今集BGM


https://youtube.com/watch?v=nmfLIerVubk

普魯士西班牙相繼退出戰爭 連奧地利同佢D義大利盟友都比拿破崙打殘埋 而家反法"同盟"只係剩得英國一個
為迫使英國投降 督政府計畫組織支十萬人既遠征軍係愛爾蘭登陸聯合當地既獨立份子反攻不列顛島
但係12月出海時遇上大風沉左一半 剩底個半登陸左之後又比英國海軍包圍而愛爾蘭既支持亦冇預期中既大
最後當佢地決定撤回法國時更被英軍打沉埋
擊退左法國對英國本土侵略之後英國國會先急急腳下令地中海艦隊撤出地中海退回直布羅陀防範法國下次軍事行動

係當時由英國控制既科西嘉島英國艦隊開始帶住物資零星離開
其中有兩架小型既巡洋艦係12月15日從直布羅陀出發前往救援科西嘉 但係途中比佢地遇上兩架巡邏中既西班牙戰列艦
死火啦!!咁撚大架船咁多碌炮 比佢地見到我地全船人仆硬街啦!!快D調頭走人啦!!
但佢地艦長突然彈出黎
唔好!!駛去順風位!!開盡帆全速衝過去!!全船人同我立齊架生!!我地準備開拖啦!!
突然兩架巡洋艦向自己直衝埋黎西班牙戰列艦被殺個措手不及 連炮門都未打開就全船被俘
本來救援科西嘉既兩架巡洋艦變成兩架巡洋艦+兩架戰列艦
帶領呢支艦隊既艦長只係個海軍准將 佢個名叫霍雷肖·奶路臣
呢種唔要命既打法就係佢既風格 因為呢種打法已經令佢盲左一隻右眼
2月13日佢再從科西嘉返抵直布羅陀 屎忽未坐暖第朝又出事

霍雷肖·奶路臣

2月14日凌晨英軍既巡邏艦隊送黎一件情人節禮物 佢地係葡萄牙西南既聖文生角對出發現一支約廿零架既西班牙艦隊
呢支西班牙艦隊從加的斯出發準備去法國既布雷斯特支援法國再一次入侵愛爾蘭
係直布羅陀既英國艦隊發現左佢地之後乘住東風唔洗幾個鐘就追左上去
朝早6點英軍係自己東南方發現西班牙艦隊 但因夜色大霧未能確認數量
到大霧散去英軍先發現對方係支三十四架戰艦其中有廿七架戰列艦既大艦隊 相反自己只有二十架戰艦而戰列艦更只得十五艘
10點西班牙艦隊從西各東排成兩行而英軍就從北向南直插向西班牙艦隊中段
英軍既計畫係插入西班牙艦隊中間後可以用兩舷既炮火射擊兩邊既西班牙軍 相反西班牙就只能以一舷既炮火射擊未插入既英軍
而且係英軍斷開西班牙艦隊後佢地會企係後半既西班牙艦隊既順風位前面 被英軍截斷左佢地前進路線就會令佢地陷於被動
奶路臣就係呢十五架戰列艦入面排尾三個架HMS上校號上面做代理艦長

11點英軍成功插入西班牙艦隊將佢地劏開兩份 前半既西班牙艦隊打開右舷既炮門向北轉射擊英軍後方仲未插入既艦隊
而英軍帶頭既旗艦亦西轉跟實前半西班牙艦隊條尾 後半西班牙艦隊則向南轉盡辦法擺脫英軍目標搭上順風向北跟上前半西班牙艦隊
如果比佢地成功既佢地就可以係英軍背面重整陣勢到時就情況逆轉 又或者乘風而逃到時又係白打一場
睇見呢種情勢排係尾三既奶路臣未待旗艦下令就私自向西轉向擋係前半西班牙艦隊前進路上
比佢咁阻一阻成支西班牙艦隊就炒埋一碟 而奶路臣架HMS上校號亦被六架戰列艦包圍集中炮擊
HMS上校號被炸剩最後一條桅桿 只要佢都被炸斷埋HMS上校號就會成為大西洋中心既一條浮木
靠呢碌桅桿HMS上校號係六架戰列艦交叉火力下拼死直衝撞上聖尼古拉斯號 奶路臣下令全船棄艦攻上聖尼古拉斯號
另一架西班牙戰艦聖何西號見到英軍登上聖尼古拉斯號 不顧英軍炮轟獨自衝向炮擊聖尼古拉斯號上既英軍
奶路臣搶得聖尼古拉斯號帆陀後又再撞向聖何西號
係呢片混亂中英軍追上包圍前半西班牙艦隊再俘虜多兩架戰列艦 剩餘既西班牙艦隊紛紛逃回加的斯
英軍死73人一船大破 西班牙死250人一船大破四艘被俘
聖文生角海戰後英軍開始封鎖西班牙海岸 而奶路臣准將既英勇表現令佢獲升為少將並受封為巴斯勳爵
家陣法國再冇希望可以入侵英國本土

聖文生角海戰

2月19日拿破崙同教廷簽署托倫蒂諾條約割讓托斯卡納成立奇薩爾皮尼共和國
4月4日共和5年大選富歇落選保王黨大勝
4月18日拿破崙同奧地利簽署奈奧本臨時條約 奧地利承認法國吞併奧屬尼德蘭換取法軍撤出威尼斯由奧地利接管
5月14日熱那亞共和國解體成立利古里亞共和國
6月9日奇斯帕達納共和國坦斯帕達納共和國合併入奇薩爾皮尼共和國
7月15日塔列朗再次出任外交大臣

係共和5年選舉中保王黨贏得兩議會多數席位 最後係個年督政官改選中佢地仲捧埋個保王黨既人入去
比保王黨操控既兩院訂立法律給予不宣誓教士 在法流亡貴族親屬公民權令保王黨選民增加
更重要既係佢地開始攻擊巴拉斯
督政府成立幾耐佢就做幾耐督政官佢家陣係咪要成為法國既獨裁者!?
巴拉斯搞上左塔里安個老婆特蕾絲·卡瓦魯斯再利用佢前夫既關係同班銀行家貪左一大筆!!
罷免巴拉斯!!打倒暴君!!

似曾相識
巴拉斯感覺自己就黎成為第二個羅伯斯比爾 佢首先任命心狠手辣既熱月黨人富歇做警察部部長監視保王黨既活動
然後佢寫左封信去義大利比拿破崙
救我啊 你大佬我就黎冧檔啦

9月4日果月18日拿破崙派佢頭馬奧熱羅返巴黎攻入議會逮捕左二百個保王黨議員 另一方面法國警察各地搜捕保王黨重要人物
事後督政府宣佈個二百個議員選舉無效 被逮捕既保王黨人全部流放法屬圭亞那 禁止教會周日禮拜 出版物全部要經警察審查
呢次已經係軍人第三次干政 巴拉斯仲以為自己好撚醒

事後奧熱羅要求巴拉斯比佢做督政官
下你ON9架!?做個少少野就想做督政官!?拿破崙都冇啦!!
但拿破崙你比左個方面軍司令佢喎!!咁我有啦掛!?
就咁奧熱羅就升左萊茵方面軍司令仲係補選中當選五百人會議員

果月政變

10月17日法國奧地利簽訂坎波福爾米奧條約正式承認奈奧本臨時條約 再加上奧地利賠償法國300百萬法郎
11月16日普魯士國王腓特烈·威廉二世過身腓特烈·威廉三世繼位

腓特烈·威廉三世

1798年1月19日係瑞典斡旋下法國奧地利同神聖羅馬帝國諸侯係拉施塔特召開會議
呢場會議係因奧地利係坎波福爾米奧條約放棄左萊茵河西岸既領土而家佢要為失去左封地既神聖羅馬帝國諸侯尋求賠償
其實類似既事件係神聖羅馬帝國史上好平常
一般神聖羅馬帝國皇帝將神聖羅馬帝國領土割讓外國神聖羅馬帝國皇帝都會將佢手上既領地送比失去封地既諸侯做賠償
但今次唔只係神聖羅馬帝國諸侯失去封地 就連神聖羅馬帝國皇帝成個義大利D屬國都冇晒
家陣神聖羅馬帝國皇帝弗朗茨二世手上剩底既就得返波希米亞王位匈牙利王位同佢鄉下既奧地利大公
呢種絕景下代表奧地利出使既係梅特涅
陛下你咩都唔需要應承任何人 家陣法國同英國仲打緊 而法國點都遊唔過海 只要拖長個會議我地一定有轉機!!

2月15日拿破崙解散教皇國成立羅馬共和國
4月9日共和6年大選
4月12日瑞士既共和派推翻瑞士聯邦成立赫爾維蒂共和國
見識過督政府咁樣駛橫手推翻選舉結果保王黨人都意興闌珊 結果就係激進派大勝
但到激進派走入議會巴拉斯又淆底囉喎
哇!!雅各賓返生啦!!好撚驚啊!!
5月11日花月22日督政府又宣佈選舉無效
保王黨勝出選舉督政府宣佈選舉無效 結果第二屆到激進派勝利
激進派贏得選舉督政府又宣佈選舉無效 結果第二屆又到保王黨勝利然後不斷重複 坊間稱呢種為千秋政策
講到尾其實你仲要唔要選舉 要唔要民主既呢?

赫爾維蒂共和國

第一次反法同盟瓦解法國戰勝佢既世仇歐洲第一強國奧地利 將自己既邊界擴張到萊茵河同義大利
從義大利戰爭到大同盟戰爭法國人用幾百年時間都做唔到既野係呢兩年就完成左
而完成呢件豐功偉業既大英雄拿破崙·波拿巴凱旋回國啦
當年個班乞衣搖身一變成裝束整齊英姿煥發既職業軍人
當年個班打死都唔肯上戰場既農民都蜂擁到徵兵站要求加入拿破崙既軍隊
係法國人民眼中再冇民主自由平等博愛 只有拿破崙
巴拉斯明白到佢最大既敵人唔係保王黨唔係激進派 係佢呢個"親信"
羅伯斯比爾講得岩...戰爭真係會養出凱撒......凱撒要渡過盧比高河啦...!!

離開群眾入到督政府 拿破崙面對既又係另一種氣氛
佢既靠山巴拉斯已經唔係葡月暴動時既和顏悅色 拿破崙明白原因
佢完成對義大利遠征既報告後就對督政府提出一個新既遠征計畫
而家抵抗共和國既只係得返英國 海上我地係唔夠佢打但陸戰我地有必勝既把握...
...比我五萬人!!我可以從北非打到去印度切斷英國殖民地收入迫使英國投降!!
全場嘩然
太冒險啦!!簡直係去送死!!
唔係!!唔冒險!!
巴拉斯打斷其他督政官既發言
憑我地既法國英雄戰無不勝既拿破崙一D都唔冒險!!拿破崙...你知我一向都好支持你架...你一於即管放心去做啦...

...一D都唔冒險...你最好就死係個到...就好似亞歷山大咁...!!

5月19日拿破崙同五萬法軍操出巴黎開始東方遠征
另一方面督政府派西哀士出使普魯士說服佢加入對抗英國
為配合拿破崙南下非洲進行左次佯攻愛爾蘭既海軍行動引走左直布羅陀英國海軍既注意力
6月11日拿破崙突襲馬爾他然後就不知去向
英國政府任命奶路臣少將為地中海海軍司令派出十三架戰列艦搜尋拿破崙既蹤影
但搵左個幾月都毫無頭緒 到7月鄂圖曼帝國傳黎報告
法軍已經出現係埃及

7月21日法軍已經去到開羅以西金字塔既腳下
拿破崙派二萬人奪取渡過尼羅河既橋頭堡埃穆比哈堡而鄂圖曼就派出六萬馬穆魯克迎戰
戰列兵一向弱於對付騎兵而且今次對手更係自己三倍之上
就算法軍可以一槍一隻射完一輪都仲有四萬人 只要比佢地兜到背後戰列就玩完
再加上呢到係一片沙漠冇任何地型可依靠點算呢?

拿破崙用左係二百年前比古斯塔夫二世·阿道夫戰列取代既陣法
方陣

法軍布陣

拿破崙將二萬步兵排成五個口字形中空面向四面既方陣每個四千人
晏晝3點六萬馬穆魯克一湧而上穿插於五個方陣間
因為每個方陣四面都係正面冇背後可以偷襲 如強行進攻又只會被密集既刺刀插成箭豬
前頭既馬穆魯克冇位入後面既馬穆魯克又源源不絕湧上黎
六萬騎兵係五個方陣中間亂成一團 最後係大後方埋伏既騎兵撲出 六萬馬穆魯克死二萬人
而法軍只死四十人 係中世紀將十字軍打過風聲鶴唳既馬穆魯克上演出人類史上最可笑既一役
而帶領法國騎兵個個叫達武
金字塔戰役後法軍開入開羅推翻埃及總督
但係佢地仲未決定進一步行動時奶路臣已經趕到黎

係埃及既拿破崙

獅身人面像前既拿破崙



金字塔戰役

進入開羅後既拿破崙

收到法軍登陸埃及既報告奶路臣就帶住佢個十三架戰列艦趕去埃及
最初佢預計法軍會停泊係埃及最大既港口亞歷山大港
但去到撲左個空亞歷山大港只係和平既小商港 咁奶路臣向前往尼羅河口搜尋法軍停泊港
8月1日終於比佢搵到

法國艦隊一樣係十三架戰列艦停泊係尼羅河口以西既阿布基爾灣
呢個係個兜型開口向東既港灣 係北面有個海角突出周圍滿布暗礁
當奶路臣發現佢地時 法軍亦同樣早就發現英軍
因為英軍去到阿布基爾灣時已開始入黑 法軍預料英軍唔會係夜晚冒險駛入滿布暗礁既海灣
咁法軍就從南向北將艦隊排成一直線最弱既擺北面勁既擺南面用右舷對海防範英軍接近

我地英國靠海軍起家我相信我地船上每一個人都係老練既水手 我冇任何作戰計畫準備比你地 你地就用自己既感覺係黑夜中衝入敵人既漏洞入面啦!!
8月1日夜晚6點 奶路臣同各船艦長講完佢既"作戰計畫"就揚帆南下阿布基爾灣
當英軍出現係水平線時法軍都驚訝佢地竟然唔係係平靜既東面而黎而係係滿布暗礁既北面順住北風直插入法國海軍同阿布基爾灣中間
十三架英軍戰艦衝過滿布暗礁既阿布基爾灣北部亦只有一架觸礁沉沒
法軍完全冇預計敵係係咁大膽 佢地向陸地個邊既左舷大炮冇人當值而且連炮門都未打開
成支法國艦隊任人魚肉 係南面既法軍戰艦諗住起錨北上支援但因逆風佢地未上到去英軍已經殺到落黎
面係法國艦隊中段既旗艦被擊中彈藥庫全船被炸成火海
到第朝凌晨戰鬥先至結束 英軍沉一船死二百 法軍沉一船三大破九捕獲死二千降三千
拿破崙既東方遠征軍艦隊全滅 全軍都孤立係中東既中心






尼羅河河口海戰

尼羅河河口海戰法軍大敗既消息傳回歐洲之後 係拉施塔特會議中既爭拗聲都隨之沈寂落黎
陛下 我話左架啦 法國遲早一定會出事 我地可以結束呢場會議繼續投入戰爭啦
12月24日大不列顛聯合王國 奧地利公國 俄羅斯帝國 鄂圖曼帝國結成第三次反法同盟 拉施塔特會議結束

海軍冇晒鄂圖曼又正式宣戰 2月10日拿破崙東進印度改為北上伊斯坦堡
因為失去左海路既補給法軍只可以靠搶掠黎維持生計
係法軍北上個幾月間沿途屠殺掠奪血流成河
殺得人多除左作孽之外最危險既係衛生問題
呢個幾月法軍日日同屍體為伍 疫症好快係軍中蔓延

3月20日萬三個法軍到達耶路撒冷門口既亞卡
亞卡當年十字軍安條克公國既首都 十字軍最後陷落既據點
雖然只係座中世紀既城堡 但法軍因為缺乏補給每一發炮彈都變得非常貴重
咁拿破崙就決定以圍城方式攻略亞卡
當班士兵紮起營聚居起上黎瘟疫蔓延就更快啦

5月21日圍左兩個月似樣D既仗都未打過就有二千人死於鼠疫 而另外大半既人都受到感染
拿破崙都感到意興闌珊希望撤回埃及啦
但點走?
如果要冇病個一半人拖住有病既人咁佢地咪遲早惹埋病?如果呢個時候比人打既咪棧攬住一齊死?
揼低佢地?將佢地留比殘暴既鄂圖曼人?
最後拿破崙留比佢地一人一支山埃然後自己一個竄返埃及

"探病"既拿破崙

返返去4月18日共和7年大選又係激進派大勝
準確D黎講佢地係叫新雅各賓派
佢地係雅各賓修道院聚集 自稱繼承雅各賓派 除左鬥地主分身家佢地仲要求平反埃貝爾 馬拉
共和7年大選後新雅各賓派控制上下兩院 巴拉斯驚心提防佢地將會推舉邊個做督政官
如果係唔合自己心意既就再發動多次政變推翻佢

5月18日元老院推舉西哀士成為新任督政官
西哀士從三級議會召開一直活躍都今日 十年間經歷幾多風風雨雨佢一一捱過
從斐揚派 吉倫特派 雅各賓派到熱月黨人一一倒台佢都企係舞台中心
係呢個再冇英雄既時代佢被全法國人視為唯一忠於革命既領袖
對於民望低迷既巴拉斯佢都係個唔錯既裝飾品
但西哀士一上到去佢就要求重寫憲法 另一方面議會又要求督政府為花月政變負責 而巴拉斯唯一既救星又遠在埃及音訊全無
為獨善其身佢向所有人妥協 6月18日牧月30日巴拉斯辭退另外三個督政官 結果議會推舉上去三個新督政官就完完全全係新雅各賓派既人
控制晒上下兩院同督政府 新雅各賓派又開始佢地激進既革命

督政府重立嫌疑犯法令而且係上面再加多條人質法
政府有權逮捕嫌疑犯既親屬為人質黎証明佢有罪
佢地再改革稅制令有錢人需邀交巨額稅收
同時係前線英俄係荷蘭登陸面俄奧又攻入瑞士 前線一步步向法國本土逼近
社會又返返1793年既前夕

係督政府入面一個人埋首攻筆草寫新憲法既西哀士將街外既吵吵鬧鬧都拋諸腦後 佢又諗起十年前個一日
曾經我都相信人民有天賦既權力去管理社會 係人人平等既社會之下每個都可以安居樂業
十年我從沙特爾走幾百里路黎到巴黎 雖然社會依然貧乏但每人對未來都充滿希望
佢地都期望內克爾既經濟改革 佢地都期待國民制憲議會爭回佢地應得既權利
自由 平等 博愛既口號邊個唔嚮往?
盧梭 伏爾泰 孟德斯鳩既教誨邊個可以反駁?
我地以為我地既革命可以拯救世界
為左成全革命我地殺左我地既國王再殺埋佢全家
為左保全革命我地將全國既細路送晒上戰場
為左自由 平等 博愛我地互相猜忌
因為盧梭 伏爾泰 孟德斯鳩我地將所有罪犯送晒上斷頭台
因為革命我地將全歐洲變成一座大屠場
因為革命大家早就忘記革命
有人問我呢十年我係點樣過
我沉默
然後淚流滿面
...我只係苟且偷生......
吉倫特派要發起戰爭時我沉默 雅各賓派要殺吉倫特派時我沉默
為左生存我放棄左我既信仰 為左生存我放棄埋我既聲音
為左我既生存我睇住全國人去送死!!
到今日我地究竟係為咩而革命!?
今日我諗起十年前個日 我又係一個人寫緊本書
我依然知道咩係第三等級 但我已經唔知咩係革命...
我只係想有人黎了結呢片混亂
我只係想有人黎救下我...

西哀士既淚水化開左憲法既墨水化成一封信寄到地中海既對岸
係啊...督政府又需要我啦...咁埃及既野我唔理LU~
9月9日拿破崙帶埋繆拉拋低四萬大軍秘密返回法國見西哀士

點啊?今次你地又想我拉邊個啊?
唔係某特定一物 係五百人會 係元老院 係督政府 係今日法國整個政治制度...我吸收左呢十年革命既經驗寫左套真正民主既新憲法...而家只係等人推翻呢個政府姐...
姐係你要我一次過拉晒五百人會 元老院同督政府既所有成員...?工程大左D喎
督政府有五個人我係其中一個 個三個雅各賓既督政官我可以說服其中一個 只要再拉走多個督政府就要解散但...
唔緊要我有辦法 雖然而家巴拉斯疏遠左我 但我地之間仲有個共同朋友塔列朗 兩個都係貪錢之人佢有辦法既 而且巴拉斯佢坐呢個位冇任何抱負只要形勢唔岩佢自然會識做既
咁搞掂左督政府之後就係五百人會...
咁就更簡單啦 五百人會主席係邊個...?

11月7日霧月17日五百人會主席向五百人會既雅各賓派成員通報 巴黎既保王黨即將發生針對佢地既政變 將佢地帶去巴黎市郊既聖克盧避難
11月8日霧月18日西哀士 巴拉斯 杜科突然辭任督政官令督政府低於法定人數被解散
五百人會緊急討論新任督政官人選 係聖克盧既雅各賓派先驚覺佢地被帶出巴黎本身就係政變既一部分
11月9日霧月19日經過一日通宵討論 因為冇左最大黨雅各賓派五百人會各小黨派互相傾軋遲遲未就督政官人選達成共識
就係呢個時候拿破崙帶住班擲彈兵衝入會議廳
因為你地共和國已經無法管治啦!!
奧熱羅見到就一前截住佢
咁你帶住兜兵入黎想點啊!?
我係黎結束革命!!
咁憲法呢!?你連憲法保護議會都夠膽推翻!?
你同我講憲法你地有尊守過咩!?果月政變時你地踐踏左佢!!花月政變時你地踐踏左佢!!牧月政變時你地踐踏左佢!!跟本從來未有人尊重過佢!!兄弟做野!!
拿破崙下令擲彈兵將議員拖出會議廳
主席!!班軍佬做反啦!!請裁決!!
議會望向佢地最後既希望 一直係主席台上帶住一絲冷笑就手旁觀既五百人會主席
佢個名叫呂西安 姓波拿巴 拿破崙·波拿巴個細佬呂西安·波拿巴
好啦五百人會解散 大家可以返屋企啦
仆街!!你背叛我地!?
有個議員係懷中掏出小刀撲向呂西安 但比擲彈兵攔住左
就咁拿破崙就更加名正言順驅散左五百人會
同日繆拉帶兵去到聖克盧將雅各賓成員全數拘捕

霧月政變

第二日元老院宣佈休會三個月由拿破崙 西哀士 杜科任臨時執政
終於...終於比我等到革命結束啦...唔得 唔係感動既時候...我要快D返去寫埋套憲法建立真正既民主法國!!
但未等西哀士完成佢編憲法12月24日拿破崙已經私自交出共和八年憲法交予公投
我編憲法早就開始寫...寫左咁耐都未寫完冇理由你.....唔通!?
哼...你唔係以為我山長水遠游過地中海就係走黎幫你抬橋下嘛!?我早就準備好啦!!

凱撒渡過盧比高河啦

12月25日法國公投三百萬票對千五票通過共和八年憲法
拿破崙當選第一執政下面設兩個執政官由夏爾·弗朗索瓦·勒布倫 讓-雅克·雷吉斯·德·岡巴薩雷斯擔任
岡巴薩雷斯開始編寫一套新既法律

三人執政左到右 讓-雅克·雷吉斯·德·岡巴塞雷斯 拿破崙·波拿巴 夏爾-弗朗索瓦·勒布倫

經過八年既流亡 因拿破崙上台政局穩定拉法葉從美國返回法國
有人問佢你係美國獨立既英雄 佢係法國革命既英雄 你有冇興趣幫佢做野啊?
拉法葉笑一笑
...拿破崙係王宮太耐已經忘記軍營既生活啦...

1800年1月20日繆拉同拿破崙個妹卡羅琳·波拿巴結婚
6月14日拿破崙係馬倫哥擊敗義大利既奧地利軍
而到12月3日係萊茵河既奧軍亦係霍恩林登被擊退
見戰況逆轉俄羅斯退出反法同盟聯合丹麥 瑞典 普魯士成立第二次海上中立武裝運動

拿破崙橫越阿爾卑斯 雅克-路易·大衞畫

咩係中立呢?
姐係英國同法國交戰 英國封鎖左法國既海岸冇人可以係海路同法國佬做生意
但有D國家宣稱自己中立就大搖大擺駛入法國既碼頭然後同你講
唔好打我啊 我中立架 你打我就等於宣戰架啦

當年美國獨立有條聰明仔做嫁兩比英國打7左
而家又多條聰明仔玩多次
如果發起個個叫俄羅斯 英國佬未必夠膽郁佢
但有D聰明仔唔諗下自己咩斤兩都諗下自己咩位置
個個叫丹麥

因為第二次海上中立武裝運動瑞典既木材源源不絕咁流入法國
英國擔心法國可能短期內重建艦隊突破封鎖
咁英國政府就派左支38架戰艦其中有12架戰列艦既艦隊前往北海
臨走前佢地提醒呢支艦隊既提督海德·柏加 我比支艦隊你只係要你搞炮艦外交 千其唔好開拖啊
YES SIR!!
不過佢下面個艦隊司令叫奶路臣

佢地第一個就搵上左北海門口既丹麥
1801年4月呢支艦隊游到去丹麥首都哥本哈根門口
當丹麥人見到英軍艦隊駛至 佢地就摷均全國共七架戰列艦泊係哥本哈根岸邊警戒
雖然數量不足但有海岸要塞補救 再加上哥本哈根對出仲有一大個沙洲 英軍將會難以靠近 只要拖耐左佢地就會自動退兵

當英軍去到哥本哈根奶路臣就日日去同柏加請戰啦
唔得 我地唔係黎打仗既 我地只係黎逼使丹麥退出海上中立武裝運動 如果一開拖我地就等於同海上中立武裝運動宣戰 英國負擔唔起呢個戰爭
咁你知唔知點解其他海上中立武裝運動國家仲未黎幫拖啊!?因為瑞典而家逆風 而俄羅斯既波羅的海仲未融冰
只要再等一個月呢到就有百幾架戰列艦 到時唔好話外交 佢地打到英國門口都冇人擋得住啊!!

4月2日英國艦隊從北面駛近哥本哈根 而奶路臣就帶12架戰列艦兜過沙洲從南面進入
一開戰英軍因丹麥海岸要塞猛烈炮火陷入苦戰 係北面柏加坐鎮既旗艦見到就淆底啦
果然唔夠打...快D升撤退旗叫奶路臣走啦!!
係南面奶路臣既戰艦上面既信號員叫到撤退旗就即刻通知奶路臣啦
咩話!?撤退!?冇理由架!!比支望遠鏡我睇!!
奶路臣將支望遠鏡擺係佢盲左既右眼上面
咩撤退旗啊?我咩都見唔到喎...你知啦盲人有時係有特權架...全船繼續進攻!!
只需四個鐘 晏晝2點丹麥就投降退出海上中立武裝運動
失去左丹麥北海各國再冇辦法支援法國 海上中立武裝運動解散



哥本哈根海戰

雖然及時解散左海上中立武裝運動但已經有大量木材經佢地流入法國
如果佢地建立艦隊再次出兵英國既 目的地不外乎愛爾蘭
咁英國首相就向國會提交1800年聯合法令合併愛爾蘭議會
8月1日係英國國會好順利通過 但問題係愛爾蘭

呢到唔係蘇格蘭咁同英格蘭有共同既宗教背景
一百年既宗教改革更堅定佢地羅馬教會信仰 再加上英格蘭長期殖民加強對方既仇恨
咁英國首相就用封地同貴族銜頭賄賂左D愛爾蘭議員並承諾會尊重愛爾蘭既宗教信仰
最後愛爾蘭議會亦係8月1日通過1800年聯合法令合併成大不列顛及愛爾蘭聯合王國
英國首相就好滿意咁拎比國王佐治三世睇啦
咩話!?要我尊重呢班羅馬走狗既宗教信仰!?咁我登基時發誓捍衛聖公會既承諾要點啊!?你要我放棄王位送埋我上斷頭台我都唔會對呢班羅馬走狗有半點退讓!!
佐治三世向首相施壓而國王既表態亦傳左返愛爾蘭 愛爾蘭人認定自己受騙獨立呼聲更加響亮
最後英國首相係內外交逼下係1801年3月14日辭職
呢個首相叫小威廉·皮特 七年戰爭拯救英國既首相第一代漆咸伯爵老威廉·皮特既二仔
呢次係佢第一次封相

小威廉·皮特

小威廉·皮特下野後由溫和派既西德默斯子爵亨利·阿丁頓任相
英國開始同法國和談

1801年2月9日法國 神聖羅馬帝國簽訂呂內維爾條約
法國吞併萊茵河西岸並從東岸撤兵 雙方承認並尊重巴達維亞共和國 赫爾維蒂共和國 利古里亞共和國 奇薩爾皮尼共和國既獨立

7月15日法國同教廷簽署1801年教務專約承認天主教係大多數法國人既信仰但唔係國教 法國同時會保障新教徒既宗教自由
教宗有權廢黜主教 法國政府會平等對待不宣誓教士 教廷放棄索取1790年後被沒收教會財產既賠償 法國停用共和曆

1802年1月26日奇薩爾皮尼共和國改名為義大利共和國

3月25日英法簽訂亞眠和約
法國從那不勒斯 教皇國撤兵 英國從馬爾他 直布羅陀 埃及撤兵 將馬爾他交還醫院騎士團 開普敦交還巴達維亞共和國

至此法國革命戰爭結束
儘管佢地早就忘記為咩革命
乜撚野民主自由平等博愛
而家佢地只要拿破崙帶領佢地縱橫歐洲 日日收到從前線送黎捷報佢地就可以忍受更甚於波旁家族既暴政
法國大革命被視為近代史既結束現代史既開始
係呢短短十年間法國人經歷左往後一百年全歐洲人將會反覆經歷既社會變革
民主 平等 反君主 反教會 市民暴動 特務政治 共產主義 民族主義 國家恐怖主義
最後革命由民主開始從民族告終

8月通過共和十年元老院憲法修正案封拿破崙為法蘭西共和國終身執政
大革命已經達到佢發起既原則 大革命已經結束!!
係德國有個音樂家聽到...唔係 係睇到 因為佢係聾既
不過係一介凡人居然為左自己既野心踐踏人權將自己踩係眾人之上學人做皇帝!?
個音樂家睇到呢個消息就將手上一首寫左成年準備獻比佢最祟拜既民主英雄拿破崙既樂譜撕成碎片
佢叫貝多芬 首歌就係大家而家聽緊既第三交響曲~英雄~

後世又有另一個德國作家寫過一句話
每個歷史重大事件都會重複發生兩次 第一次係悲劇 第二次五十年後再講

下集拿破崙戰爭

當年打生打死將國王推上斷頭台,十年後投票將拿破崙推上國王寶座

那時貝多芬未聾..... 不過開始有少少問題..... 另外，因為法國大革命，英法戰爭而雙方都引入國歌這個概念，例如貝多芬為英國重新譜奏 God Save the King，WoO 78 WoO 157， 同時為法國寫左首 Eroica

拿破崙完左係咪到意大利同德意志

又貼漏左人

路易·尼古拉·達武

第一次係悲劇 第二次就鬧劇
三世真係不及一世

第一次係悲劇 第二次就鬧劇
三世真係不及一世

阿侄仔佢真係廢好多

陳雲：馬克思在《路易·波拿巴的霧月十八日》寫過，所有歷史事件都會上演兩次，第一次是悲劇，第二次是鬧劇（farce）。


一九八九年的天安門運動，強調學生的純潔，要照顧軍警的心性，要溫柔，要悲情，結果失敗了，成為血腥的悲劇。從此中國民運一蹶不振。


台灣的佔領立法院事件，如果變成天安門運動那種模樣，就以鬧劇告終。從此台灣人很和平，很溫柔，等待共產黨過來接收。


Wan Chin 人世是公平的。給大家同樣的機會，有人成功，有人失敗。不要怪天，怪自己。


Wan Chin 甲午年，大轉折，大家看吧。



陳雲：人世是公平的。給大家同樣的機會，有人成功，有人失敗。不要怪天，怪自己。
https://www.facebook.com/wan.chin.75/posts/10152247153012225



The Eighteenth Brumaire of Louis Bonaparte
https://www.marxists.org/chinese/Marx/1851-1852/

17世紀同英國打海戰真係冇得贏

各位巴打點評價羅伯斯比爾？

各位巴打點評價羅伯斯比爾？

假如有輪迴
我估史太林前世就係羅伯斯比爾

那時貝多芬未聾..... 不過開始有少少問題..... 另外，因為法國大革命，英法戰爭而雙方都引入國歌這個概念，例如貝多芬為英國重新譜奏 God Save the King，WoO 78 WoO 157， 同時為法國寫左首 Eroica

點解你樣樣都知嘅
你睇多書

各位巴打點評價羅伯斯比爾？

假如有輪迴
我估史太林前世就係羅伯斯比爾

我介紹3本書你睇
一本佢啊妹寫既羅伯斯比爾傳
一本羅伯斯比爾選集 記錄左佢既演講
一本係佢唯一著作革命法制和審判
睇完你仲會咁諗先返黎

reading

陶傑 - 讀法國大革命

香港蘋果日報

中國高層在流傳法國大革命研究，其權威論著，就是十九世紀法國歷史學家 托克維爾。


歐洲的現代史，就是由法國大革命誕生的。我在本欄說過，不識法國大革命，無資格論政。現在更要修正：正如沒看通紅樓夢，不太有資格稱為 中國知識份子，同理，不懂法國大革命，無以做一個世界公民。


法國大革命是 說不完的故事，讀不完的教科書，回味不盡的激情劇。讀法國革命史透澈，能知過去未來，可悉人性思想：歷史的大海嘯爆發了，如何自處？本來是好人，為何變成了惡魔，明明是庸人，為何變成了 犧牲品。


法國大革命史尚可與 中國歷史並讀，譬如：三國演義，曹魏篡漢，最後天下卻盡歸司馬懿。法國大革命，最後革命派也分裂而自相殘殺，卻由拿破崙「 冷手執個熱煎堆 」，統合大局，而且在歐洲稱帝。


讀歷史要有這樣的「 平行閱讀 」，才有心得，自己領悟道理，歷史就像工商管理一樣，完全可以應用。不要少看這門學問：在亂世中，學會隔岸觀火，趨吉避凶。


讀別的學科，你可以發財，但歷史學 不是讓你發財的，是在生死關頭，學會保命的。


又譬如，如果你活在一九四六年的上海，東亞戰爭剛結束，共軍進東北，與蘇俄一起劫收日本留下的物資，然後坦克、裝甲、重機槍，共軍一下子就「 現代化 」了。這時毛×東來挑戰中國民國的法統了。


中日八年血戰之後，司馬懿和 拿破崙之類的野心家 要出來「 標尾會 」了。然後會如何？讀通了 法國大革命，你就明白，不可以再押注在蔣介石身上了，而且如果你有工廠 和資本，或沒有錢，但有知識，崇尚品味，千萬不要遲疑，要離開上海，去殖民地的 香港了。


所以讀法國大革命史，最後是不是學保命呢？現在的中國政權研究法國大革命，也一樣想保命。但是他們的角度不同。中國考慮的絕不是貧富懸殊，必須打擊貪污而令社會更公平，而是從國王路易十六吸收教訓：


法國革命的爆發，是因為國王一念之仁，邀請平民開大會，直接對話，推行政治改革。所以，政治改革這個缺口，絕不可以打開，不然，洪水就會衝決堤了。


所以連共產黨 也知道精研歷史，香港特區的「 從政人士 」，無人對這科有認識。他們把中國歷史科砍掉，以為憑 MBA、律師、測量會計，就可以管理香港，與中國打交道。


讀法國大革命，不必要啊，能賺到幾多錢呢？所以，香港是死路一條，香港之垮亡，在中國之先。此一道理，法國革命史也說明了。