LM

9月29日國民公會o係嫌疑犯法令之上再通過埋全面限價法令將穀麥 麵粉 肉 油 番簡 火柴 皮革 紙統一價格出售同設定最低工資
所有以高於規定價格買定賣既人同所有以低於規定人工僱傭既僱主同僱員都會被視為反革命嫌疑

10月24日國民公會通過共和曆廢除教會既額我略曆 將國民公會成立既1792年定為共和元年
每年十二個月 每月三星期 每星期十日 每日十個鐘 每個鐘一百分鐘 每分鐘一百秒
芽月 花月 牧月 穫月 熱月 果月 葡月 霧月 霜月 雪月 雨月 風月取代羅馬人命名既十二個月

10月31日共和曆霧月10日 包括布里索廿二個吉倫特派成員上斷頭台
11月8日共和曆霧月18日到羅蘭夫人
第二日係魯昂避難既讓-馬利·羅蘭收到老婆被處死既消息就跟住吊頸自殺啦

11月12日共和曆霧月22日 巴伊處死
11月16日共和曆霧月26日 路易·腓力二世·平等處死
11月29日共和曆霜月9日 巴納夫處死
12月4日共和曆霜月14日 國民公會通過聖-茹斯特提出既霜月14日法宣佈永久暫停憲法直至戰爭結束為止
哈哈哈!!殺啊!!殺啊!!殺晒所有反革命賣國賊!!

...係我殺架...布里索係我殺架...仲有吉倫特派佢地全部都係比我殺架!!丹東!!我唔應該聽你講...我一開始就唔應該出個本書!!
你話路易十六抵死因為佢反革命 你話瑪麗·安托瓦內特抵死因為佢係奧地利人 咁布里索衰咩姐!?巴伊呢!?路易·腓力呢!?巴納夫呢!?
如果塔列朗 拉法葉未走既你係咪斬埋佢地!?而家部斷頭台由朝做到晚一日斬百幾人
全國監獄載滿反革命嫌疑 監獄入面既人仲多過出面既人!!
佢地衰D咩姐!?因為呢個國家大部份都係窮人而佢地個個有槍 你唔想佢地做反你就殺晒所有有錢既人!!
有錢人比你殺晒啦但佢地依然肚餓 你唔想佢地做反你就煽動佢地互鬥
革命將人民視為威脅 革命成為保護國民公會既手段 革命粉碎左我地既社會
我地呢幾年既革命究竟為咩!!丹東!!我地要收手啦...我地科德利埃報會本來就同雅各賓會無關...

12月5日共和曆霜月15日 德穆蘭出版老科德利埃報一反以往雅各賓派暴戾作風 佢係入面要求公民冷靜同國民公會停止煽動恐慌
部分揸住支槍日日都話要分身家既貧民都開始動搖
而呢份動搖亦動搖左極左派既神經 埃貝爾係佢份杜薛斯涅神父報批評寬容派
又有人煽動反革命啊!!所有反對斷頭台既都應該上斷頭台!!
丹東同德穆蘭被逐出科德利埃報會

經歷過斐揚派同吉倫特派 而家雅各賓派再分裂成丹東派同埃貝爾派 佢地都等緊羅伯斯比爾表態
1794年2月5日共和3年雨月17日 羅伯斯比爾係國民公會上面演講
如果係和平時期道德就係民主政府既力量 但係革命時期係呢種力量之上要再加上恐怖
因為冇道德既恐怖係對人有害既 但冇恐怖既道德卻係軟弱無力既 革命政府就係用自由既專政去推翻暴君既獨裁
羅伯斯比爾啊...我地一場同學十幾年老友...希望你仲記得歷史同哲學既教訓 愛情既力量係更強大更持久而唔係恐懼
德穆蘭啊...正因為我地係一場同學十幾年老友如果你燒左老科德利埃報既我可以當咩事都冇發生過...
咁又唔知你仲記唔記得盧梭既一句話...燃燒唔係答案!!

2月26日共和曆風月8日 國民公會通過聖-茹斯特提出既風月法令 所有被判反革命罪既人財產充公
風月法令通過後聖-茹斯特係演講台上再加多句 以後再有邊個夠膽攻擊革命政府既尊嚴既全部拖去斬頭!!
羅伯斯比爾倒向左激進派 風月法令又再次激起已經冷靜落黎既平民繼續去"搵"反革命嫌疑

3月4日共和曆風月8日 埃貝爾係科德利埃修道院門口呼籲群眾再一次攻入國民公會清洗入面既反革命派
3月14日共和曆風月18日公安委員會收到情報就拉左埃貝爾 十日後被拖上革命法庭
我衰咩啊!?我從來都係全法國最革命個個!!邊個可以話我反革命!?
傳証人
係啊係啊係佢啦 佢個衰樣化左灰我都認得啊!!就係佢係廿年前偷左我件衫啊!!
罪成即日處斬
激進派既埃貝爾被處斬 寬容派既領袖丹東成為人民英雄 人人都期待佢地為公安委員會帶黎和平

公安委員會入面聖-茹斯特同庫東係到遊說緊羅伯斯比爾
埃貝爾係死於陰謀做反但我地唔可以直接告佢顛覆 因為煽動顛覆係我地一向做開既野 將來我地都要繼續靠呢招維持自己既權力
如果我地判左埃貝爾顛覆 我地距離斷頭台仲會遠?同樣如果埃貝爾唔係死於顛覆既我地係丹東面前咪變成暴君?
咁我地有咩罪名可以入到丹東...?
早排我地清洗吉倫特派既時候已經攞到丹東貪污D料
...唔得!!丹東係我朋友...而且搞丹東一定會連累埋德穆蘭...佢係我十幾年同學!!..我唔忍心...
共和國既大事面前你同我講呢D!?我地殺咁多人唔通係因為我地心理變態咩!?係因為呢D係打贏場仗必要手段!!如果比丹東派上到位場仗必敗!!我地搞得埃貝爾丹東已經注定走唔甩...
都係唔得!!...而家丹東係坊間太受歡迎啦...如果殺左佢後果我地可能搞唔掂...
如果以後有邊個支持丹東既我地殺埋佢咪得囉!!...就好似吉倫特派咁!!

3月30日共和曆芽月4日丹東 德穆蘭被捕舉國嘩然
和平呢!?我地既和平呢!?
聖-茹斯特係國民公會承諾丹東派係對共和國既敵人既最後清洗
只要比我殺埋丹東和平一定會黎!!

4月3日共和曆芽月9日丹東被指控係1793年法屬東印度公司清盤前利用職權得到內部消息拋售大量法屬東印度公司股票賺左幾百萬里弗爾
然後因為呢條罪再軒連十五個丹東派國民公會成員包括德穆蘭 全員處死
宣判後德穆蘭老婆露西爾日日上門拍門搵羅伯斯比爾
羅伯斯比爾!!德穆蘭係你十幾年朋友黎架!!你要殺丹東咪殺囉!!放過我老公啊!!羅伯斯比爾!!

4月5日共和曆芽月11日丹東 德穆蘭處刑
斷頭台上既已經唔係路易十六或瑪麗·安托瓦內特
呢短短一年間革命往人人意想不到方向發現 法國本身就已經成為一大坐既斷頭台
台下既觀眾已經失去往日熱情 佢已經見得太多無名無姓既人無緣無故成為刀下亡魂
丹東同德穆蘭不過係眾多平凡人頭其中之一
第一個係丹東
最可惜既係我早過羅伯斯比爾條仆街!!不過斬我呢D人頭既日子唔係日日都有得睇架!!
第二個係德穆蘭 佢上台前被告知佢老婆露西爾已經被捕
羅伯斯比爾!!出黎啊!!你要殺丹東你要殺埋我!!關我老婆咩事啊!!我老婆...!!我老婆......!!!!
最後要十幾個人先成功將佢紮上斷頭台
4月13日共和曆芽月19日到德穆蘭老婆露西爾
咁快可以見返我老公係我既幸福...

一個人有罪全國有嫌疑
德穆蘭兩公婆死後留低一個2歲既仔 佢叫馬克西米連 以佢兩公婆生前最好既朋友命名
呢個係最好既時代 又係最壞既時代
該死既人都死晒 唔該死既人都死晒
而家只係死剩一個

德穆蘭死後羅伯斯比爾稱病係公眾既目光中消失左一個月
呢段時間聖-茹斯特被派到尼德蘭方面軍監督戰鬥
6月10日牧月22日 羅伯斯比爾再一次出現係國民公會 公安委員會另一個成員庫東就交出牧月22日法
根據牧月22日法所有被革命法庭審訊既罪犯冇權請律師及自辯 判決只根據陪審團既良心
所有被革命法庭定罪既罪犯一律判處死刑
全場鴉雀無聲
...公安委員會已經痴左線啦...快D搵人制止佢啦...
所有人直冒冷汗睇住演講台上既庫東宣讀牧月22日法
..只要有人提出反對我一定會跟隨架...
宣讀完畢之後就開始表決
...我...我唔敢投反對票啊...有冇人可以制止呢場投票啊...
最後牧月22日法經國民公會全票通過
所有反對公安委員會既人都被清除 再冇人可以阻止佢地 更大既恐怖將要來臨

6月26日共和曆獲月8日 聖-茹斯特監督既法軍係奧屬尼德蘭既弗勒呂戰勝反法聯軍主力攻佔整個奧屬尼德蘭並開始進入荷蘭 全部反法聯軍退出萊茵河西岸
戰爭就黎結束啦!!共和國打贏啦!!
和平露曙光 只要忍多陣恐怖就會結束
大家都係咁諗

係一年前既1793年9月有個國民公會既議員被派到波爾多監督全面限價法令既執行
佢個名叫讓·蘭伯特·塔里安
佢係到識左個西班牙銀行家個前妻特蕾絲·卡巴魯斯
當年法國爆發革命之後佢老公就返回西班牙 但特蕾絲·卡巴魯斯因為祟拜革命就同老公離婚留係法國
嫌疑犯法令通過之後佢又不明不白咁比人掟左入花廳
塔里安黎到波爾多係監獄中見到特蕾絲·卡巴魯斯就傾倒於佢既美貌之下私自放佢出獄
好快呢個報告就上到公安委員會 特蕾絲·卡巴魯斯又比人掟返入去 而塔里安就比人召返返巴黎從此就被冷落係國民公會既暗處

另一個叫巴拉斯子爵保爾·弗朗索瓦·讓·尼古拉
曾經被派過去義大利同阿爾卑斯督過軍 1793年5月馬賽叛變時佢被派去鎮壓
不過好地地鎮壓完佢唔收手 佢收賄
佢派人四出搜括財物抄人家產 普通市民都要比一筆錢佢唔係就掟佢上革命法庭
報告又係好快就上到公安委員會 巴拉斯又係黎手比人掟左入雪櫃
不過巴拉斯同塔里安唔同 佢帶過兵

7月25日共和曆熱月7日 塔里安收到一封由波爾多監獄寄黎既信
因為你既膽小軟弱我就黎比人掟上斷頭台啦!!你幾時先救到我出去架!?
塔里安攞住特蕾絲·卡巴魯斯封信惴惴不安 但自己已經被架空又無能為力
早已失去一切政治權力既佢而家眼中就只有自己既女神

7月26日共和曆熱月8日 岩岩係前線返黎既聖-茹斯特代表公安委員會係國民公會發表工作報告
係佢口中法國對外對內都一片升平 的確和平既希望已經離法國唔遠啦 再忍多陣公安委員會就識收手既
突然塔里安彈起身大嗌 你地呢個係暴政!!
聽到佢咁講羅伯斯比爾就上台辯駁啦
你話我係暴政...係我的確係殺左好多人...但唔通我殺既人都係為左我既利益咩?我全部都係為左共和國既秩序而殺既!!...但相反...國民公會入面仲有未肅清既議員!!
聽到羅伯斯比爾咁講巴拉斯 塔里安 仲有因為係里昂殺太多一樣比人掟左入雪櫃既富歇面面相覷
你講我?定講我啊?我地全場人都曾經因為太激進或太溫和比你指責過 而家激進既埃貝爾同溫和既丹東都比你殺晒啦以你既標準仲有邊個係無罪既!?
係邊個!?講名!!名啊!!講名啊!!
羅伯斯比爾 聖-茹斯特 庫東係眾人包圍下逃出國民公會
羅伯斯比爾苦笑話 睇黎岩岩個D係我既遺言啦...

第朝7月27日共和曆熱月9日 羅伯斯比爾再返上國民公會
一入到去塔里安就帶頭衝上去大嗌 暴君黎啦!!打倒暴君!!
全場人又再跟住圍上去大嗌暴君!!暴君!!
大家聽我講!!我要求發言!!要求...發...咳咳...
做咩啊暴君!?係咪比丹東既血啃親啊!?
嘔返丹東既血出黎!!
之後塔里安又跳上演講台上
大家表決廢除羅伯斯比爾一干人等既公民權利!!
支持!!支持!!
此地不宜久留羅伯斯比爾 聖-茹斯特 庫東又好似琴日咁逃出國民公會避入巴黎市政廳
不過今次佢地心知唔會有聽日啦

被包圍既羅伯斯比爾


https://youtube.com/watch?v=TC3Z6NuoFz8


夜晚巴拉斯加埋富歇召集左一班支持佢地既國民衛隊包圍巴黎市政廳
雅各賓派又召集左一班支持佢地既民兵係巴黎市政廳聚集
係巴黎市政廳入面聖-茹斯特草擬左份推翻國民公會既宣言等羅伯斯比爾簽
全國民兵都係企我地個邊既!!只要簽左佢我地可以再建立過新政府!!
羅伯斯比爾揸住支筆對住份野沉思良久
做咩姐!?再唔快D簽出面既人就攻入黎啦!!
...我地以咩名義......我地係以咩名義推翻一個由全民普選出黎既議會......?
冇人夠膽落筆

巴黎市政廳外面D民兵遲遲未收到指示就開始解散
國民衛隊見D人走到七七八八就發起進攻攻入巴黎市政廳
聖-茹斯特奮戰到底最後被生擒 跛腳既庫東被發現匿係樓梯底 萬念俱灰既羅伯斯比爾準備吞槍自殺但只係炸爆左自己既下巴

熱月政變


熱月政變後既羅伯斯比爾

7月28日共和曆熱月10日 羅伯斯庇爾 聖-茹斯特 庫東同埋十九個雅各賓派核心成員送上斷頭台
呢次係共和國第一次靠軍人穩定政局
不過未係最壞既一次


https://youtube.com/watch?v=myUyc2S_JBA


熱月政變後特蕾絲·卡巴魯斯被釋放返到巴黎同塔里安成婚
巴拉斯出席佢地兩人既婚禮
呢到係佢第一次同特蕾絲·卡巴魯斯見面
塔里安...你老婆......又真係幾靚個喎...

跳脫衣舞比巴拉斯睇既特蕾絲·卡巴魯斯同約瑟芬·德博阿爾內

9月因應法軍攻佔奧屬尼德蘭後開始進入荷蘭 奧地利派遣梅特涅出任駐荷蘭大使
10月法軍攻入保王黨既根據地 梅特涅既鄉下科布倫茨
普羅旺斯伯爵路易·斯坦尼斯瓦夫 阿圖瓦伯爵查理·腓力逃亡英國

巴拉斯 塔里安 富歇呢班主導熱月政變推翻雅各賓派既人被稱之為熱月黨人
當年所有親近雅各賓派既人都比佢地解除公職包括砲兵准將拿破崙·波拿巴
佢地係熱月政變之後開始改造雅各賓派既"專政機器"
雅各賓派係點樣建立專政既呢?
係民兵
咁點解雅各賓派可以多次煽動民兵做反而冇人可以阻止到呢?
因為負責維持寺安既國民衛隊都係由窮人組成而國民衛隊又由巴黎公社指揮而巴黎公社都係由雅各賓派操控

首先國民公會係8月10日兩周年紀念日宣佈廢除牧月22日法 解散巴黎公社 巴黎市政由公安委員會負責
公安委員會由九席擴充到十二席而且每月改選三席同不得連任以防公安委員會坐大
未交過稅既市民被驅逐出國民衛隊 國民衛隊又變返由交過稅既公民組成
11月11日塔里安帶住呢班二世祖國民衛隊攻入雅各賓修道院解散雅各賓會
法國人民終於係雅各賓派既恐怖之下解放出黎
其中包括兩個早已被世人所遺忘既人

雅各賓派被推翻之後巴拉斯走去聖殿塔拜會兩個被囚禁係到既特別囚犯
囚禁係高層既係路易十六個大女瑪麗-特蕾絲
經過兩年既單獨囚禁 瑪麗-特蕾絲言行舉止變得異常 講野1999動作似甩線木偶
巴拉斯就幫佢搵左個保母同下令衛兵每日要帶佢出花園散步
之後佢就落地牢去見埋路易十六個仔路易·查理 所謂既法國國王路易十七
一打開門一陣惡臭伴隨住一堆蛇蟲鼠蟻係監房中衝出黎
入面係間不見天日陰暗潮濕既地底密室 除左蛇蟲鼠蟻同屎屎尿尿之外間房入面就只係得返個破爛既舊公仔
咦喂!?個王子呢!?
衛兵掩住口鼻指指地下個爛公仔
巴拉斯攞油燈埋去照真佢個樣 因為長年營養不良而體型細小四肢扭曲皮膚就似死人一樣既灰白
仲有全身未有及時處理既甩跤骨節令佢近乎癱瘓 另外全身滿布瘀傷被各種昆蟲寄居 甚至可以見到有蚯蚓係佢傷口入面爬出黎
呢隻九歲既細路掩掩一息攤係牢房入面
...點解佢搞成咁會冇人理架...
因為冇命令囉
...快D叫醫生......而家有命令啦!?快D叫醫生啊!!

巴拉斯探訪過之後路易·查理生活大有改善
佢既監房從地底密室搬上樓上正式既房間有完善既傢私更重要既係有窗可以見到兩年冇見既太陽
醫生治療下路易·查理身體狀況亦大有改善但依然無法獨自行路
得到國民公會既許可路易·查理個保母偶然會帶佢落樓下花園散步
落到花園路易·查理咩都唔做剩係採花
咦DD點解你要摘咁多花既?
因為媽媽最中意花 我要摘多D下次見到時送比佢

之後因為病情惡化路易·查理愈黎愈少機會可以再出房
再攤多幾個月6月8日路易·查理重投佢母親既懷抱 呢年佢十歲
到最後一刻佢手上都拎住一紮花

路易十七死後普羅旺斯伯爵路易·斯坦尼斯瓦夫宣佈繼承法國王位為路易十八
7月30日路易十六最後既後人瑪麗-特蕾絲比佢舅父神聖羅馬帝國皇帝弗朗茨二世以法軍俘虜交換返奧地利

話說當年美國獨立戰爭後期荷蘭發起海上中立武裝運動結果引黎英國向荷蘭宣戰
四年戰爭後荷蘭戰敗英國廢除償還荷蘭既國債做成阿姆斯特丹股市崩潰引發暴動
普魯士國王腓特烈·威廉二世為保護佢個妹 荷蘭執政威廉五世個老婆威廉明娜出兵荷蘭鎮壓暴動
但當反法同盟戰敗普軍退出荷蘭 荷蘭人乘機又發起暴動
1794年冬天法軍趁河水凍結越過荷蘭縱橫交錯既沼澤水道直搗阿姆斯特丹
1795年1月18日荷蘭執政威廉五世逃亡英國
國民公會派西哀士出使海牙仿照法國既民主政權成立巴達維亞共和國

巴達維亞共和國

4月25日法國普魯士簽訂第一次巴塞爾和約
普魯士承認法國吞併萊茵蘭 而法國則退萊茵河東岸 普魯士退出戰爭宣佈中立
6月25日塔列朗回流法國
7月22日法國西班牙簽訂第二次巴塞爾和約
法國割讓聖多明哥換取波旁家族西班牙支系承認法蘭西共和國繼承法國王位 西班牙退出戰爭

8月15日國民公會廢除里弗爾指卷等舊有貨幣發行新貨幣法郎

熱月黨人從制度上清除雅各賓派既最後一項改革 目標係國民公會
雅各賓派最大既專政基礎正正係一院獨大三權合一既國民公會 係到佢地只要得到足夠既民意支持就可以無惡不作
國民公會發起過全民公投希望可以廢除全民普選返回國民立法議會只有交過稅既人先有權投票
結果105萬票對五千票被否決
最後8月22日國民公會頒布共和3年憲法
立法權交由五百人會草擬法案交由元老院表決 元老院冇修改權只有否決權
行政權屬督政府由五個非議員出任督政官 督政官每年改選一個由五百人會選出十個候選人比元老院任命其中一個
但國民公會擔心將來新成立既議會可能會被激進派或保王黨把持
所以係8月30日臨解散國民公會前佢地通過左條法律叫三分二法
將來新成立既兩個議會其中三分二議席都要係舊有國民公會中選出
為表公正國民公會都將三分二法交與公投
9月公投結果廿萬票對十萬票三分二法通過

咩話!?三分二!?我忍咁多年就係為左等用選票收你地皮!!你而家話我只可以選三分一議席我仲同你選!?直接做你個反啦!!
10月5日葡月13日 一班不滿三分二法既保王黨民兵進攻國民公會會址杜樂麗宮
哇哇哇!!點算啊!?打到黎啦!!
班國民公會議會就驚慌失措啦
唔洗驚!!召民兵!!雅各賓派都係咁樣維持政權架姐!!
國民公會就走去搵D民兵既領袖啦
咩話!?杜樂麗宮有人做反!?慘囉...不過我都慘啊 以前雅各賓時期煮大鑊飯有槍係手就飯食
而家你地熱月黨上台就剩係識話我地係暴民 革命既野唔好搵我地啦
最後佢地只係攞左一大籃檸檬返國民公會交差
點算啊!!冇人幫拖啊!!保王黨就黎打到入黎啦!!
巴拉斯突然彈起身
唔緊要!!我有橋!!當年我係馬賽同土倫做派遣議員時識左個幾有名望既軍官 佢因為同雅各賓派行得近比人炒左而家日日係巴黎行行企企 如果搵佢帶兵既軍隊一定願意幫有鎮壓!!
世界上竟然有D咁既人!?佢係邊個!?快D搵佢出黎!!
佢叫拿破崙

得到國民公會任命復出既拿破崙帶住巴黎既駐軍反攻杜樂麗宮
啊SIR佢地人都幾多下個喎 唔係要我地硬攻下嘛...?
唔洗 你知我炮兵出身架啦 步兵既野我唔熟 拎幾碌炮黎 上散彈...(以下省略)
經拿破崙鐵腕鎮壓後杜樂麗宮前放置斷頭台既革命廣場從此改名為協和廣場喻意人民團結
而為拿破崙搵大炮黎個條友叫若阿尚·繆拉

10月26日國民公會解散因帶領熱月政變同鎮壓葡月暴動有功 巴拉斯被選為督政府五個督政之一
拿破崙因抬佢上位既功勞成為佢既親信被任命為義大利方面軍總司令
呢年佢廿六歲

葡月暴動

若阿尚·繆拉

係佢出發之前11月30日巴黎有份新報紙出版
份野叫護民官報 出版人叫格拉克斯·巴貝夫 原名弗朗索瓦·諾埃爾·巴貝夫
1760年12月24日聖誕生於皮卡第貧農家庭 所以叫諾埃爾(Noël法文聖誕既意思)
因為屋企真係窮到燶所以佢老豆就走左去當兵打波蘭王位繼承戰爭 但又做左逃兵投靠左奧地利
係奧地利王位繼承戰爭時佢以奧地利兵身份參戰上左位成為左瑪麗亞·特蕾西亞個大仔後黎既神聖羅馬帝國皇帝約瑟夫二世個家庭教師
之後靠關係又返返法國做稅官但又好快比人炒左
呢年巴貝夫14歲
因為呢種家庭背景巴貝夫雖然窮但係佢啊爸身上讀過唔少書
佢大個左之後係地方政府入面做土地管理 農民出身既佢係到見盡貴族點樣利用土地侵害農民權益
法國革命之後佢就加入左最保護窮人既雅各賓派 熱月政變之後佢著左陣草
1794年10月5日彈返出黎搞左份報紙叫護民官報
到1795年11月30日佢係佢份報紙入面出左篇專欄叫平民派宣言
佢係入面話大自然已經平等給予所有人生產既權利 相反如果有人將呢種權利私有化實係形同打劫
故此我地得出一個結論...私有產權係強盜行為!!法國人民平分法國土地!!
巴貝夫係先賢祠門口聚集二千幾人成立先賢祠會其中包含大量前雅各賓派
最初巴拉斯主張利用佢地黎打壓保王黨 另一方面督政府又係佢地入面放置大量線人
然後呢班人慢慢發展佢地開始出現推翻督政府復辟1793年憲法既諗法
呢個線報好快上到督政府
1796年2月27日巴拉斯令拿破崙攻入巴貝夫係先賢祠集會場所逮捕巴貝夫
5月10日巴貝夫被判顛覆罪處斬 督政府宣傳呢個係平等主義者復辟雅各賓恐怖專政既陰謀
為保障社會安定督政府一方面要求議會限制出版自由 另一方面利用自己既行政權力四處安插線人
雅各賓專政下互督背脊既恐怖結束 取而代之既係另一種人人自危既恐怖
係督政府線人監視下人人都可能隨時被控以擾亂社會秩序而被捕
佢地稱呢種恐怖為白色恐怖
白色係波旁家族既顏色 係保王黨既顏色

巴貝夫

1796年鎮壓完巴貝夫之後巴拉斯將佢後宮之一既約瑟芬·德博阿爾內許配比拿破崙 之後拿破崙就帶埋繆拉出發義大利
3月27日抵達前線既尼斯迎接佢既係四萬幾法軍 但冇盛大既儀仗典禮只有一群眼神空洞既乞衣
佢地冇軍服冇軍靴冇糧食冇人工甚至有好多連武器同子彈都冇
呢支唔係軍隊真係乞衣
唔得...呢支軍隊打唔到仗...
各位士兵!!你地冇衫著冇飯食政府咩都冇比你地!!而且政府比唔到你地既野我都一樣比唔到!!但係我地眼前既係世上最肥沃既平原 你地有咩想要既就自己去攞啦!!
講係講得好聽 但唔打場勝仗係說服唔到佢地

當時義大利西北部屬於薩丁尼亞-皮埃蒙特王國
話說當年西班牙王位繼承戰爭之後薩伏依公國係烏得勒支和約到得到西西里島
但戰爭結束後波旁西班牙又旋即入侵薩伏依既西西里引發英法荷奧四國同盟戰爭
奧地利驚薩伏依睇唔住個場就用薩丁尼亞交換西西里 加埋1743年薩伏依吞併皮埃蒙特就變成而家既薩丁尼亞-皮埃蒙特王國

當初督政府要求薩丁尼亞-皮埃蒙特王國交出薩伏依同退出反法同盟以換取和平
薩丁尼亞-皮埃蒙特王國當然唔肯啦佢地就搵黎奧地利幫拖
1795年冬天三萬奧地利軍開入薩丁尼亞-皮埃蒙特王國 臨走之前奧地利將軍收到神聖羅馬帝國皇帝弗朗茨二世既密函
小心義大利基因 佢地既唔好抽仲隨時反面

1796年4月10日拿破崙既義大利方面軍開入薩丁尼亞-皮埃蒙特王國
奧地利軍認為法軍會沿海前進目標係熱那亞 但薩丁軍就主張係山地布防阻止法軍北上首都都靈
果然就係4月10日奧軍係熱那亞門口截擊左五千法軍令奧軍更堅信法軍一定會進攻熱那亞
咁大座城市係面前唔打點會走去同你地爬山啊!?我知啦你地班義大利人緊係又想調轉槍頭呢
奧軍將分布皮埃蒙特北部山區既部隊向東南調去沿海地區剩底萬幾薩丁軍留係山區
山頂既奧軍前腳離開山腳既法軍後腳就跟入黎
11日法試探性進攻左幾左要塞 最後拿破崙睇中左其中一座叫蒙泰諾泰
12日萬四法軍突襲只有四千人既蒙泰諾泰要塞 不出半日就被攻陷
蒙泰諾泰要塞既陷落切斷山上同沿海反法聯軍既聯絡 山區既反法聯軍潰散
28日薩丁尼亞-皮埃蒙特王國交出薩丁尼亞以外既領土退出反法同盟宣佈中立

蒙泰諾泰戰敗後係皮埃蒙特東部既奧地利軍準備向北退入米蘭休整
拿破崙帶住萬五法軍緊隨其後
5月10日朝早係洛迪南方法軍既先頭部隊追上左奧軍既後衛
洛迪唔係D咩大城只係條小村莊 好彩係洛迪南面有條河可以隔開後面既法軍
而河上面就只有一條長約二百米既小木橋 難以容納大軍通過
一萬奧軍退入洛迪之後就準備炸橋 法軍既先鋒見到即刻快馬趕去後面盡將大炮拖黎轟炸任何接近木橋既人
晏晝法國主力到達 拿破崙命騎兵去上游過河包抄 而步兵就係橋下涉水進攻
但對岸既奧軍陣形整齊火力猛烈 成堆既法軍步兵只係成為河中既魚糧
見到形勢危急拿破崙不顧身入跳落戰馬拔出軍刀身先士卒帶領法軍衝鋒
拿破崙唔係伍長 唔係排長 唔係連長 係堂堂義大利軍團團長就好似一個伍長咁走到最前帶領士兵衝鋒
全軍士氣大勇一呼而上同時係奧軍後方法軍騎兵趕到大嗌一聲Vive Le République!!
奧軍潰散 死傷降三千只有小部分走得甩
而佢地最後既目的地係波河中游支流明喬河西岸既曼圖亞要塞
曼圖亞要塞東面係奧地利屬國威尼斯共和國 北面係阿爾卑斯山爬過去就係維也納
係呢場仗拿破崙除左奧地利之外佢仲贏到士兵既尊重 因為佢勇敢既表現士兵都暱稱佢為小伍長

洛迪戰役

5月31日法軍到達曼圖亞要塞 6月3日開始包圍
6月23日教皇國 麾德納公國同拿破崙軍簽署休戰條約 拿破崙順手係佢地身上為班法國乞衣搶左180碌大炮
6月29日督政府成立坦斯帕達納共和國取代米蘭公國

7月奧地利徵召六萬大軍兵分三路解救曼圖亞
一路萬五人兜過明喬河既源頭加爾達湖從北面包圍曼圖亞外既法軍
另一路係三萬人主力從東面經曼圖亞直擊法軍陣地
最後一路萬五人從南面阻截法軍南下
而家法軍唯一退路就係走返法國耕田

但呢一切都走唔過拿破崙既法眼
7月31日拿破崙揼低180碌大炮離開曼圖亞要塞
收到法軍撤兵既消息東路主力快馬加鞭趕入曼圖亞接收法軍留低既大炮
但要知道搬大炮唔係容易既事 呢到有180碌碌碌段噸計既大炮 三萬奧軍主力就留黎做呢D野
咁法軍走左去邊呢?

左向右係明喬河 阿迪傑河 布蘭塔河 明喬河上面係加爾達湖 曼圖亞要塞係明喬河最下

係北面萬五人沿明喬河繼續南下突然遭到四萬法軍突襲全軍覆沒
係曼圖亞搬緊大炮既奧軍主力先發現自己已經陷入被逐個擊破既危機
三萬奧軍搬到半路揼低D大炮匆匆北上迎擊法軍
8月5日兩軍係卡斯奇里恩相會
法軍右翼首先發動進攻點知一打即退 奧軍左翼以為自己贏左全線追出
大家仲記得腓特烈二世既斜線戰術嘛
弱翼佯攻 強翼滅敵 呢到係法軍弱翼
法軍強翼係左邊 唔係呢到D步兵特別勁 係大炮
拿破崙吸收左土倫集中大炮既經驗今次佢再引伸多一招
叫大炮衝鋒

拿破崙將所有大炮集中係左翼分成兩批
一批係到集中轟炸 另一批由馬拉趁機全速衝向敵人近距離發炮 而後面個批又趁機會衝向前不斷重複
奧軍右翼遭到猛烈且步步進逼既炮火轟炸潰敗
法軍中路一隊騎兵又乘機衝出截斷奧軍左翼
最後法軍死一千 奧軍死三千
帶領中路騎兵個個叫皮爾埃·奧熱羅
南路奧軍得知另外兩路敗退都跟住退返奧地利 拿破崙繼續包圍曼圖亞


卡斯奇里恩戰役

8月19日法國西班牙簽署第二次聖伊爾德豐索條約 西班牙割讓北美殖民地予法國但唔可以轉交第三國 兩國結成聯盟
10月5日西班牙向英國宣戰

11月奧地利趁冬天來臨前再組織多次反攻
六萬奧軍從布蘭塔河同阿迪傑河兩路南下 曼圖亞外既法軍亦分兩路攔截
拿破崙帶領既一路擊退左布蘭塔河既奧軍 但阿迪傑河一路既法軍卻被奧軍擊敗令拿破崙陷入前後包圍
但好彩奧地利兩軍會合路途上有條小村叫亞扣
亞扣係條沼澤中心既小村 四處都係小橋堤壩令奧軍難以發揮數量優勢而村莊既出入口亦只有一條小橋
拿破崙集合返兩路法軍表面後退返曼圖亞 另外自己帶二萬偷偷潛入亞扣

11月15日一支二萬四人既奧軍進入亞扣
匿係村外沼澤叢林中既法軍三路包圍向亞扣 村口小橋一路由拿破崙帶領
一如洛迪時一樣 拿破崙揸住支軍旗走到最頭帶領衝鋒
但衝到去橋上奧軍火力猛烈就連拿破崙都被炸落橋底既沼澤
激戰兩日後法軍終於取得亞扣橋 兩路奧軍退回奧地利
法軍又繼續包圍曼圖亞

亞扣橋戰役


https://youtube.com/watch?v=WWR-smT-fFs


12月31日摩德納 費拉拉 博洛尼亞合併成奇斯帕達納共和國

1797年1月7日奧軍再組六萬人救援曼圖亞
一樣布蘭塔河阿迪傑河兩路各三萬人南下 不過今次唔係從東面進入曼圖亞而係從曼圖亞北部加爾達湖阿迪傑河中間既山區潛入
奧軍派信差潛入曼圖亞通知佢地裡應外合但被法軍捉到
得知奧軍既計畫拿破崙先派一萬法軍輕裝北上偵測
1月12日奧法兩軍既先頭部隊係里窩利相會 法軍瞬間陷入苦戰
得知奧軍位置拿破崙立即帶多一萬人北上馳援 13日晚趕抵里窩利
當時法軍已經退守里窩利一座山頭奧軍駐守山腳 就算加埋拿破崙一萬援兵法軍都比奧軍少一萬人
點解奧軍有咁大數量優勢都仲唔發動進攻呢...?拿破崙爬係山頂觀察奧軍營地
原來佢地炮兵仲未到...唔...?個個營地咁多馬既...?唔通係騎兵既營地...?

第朝1月14日法軍主動落山發起進攻 因為法軍居高臨下既射擊奧軍一開始就陷於劣勢
奧軍派騎兵準備兜去法軍後方 點知一出營就遭到埋伏已久法軍炮火重點轟炸
未有炮兵支援又失去所有騎兵 被包圍山谷下既奧軍被法軍騎兵反覆穿插
最後三萬奧軍降八千死萬五 法軍只係死四千
第二日夜晚拿破崙又趕返返曼圖亞包圍另一路奧軍 奧軍又再撤退
2月2日經過一年圍城曼圖亞要塞終於彈盡糧絕開城投降 法軍向南開入教皇國向東進入威尼斯
威尼斯宣佈中立 然後法軍繼續北上
目標奧地利本土

里窩利戰役

下集法國大革命結局篇:拿破崙·波拿巴霧月十八既悲劇

羅伯斯比爾=蘿蔔絲脾耳

同音字

終於出

唔記得貼奧熱羅個衰樣添

夏爾·皮埃爾·弗朗索瓦·奧熱羅

雅各賓派竟然係咁樣玩完，瘋狂內鬥，最後自己都鬥死埋

下篇就到霧月政變，拿破崙無雙

see also :


陶傑: 革命 和人性


法國大革命後期，革命的雅各賓派分裂，一時出了兩個領袖，一個是 丹東，一個是 羅伯斯庇爾。


丹東和羅伯斯庇爾都有辯才。兩人都是激進派，主張推翻皇室，把國王送上斷頭台。而且清剿貴族階級，切實的「還政於民」。


丹東和羅伯斯庇爾本來是親密的盟友，後來卻發生了分歧：丹東不想無休止地濫殺，主張「革命」和「專政」應適可而止，除了革命，新成立的法蘭西共和還需要經濟。


但羅伯斯庇爾不同意，他認為革命如不徹底，皇權遲早復辟，加上歐洲的 皇室大軍壓境，因為對「 外國勢力」的恐懼，羅伯斯庇爾 轉而在國內清剿「 反革命」而洩憤：貴族殺光了，殺溫和的 知識份子，殺在街頭異議政事的平民，最後，革命的丹東 也被打成保皇黨的同路人，判處死刑。


丹東喜歡喝酒、玩女人，私生活一塌糊塗，羅伯斯庇爾則單身獨居，沒有嗜好，一天到晚思考他的革命道理。丹東的放蕩，羅伯斯庇爾的清教徒，完全不一樣，最後，丹東的淫亂和酗酒都成為罪名。


一七九三年 四月，丹東的囚車路經 羅伯斯庇爾的公寓，丹東抬頭，看見昔日的好友，窗戶緊閉，丹東大喊：「我的今天，也就是你的明天！」 果然，羅伯斯庇爾濫捕狂殺，人人自危，三個月後，議會政變，趁羅伯斯庇爾演講時派兵把他擒下。


丹東和羅伯斯庇爾，反目成仇，一半為了權力，另一半是性格的衝突，奮鬥時可以共患難，但奪得政權之後就不一樣了，人是會變的，革命的史詩，會變成仇恨的詛咒，英雄變成魔鬼，理想化為惡夢，古往今來，人性遵循愚昧和虛妄的軌道。


有人說，丹東 比羅伯斯庇爾好一點，因為他愛紅酒 和女人，比起乾澀蒼白的 羅伯斯庇爾多一點點人性，但隋煬帝何嘗不沉緬酒色？尼祿也一樣，卻同時嗜殺。在一個亂世，鑑古而知今，一切都似曾相見。


陶傑: 革命 和人性

點解塔利安會俾佢老母跳艷舞俾巴拉斯睇

點解塔利安會俾佢老母跳艷舞俾巴拉斯睇

我搵唔到位講
其實最後巴拉斯會橋左佢牆腳

點解塔利安會俾佢老母跳艷舞俾巴拉斯睇

我搵唔到位講
其實最後巴拉斯會橋左佢牆腳

老婆呀

我睇到果到都覺得怪怪地

前幾集後面果一大串重點人物死剩幾多件

點解塔利安會俾佢老母跳艷舞俾巴拉斯睇

我搵唔到位講
其實最後巴拉斯會橋左佢牆腳

ntr

點解塔利安會俾佢老母跳艷舞俾巴拉斯睇

我搵唔到位講
其實最後巴拉斯會橋左佢牆腳

老婆呀

我睇到果到都覺得怪怪地

好強既摩擦力

天馬行空BB 一鍵留名！