一般講到神聖羅馬帝國大家都會諗起伏爾泰所講既:既唔神聖亦唔羅馬更唔係帝國
究竟神聖羅馬帝國衰過D咩要比人咁樣講呢
故事就從羅馬帝國既滅亡開始講起
話說係公元4世紀未有支西方人前所未見遊牧民族突然出現係中亞山區
並以西方人前所未見既野蠻去壓其他羅馬人眼中既"野蠻民族"
呢支遊牧民族就係上帝之鞭匈奴人啦
佢地首先征服東歐既遊牧民族阿蘭人即係漢朝所稱既奄蔡
然後匈奴人又帶住阿蘭人繼續西進侵擾係中歐岩岩建國既東哥德王國
今次東哥德人就避無可避啦
佢地一部分加入匈奴另一部分就作為傭兵內附羅馬
一直以蠻族作為屏障既羅馬帝國佢地最富庶既地中海治岸遭到一眾蠻族既直接搶掠
匈奴人既侵略唔單止破壞東西羅馬既經濟更重要既係做成民族大遷徙既開始
一眾蠻族湧入羅馬帝國做佢地既傭兵實質就係加入搶掠
哥德人,汪達爾人,勃根地人,倫巴底人,安格魯人,朱特人,阿瓦爾人,馬扎兒人,斯拉夫人.......
仲有更重要既係今集既主角法蘭克人

民族大遷徙路線圖

係475年一位蠻族軍官歐瑞斯特攻入當時羅馬首都拉文納時任西羅馬皇帝逃入拜占廷境內
歐瑞斯特立自己個仔羅慕路斯做西羅馬皇帝
476年日耳曼人奧多亞塞廢左佢頒布退位詔書宣佈西羅馬各省總督自決轄地命運
當時比利時高盧省總督法蘭克人薩利昴部領袖希爾德里克一世建立法蘭克王國墨洛溫朝

公元477年歐洲勢力圖

481年希爾德里克個仔克洛維一世繼承王位
507年克洛維一世將西哥德人趕入庇利牛斯山以東
確立左法蘭克王國西部界線
而佢對後世影響最大既係佢頒布薩利克繼承法
薩利克繼承法既內容係如死後無子則由女生繼承
呢點將會帶黎後世多埸各國王室圍繞繼承權引起既戰爭
511年克洛維死後根據日耳曼傳統財產由兒子平分
因為佢有四個仔所以佢個國家就分左四分
細仔死晒其財產又會返返去佢大仔或其後人繼承
因為呢種長期斷續既分裂令法蘭克王國既實權落係宮相身上
就咁又過左200年
歐洲呢班蠻族可以和平地互相斯殺既日子終於結束
係中東阿拉伯半島新興既伊斯蘭教趁拜占庭同波斯打得難分難解既時候成功擴張勢力
佢地先消滅左波斯帝國然後沿住北非沿岸游過直布羅陀海峽了結埋盤踞係伊比利亞半島既西哥德王國
最後佢地仲爬過埋庇利牛斯山直指西歐天主教世界
而首當其衝既就係法蘭克王國
732年法蘭克王國宮相鐵鎚查理帶兵係圖爾阻擋左阿拉伯帝國既擴張(世紀帝國2征服者戰役其中一關)

阿拉伯帝國領土範圍

737年時任法蘭克王國國王提奧德里克四世死埋大權在扼既鐵鎚查理7年拒立新王
741年鐵鎚查理死佢個仔矮子丕平繼承宮相
743年丕平立提奧德里克四世個仔希爾德里克三世為傀儡王
一次丕平同時任教宗匝加利亞會面就呻啦
啊我個國王乜撚都唔做點算好呢
教宗就答啦邊個做野既咪邊稱王囉
得到左教宗默許751年丕平廢黜希爾德里克三世自立為王建立卡洛林朝
咁都做得出幾咁大逆不道簡直人神共憤
不過唔緊要最緊要係登基當日丕平得到教宗既親自加冕
連代表神講野既教宗都話得囉仲有咩唔得呢
呢場登基典禮開創左世俗政權需要得到教宗冊封既先例
由此教宗就成為中世紀政治動盪既根源
好景不常年頭先幫丕平加冕完年尾義大利就遭到倫巴底人呢班山番入侵
為左報答教宗既大恩大德丕平當然義不容辭立即幫拖
756年丕平戰勝倫巴底人並將義大利中部送比教廷成為教皇國史稱丕平獻土

教皇國領土

呢兩條撚樣都算好事多為啦
一個發明冊封 一個發明獻土
咁請問究竟冊封封建領主既教宗大啊?定教宗不過係封建領主分封既諸侯呢?
呢點就會成為下集敘任權鬥爭其中一項爭議
768年丕平去世佢兩個仔卡洛曼同查理平分國土
771年卡洛曼死埋查理一個獨吞
查理繼位以黎不斷擴張領土
法蘭克王國征服左今日從法國到德國從低地國家到義大利北部
確立左今日西歐既範圍

法蘭克王國擴張

突然得到一大片義大利中部既教廷佢地唔知到咁係代表住你唔再純粹係宗教人物
你仲要照顧埋當地貴族需要
799年時任教宗利奧三世被當地貴族趕出羅馬
然後查理出兵接返佢返去
好好記既一日800年12月25日聖誕節
查理係聖彼得大殿做禮拜時突然被教宗加冕並冊封為羅馬人民既皇帝
神聖係指教宗既加冕
羅馬係指羅馬城既人民
帝國係指歐洲唯一既皇帝
從此查理國王就變成查理曼大帝
法蘭克王國就變成神聖羅馬帝國
814年查理曼大帝駕崩
佢死剩既最後一個仔虔誠者路易
聽個名就明佢係咩人
虔誠者路易唔同佢祖先佢係個比起政治佢更中意拜神既耶撚
根據日耳曼人既傳統佢又要將佢既領土分比佢三個仔
大仔洛泰爾一世得到意大利
二仔丕平一世得到阿基坦
三仔日爾曼人路易得到巴伐利亞
佢地三個都已經覺得分唔均啦
好衰唔衰身為耶撚居然咁生得又生多個仔禿頭查理又要分多份
三個大仔都做佢老豆個反啦而且今次連教宗額我略四世都企埋地個邊
833年虔誠者路易退位四仔禿頭查理收監
屌你正啊喂今次老豆身家三個仔任分
大仔洛泰爾一世就話啦我係大仔我要最大份
兩個仔就話啦:老奉啊?
佢地又放返老豆同禿頭查理出黎食大佬洛泰爾一世既領土啦
840年比佢四個仔玩左成世既耶撚虔誠者路易駕崩
老豆死埋 冇人話事 身家點分?立架生啦!!
打左兩年洛泰爾一世頂唔順認輸
843年簽定凡爾登條約將法蘭克王國分三份
一份洛泰爾一世既中法蘭克王國
一份禿頭查理既西法蘭克王國
一份日耳曼人路易既東法蘭克王國
洛泰爾一世又有三個仔同佢分身家
最後中法蘭克王國係墨爾森條約比東西法蘭克王國吞埋

843年凡爾登條約同870年墨爾森條約既分割

日耳曼人路易生左個仔胖子查理
胖子查理又比佢個侄阿努爾夫廢左
阿努爾夫又早死得個幾歲既仔孩童路易
孩童路易係911年十八歲時死埋
東法蘭克貴族選法蘭克尼亞公爵康拉德一世做東法蘭克王國國王
東法蘭克王國卡洛林朝結束
康拉德一世又傳位比薩克森公爵捕鳥者亨利建立薩克森朝
936年捕鳥者亨利個仔奧圖一世繼位
當時教皇國不斷遭到倫巴底王國既入侵
時任教宗若望十二世就向奧圖一世承諾如果你搞得掂倫巴底人既我就封你做神聖羅馬帝國皇帝
962年踩住倫巴底人既屍骸進入羅馬城既奧圖一世受封神聖羅馬帝國皇帝
正式成立今日我地所知既神聖羅馬帝國
作為交換奧圖一世又頒布<奧托特權>確認教皇國係教宗私產係教皇國內教宗有絕對既權力同時教宗又要忠於神聖羅馬帝國皇帝
呢個時候若望十二世心諗...扑街啦...我講下咋喎...對付倫巴底人都仲好d啦...家陣門口個個係東法蘭克王國...點頂啊...
之前就引虎驅狼啦咁而家又要引咩驅虎好呢?
若望十二世靈光一閃---拜占庭!!
而呢個故事教訓我地遠水難救近火
奧圖一世發現佢既計謀就立即帶兵攻入羅馬自立新教宗利奧八世
利奧八世死後再立若望十三世

奧圖一世開始左教宗冊封皇帝皇帝選舉教宗權力自我繁殖既先例
教宗同皇帝既權力不斷糾纏
雙方既和平建立係非常微妙既平衡之下
係呢個槍桿出政權既混亂時代中
任何一方權力既掘起或衰落都會令呢個體制同佢所引申出既秩序徹底崩潰
下集敘任權鬥爭