔多年沒有把握向禮表白的機會，心裡產生強烈的念頭，要回到年少時。忽然，擁有控制時間能力的精靈（三上博史 飾）受到感動而現身，告訴健只要他許願，便能完成他回到過去的願望。於是，得到精靈相助的健便回到拍攝相片的時間，為改變他和禮的未來而努力。」

「屌..咪又係啲愛情劇，係多個時光倒流之嘛。」我一路碌落去，一直都諗唔明呢套劇有咩特別。

「search左喇，求婚大作戰丫嘛，聽都未聽過。大佬，你鐘意還鐘意，唔使畫首主題曲個琴譜落我張枱度下話。」我開返MSN搵慧。

「妖..你真係乜都唔明。」慧無端端發我脾氣，打完字之後就off左，搞到我呆左。

「搞乜呀？？」我無端端又多一個問號。

覺得困擾既我唯有開多次求婚大作戰嘅wiki，睇下有咩miss左。

「岩瀨健出席青梅竹馬吉田禮和大學教...」我照著wiki黎讀。「咪住..」

「青梅竹馬？青梅竹馬？」我呆左一呆。

「唔撚係呀...」我覺得我只係諗多左，冇耐就熄左機沖涼訓教。

今朝我又早左起身，可能因為我成晚都訓得唔好。又同琴日一樣，一早就返左學校，唔同嘅係，今日係晴天。

返到學校嘅我，唔知點解第一時間去嘅地方，係音樂室，我都唔知點解。可能，我喺度期待緊慧喺果度彈琴。

可惜嘅係，入面一個人都冇。我唯有行落樓梯，去canteen坐一陣，等課室開門。

喺canteen，我遇到我老友，西成。西成係我升中學之後第一個識嘅朋友，雖然佢中一二同我同班，但佢依家讀緊Ｂ班，之不過我都同佢係咁老友鬼鬼，日日午息都一齊食晏。題外話嘅係，佢暗戀阿敏。

講到依家，我都未形容過阿敏係咩樣，其實阿敏幾靚女，眼大大鼻高高咁，外表都幾清純，都算係女神級。之不過我由細識到佢大，對佢冇乜感覺。係，冇乜感覺。應該係。

「阿敏呢排點？」西成第一句就問。「你咪媾左佢添呀同你講。」西成拍一拍我膊頭，西成鐘意阿敏呢件事，嚴格黎講得我一個知。西成佢肥肥地，但生得好高，當時中三嘅佢已經有米八，係籃球校隊。西成中一嘅時候，見到我同阿敏吹水，而佢喺見到阿敏嘅瞬間就已經一見鍾情，鐘意左人，仲成日問我阿敏有咩興趣，可惜，高高大大嘅佢反而係一個毒撚，連計都未同阿敏傾過一句。至於西成點解叫西成...我都廢事解釋，呢個唔係重點。

「你都痴撚線。我先唔會媾兄弟個女神。」我一講呢句，西成即刻攬住我。「果然係好兄弟。」

「話時話，你今日又會咁早返黎嘅。」我問西成，因為佢平時好晏先返，三日唔埋兩日就遲到果啲人黎。

「我決定左架喇。我決定今日搵阿敏表白！」西成好有自信咁講，我就反而嚇到呆撚左。

「吓？做乜咁突然？你今日咩事？發燒？」我摸一摸西成個額頭，點知比佢一野推開左。

「你就發燒！琴日我睇左一套劇，講一個男仔後悔冇喺同女神相處時表白，結果女神結婚，新郎唔係佢，呢個故事真係好慘。」西成拍拍心口，「呢啲咁嘅悲劇我先唔想發生喺我身上。我要表白！我知道阿敏差唔多呢個時候就會返學，我要同佢表白！就今日！」西成講到興致勃勃咁，我都唔好意思打斷佢。

「唯有幫你加油啦，兄弟。」我拍一拍佢膊頭，「話時話，你睇咩劇？」「屌，求婚大作戰囉，好好睇架！只不過你又唔鐘意睇劇，算啦。」西成一路望住校門，一路同我講。

「又係呢套野....」我心諗。點解我呢幾日都比呢套劇圍繞住？

「黎喇黎喇！我去喇兄弟！」阿敏喺遠處一個人咁行緊返學。西成一見到咁樣，即刻喺褲袋拎左粒金莎出黎，跑去校門。

「係喎今日係情人節喎...good luck喇巴打。」我企喺canteen望住事情嘅發展。

西成跑去阿敏嘅面前，講左一陣，就將粒金莎擺喺阿敏嘅面前。

「咕嚕。」喺遠處睇嘅我唔知點解有啲緊張。心入面甚至無端端有一個念頭：

「阿敏唔好收粒朱古力。」

我都唔知點解。

我都解釋唔到。

之不過，好快我就握緊拳頭，喺遠處幫西成打氣。「加油啦..西成。」希望精神上支持到西成。

可惜嘅係，冇錯，只係見阿敏佢尷尬咁搖一搖頭，就行過左西成。我只係見到遠處急步行返學既阿敏，同埋呆左嘅西成。

大概傻嘅都知咩事，我見到西成慢慢咁行返黎canteen，坐左喺長椅度，成個人無哂神。

「屌，小事姐..」我嘗試用輕鬆啲嘅手法安慰西成。

「小？小你老母呀！」點知西成突然發癲，捉住左我隻手臂，「我鐘意左阿敏三年喇，估唔到佢居然拒絕左我....屌..！點解？點解？」西成抱住自己個頭，跪左喺長椅度。「你連計都未同人傾過，我係阿敏都拒絕你啦。」呢句當然只係我心入面嘅諗法，冇講出黎。我只係拍一拍西成嘅膊頭，以示安慰。

加油

多謝支持,一陣有文

陪西成坐左一陣嘅我行返上課室，由西成自己一個坐係canteen冷靜下，一開門就見到阿敏。

「喂..早晨。」我笑住同阿敏打招呼，表情有啲僵硬。

「早晨？識左你咁耐都唔講早晨嘅，無端端今日講，神神化化咁。」阿敏望一望我，就行左出走廊。

突然，我望到西成喺樓梯口上緊黎。隻眼仲有啲淚光。

「咁大整蠱？」我即刻拉住阿敏隻手，拉返佢入課室。

「你做咩呀？」阿敏好奇怪咁望住我，但係冇鬆開隻手。

「ehh...你早幾日咪畫左個琴譜喺我張枱嘅？」我求其搵啲野講，阿敏點點頭。「我琴晚search左，果首

歌係咩求婚大作戰嘅主題曲丫嘛。」

「吓？你知道喇？有冇睇套劇？」阿敏好驚訝咁問。

「ehh...未有時間。遲下睇。」我求其鳩up幾句，突然望到西成行過我地班房，比佢見到我同阿敏吹緊水

。佢個表情由好sad變到好驚訝咁望住我。

「？」覺得奇怪嘅我，順住佢望緊嘅方向，望一望下面。

仆街！我捉實左阿敏隻手！

「喂！件事唔係咁..」我鬆開阿敏隻手，衝出班房，但係西成已經跑走左，落左樓梯。
「今次水洗都唔清..屌！」我拍落張枱度，再望住唔知發生乜事嘅阿敏。

基本上成個上午，我都冇心機上堂，慧望到我好似好困擾咁，都冇聊我講野，終於，午息嘅鐘聲響起。

我決定搵西成，講清楚。

「有冇再假啲呀！屌你老母！」西成一見到我即刻衝過黎，扯住我件衫。

「屌。成件事唔係咁，但係我依家解釋你都未必信啦。」我嘗試拉開佢隻手，但係佢捉到我實一實。

「信？我就係錯在信你呀！呢頭話唔媾兄弟條女，呢頭拖人隻手？我比人拒絕果陣你實覺得好爽啦！」

「成件事搞撚錯哂啦....」我係咁掙扎，佢反而捉得更實。

「你要媾佢，FINE！你可以同我講，你係我兄弟我一定讓你，但係點解你要做埋哂啲小動作呀？吓？」

西成咆哮，嘈到隔離班啲人都出埋黎食花生。

「屌！都話唔撚係咁！」我終於頂唔順，一野推開左佢。「我依家解釋呀，事實係今朝我見你咁灰，咪

諗住返課室先，等你冷靜下，點知你咁快返上黎，咁岩得咁橋阿敏佢行緊出班房，如果我唔拉住佢你地

就撞到正一正呀，我係廢時你地兩個見到尷尬咋，屌！」我拉返正衫領，「之不過依家你火遮眼，我講

乜你都聽唔入耳架啦。」

西成聽完之後，沉默左一陣就行出左班房。班花生友都一哄而散。

「咪住先..」我好似醒起啲野。

我行出Ｂ班，果然見到慧同阿敏企左喺出面。

終於有真人真事(?)故睇

今日係我第一次同媽媽以外嘅女性食晏。仲要係兩個。

慧同阿敏就坐左喺我對面。

「究竟發生咩事？你地可唔可以由頭講過件事？」慧有少少激動咁問。

「...好小事。」我扮哂冇事咁，其實成個人都覺得好煩惱。

「唔好再扮野啦！講啦。」慧望一望我，再望一望阿敏。

「其實你聽到嘅，咪就係成件事囉。」我回答。

「姐係..」

「其實西成佢一直都鐘意阿敏，只不過佢之前又怕醜唔敢搵阿敏，終於今日一朝早佢就去搵左阿敏表白..咁佢衰左，咪諗住比佢靜下囉，點知後尾會搞咁大個誤會。至於詳情..我諗你地都聽到哂。」我望一望出面，個天陰陰地，好似有啲想落雨。

「唉。真係煩。」慧望一望阿敏，阿敏好似有好多野講，但係唔講咁。

「我仲煩啦。依家我兄弟誤會左我呀。」

「誤會咩？誤會你鐘意阿敏？」慧突然一句撻落黎。

搞到我一時唔知點答。

「唉。我都唔知。唯有等佢依家冷靜下。」我望一望出面，個天果然落起毛毛雨。

我地三個靜左好耐。

「喂，你地跟我黎一個地方。」突然，慧拉住我地兩個，行左上一樓。

慧打開左音樂室度門，坐左喺鋼琴椅上面。

我同阿敏唯有搵個拉坐低。



https://youtube.com/watch?v=RBlcZMSdU3g


「做咩突然之間..」我正想問點解慧要彈鋼琴，仲要係彈果首歌嘅時侯，阿敏擺隻食指喺佢嘴唇前，示意叫我安靜。

「....」

「....」

「....」

成個音樂室都比鋼琴聲圍繞住，好舒服。

我閉上雙眼，靜靜咁聽呢首歌。

「....」

「....」

「....」

我個心好似靜左落黎，冇咁煩躁。

突然之間，慧開始開口唱歌。唱嘅，當然就係呢首歌。

「熱い涙や恋の叫びも 輝ける日は何処へ消えたの
（就算流著熾熱的眼淚地呼喊愛情　 閃光的歲月也在某處消失了）

明日も宛なき道を彷徨うなら これ以上元には戻れない
（就算對明天的路感到徬徨的話　 那樣也無法回到原來的樣子）

耳を澄ませば心の声は 僕に何を語りかけるだろう
（用耳朵仔細聆聽心裡的聲音　 會向我敘說什麼？）

今は汚れた街の片隅にいて あの頃の空を思うたびに
（現在在這骯髒的街道角落裡　 總會回想起那個時候的天空）

神より給えし孤独やTrouble 泣きたいときは泣きなよ
（上天給你的孤獨跟Trouble　 想哭的時候就哭吧）

これが運命でしょうか 諦めようか 季節は巡る 魔法のように...
（這就是命運嗎？　 要放棄嗎？ 季節的運轉就像是魔法一般）...」
.
.
.
(中文翻譯由上網參考外加自己翻譯)
.
.
.

雖然我聽唔明日文，但係我感覺到慧當時唱歌時候嘅感情。帶點無奈，帶點寂寞。

「唱得幾好呀。」我由心入面讚慧，因為真係好好聽。

「多謝。」慧笑左一笑。「其實，我大個果陣，希望可以做歌手。」慧好似有啲怕醜咁，摸一摸部鋼琴， 「最好，可以搞返一個自己做主音嘅樂隊。」慧邊講邊笑，笑到成個細路女咁。

「哈。如果你夢想成真，記得預埋我。你知我對音樂幾有天份架啦。」我笑住回應佢，但係唔知點解我好似有啲唔敢正視慧。

「好呀。你第時就做結他手啦。結他手有型呀，識女仔好易。」慧講笑咁講，好似講到有啲忘形。「但係唔好唔記得阿敏呀，佢鐘意左你好耐架啦。」

「....」

「....」

「....」

成個音樂室死寂一片。

有故要追了

加油