文呢

1775年6月巴黎 路易大帝高中
新加冕既法國國王路易十六從加冕地蘭斯返回巴黎途徑我既母校
作為全校拉丁文成績最優秀既我代表全校向國王獻辭
呢日大雨滂沱可能咁令國王有所延誤 我地全校師生從朝早開始一直係學校大門等待國王大駕
到黃昏國王既車隊先珊珊來遲 我代表學校上前準備朗讀獻辭 然後係馬車入面傳黎一把女人聲
伊~老公啊~出面咁大雨我地快D返屋企啦
然後國王既車隊留低全校師生係大雨中目送佢地繼續返回凡爾賽

VIVE LE ROI
又係既 佢係國王 呢D好小事姐
呢年我17歲

其實故事早係1729年已經開始
當時熱那亞共和國治下既科西嘉島發生抗稅暴動 最終係1755年脫離熱那亞獨立建立科西嘉共和國
因為熱那亞無力鎮壓佢就將科西嘉賣比法國 1769年法國吞併科西嘉島
呢年科西嘉有個獨立派既貴族生左佢第四個仔 係叢林入面遊擊既生活令到佢個細仔營養不良肚煲生癬日r夜r
個老豆唔想再令家人受苦 因為咁佢背叛自己既戰友走出叢林投向法國成為法國既貴族從此過上唔錯既生活
而佢個營養不良肚煲生癬既仔後來亦得以入讀法國既軍事學校
不過呢D都係D唔關事既野

係18世紀俄羅斯普魯士兩國相繼掘起結束左法國奧地利兩國自義大利戰爭以黎長期敵對狀態
1763年七年戰爭結束後法奧兩國王室為加深雙方關係開始商談一樁婚事
法國國王路易十五繼承左佢太爺路易十四長命既基因 到1766年佢所有仔都死晒剩低佢最大既嫡孫12歲既路易-奧古斯特
而奧地利女大公瑪麗亞·特蕾西亞岩岩好又有個女仲未嫁出去就係11歲既瑪麗·安托瓦內特
到1770年兩人成婚

青年路易-奧古斯特 青年瑪麗·安托瓦內特

瑪麗·安托瓦內特離開維也納前瑪麗亞·特蕾西亞同佢告別
再見啦乖女 你要成為法國人眼中既天使啊
但當呢隻天使去到法國時 迎接佢既氣氛同佢既姿態毫不相秤
出現了...敵國既女人!!我地竟然淪落到要同呢D人結婚!?
二百幾年既國仇家恨...!!
瑪麗·安托瓦內特係法國當權者既圈中佢絕不受歡迎 即使係佢老公同佢亦唔算親密
凡爾賽宮廷中貴族間既玩樂就成為左佢生活中唯一既內容
而係呢到佢識左個12歲既細路 路易-奧古斯特最細既細佬阿圖瓦伯爵查理·腓力
呢個12歲既細路查理·腓力就成為左15歲既寂寞人妻瑪麗·安托瓦內特係凡爾賽宮中唯一既玩伴
呢段時間入面年青既查理·腓力內心中都起左少少變化...

青年阿圖瓦伯爵查理·腓力

路易十五個太子既二仔普羅旺斯伯爵路易·斯坦尼斯瓦夫·塞維爾係1771年5月14日迎娶薩伏伊公主
1773年11月路易十五個太子最細既仔15歲阿圖瓦伯爵查理·腓力又同另一個薩伏伊公主結婚
就路易十五就幫佢已過身既大仔個三個仔搵晒老婆 佢可以安心隨時撤手歸西
之後就係佢三個乖孫既生殖問題
如果有日大佬路易-奧古斯特仔都未生就突然暴斃既 繼位既將會係細佢3歲既路易·斯坦尼斯瓦夫
佢生仔既時間比佢大佬少左三年 然後路易·斯坦尼斯瓦夫又仔都未生就突然暴斃
繼位既係再細佢兩歲既查理·腓力 佢生仔既機會就更加細
然後繼位既將會係順位第四既繼承人 路易十四二仔既後人奧爾良公爵路易·腓力

就咁奧爾良公爵路易·腓力就準備左一大班花柳雞去招呼阿圖瓦伯爵查理·腓力
只要比佢惹到既就冚家性病死 自己既王位繼承順序就保證升一級
路易·腓力就拍查理·腓力個膊頭啦 喂堂細佬岩岩結婚識唔識扑野啊?洗唔洗大佬介紹幾條正菜過你啊?
啊唔洗啦...我...我已經有中意既人...
吓!?你講你老婆啊!?政治婚姻既野洗唔洗咁認真啊!?
唔係...唔係...算啦...唔講啦...

奧爾良公爵路易·腓力

然後1774年8月3日路易十五病逝 路易-奧古斯特繼承佢啊爺成為法國國王路易十六
路易十六同瑪麗·安托瓦內特呢對少夫少妻結婚四年依然一無所出
但到第二年1775年8月6日佢最細既細佬阿圖瓦伯爵查理·腓力生左個仔路易·安托萬
取名路易係紀念佢啊爸 而安托萬就係安托瓦內特既男性位格...
路易·安托萬一出世法國坊間就開始傳啦 你細佬細你五年又遲你三年結婚都生得
你兩個青年男女血氣方剛日對日夜對都未生到 唔通陛下虧既...?

因呢個消息受最大打擊既唔係路易十六而係佢堂叔奧爾良公爵路易·腓力
因為而家佢既繼承順位已經跌到落第五 而路易十六亦係1778年12月19日生左個女瑪麗-特蕾絲洗清左佢性能力疑惑
睇住瑪麗·安托瓦內特懷中既BB 阿圖瓦伯爵查理·腓力不禁露出失落既苦笑
點啊?大嫂升LV做啊媽唔鄧我開心?
點會呢...家陣我個仔都多左個玩伴...
就好似我地已前咁?

左邊係瑪麗-特蕾絲

係凡爾賽宮既另一間房 遠離佢老婆同細佬緋聞既地方 國王路易十六埋首於一棟棟既財務報表
佢接手既呢個國家岩岩係七年戰爭落敗失去左北美同印度大部分既殖民地再加上十幾億里弗爾既負債
得返既只係南美同非洲幾個零落居留地 法國已唔再足以維持重商主義 更莫講話要還錢

路易十六上任後做既第一樣野就係經濟改革
1774年8月24日佢請黎重農主義既代表人物勞恩男爵安·羅伯特·雅克·杜爾哥做佢既財政大臣
重農主義認為一切既經濟活動包括重商主義既關稅都只係農業盈餘所衍生
因為當人都餵唔飽更莫講話消費 但全國既土地只用黎耕田亦係浪費
咩土地用黎種D咩農民最清楚 所以政府首先要廢除一切同生產有關既稅 只收地稅
然後再廢除埋農產品出口關稅令大量農產品流入外國令佢地依賴我地既糧食生產
咁我地就算唔靠殖民地只用本國土地都足以控制國際貿易既經濟命脈啦
杜爾哥向路易十六承諾唔破產 唔加稅 唔借錢 我都可以救到你荷包
佢兩個懷住一片雄心壯志準備放手大幹
結果杜爾哥一上任就出事啦

勞恩男爵安·羅伯特·雅克·杜爾哥

唔抽稅剩係收地稅我食咩啊!?
班貴族不滿杜爾哥既經濟政策 但杜爾哥係路易十六屬意既財政大臣
咁班貴族就走去搵阿圖瓦伯爵查理·腓力啦
老實講...我同我哥都唔算FD...不過呢單野我都受影響 如果話要搵人說服陛下既話會有更適合既人選
阿圖瓦伯爵查理·腓力就走去搵佢大嫂瑪麗·安托瓦內特
大嫂 啊哥佢最近搞緊個D經濟改革既野你知唔知?
吓?呢D男人既野我點知姐 老實講大嫂讀得書少 佢地講既野我全部都聽唔明所以我平時都只可以揍下女開下P黎過日晨
簡單D講 佢要CUT你生活費
咁太過份 我嫁入黎法國就係要成為大家既天使!!我一定會幫你地!!
就咁路易十六比瑪麗·安托瓦內特吹左年幾枕邊風
1776年5月12日杜爾哥炒魷
不過炒左佢路易十六荷包都唔會返黎 佢又要搵過第二個做財政大臣啦

一個瑞士裔法國東印度公司既經理靠佢老婆同貴族良好關係一路摸到上路易十六身邊
最後成為左路易十六第二位財政大臣
佢叫雅克·內克爾

雅克·內克爾

吸收左杜爾哥既教訓 內克爾兜過貴族去重組平民既稅項
為爭取班窮到肚穿窿既平民支持佢既稅制改革 佢係1781年發表致國王財政報告書
內克爾將呢份名義上比國王睇既財政報告公開比全國人民令佢地得悉當前法國政府財政狀況
雖然係呢份財政報告入面有好多人要加稅 但內克爾行事透明以理服人為佢係坊間博得良好名聲
係呢份財政報告入面內克爾成功償還左三萬六里弗爾 內克爾就好滿意咁拎比路易十六啦

啊內克爾你黎得岩啦 我岩岩加入左美國獨立戰爭 條數你幫我加埋落去啦
...陛下啊...你本來咩緊個條數已經好大囉喎...不如你試下慳D洗啊...?
隔牆有瑪麗·安托瓦內特對耳

冇耐1783年內克爾都炒埋 幫佢執手尾既係夏爾·亞歷山大·德·卡洛訥子爵
法國貴族出身既佢好清楚咩該做咩唔該做 初上任既佢只好保守地做D貨幣改革
但到1783年6月8日 真正大鑊既野係法國外面爆發啦
爆發既唔係咩政治事件 係冰島既拉基火山

夏爾·亞歷山大·德·卡洛訥子爵

冰島既拉基火山從1783年6月8日一路噴到1784年既2月
呢場火山爆發導致當地四分一人死亡
而佢既火山灰飄到歐洲大陸將做成更大更長遠既傷害
首先因為火山灰籠罩而減少日照 減少日照而令農作物失收
農作物失收農民就肚餓 農民肚餓就開始劏牛
D牛食晒就減少左耕田既勞力同肥料供應
即使比佢地等到火山冬天過去 剩底既不過係一班垂死既農民對住一片荒廢既爛地
而家頻臨破產既唔只係路易十六個荷包 仲有係法國既經濟
當班垂死既農民將佢手上最後一粒種子拋到地上時 佢地最後既希望都比一場全國性既冰雹摧毀
失去農作物既農民無法如期交租而被地主收回土地
失去土地既農民為求生存就挺而走險作奸犯科令商業活動風險提高
再加上因天災而被破壞既基建同埋各地貴族領主對自己封地設立既關稅令食物運輸更困難從而再提高糧食價格
當商人發現食品價格有升唔跌時佢地就更加拒絕出售
然後食品市場陷入左需求愈高供應愈低既惡性循環
然後再做成經濟持續崩潰既另一個惡性循環

到1787年美國獨立戰爭結束 法國負債唔單只冇減少之餘係上面仲加多左八億里弗爾
卡洛訥終於忍唔住同路易十六坦白
其實要受教訓個個係你...杜爾哥同內克爾冇錯架...
當然路易十六亦無計可施 始終法律唔係佢一個人既事
為爭取貴族支持卡洛訥既改革 路易十六召開由貴族組成既名人會議
我知我既改革內容大家都唔岩聽...但希望大家了解法國既窮係經濟結構上既窮...如果唔改革法國就玩完架啦...
出席名人會議其中在坐一個係奧爾良公爵路易·腓力
乜陛下冇錢咩?哎呀陰功囉 不過我唔會白白嘔D錢出黎囉!!如果想要我地D錢就正正式式開個三級會議交D權利出黎塞住我地把口!!

三級會議 一個幾咁古老既詞彙 就連當日係名人會議講呢個詞出黎既人都唔肯定呢個字係咪咁讀
咁咩係三級會議?
三級會議係1302年開始每當國王有難時召開既會議 佢唔係正式既立法機構冇權立法
佢係由第一等級教士 第二等級貴族 第三等級平民所組成 每當國王有難時全國各地三個等級選出佢地既代表齊集巴黎向國王申訴
然後國王就會回應佢地某D訴求黎換取某D利益
法國最近一次召開三級會議已經係175年前既1614年
雨格諾戰爭岩岩結束三十年戰爭開始前夕 當時為解決亨利四世被行刺後既混亂政局而召開
係1614年三級會議佢地仲引入左新制度將以往一等級一票既分組點票改為一議席一票
但最後咩都解決唔到就結束左 呢場就成為左當時法國最後一場 波旁朝唯一一場三級會議
自此三級會議就再未曾召開過

而卡洛訥召開名人會議就係交呢個結果比你!?三級會議條橋係邊個出姐!?係路易·腓力腓力啊!!
佢搞咁多野都係想侯住你個位姐!?三級會議絕不可開!!如果卡洛訥唔識點搞既我介紹第個人比你!!
阿圖瓦伯爵查理·腓力向路易十六介紹左個佢既親信樞機主教艾蒂安·夏爾·德·洛梅尼·德布里安
路易十六登基十二年間換左三個財政大臣 呢個係最後一個

艾蒂安·夏爾·德·洛梅尼·德布里安

德布里安一上場就擱置左將會召開既三級會議 然後再開多次名人會議黎商討加稅既問題
雖然政府已經下令擱置三級會議 但係法國東南部多菲內省首府格勒諾布爾當地三個等級擅自召開左當地既三級會議
當地既士兵受命驅散前往會議既群眾包括三個等級既議員
雖然軍隊好快就佔領左前往會議場地既道路 但群眾爬上周圍建築物用佢地既磚頭瓦片掟下面既士兵
而且聚集既市民實在太多 佢地既軍官只好妥協批准佢地改為係市郊既維濟耶開會

7月21日維濟耶 呢到召開左久別175年既三級會議 雖然只係地方既
係到佢地通過左三級會議既召集辦法保持1614年三級會議既一議席一票
保證地方有權拒絕交納任何未被三級會議通過徵收既稅
呼籲廢除國王通過發布逮捕密令既方式隨意逮捕公民

磚瓦之日

8月16日德布里安宣佈法國破產
8月25日德布里安向路易十六請辭 受人民愛戴既內克爾又被請返返黎做財政大臣
1789年初路易十六宣佈召開三級會議 全國各地開始選舉各等級代表 而且為表誠意佢仲將第三等級既議席加一倍
4月來自全國各地既人為各自既理由陸續到達巴黎準備參與呢場175年一度既大盛事

其中有伊曼紐爾-約瑟夫·西哀士1748年5月3日生於弗雷瑞斯
佢屋企係未落貴族既後人 佢係屋企第五個仔 因為做稅官既啊爸係個虔誠既教徒所以佢細細個就比人送左入耶穌會讀書
成年後佢就去左巴黎聖敘爾皮斯神學院正正式式讀神學準備做神父
但呢條鄉下仔黎到大城市巴黎係到接收到大量啟蒙思想動搖左佢既宗教信念
1770年西哀士索邦大學神學系畢業
1775年西哀士被任命為布列塔尼教區既後備神父 係現任神父死之前西哀士都只可以跟係佢身邊針茶遞水
但係到西哀士見盡貴族同教會特權點樣欺壓百姓 從此立志要進入政壇拯救蒼生黎民
然後1780年西哀士升任沙特爾大主教
當1789年路易十六宣佈召開三級會議西哀士終於等到佢既從政機會
西哀士當選奧爾良第一等級代表重返陪佢渡過學生生涯既巴黎
黎到巴黎 全市都充斥住因三級會議而齊集既人群 街頭巷尾市井小民都受氣氛感染充滿政治熱情
西哀士都難忍興奮BOOK到酒店之後馬上動筆寫佢既政治宣言為呢坐城市添一把火

伊曼紐爾-約瑟夫·西哀士

吉爾貝爾·杜·莫提耶1757年9月6日生於奧弗涅省沙瓦尼亞城堡
擲彈兵上校拉法葉侯爵個仔 睇佢出身地都睇得出 佢係有封地有私人城堡正正式式既高級貴族
係佢兩歲既時候佢啊爸係七年戰爭中戰死係布倫瑞克-沃爾芬比特公爵斐迪南既普魯士軍手下
就咁係佢兩歲既時候就繼承左佢啊爸既封號
1771年到佢中學畢業之後一如其他貴族好快加入左軍隊成為騎兵上尉
1776年岩岩宣佈獨立既美國係歐洲各國尋求盟友對抗英國
係軍中鬱鬱不得志既少年新兵拉法葉侯爵聽到即刻自告奮勇變賣身家籌集軍隊前往美國加入戰爭
到1778年法國正式加入戰爭之後拉法葉侯爵亦成為法軍係美洲最高指揮
戰後亦順理成章成為法國代表游走於美法之間 係呢段時間佢仲識埋廢奴主義者多次就呢個問題向美國施壓
當時既美國駐法國大使湯馬士·傑佛遜評論拉法葉侯爵:佢呢份人永遠渴求公眾對佢既評價
1789年三級會議宣佈召開之後當年呢隻二世祖新兵變成戰爭英雄 當選埋第二等級代表仲做埋三級會議副主席

拉法葉侯爵吉爾貝爾·杜·莫提耶(誤)

拉法葉侯爵吉爾貝爾·杜·莫提耶(正)

米拉波伯爵奧諾雷·加百列·里克蒂1749年3月9日生於內穆爾
祖上係義大利起家既商人 當年係西班牙王位繼承戰爭初期旺多姆公爵同歐根親王係義大利北部打過你死我活時
米拉波既太爺加入左法軍有功然後係普羅旺斯到得到左塊封地同爵位 然後傳到佢啊爸個代
因為米拉波係二仔所以繼承封地爵位冇佢份 佢成年後走左去當兵
係佢軍旅生涯最後幾年被派駐普魯士 係個到佢亦見證左腓特烈二世生涯最後幾年
然後係1786年返國 個時岩岩好法國各地開始選舉各等級代表
睇下杜爾哥係男爵 卡洛訥更不過係子爵 佢地都做到財政大臣 伯爵之後既我唔撈返一官半職點似樣
咁佢就準備參選普羅旺斯第二等級選舉囉喎 但到入紙申請時先發現
喂你係貴族出身姐 但你冇封地喎
選唔成第二等級佢就撲左去隔離省既艾克斯當選第三等級代表出發巴黎

米拉波伯爵奧諾雷·加百列·里克蒂

安托萬·巴納夫1761年10月22日生於部多菲內省首府格勒諾布爾
因為出身於新教家庭所以冇權接受教育 不過好彩佢啊媽係個有錢女讀過下書安托萬就由佢啊媽教大
到佢28歲時佢鄉下格勒諾布爾擅自召開三級會議引發騷亂 當時佢啊爸亦係第三等級代表之一
親歷呢一切既安托萬事後寫左本書評擊軍隊鎮壓行動為佢係鄉間贏得掌聲
然後跟埋佢啊爸一齊成為菲內省第三等級代表前往巴黎

安托萬·巴納夫

讓·西爾萬·巴伊1736年9月15日生於巴黎
佢啊爸同啊爺都係羅浮宮宮廷畫家 佢生出黎都預備繼承衣缽
但佢返學讀書之後發現佢係數學上更有天份特別係天文學上
之後佢就放棄左畫畫主攻天文 1763年進入法國科學院 1784年被錄取為法蘭西學院院士
1789年三級會議宣佈召開之後順手做埋巴黎第三等級代表

讓·西爾萬·巴伊

夏爾·莫里斯·德·塔列朗-佩里戈爾1754年2月2日生於巴黎
因為天生單腳殘障所以冇好似大多數貴族咁去當兵而走去教會讀書
1770年入讀巴黎聖敘爾皮斯神學院
1775年任蘭斯聖坦尼隱修院院長
1780年任法國教會總代表
1788年升任天主教歐坦教區主教
1789年成為三級會議第一等級代表

夏爾·莫里斯·德·塔列朗-佩里戈爾

雅克·皮爾埃·布里索1754年1月15日生於沙特爾
一個客棧老闆第十三個仔 中學畢業之後去左間律師樓做BOY
係個到賺左筆錢之後去左英國旅行 然後係個到識左班廢奴主義者之後跟埋佢地去岩岩獨立既美國
到佢1784年返回法國之後因為寫左篇批評法國政府經濟政策既文比人掟左入巴士底監獄幾個月
出獄之後佢繼續批評君主制同奴隸制
到1789年三級會議召開之後佢趕去巴黎創立左法蘭西愛國者報並係入面連載佢既巴士底監獄生涯

雅克·皮爾埃·布里索

雅克·R·埃貝爾1757年11月15日生於阿朗松
一個法官個仔 係阿朗松讀法律 係阿朗松做律師
但衰打輸左場官司就著草去巴黎 之後一直靠偷呃拐騙為生
直到1789年依然如是

雅克·R·埃貝爾

雅克-路易·大衛1748年8月30日生於巴黎
係佢9歲既時候佢啊爸同人決鬥被殺啊媽離家出走 佢就被送左去佢啊叔屋企
16歲既時候入讀美術學校 因為塊面有腫瘤講野1999所以只專注繪畫
但參加左三次畫畫比賽都落選 成世人頭頭碰著黑雅克-路易·大衛差D跳落塞納河
好彩後來佢啊叔幫佢搵左個親戚 名畫家洛可可大師弗朗索瓦·布歇教佢畫畫
1774年得獎前往羅馬進修 1780年回國 1784年成為王家藝術院院士
之後發表名作荷拉斯兄弟之誓 佢用呢張畫隱喻社會契約
1787年再發表另一幅名作蘇格拉底之死
再係1789年趁全國熱心政治既人係巴黎集結時發表新作處決自己兒子的布魯圖隱喻法國王室既麻木

雅克-路易·大衛

佐治·雅克·丹東1759年10月26日生於布列塔尼
醜 貪 律師 老婆奴 講野大聲 1789年撲左黎巴黎食花生

佐治·雅克·丹東

讓-保爾·馬拉1743年5月24日生於瑞士隔離既小國納沙泰爾公國
佢既祖輩係法國雨格諾宗徒 係路易十四發表楓丹白露敕令之後走黎呢到
馬拉16歲既時候離家出走闖天下 一行就行到黎巴黎係到讀醫
但讀都未讀到畢業佢浪子基因又發作 今次佢繼續向北最後黎到英國
呢段時期佢靠寫文維生 1774年佢發表奴隸制枷鎖指摘英國既議會制只係為暴君黃袍加身既工具
1776年佢又返返法國巴黎行醫維生 呢個連執照都冇既黑市醫生突然爆紅成為一代名醫
就連路易十六個細佬阿圖瓦伯爵查理·腓力都請佢做私人醫生
然後佢就一邊睇下病一邊寫下文HEA到今日

讓-保爾·馬拉

卡米爾·德穆蘭1760年3月2日生於皮卡第
佢啊爸係當地法官 德穆蘭14歲個年佢啊爸搵到門路攞到獎學金送佢個仔入巴黎名校路易大帝高中
在校時佢熱愛古典文學 畢業後跟佢啊爸做律師 但衰講野1999做左冇耐就轉行寫作
1789年佢黎到巴黎之後幫米拉波份報紙寫專欄 點知佢份報紙出左一日就被取締左
而家佢作為一個業餘記者既身份日日係巴黎無所事事遊離浪蕩
係佢背後永遠跟住幾個秘密警察鴿實呢隻危險份子
然後有日佢HEA到去盧森堡公園既時候識左個有錢佬個女露西爾·杜普雷斯
呢條未見過世面既千金小姐好快就傾倒於德穆蘭既革命浪漫之中
但佢老豆嫌德穆蘭呢隻報紙仔襯唔起自己個女反對佢地來往

卡米爾·德穆蘭

最後仲有同大家講呢個故事既人
我係馬克西米連·羅伯斯比爾1758年5月6日生於阿拉斯
全家有四兄弟姐妹 我係大仔 我啊爸係個律師
係我6歲個年我啊媽難產死左 我啊爸傷心過度離家出走從此音訊全無
最後我四兄弟姐妹就由啊婆揍大
係零親家庭長大既我學習成為我唯一既喜好同埋選擇
1770得到當地神父賞識送左我去巴黎讀名校路易大帝高中 係到我識到我一生既好友德穆蘭
1781年法學畢業然後返到鄉下做法官
係維濟耶集會之後法國全國各地要求召開三級會議呼聲不斷
我乘勢發表致阿圖瓦人民書—論改革阿圖瓦三級會議的必要性成為當地名人 後來當選第三等級代表黎到巴黎

馬克西米連·羅伯斯比爾

就咁全國300個教士291個貴族610個平民代表齊集巴黎準備解決法國當前既經濟危機
路易十六諗住係咁
事實係三級會議只係將全國專業憤青中既精英集中到巴黎 呢到最終只會成為佢地既私人遊樂場

首先發功既係西哀士 佢一輪埋首工筆之後出版一本小冊子叫咩係第三等級
係呢本野入面佢引述自己既職業生涯指摘教士貴族不事生產只係國家既寄生蟲
相反第三等級係咩啊!?係呢個國家既一切!!第三等級在政治秩序中有咩地位啊!?咩都冇!!第三等級要求D咩啊!?要應得既地位!!
呢本小冊子面世後風行巴黎 人人都反思自己點解要山長水遠走黎巴黎就係為解決路易十六荷包問題
然後巴黎市中都響起左如同當年美國人一樣既口號 無代表權就唔交稅!!
係第三等級中比起經濟改革佢地開始更關心政治改革

1789年5月5日三級會議終於係凡爾賽開幕 主席係財政大臣內克爾 副主席第二等級代表拉法葉侯爵
一開場內克爾就用左三個鐘去講解法國當前經濟困局 內裡全部都係技術官僚既學術名詞聽得第一二等級代表喊路連連
台下就只有等三等級代表六百對金睛火眼啤實佢 佢地都期待緊內克爾會講出佢地所期待既
直到三個鐘頭技術詞典演說結束 一如所料全部都係內克爾專門範圍內既經濟議題

演說結束之後內克爾就請各等級代表返各自既會堂討論 米拉波聽到即刻拍枱
等陣!!我地第三等級要求三個等級一齊開會!!
吓?我諗冇需要啊 反正你地三個等級係分開表決既
乜撚話!?分開表決!?維濟耶集會既時候咪講好左一席一票個囉!?
維濟耶集會決定既係多菲內省佢地自己三級會議既規矩 一個地方既三級會議邊有權決定全國三級會議既規矩?
好!!咁上次1614年三級會議都係一席一票架啦點解今次又返返一等級一票呢!?
你應該問返點解個次三級會議係一席一票 自法國有三級會議以黎一直都係一等級一票 1614年係個別事件
等陣主席 無論咩等級佢地都係法國人黎解決法國既問題 三個等級一齊開會好合常理姐?
拉法葉你收聲!!家陣我先係主席!!如果你地堅持要三個等級一齊開會既咁首先你地要諗辦法幫全場人點齊名
點名?點乜撚野名啊?
第一二等級既人個個都貴人事忙邊似得你地咁得閒 佢地好多都只係派代表黎開會
乜撚野話!?代表!?佢地自己本身咪自己等級既代表囉!?仲要搵代表!?代表既代表!?佢地黎做咩架!?舉手架咋!?我地要求以而家既陣容開始討論!!
各位稍安無燥 國王好快會黎為大家仲裁

三級會議

好快 幾快?
我地而家等左一個月
呢一個月咩會都冇開過
6月20日終於有人忍唔住 西哀士提出第三等級自行點名
反正第三等級全部人齊 你地自己點名 另外兩個等級既人想玩就入黎加埋自己個名 登記完就返凡爾賽宮開會
就算另外兩個等級黎唔齊我地自己都會繼續討論議題 因為我地呢到係唔分等級既會議
呢到唔係三級會議 我地唔係作為三個等候既代表黎開會 我地係作為國民黎解決國家問題而開既會 呢到係國民議會!!

就咁578個主要係第三等級既各級代表從巴黎向西出發衝向凡爾賽
我地去開國民議會!!
點知去到 鎖左門

借問聲咩事啊?我地黎開國民...三級會議個喎 點解鎖左門既?
哦 因為陛下幾日後會黎演講所以我地而家裝修緊唔比入去
咩話成個月遲唔裝早唔裝而家先黎裝!?先唔理佢真定假 全巴黎邊到有裝到幾百人開會既地方啊!?
巴黎既地頭蟲巴伊即刻諗到 我知邊到有!!跟我黎!!
然後呢578人又跟住巴伊衝返轉頭
呢幾百個精力過剩既憤青由朝到晏巴黎凡爾賽兩頭走
呢個時候佢地身邊已經吸引左大班花生友專程黎欣賞呢場大龍鳳
本來係隔離開緊畫展既雅克-路易·大衛見到都跟埋出去

最後巴伊將呢班人帶到凡爾賽宮隔離既室內網球場入面 然後係巴伊既帶領同花生友既見證下宣誓
我地係代表全國國民既國民議會係到宣布成立 而我地既會議會一直保持到法國建立憲法為止!!
議會萬歲!!法國萬歲!!國王萬歲!!

網球場宣言 企中間個個係巴伊 雅克-路易·大衛畫

除左網球場之外仲有兩個花生友係凡爾賽宮入面一直欣賞緊呢場大龍鳳
佢地係路易十六同阿圖瓦伯爵查理·腓力
細佬 聽講關閉會場條屎橋你出架?
大佬 佢地黎巴黎只係負責比錢你洗 比佢地關心其他野奧爾良公爵就會乘虛而入利用佢地挑戰你個王位架啦
傻啦細佬 槍竿子出政權既時代早就過去 就靠呢班讀書人可以做得出D咩呢?愛與和平佔領巴黎!?呢種政治危機正正係比國王表演既機會
人黎 幫我傳個口信落去 話反正我本來都準備接受一席一票 既然佢地而家已經開左國民議會咁就解散三級會議叫一二等級都去國民議會到開會啦
大佬 你向佢地讓步太多啦...

就咁國民議會連埋未參加既人名正言順走返返入凡爾賽宮
而國民議會亦係7月9日改名為國民制憲議會
呢班本來為解決法國經濟危機而聚首巴黎既代表亦開始改為草擬法國既君主立憲憲法

阿圖瓦伯爵查理·腓力又係凡爾賽宮另一間房招集另一班貴族去開佢地自己既會議
你地認命啦 國王冇心做野架啦 如果你地唔甘心就咁比班蟻民分你地身家既就跟我黎
跟你?你可以做D咩啊?
我一個當然做唔到D咩啦 但在坐有唔少樞密院既成員係咪?你地可以用國王既名義落命令架嘛 調一支軍隊 消滅呢個蟻民議會
7月11日二萬大軍從全國各地包圍到巴黎市郊

哇~咩事啊?咩事啊?咁撚多軍隊既?

1789年7月12日巴黎市中心塞納河泮既杜樂麗宮 呢座係自路易十四起好凡爾賽宮後就荒廢既法國王室舊居
係佢北翼既巴黎王家宮殿花園係奧爾良公爵路易·腓力既居所
自1789年三級議會召開以黎路易·腓力就開放正門廣場比公眾以示佢有別於國王三兄弟既親民開明作風
順理成章係三級議會召開後呢到亦成為憤青既集中地

呢日既中午 一班憤青如常地享受佢地既下午茶時間
突然有條友彈出黎跳上台大嗌
財政大臣內克爾又被炒啦!!今次唔只佢!!係成個財政部比人炒左啊!!
呢次任免係王室干預議會既開始!!係班德國傭兵對法國愛國者進行聖巴托洛繆大屠殺既喪鐘!!
班德國傭兵今晚就會入城殺晒我地!!我知你地班秘密警察匿係角落頭監視緊我!!但我唔會再逃避!!
所有愛國者攞起武器戴上紅白藍三色帽徽做記認跟我黎!!
呢條友係卡米爾·德穆蘭

巴黎王家宮殿花園

德穆蘭帶住千幾人衝入巴黎市政廳攞武器
但一去到大門就比巴黎商會會長雅克·德·弗萊塞勒載住左
你帶住咁大班人要武器黎做咩!?想作反啊!?
城外班德國傭兵準備今晚入城殺晒國民制憲議會成員同佢地支持者!!係法國人就交武器出黎跟我地一齊趕走班外國佬!!
挑你班死廢青咁得閒顧點自己先啦 人地要殺邊個關你撚事咩 咁把炮自己上山打遊擊啦
磅一聲大門又閂返埋啦 千幾人既熱情就咁就淋息左

唔係!!仲有得搞既!!榮軍院!!個到都有武器!!
德穆蘭又帶住千幾人衝去榮軍院
今次真係比佢地搶到火槍啦
不過冇火藥冇子彈
係德穆蘭帶住千幾個攞全火槍既暴民既號召 巴黎全市陷入恐慌四處都係搶掠
但佢地依然得唔到佢地想要既火藥同子彈

14日朝早巴士底監獄
有個囚犯被街上既吵雜聲嘈醒
佢叫唐納蒂安·阿爾豐斯·弗朗索瓦·德·薩德侯爵
薩德 SM中既S 後世性虐待既代名詞
係佢後生既時候因為虐待過一隻雞被判死刑 佢就逃亡到義大利
係義大利佢又強姦左佢老婆個做緊修女既妹 之後佢又走返返黎法國 比人捉到掟左入巴士底監獄
呢朝係佢被囚禁第十二年既一個朝早
佢起身望出窗外 見到一街都係密密麻麻既人潮個個攞齊架生 雖然唔知佢地係到做咩 百無聊賴既薩德侯爵就S基因發作向窗外大叫
救命啊!!佢地係到虐殺囚犯啊!!

街上既群眾個個抬頭望向佢 個個開始交頭接耳
有冇睇個法蘭西愛國者報啊?聽過入面D生活好悲慘個喎 佢係到嗌救命喎我地係咪應該幫佢呢?
比樓上個S叫一叫 樓下班S停低搜索火藥搶掠糧食將注意力集中係呢幢建築物入面
又係喎 咁大座城堡入面冇理由冇火藥既 不如...
然後愈黎愈多暴民包圍到巴士底監獄下面 直到監獄長侯爵洛奈都發現到自己處境非常危險
我呢到得百幾個瑞士傭兵 樓下我睇閒閒地都有千幾人 靠我地頂唔到幾耐咋喎 出面亂左咁多日究竟軍隊係到做咩仲唔出黎平亂架
大SIR 因為近日有大量不明既軍士調動 陛下擔心發生兵變所以下令全部軍隊禁止離開營帳
唉 算 冇得打 幫我叫下面D人搵個代表上黎傾下
YES SIR

侯爵洛奈

兩個平民代表入到巴士底監獄見侯爵洛奈 佢地要求侯爵洛奈只要交出巴士底監獄既彈藥佢地就願意和平散去
侯爵洛奈好快就答應左佢地既要求
咁協議達成我地都快D返去比出面既人答覆
咁心急做咩姐 一場黎到而我又夠鐘食晏 介唔介意食埋先走?
兩條死窮鬼聽到可以食貴族餐即刻L飯應

但係巴士底監獄外面聚集既群眾開始愈黎愈鼓譟 乜咁耐架...?
其中有兩條友趁守衛唔留意穿過乾涸既護城河去到大門前放低吊橋
外面既群眾見到大門打開即刻衝入巴士底監獄
係樓上既守軍見到又即刻開槍示警 點知打中左個師奶
班外國佬屠殺人民啦!!
係入面嘆緊晏畫既侯爵洛奈同代表聽到外面發出戰鬥聲就飯都唔食衝出去睇
停火!!停火啊!!邊個下令開火架!?
侯爵洛奈我話左要早D返去比答覆架啦...而家搞成咁我驚唔係岩岩個協議可以了事...
下面既人聽住 岩岩既戰鬥係意外係擦槍走火 只要你地和平散去並保證我地守軍既人身安全我地會立即交出彈藥
你殺左我地咁多人諗住可以和平!?一命填一命啊!!
咁侯爵洛奈你諗住點啊...?
就算佢地唔答應我既要求都冇得打架啦...我出去代表巴士底監獄投降...

圍攻巴士底監獄

下畫5點侯爵洛奈出城投降
侯爵洛奈舉高雙手走入人群中 千幾個暴民怒目相向
大家聽我講頭先既戰鬥...磅!!侯爵洛奈被一擊倒地
憤怒既群眾一湧而上 最初只係拳打腳踢 後來係刺刀銼頭
從巴士底一路打到去巴黎市政廳
殺人犯!!劊子手!!
侯爵洛奈被打到甩皮甩骨蓮蓬蜜蜂竇咁 佢用最後一口氣苦苦哀求
...殺左我...

最後佢既人頭連埋巴士底監獄守軍既人頭被暴民一個個插係刺刀上巡遊
打倒暴政!!自由萬歲!!
巡遊既終點係巴黎市政廳
雅克·德·弗萊塞勒同我出黎!!
點啊?你地班廢青搵到工未啊?
工就未搵到啦不過火藥就搵到唔少...去死啦法奸走狗賣國賊!!
雅克·德·弗萊塞勒被亂槍打死
暴民既刺刀上又多一個人頭

攻佔巴士底後


https://youtube.com/watch?v=qmKBoU9yPu8


第朝路易十六訓醒先收到巴士底監獄既報告
咩事啊?暴動啊?
暴動!?係革命啊!!佢地已經得武器啦!!全國各地既農民都開始燒地契同衝擊地主啦!!睇你呢鋪點收科!!
...我去出去見下佢地...
仲見!?屌你冇撚得救啦!!出兵鎮壓啊!!
我忍夠你個燈神啦!!次次出埋D屎橋話奧爾良公爵想謀我個位 你個繼承順位仲高過佢啊!!咪以為我唔知調兵入黎巴黎個個係你!!
屌最把炮係你!!你玩撚晒佢!!我去老婆娘家薩伏伊避幾日你好自為之啦!!最慘係害埋大嫂...
我老婆關你撚事!?

下集從人權及公民權宣言到凡爾賽遊行

出現了

蘿蔔大神出現了

等左你好耐!!!!!!!!!!!!!!!!

推

留名

德國傭兵
唔係瑞士咩
仲有果陣德國都未出世

德國傭兵
唔係瑞士咩
仲有果陣德國都未出世

德國係指族裔
德國傭兵係指係神聖羅馬帝國諸侯到請返黎既傭兵

想問下點樣可以搵返之前個D?

出現了

蘿蔔大神出現了

留名

留名

屌你正呀喂

終於有