「我、我鍾意妳！」

各位仲記唔記得自己第一次告白時嘅情景？

我永遠都唔會忘記，個陣係中二嘅下學期，
我趁著美術室得返我同阿璇嘅時候，鼓起勇氣同佢告白。

「可唔可以比個機會我！？」

「吓？」阿璇佢聽完後當堂一呆。「你話你鍾意我？」

等待答覆個段雙方都沉默嘅時間，我可以清楚聽到自己嘅心跳聲。

「乜、乜你唔係咩架咩？」阿璇問。

「咩…？我唔明…」

「我見你同隔離座位小霖咁投契，我仲以為你地係一對添…」

「痴線！」我好大反應，「當然唔係喇！妳完全搞錯喇！」

正如阿璇所講，我同小霖真係好投契。成日形影不離，一齊返學放學、
一人做一半功課之後借比對方抄、飯盒兩份分、有時仲走堂去網吧、
落球場打波，但我地真係只係好朋友…

而且，小霖係男人。

「吖…原來你嘅性取向係正常，真係誤會哂，哈。」阿璇佢調皮咁吐吐舌，
「不過…我真係無辦法接受，我一直以嚟都係當妳姐妹…」

「姐妹！？」

如同晴天霹靂般嘅答覆，阿璇仲要轉用「妳」字。

「嗯，姐妹。」

「哈…哈哈…咁我係姐姐定妹妹？」我好勉強咁保持風趣。

若果喺個刻已經宣告我失敗咁都好啲，點估到…

「你地兩個點解仲喺美術室嘅？」

「Amy！」阿璇有少少吃驚咁望向我身後。

係Amy，同級生裡面最八卦嘅一個女學生，比佢知道嘅「新聞」，
只需要一個小息時間就可以散播到全校…

中一個年嘅一單師生戀，比佢發現之後第二日就上哂各報紙頭條。

「無，我地只係…」我當時更係想掩飾過去，而我深信阿璇會協助我。

「Amy，原來佢唔係基架！」點知阿璇竟然咁樣衝口而出。

我注意到Amy副超圓眼鏡嘅鏡片閃過一絲光茫。

「佢仲要同我告白！但我真係接受唔到！我心裡面已經認定佢同小霖先係一對…」

阿璇一邊講，我一邊慢慢掃過美術課室嘅四周…

仲記得，個陣上堂畫肖像掃描，我同阿璇一組，落堂個陣佢話我畫得佢好可愛…
仲記得，轉身想同阿璇傾計，結果打瀉咗水彩搞到成身都係…
仲記得，阿璇佢主動邀請我加入美術學會…
仲記得，老師叫我地兩個合作砌模型參加比賽，喺美術課室度過咗好多個時光…

就喺呢一刻，所有美好嘅畫面都開始崩壞，變得肢離破碎…

…連同我嘅第一次告白。

告白就好似一場只有一條命嘅遊戲。失敗就係game over，無得復活。