我真係想像唔到。

小學三年班，果陣阿敏就坐我隔離。

就算之後有好多次嘅調位，唔知點解，我既附近總係有阿敏嘅身影，可能呢個係上天嘅安排。

細細個男仔女仔冇咩顧慮，我地成日玩得好埋，好多人細鬼大嘅同學都話我地拍拖。

但係我地從來都唔會介意，因為我地知道呢個唔係事實。

果陣時阿敏好百厭，恃住果時生得高過同輩，成日都會整蠱同學，又會改人地花名，好多同學都怕左佢，怕比佢蝦，比佢鬧。

得我一個係成日同佢玩。雖然佢都有整蠱我。但係我唔介意。因為，我知道阿敏係我嘅好朋友。

一直都係，甚至我以為呢段好友嘅關係持續永遠。

隨著我地慢慢長大，關係的確冇細個果時咁好，但係佢由始至終都佔好大嘅一席位。記得小學六年班，中學分派結果，我第一個望嘅唔係自己嘅結果，而係阿敏。當我知道左我同阿敏係同一間中學時，我地兩個都好開心，開心嘅原因，係因為我從小學三年班就識嘅好朋友會繼續陪住我。

雖然我地中學唔同班，但係我地都成日會搵對方，中學之後嘅佢再冇咁百厭，加上佢性格不嬲幾好，好快識到好多女仔朋友，而我係佢唯一嘅男性朋友。即使中學期間又有傳聞話我地拍拖，我都係一笑置之。依家諗返起，聽到傳聞果一刻嘅阿敏，笑容有啲腼腆。當時我冇諗咁多。

知道真相嘅瞬間，我真係好詫異。好難想像到。

但係都只有呢個答案，一切嘅野先可以串成一條直線。

佢喺我嘅枱上面寫琴譜，而果個琴譜嘅歌，係求婚大作戰嘅主題曲，而呢套劇，講嘅內容大綱係：

「一個青梅竹馬嘅愛情故事。」

唔怪得之當時慧喺MSN發我脾氣，一切都係因為我太遲鈍。

「....」

但係。

有時。真係。

好難面對。

寧願佢地話講笑，都好過遇上呢啲情況。

「鐘意自己嘅好朋友」呢樣野，有時係一個tough choice。

我用左成日嘅時間，睇哂成套求婚大作戰。

一個唔鐘意睇劇嘅人，用哂一日所有時間黎睇劇。

返到屋企，就即刻打開電腦，搵果套劇黎睇。

依家係凌晨四點。我從來未試過咁夜都未瞓。

根本瞓唔著。

基本上睇完套劇，我係冇乜感覺嘅。

原因好簡單，當劇入面發生嘅事，套入你嘅現實世界嘅時候，就會覺得劇情好兒戲。

兒戲到好難令人相信。

慧講完果句野之後，當時我只係傻笑咁講左一聲「咪玩啦」，就離開左音樂室，完全冇望到阿敏係咩表

情。

即使之後嘅化學堂，我係咁撩慧傾計，佢都完全唔理我咁。佢好似完全唔想面對我咁。

我望住遠處嘅阿敏，好明顯咁見到佢心神恍惚，冇意欲上堂。

放學鐘聲響起，阿敏第一時間離開班房，中三以黎第一次唔係同慧放學。

之後我就見到慧飛奔出去，想攔住阿敏。

我只係成個人坐喺度。

其實最唔想面對現實嘅，係我自己。

我攤上床，模模糊糊咁瞓著左。

「叮、噹、叮、噹」

我著住一件白西裝，繞住隔離著婚紗嘅女仔隻手。

個女仔係阿敏。

我望一望周圍，四周綠草如茵，前面有一座大教堂。小朋友不斷喺我前面嘅路上灑花瓣。

我笑住咁望住阿敏，阿敏都甜絲絲咁望住我，我地兩個繞手行入教堂。

宣讀誓言之後，我慢慢貼近阿敏塊臉，佢亦都慢慢貼近我塊臉。

我地嘅嘴唇互相貼住，我閉上眼睛，感受接吻嘅感覺。

突然，一道光線射入我嘅雙眼。

冇錯，一切都只係一個夢。

「究竟我諗緊啲咩？」我我自己都唔清楚我真實嘅感覺。

我望一望個鬧鐘，６：５０ＡＭ。

連續三日都咁早起身，我自己都解釋唔到。

我換上校服準備返學。

今日係二月十五日。天氣有啲凍。陰天。

早晨嘅校園好冷清，比起前果兩日冷清。

我都唔知點解，望住空無一人嘅canteen，我連坐嘅意欲都冇。

我行上樓梯，打開音樂室嘅門，坐喺鋼琴椅上，打開左琴蓋。

自少對音樂冇興趣嘅我，望住黑白相間嘅琴鍵喺度發呆。

就係呢個地方，搞到我咁煩惱。

我望一望音樂器材室，關左琴蓋，行左入去。

我拎起左枝木結他。

我搵個位坐低，笨拙咁擺個結他喺大腿上，開始亂咁掃。

掃嘅過程中，我慢慢記得每個位置係咩音。

我嘗試掃琴日慧果首歌，結果當然差好遠。

但至少我感覺到方向。

我望一望個鐘，七點四十分。

「係時候上班房。」我擺低支結他，離開音樂室。

「聽日再黎見你。」我關上音樂室嘅門

如果支持既,唔該LIKE OR 推 THANKS

推

今日阿敏冇返。其實我都估到。

奇怪嘅係，慧都冇返。

百無聊賴嘅我戇居居咁坐左半日。

午息時間，突然有人行入班房搵我。

係西成。

「兄弟，對唔住，我知我琴日係火遮眼，唔好意思。」西成好有歉意咁同我講。

「屌，兩兄弟，呢啲小事。你冇事就好。」我拍一拍西成嘅膊頭，示意原諒。

「我諗過架喇。成件事根本最戇鳩嘅人係我。」西成行出班房，我都跟住佢出去。
「無端端話鐘意人，無端端走去同人表白，無端端誤會兄弟。」
「成件事錯嘅人，係我。Sorry。」

「咪乜都攬哂上身啦。搞到我有啲唔好意思。」我搭住西成膊頭，「琴日真係我呢世人過得最差嘅情人節。」

「搞乜？」

「屌。總之好撚煩。唔關你事...又算關你事，唉總之我都唔知想點。」我講到隱隱瞞瞞咁。

「又點？兄弟唔駛隱瞞下話，我都知我琴日火氣大，都低哂頭向你say sorry啦，比下面好喎。」

「唉。你真係想知？」

「講啦。」

「聽完唔好發火。」

「唔會。」

「阿敏佢，好似，好似咋吓....鐘意左我。」

「吓？」西成即刻彈開幾步。

「等陣先！其實我都係琴日先知，嚴格啲黎講係琴日午息。」我地兩個落左canteen，搵個位坐底。
「你冇野呀可。」我望一望西成。

「屌。係真嘅又點，阿敏都拒絕左我啦，我知自己已經收左皮，就算佢同第個一齊都唔關我事，女死女還在，下個更可愛丫嘛。」西成扮哂冇野咁，其實佢啲戲好屎。「何況佢同我兄弟一齊，好過同第二個一齊啦，你對人好啲添呀！」西成拍一拍我膊頭，「只不過，你有冇可能會錯意？」

「老老實實，我寧願件事係假。」我托起個頭，「慧琴日無端端爆響口，阿敏果時都喺度。成件事尷尬到我即刻走。」

「咁..點解你唔接受阿敏？」西成好似有啲嬲。

「好難接受...。我識左佢咁耐，連少少非份之想都冇。由細到大都同當佢朋友，無其他。」我嘆左一口氣。

「你唔鐘意阿敏咩？」

「.....」

「做咩又唔答我？」

「..鐘意。但唔係戀人上嘅鐘意，我一直當佢係朋友，之前係，以後都係。」我摸一摸心口，我個心口好似好平靜。

「...你講大話。」西成睥實我。
「識你咁耐，點會唔知你講大話係點。」

「我講大話？」我感覺到我心跳率快左。

「你岩岩啲說話，唔係來自你內心，...我睇得出。」西成個眼神好肯定。「呢度得我地兩個，點解你唔肯講真話？你仲當唔當我兄弟？」西成睥到我更實。

唔係來自我內心？咁我內心諗緊乜？

回想起由細到大，我同阿敏一齊嘅片段。回想起小學嘅阿敏，中學嘅阿敏，依家嘅阿敏，夢中嘅阿敏。

..往往夢係顯示出自己真實希望嘅地方。..

..有時好多人面對唔識抉擇嘅時候，會欺騙自己，連自己都唔知。..

腦海突然走出呢兩句句子。

我個心跳得好快。

我諗起夢入面阿敏甜絲絲咁望住我，我諗起我同佢接吻嘅一刻。

..我鐘意阿敏..

唔通呢個先係我真正嘅諗法？

我一聲唔出咁跑左出canteen。

希望有多d人留言

唔錯

識左阿敏咁耐，我當然知佢住喺邊。佢同我住得好近，有時返學撞到都會一齊返。

我跑左去佢屋企樓下，正想打比阿敏嘅時侯。我望到慧同阿敏坐左喺樓下嘅公園。

我深呼吸一口氣，慢慢行近佢地。

「阿頌？你點會喺度？你走左堂？」慧好驚訝咁望住我，阿敏都抬起頭望住我。我望到佢雙眼有啲淚光。

「唔好理呢啲野啦。」一時之間，我唔知點開口，明明我已經諗好哂講咩。

「其實你黎得都幾岩時候，岩岩我地講起你。」慧。

「講起我？做咩？」

「講起你條傻仔以為阿敏真係鐘意你。」慧。

「吓！？」我差啲成個人彈起。

「我琴日亂up下，點知你又真係信。你又比我整蠱啦。」慧奸笑咁望住我。

「咁..琴日阿敏做咩唔出聲？」

「琴日，ehh，阿敏佢唔舒服丫嘛，午息之後。」慧，「咁唔舒服梗係即刻返屋企啦，點知病到今日都未好，我今日咪陪佢睇醫生囉，點知條傻女出門口冇帶鎖匙，佢爸爸媽媽又返哂工，咪唯有坐喺度囉。」

「.......」呢一刻我真係無言以對。

一切都係我會錯意？我又比佢地整蠱左？

我望一望阿敏，佢雖然dup低個頭唔出聲，但好似有啲笑容。

好似喺度偷笑。

屌。呢一刻，我真係柒到無地自容。我好想即刻走。

「等我仲咁擔心..車。」我扮哂冇野咁，其實個心好痛。「阿敏好似喊過黎喎，冇事丫嘛？」

「病左好辛苦架，仲要喺度吹風。人地女仔黎架，辛苦起上黎就梗係想喊啦。」慧，「不如你幫手諗下有咩地方可以比阿敏抖下啦。」

「我屋企囉。橫掂我屋企冇人。」我好似有啲眼濕。

「一於咁話，去你屋企啦。」慧拖住阿敏。

一路行去我屋企嘅路程上面，我都冇出過聲。

「我真係傻。」我心諗。

等我之前仲以為阿敏唔鐘意我比較好，到依家我發現我鐘意阿敏嘅時候，原來一切都係誤會。

我一直都呃緊自己。哈。

我流左一滴眼淚，我好快咁抹左佢，當然冇比佢地兩個見到。

上到我屋企，慧扶左阿敏去梳化，比左幾件褸阿敏蓋住。

「估唔到你屋企都幾整齊下。」慧喺我屋企周圍行。

「我阿媽執嘅，」我望一望閉左眼嘅阿敏。「話時話，你點解成日玩我？」

「吓，你好玩囉。你又玩得，唔玩你玩邊個？」慧企喺我書枱前面研究我保存落黎嘅cd。「有聽Linkin Park,X-Japan,The Beatles,Mr. Children...你鐘意聽band架？」

「吓，係呀。」我比左張電腦椅慧坐，自己搵張木椅坐低。「齋聽，冇話特別有研究咁囉。」

「冇話想夾band？」慧問我，「你冇諗過？」

「有呀。但冇心機，怕自己半途而廢。」我講出心入面嘅諗法。「老老實實，我對音樂真係唔係好掂。」

「唔係丫，你唔似啲半途而廢嘅人。」慧，「咁如果你真係夾band嘅，你會做咩位？」

「應該係結他手...雖然我依家唔識彈結他。」我望住牆上收藏嘅海報。

「吓？點解嘅？唔係真係為左媾女呀。」慧笑左一笑。

「我先冇咁膚淺，我個人覺得，樂隊嘅每一個位置都好重要，但係我特別鐘意結他手呢個位置，」我拎左個杯去斟水，「主唱係一隊嘅靈魂，絕對唔可以冇左佢；鼓手控制住樂曲嘅節奏，當演奏激情嘅歌嘅時候，鼓手帶領歌曲速度，力度同節奏感。演奏柔情嘅歌嘅時候，要控制氣氛。」我拎左杯水比慧。「至於貝斯手，好多時侯充當住support嘅角色，用低音幫助歌曲嘅推進。」我飲左一啖水，「鋼琴手，無論係咩類型嘅歌都可以融入去，可以話係萬能。」「吉他手，可以彈出千變萬化嘅樂曲，幾乎每首歌都有結他嘅聲音，結他手絕對係帶領樂曲嘅主要人物。」
「...我想做一個帶領者嘅角色。」

「....」

我望一望慧，發覺佢一直望住我，望到眼都唔眨。

「做咩眼甘甘望住我。」我有啲怕醜咁擰開塊臉。

「估唔到你對BAND又幾有研究喎。」慧飲左啖水，「真係人不可以貌相。」

「咁你呢？」

「嗯？」慧。

「你又點解想做主音？」

「好簡單姐，因為我鐘意唱歌囉。」

「咁唔做solo歌手？」

「鐘意band sound囉。」慧笑左笑，「或者照你咁講，想做樂隊嘅靈魂囉。」

「既然我地都鐘意BAND，不如一齊夾BAND？」

「梗係好。但我地都要搵多三個人，做鼓手，貝斯手，同鋼琴手」慧望一望窗外，「你有冇咩人選？」

「人選係有一個嘅...係唔知佢肯唔肯。」我拎起部電話。

「鈴鈴鈴！」

電話響起，唔係我，都唔係慧。

係阿敏。

阿敏爬起身，拎起電話黎聽。

「喂媽咪？」
「係呀出左去睇醫生。」
「嗯。依家返喇，岩岩唔記得帶鎖匙，去左同學屋企。」
「好喇掰掰。」

阿敏擺返電話入衫袋，「Michelle我地走喇。」

「好啦，我送你返屋企啦。阿頌一齊啦。」慧。

「唔啦。」我根本唔多想在面對阿敏。

「唉真係懶，青梅竹馬朋友病左都唔照顧下。」慧比說話我聽。

「費事啦，唉，唔好意思啦。」

「算喇算喇，阿敏我地走啦。」慧扶起阿敏。

「話時話，」阿敏望住我，「如果你地真係夾BAND嘅話，你地要加油呀，哈哈。」

原來阿敏一直都冇瞓，聽哂我地嘅對話。

「好啦掰掰。」阿敏同我揮手道別，慧亦都揮一揮手，「你快啲學結他啦。」講完就走左。

「梗係，依家我就去研究。掰掰。」

佢地走左之後，我即刻打左個電話比我心入面嘅人選。

「嘟嘟。嘟嘟。」

「喂？」

「喂傑仔？有冇興趣夾BAND？」

留名支持

果一晚，我用左成晚時間去搵BAND嘅資料，同埋啲結他嘅基本技巧。

我望一望個日曆，今日係星期四。

「就星期六去買支結他練下啦。」我立定決心要練結他，夾BAND。

Dododo！

我MSN響起，係傑仔。

「喂，你岩岩咪問我夾唔夾BAND嘅，其實我都OK。」

「真係？咁預埋你架喇喎。」

「但係你知啦，我地中三架喇，下年就揀科，又呢又路，好忙架，有冇時間練架。」
「何況，我地都未搵齊人，不如中四先搞都未遲啦。」

之前我只係輕輕提過傑仔，其實傑仔成績幾好，一直都係我地班頭十名內，又識彈鋼琴，係衰在生得矮。但老老實實，佢彈鋼琴果陣真係幾charm。

「咁冇計啦。可能中四先搞係仲好嘅。」我講就咁講，但其實好想即刻夾BAND，但做人唔可以咁自私，要遷就下人。「但係，你今個星期六得唔得閒？一齊同我出去買結他？」

「吓，我星期六要補習喎。」

「咁算啦。」

「聽日問下西成先。」我冇耐就熄左電腦沖涼瞓教。

今日係星期五，但係我七點正已經返到學校。

我一返到去就即刻行上音樂室，拎起支結他開始彈。

我喺書包拎左一份我琴晚print嘅結他譜，逐粒逐粒音咁彈出黎。至於果首係咩歌，相信我都唔使講。

練下練下，慢慢到左七點九，我就執返好啲野，上返課室。

一返到去就已經見到慧坐左喺位，但係阿敏今日都係冇返。

「喂慧，」我坐返埋自己位，「阿敏今日又唔返？」

「係呀佢仲未病好。」慧擰轉個頭，「話時話，你話有個鋼琴手人選，係邊個？」

「我正想同你講呢件事。我原本搵左傑仔，但係佢話中四先同我地夾，咁你點睇？」

「傑仔呀..佢彈鋼琴係幾叻嘅，好似仲攞過獎。」慧托一托個頭，「其實又真係唔急嘅，如果中四先搞，應該都未遲嘅。你咪順便練下結他囉，你唔係岩岩先開始學咋咩。」

「係呀，老老實實連結他都未有。」我拎左書包份譜出黎，「係今日一朝早去音樂室自學左一陣。你睇。」

「明日晴喎。你好鐘意呢首歌？」慧笑左一笑，指一指我枱上面嘅琴譜。「呢首歌嘅鋼琴版我可能教到你，結他版就唔識喇。哈哈。」

「我聽日仲要出去買結他。」我收返埋份結他譜，「話時話，你有冇識人係教結他架，有人教進度應該快好多。」

「我識唔識教結他嘅人呀...」慧諗左一諗，「好似...冇，哈。」

「咁唯有我出去搵人教，大前題係我聽日去買結他先。」

「使唔使我陪你？」

「吓？」

「幫下眼嘛。還掂我聽日都冇野做。」

「..其實我冇所謂嘅，反正我都冇人陪，哈。」

「一於咁話啦，聽日十二點，旺角地鐵站等啦。」慧拎左張紙，寫低佢嘅電話號碼，「呢個我電話，聽日我地電聯啦。」

「..OK。」我望到班主任入緊黎。

「林sir黎喇唔傾住。」慧擰翻轉頭。

「李頌希，同我出黎。」林sir一見到我就叫我出去。

「你琴日做咩走堂？去左邊？」林sir盤問我，我先醒起我琴日走左堂。

「吓，返屋企瞓教囉，唔記得通知學校姐。」我求其吹水，雖然我真係返左屋企。

「咪咁多籍口，你今日放學同聽日同我留低喺學校反省！」林sir拍落張枱度。

「聽日？聽日星期六喎！」我以為自己聽錯。

「係呀，還掂聽日九至十二我都要幫高form補課，你返黎，我幫你做德育培訓！」林sir睇落唔似講笑。

「咪玩啦阿sir，聽日有野做呀。」

「我夠有啦，我咪照幫你做德育培訓。我陣間就通知你家長，鬼叫你走堂咩，你等比訓導跟進啦。」

「你姐係玩鳩我姐。」我心諗，我唔敢講出黎，廢事又揹多一單野。

「坐返埋位上堂啦。」林sir示意我坐返埋位。

「你聽到架啦，聽日買唔到結他喇。」我同慧講。

「咁冇計啦，黎緊我好多日都唔得閒，得聽日得閒。」慧望一望我，「聽日買唔到咁唯有搵第個陪你啦咁。」

「..............................」

一定要想辦法先得。

追番灑啦
好文!!

我諗左成個上午，我都諗唔到方法。

直接走數？一定大把手尾跟。

扮病唔去？佢打去我屋企咪死。

唉。睇黎聽日點都走唔甩。

雖然我都諗唔明點解我咁想慧陪我去買結他。

依家午息，唯有落去食野先。

「喂西成，出去食野啦。」我行入Ｂ班，搵西成食晏。

「喂阿頌，你琴日走左去邊？」西成同我一齊行出班房。

「唉唔想提。」我嘆左口氣。

「做咩？」

「我去左搵阿敏，點知，原來我真係表錯情。」

「吓？姐係點？」

「琴日我跑去搵阿敏，點知慧都喺度，慧話佢整蠱緊我。唉，今次真係做左真心膠。」

「仲以為阿敏真係鐘意你添。咁我有機會喇。」

「吓！？」

「我諗過喇，雖然之前我表白失敗，但係我係唔會咁易放棄架！」西成握緊拳頭，「之前失敗，可能因為我地大家瞭解得唔夠清楚，如果我之後同佢相處多啲，應該可以喺埋一齊。如果阿頌你真係同阿敏一齊嘅話，我就放棄，但係，睇依家咁樣嘅情況...我唔想咁易就放棄。」

「.....」我無言以對。「話時話，你之後得唔得閒？」

「做咩？」

「遲下陪我去買結他。」

「結他？你想學結他？」

「係呀。你邊日得閒？」

「基本上除左聽日，日日都得。」

「聽日你做咩？」

「籃球隊練波呀。十二至五，諗起都攰。」

我醒起一啲野。

「係喎，林sir，我地班主任，係咪籃球隊教練？」

「唔算係，佢只係算係替補，佢帶開c-grade，聽日b-grade練習。」

「b-grade負責老師係邊個？」

「楊sir囉。」

「咁如果楊sir冇返，...係咪林sir代？」

「應該係。」

「ok..」

我有計劃喇。

「唔該搵楊sir。」我敲一敲教員室度門。

「咩事？」楊sir行左出黎。「咦？阿頌？」

「楊仔，你聽日幫下手得唔得。」我指嘅楊仔，當然就係楊sir。至於點解我叫佢楊仔，原因係因為佢係我阿爸嘅朋友，由我細細個就已經照顧我。咁我自細就叫佢楊仔，叫到佢依家，even佢依家係我阿sir。
當然，呢個稱謂係私底下先嗌。我地呢個關係，我從來冇講過比人知。

「做咩事？你有野唔識？」

「唔係，」我拉埋楊仔一邊，廢事人地聽到我地講嘅野。「我係想你聽日請假。唔該你！」

「點解？」楊仔覺得好詫異，「我雖然應承左你老豆話喺學校照顧你，但唔係咩都幫。」
「何況，冇合適理由我係唔會請假。」

「你聽日籃球隊練波咋嘛..當我求下你。」

「咁你答左我先，點解要我請假？」

「聽日係..我表姐結婚！我要去佢婚禮。」我求其吹水。

「咁其實你聽日唔係放假嘅咩？咁關要我請假咩事。」

「姐係呢，林sir聽日話要留我喺度做啲咩德育培訓。如果我去左，聽日就去唔到表姐個婚禮架喇。但係呢，如果你請假，林sir就要代你做b-grade嘅教練，咁我咪唔使去囉。」

「...」楊仔好似考慮緊。

「婚禮呢啲野一生人一次，我同表姐感情又好好，我真係好想去佢婚禮呀。幫下手啦好嘛？」

「好啦。我幫你同林sir講下。睇下佢可唔可以代我。謹此一次架咋！」楊仔應承左我。

「唔該哂楊sir！」

「話時話，點解林sir要幫你做德育培訓？」

「ehh。早幾日默書出貓囉。」

「你條友！好心你比心機啲讀書啦！出貓好缺德架！...」楊仔訓示左我一輪，但我完全冇上心。

返到屋企之後，我即刻用msn搵慧。

「喂慧，我聽日得閒喇。」

「你唔使比林sir留低？」

「佢聽日要代楊sir練b-grade，所以我唔使返去。咁你聽日係咪陪我買結他？」

「ok呀。咁聽日見啦，掰掰。」

「掰掰。」

OFF左MSN之後，我反而喺度諗。

我究竟喺度做緊啲咩？

點解我咁期待同慧出街？

我唔係鐘意阿敏嘅咩？

我又開始唔明自己諗緊啲咩。

放左學之後，林sir留低左我，而佢比左一大堆電腦科嘅野我做。

「又話德育培訓嘅喂。」我望住一疊功課，頭都暈埋。

「你走左堂，咪用返時間去補做返啲野囉！咪講咁多，快啲做。」林sir托一托眼鏡，「話時話，你聽日唔使返。」

「吓？真係架？」我扮哂驚訝。

「楊sir岩岩同我講佢聽日要請假，咁唯有我代佢練b-grade。但係，你咪諗住走得甩，你星期一放學留低。」

「ok..」我扮sad，其實心入面好開心。

返到屋企之後，我即刻用msn搵慧。

「喂慧，我聽日得閒喇。」

「你唔使比林sir留低？」

「佢聽日要代楊sir練b-grade，所以我唔使返去。咁你聽日係咪陪我買結他？」

「ok呀。咁聽日見啦，掰掰。」

「掰掰。」

OFF左MSN之後，我反而喺度諗。

我究竟喺度做緊啲咩？

點解我咁期待同慧出街？

我唔係鐘意阿敏嘅咩？

我又開始唔明自己諗緊啲咩。

SORRY手殘COPY錯
#46可以唔使理,次序錯左

星期六嘅朝早，風和日麗。

十二點正。

「Hello。」我望一望眼前嘅慧，簡直係眼前一亮。

慧著住件白色嘅連身裙，褸住一件紅色嘅短袖外套，下身著左條黑色嘅緊身長褲，加對粉紅色嘅波鞋。
佢放左佢長及肩嘅頭髮，化左淡淡嘅妝。

「好可愛。」呢個係我心入面嘅諗法。

「你諗住去邊度買？」我問慧。

「跟我黎啦，呢頭有間樂器鋪啲野平靚正。」慧邊行邊講。

我地行左一陣，就見到一間小商場。

「入黎啦，間野喺入面。」慧。

「叮叮」

去到商場二樓嘅轉角，我地行入左一間樂器鋪。入面雖然唔大，但係都有幾多樂器，而木結他就佔最多。

「話時話，你想買電定木？」慧問我。

「木啦。我鐘意玩木結他多啲。」我拎起一把木結他，求其掃左幾下。

「客人識貨喎，呢支結他上個月先喺日本運過黎，靚野黎架，聽下啲音色，幾清脆。」老闆同我搭嗲，可能因為我同慧係呢間鋪唯一嘅客人。

我望一望個價錢牌，成$2200，嚇到我即刻擺返好。

「ehh。老細，我係初學者黎嘅，唔知有冇啲有平又岩新手玩嘅木結他呢？」我決定問老細意見。

「嗱，呢枝啦，呢枝美國野，價錢平民化，音色都還可以，幾岩新手玩。」老細拎左一枝啡黑色嘅木結他出黎比我睇，「彈啲簡單嘅譜其實呢枝真係幾好，」老細行近，喺我耳邊細細聲講，「用黎冧女朋友一流呀！」

我望一望喺度望緊鋼琴嘅慧，笑左一笑就話「好啦就呢枝啦。」，跟住就拎左五百蚊出黎。

「多謝幫襯！祝你早日練成結他，彈比女朋友仔聽～」老細笑笑口咁望住我同慧。

「慧，買完啦。」我拍一拍慧嘅膊頭。

「哦係呀。咁不如去食野啦，我仲未食晏呀。」慧講完就行左出鋪頭。

「我地依家算唔算約會緊？」我無端端起左呢個念頭。

「諗咁多做乜。」我細細聲講左句就跟住慧去食晏。