唔好以為睇你post嘅人少過_大_
回post表示支持

https://youtube.com/watch?v=VbxgYlcNxE8

1812年6月23日拿破崙渡過尼曼河進入俄羅斯
對此俄羅斯亦早有準備 巴克萊·德托利既廿四萬大軍亦係尼曼河對岸對待法軍既來臨
當法軍一渡過尼曼河呢廿四萬俄軍拔足就跑從此音信全無
我地戰無不勝既拿破崙皇帝威名遠播所向披靡!!我地唔洗打都可以行入莫斯科啦!!
最初俄軍既敵前逃亡鼓起左法軍既士氣 但等佢地行左兩個幾月之後佢地就後悔啦
如果打既話都仲有機會係敵人身上得到補給 但而家係佢地眼前既只係一片沙漠
冇錯係沙漠 俄羅斯既夏天炎熱而乾燥 植物稀少塵土飛揚 當時法軍面對既唔係大家想像既雪原 係沙漠
巴克萊·德托利個廿四萬大軍負責將法軍進路前每條村移平
幾百公里既荒地養近百萬大軍 後勤補給完全無力負荷
饑餓疾病係軍中肆虐 士兵開始擅自離隊然後一去不返 當佢可以再同隊友見面時已經變成地上既白骨
人類從未係歷史中得到任何教訓 又或者當時根本冇人將卡爾十二世當成一個教訓

7月18日英俄簽訂厄勒布魯條約結束兩國既戰爭並同瑞典結成盟友共同對抗法國入侵
7月22日英葡聯軍係薩拉曼卡戰役擊敗法軍攻入馬德里 英軍總指揮阿瑟·韋斯里獲封威靈頓伯爵

8月14日拿破崙終於到達俄羅斯境內既第一座大城 斯摩棱斯克
法軍既偵查發現城內有七萬俄軍 拿破崙認定呢到將會成為決定性既戰場 又或至少係件唔錯既補給品
16日十七萬法軍開始包圍斯摩棱斯克 七萬俄軍據城固守
第二日巴格拉基昂帶住六萬俄軍增援 而家城內既俄軍已增至十三萬人
拿破崙更加深信呢到必定係最終既決戰之地就下令放鬆包圍
圍佢好啦 唔好攻陷啊 我要吸引全俄國既軍隊集中晒係到一次過殲滅!!
但當十七萬法軍懶懶閒係城外紮營時 城內既俄軍已經開始左佢地既戰鬥
拖晒D平民走!!唔走就殺!!拎得就既就拎!!拎唔走既就燒!!燒唔爛既野就同我打碎佢!!一條草都唔好留比法國佬!!
18日拿破崙驚覺城牆上既守軍愈黎愈少既時候佢先發現自己既天真
扑街!!快D攻城!!佢地走緊啊!!
等班法國佬爬上城牆時城中已經化成一片火海 一條十三萬人既人龍從東門伸向東方既地平線
晒左兩日時間黎露營最終一無所獲 拿破崙要急起直追爭取係物資用完前進入莫斯科

斯摩棱斯克戰役

但打到呢到俄羅斯國內對焦土戰術既反對聲音亦愈黎愈激烈
條蘇格蘭佬燒左斯摩棱斯克啊!!斯摩棱斯克係我地既民族發源地千幾年既歷史名城佢一把火就燒撚左啊!!
就算要玩焦土戰 可以燒我地俄羅斯人既屋既就只有俄羅斯人自己!!
亞歷山大一世頂唔住輿論要搵人接替巴克萊·德托利 但要搵個純種俄羅斯人又要有咁上下軍隊經驗既人邊到搵?
亞歷山大一世搵黎搵剩係搵到一個
死肥佬庫圖佐夫
今次你係想打啊嘛!?咁你同我好好睇睇打一場!!

9月7日十五萬俄軍進駐莫斯科以西120公里外既博羅金諾村
博羅金諾村位於莫斯科河支流科洛恰河北岸 庫圖佐夫將佢既軍隊分成四個軍團
最大分既係佢既右翼放係博羅金諾村東面面向科洛恰河由巴克萊·德托利帶領
冇咁大分既中路係博羅金諾村南面向西 築有雷夫斯堡
最細分既左翼擺係中路既南面巴格拉基昂帶領 築有巴格拉基昂堡
呢三隊構成一個尖向西北既直角型 庫圖佐夫同佢既預備隊就係呢個直角東南既空間入面
庫圖佐夫呢個佈陣係希望利用向西兩路堅守堡壘消耗法軍 然後右翼趁機過河包抄

一直追求決戰既拿破崙亦帶住十三萬人從西面黎到 兩軍中間被一條源自科洛恰河既小溪隔開
拿破崙考慮到俄軍右翼人數眾多且隔河防守唔適合作為攻擊目標 咁就只有從正面強攻
法軍係科洛恰河南岸向東展開陣形 主力係中路由達武帶領 右翼係內伊 後面有預備隊既繆拉
另外係科洛恰河北岸只有少數既波蘭軍團保護法軍係南岸既左翼防止俄軍右翼渡河

朝早6點小溪兩側合共千門大炮齊射 中路既達武首先操向小溪對岸既巴格拉基昂堡
因為中隔住條小溪河谷爬過去之後仲有大量拒馬土壘令法軍步步為艱 呢個時候巴格拉基昂堡中數百門大炮掃射向小溪
戰場仿如第一次世界大戰既戰壕戰 小溪成為戰壕間既無人帶 步兵源源湧入只係白白成為大炮既食糧
法軍步兵化身人盾掩護炮兵前進破壞俄軍既防禦工事 見到法軍炮兵推進巴格拉基昂堡中既俄軍都爬出碉堡係小溪上同法軍殊死一戰
巴格拉基昂堡前既血戰一直維持到11點
鮮血淹過溪水 屍體填滿河谷 不過一公里長既小溪就堆滿左過萬人馬既屍骸
達武 內伊 繆拉全個法國正面軍都衝到巴格拉基昂堡下
眼見俄軍人數最少既左翼快將失守 庫圖佐夫下令預備隊包抄法軍右翼 巴克萊·德托利一半渡河包抄法軍左翼另一半支援巴格拉基昂堡
當巴克萊·德托利一渡河就比恭候已久既波蘭軍團擊退 不過預備隊既攻擊分散左法軍既火力令巴格拉基昂堡得以重整
但係呢個時候一個炮彈飛埋黎係巴格拉基昂身邊爆炸炸飛左佢既左腳
巴格拉基昂強作鎮定繼續指揮 但冇耐失血過多跌左落馬先比人發現佢既傷勢抬離戰場
12點繆拉同佢D騎兵成功穿過俄軍炮兵既火力盲點衝到巴格拉基昂堡下 庫圖佐夫放出所有騎兵攔截
一輪奮戰後繆拉擊退俄軍騎兵終於衝上巴格拉基昂堡 內伊 達武都從後跟上 前線從南方推進到雷夫斯堡
只要攻陷埋法軍就可以宣佈勝利 所有人都上晒戰場而家只係剩低拿破崙身邊既帝國衛隊 推埋佢地上戰場一次過消滅俄國佬啦陛下!!
嗯...天色都開始暗啦...今日之內打唔晒架啦...佢地就留返聽日先用啦...
夜晚7點兩軍各自退兵

第朝天光 戰場上依然係個堆屍體
但對面已經冇人
走晒!?又走!?班俄國佬究竟想點架!?你唔打我就攻入莫斯科架啦!!就當我求下你出黎同我打返場啦!!
博羅金諾戰役 法軍死二萬八 俄軍死四萬四 第一次世界大戰前歐洲單日死人最多既戰役









博羅金諾戰役


https://youtube.com/watch?v=k97nvOSBDnk



https://youtube.com/watch?v=eI8dZhuJQyU


庫圖佐夫!?你返黎啦!?場仗打成點啊!?拿破崙收左皮未啊!?
未
未!?你打輸左!?佢已經去到莫斯科門口個囉喎!!
陛下 臣冇打贏亦冇打輸 以臣係博羅金諾所見法國佬著既都係夏天既軍服 就憑呢點我地已經贏左啦
贏你老母啊!!你趕唔走拿破崙仲拖住十幾萬人返黎同我講呢D野!?你同我推晒佢地去死都要守住莫斯科啊!!
陛下 我唔可以將寶貴既軍隊浪費係佢地身上 拿破崙想要莫斯科既咁咪比佢囉 如果佢想要聖彼得堡既都比埋佢啦
俄羅斯冇左莫斯科唔會死 但國家冇左軍隊就玩完啦!!陛下我地搬屋去聖彼得堡啦

係維也納另一個皇帝都收到封黎自巴黎既信
入面只有短短一句
夠鐘撤兵啦

9月15日法軍進入莫斯科 如同一路既經歷呢到早已變成一座空城
雖然俄國佬早就搬走晒呢到所有野 但好彩佢地冇好似斯摩棱斯克咁放火燒城
至少而家有個有瓦遮頭既地方比疲憊既法軍休息下

15日晚 十萬法軍難得既安眠
最初只係市郊少少既火花 然後...
...陛下...陛下!!起身啦陛下!!出面燒起上黎啦!!
係克里姆林宮訓緊覺既拿破崙半夜被嘈醒爬出窗外一望
成個莫斯科市都燒起上黎 全軍係熟睡中被趕起身救火 最終燒足三日三夜
18日天上開始飄落一片片雪花撲滅地上既火花
...落雪啦...睇下落雪啦!!家陣連個天都幫我啊!!亞歷山大一世!!知驚就快D投降啦!!

莫斯科大火

火災後視察既拿破崙

俄羅斯落起第一場雪之後就再未停過
每日急降十幾度
而家莫斯科城中仲著住夏季軍服既法軍恨不得燒著成座城黎取暖
法國派往聖彼得堡既談判代表一一被拒絕 薩拉曼卡戰役後西班牙既法軍節節敗退
征俄前線既奧地利軍仲擅自撤兵 普魯士萊茵邦聯緊隨其後 法國保王黨人乘勢起事
10月19日拿破崙不得不率兵撤退
俄軍開始反擊啦

法軍撤出莫斯科

當法軍一步出莫斯科俄國既哥薩克騎兵就無間斷出現偷襲
因為冰雪遍地補給不繼令戰馬缺乏牧草 再加上法軍冇準備雪地用既馬蹄
法軍騎兵追擊哥薩克時好容易線低跌斷腳令法軍損失大量騎兵
只係D馬死左都仲好D 但D馬死左就代表有肉食
一路缺乏食糧既法軍全軍往往就會因為好小既食物而自相殘殺

11月9日法軍重返斯摩棱斯克 攞埋緊餘既補給品同守軍就繼續上路
16日去到尼曼河前最後一座大城明斯克 但駐守係到既奧地利軍早就撤走左
法軍所有補給都落入俄國佬手上 法軍轉向北上
最終係26日終於去到尼曼河支流既別列津納河
因為愈黎愈近歐洲 天氣都開始回暖 士兵都可以鬆返口氣
但比佢地去到別列津納河前佢地已經再笑唔出


法軍撤退

因為天氣寒冷 俄羅斯既河流已經全部凍結
士兵都可以踩住結冰既河面過去 拿破崙就覺得反正都係啦鋪浮橋既架生都冇用架啦 揼晒佢啦
但邊境前既別列津納河偏偏仲未結冰 而且對岸仲有四萬俄軍等緊佢地
拿破崙就派左一萬人向下游走引開對岸既俄軍 之後派左班工兵去上游剩夜搭起左座勉強浮得起既"設施"
第朝天光三萬法軍向浮橋一湧而上 浮橋不堪負荷應聲斷裂 更引起左俄軍既注意
過左河既少數法軍歇力抵抗 另一邊既工兵加緊修建浮橋
等法軍有序過埋河趕走埋對岸既俄軍就諗住安全啦
點後面又有俄軍趕上黎 拿破崙就即刻下令炸橋
陛下!?我地仲有一萬人係下游未過河個喎!?
屌!!我都死左六十萬人係到啦!!再死多一萬人算D咩啊!?炸!!


別列津納河戰役
http://upload.wikimedia.org/wikipedia/commons/thumb/8/86/Adolphe_Yvon_%281817-1893%29_-_Marshall_Ney_at_retreat_in_Russia.jpg/640px-Adolphe_Yvon_%281817-1893%29_-_Marshall_Ney_at_retreat_in_Russia.jpg
係別列津納河為法軍殿後既內伊

12月12日法軍渡過尼曼河退出俄國領土
半年前都冇佢帶住六十萬人過河 半年後今日跟住佢返黎既人一萬都冇
生還率只有六十份一
無論百年戰爭既一百年 義大利戰爭大半世紀 牽涉全歐洲既三十年戰爭同七年戰爭
甚至將呢幾場仗既死亡人數加埋都唔及呢短短半年
法國人已經死盡 再冇人可以做呢隻科西嘉食人魔既爪牙

法軍進軍路線圖

法軍人數減幅

拿破崙退出俄羅斯後庫圖佐夫就向亞歷山大一世請辭
陛下你想要既係拿破崙既人頭定俄羅斯?呢場戰爭已經為人民帶黎莫大既苦難...我地而家應該要收兵同人民休養生息
我唔理!!而家邊個係皇帝!?我叫你追你就追!!
咁希望陛下以後可以成為一個名君啦...

2月27日普魯士加入英俄組成第六次反法同盟 奧地利宣佈中立
4月28日庫圖佐夫因傷寒係軍旅中過身

征俄失敗後拿破崙即刻趕返巴黎徵召廿萬新兵反攻東歐
但等佢支軍隊趕到黎既時候戰場已經推到入薩克森王國境內
拿破崙領兵十二萬進攻萊比錫
係萊比錫城西 當年古斯塔夫·阿道夫魂斷之地呂岑遇上布呂歇爾既七萬俄普聯軍
法軍以人數優勢好輕易擊敗左俄普聯軍
但因法國既戰馬都死晒係俄羅斯令法軍缺少騎兵 俄普聯軍戰敗後得以安然撤退

呂岑會戰後拿破崙繼續東進 九萬俄普聯軍放棄薩克森首都德累斯頓東退布雷斯勞
拿破崙帶十一萬法軍繼續追趕
為厘補騎兵不足既缺陷 拿破崙下令內伊先從北面兜截俄普聯軍既後路
5月19日拿破崙係德累斯頓以東既包岑追上俄普聯軍
但到開戰第二日內伊先到達戰場 俄普聯軍意識到後將被切斷就匆忙撤退
同樣因為缺少騎兵未能殲滅敗退既俄普聯軍

連贏兩場大戰但都一無所獲 拿破崙無奈同反法聯軍簽訂兩個月既休戰協定去重整軍備
拿破崙以為佢可以用兩個月重新準備一支戰無不勝既軍隊 事實上呢兩個月休戰只係比反法聯盟尋找更多盟友
8月11日休戰結束瑞典 奧地利向法國宣戰

休戰結束後拿破崙帶法軍主力東出布雷斯勞 但反法聯軍採取避其鋒芒斷其羽翼既戰略
布呂歇爾係柏林南面既葛羅比忍戰役 波拿道特係布雷斯勞後方既卡茲巴赫戰役戰敗左法軍
被孤立係布雷斯勞既拿破崙不得不退回德累斯頓
反法聯軍以為時機成熟8月26日集合廿一萬大軍包圍德累斯頓 但被拿破崙用十三萬人擊退
德累斯頓戰役後拿破崙以為自己得米就派十二萬人追擊退入波希米亞既反法聯軍 但又係庫爾姆戰役被徹底咁趕返出黎
加上進攻普魯士個路軍隊既失敗 拿破崙已經意興闌珊放棄所有主動攻勢
仲下令係後方督軍既奧熱羅將駐守萊茵邦聯各部隊退入萊比錫要係到同反法聯軍決一死戰
係到拿破崙十九萬法軍被三十六萬黎自全歐洲各民族既反法聯軍包圍
兩軍混戰三日留低共十萬條屍骸 但本應出現既奧熱羅卻遲遲未到 最後拿破崙不敵而逃
萊比錫戰役後繆拉自己一個走返那不勒斯國王加入第六次反法同盟向法國宣戰

萊比錫民族大會戰

拿破崙逃返巴黎後卻見奧熱羅同佢支十萬大軍完完整整咁擺係到
奧熱羅...!!因為你!!因為你既背叛令我打輸左場咁重要既仗!!因為你!!法國要亡啦!!
法國要亡...?陛下你要搞清楚 係因為你法國先要亡!!如果你仲係法國人民既皇帝就唔好為左自己既野心將自己既人民推去打一場必敗既仗!!

法軍退出德意志地區後萊茵邦聯加入第六次反法同盟向法國宣戰
12月2日反法聯軍攻入阿姆斯特丹推翻路易·波拿巴王位
21日反法聯軍渡過萊茵河
1814年1月14日瑞典丹麥簽訂基爾條約 丹麥將挪威割讓瑞典換取瑞屬波美拉尼亞 丹麥投降
3月1日英俄奧普簽訂儲蒙條約
約定推翻拿破崙後繼續反法同盟二十年以維持歐洲和平 四國各出兵六萬人組成聯軍防範法國侵略
3月30日巴黎守衛隊隊長馬爾蒙向反法聯軍投降 拿破崙逃入楓丹白露宮
列朗係巴黎成立臨時政府同反法同盟就拿破崙退位談判

俄軍進入巴黎凱旋門

巴黎中既俄軍

玩完了 乜撚都玩完了
回想廿年前佢只係土倫港中既一個小炮兵 憑佢既野心同堅持係呢短短廿年間爬上歐洲既頂峰將歐洲打個天翻地覆
然後俄羅斯一場雪就將佢打到眾叛親離永不翻身
而家係拿破崙身邊只係得返佢老婆 佢個仔 同內伊帶住個幾千個帝國衛隊
仲有塔列朗同佢手上既一張紙

陛下呢張係我同反法各國草擬既退位詔書 簽左佢萬事有商量
如果我簽左之後個王位邊個坐...?
......
...當然係我個仔啦...唔係我生佢出黎做咩啊...
...我會幫你爭取...
4月6日拿破崙退位


拿破崙退位

塔列朗攞住拿破崙封退位詔書返到巴黎同反法各國代表商討法國王位繼承人問題
繼承人問題!?拿破崙退位佢個位緊係由佢個仔繼承啦 有咩問題?
奧地利!!你緊係想佢個仔繼位啦!!有你個女睇住一個唔覺意連佢個位都比你坐埋添!!
咁波拿道特啦!!瑞典呢D小國同法國合併咁就勢力均衡啦
你都ON9!!瑞典就係你俄國門口 有咩事你就即殺入斯德哥爾摩 交比瑞典咪姐係交比你!?
咁奧爾良公爵路易·腓力啦 佢本身係法國貴族冇異議啦掛!?
有
塔列朗打斷左佢地既爭拗
你地係講緊法國既問題個呵?點解你地唔問下我地法國本來既王室?
只有路易十八可以繼承法國王位!!如果唔係路易就係拿破崙 其他一切建議都只係想操控法國既陰謀我係絕對唔會妥協!!

5月21日瑪麗·路易莎帶埋佢個仔弗朗索瓦·夏爾·約瑟夫·波拿巴返佢祖家奧地利
5月30日反法聯軍簽訂1814年巴黎和約
法國回復至1792年1月1日既疆域
反法同盟承認波旁家族為法國王室正統 法國承認荷蘭 瑞士 德意志 義大利各邦國獨立
拿破崙保留法蘭西帝國皇帝稱號流放至厄爾巴島 並每年收取法國政府二百萬法郎
呢樣就係塔列朗爭取既成果 冇割地冇賠款 一切責任由拿破崙孭

路易十八登基

科西嘉食人魔被流放到地中海不知名小島啦!!歐洲終於和平啦!!
拿破崙被流放厄爾巴島後梅特涅繳請歐洲各國到維也納商討今後既歐洲秩序
事實上係梅特涅意識到奧地利係拿破崙戰爭中已經打到亡國邊沿
周邊太多新興強國 奧地利已經無辦法再維持歐洲第一大國既地位
至少要係夕陽前主導歐洲未來秩序為奧地利賺返筆養老金

9月18日維也納會議召開
各國都派出代表劃分新歐洲既邊界
法國有塔列朗 奧地利有梅特涅 俄羅斯更由皇帝亞歷山大一世親自出席
而英國就派出代表外務大臣卡蘇里子爵羅伯特·史釗活

維也納會議
1.威靈頓6.梅特涅10.卡蘇里22.塔列朗

卡蘇里子爵羅伯特·史釗活

另一方面路易十八恢復王位後 佢只係成立左兩個裝飾性既上下議院
冇立法權冇否決權 只係一班圍埋吹水 國王繼續大權獨攬
路易十八堅持君權神授 佢恢復晒法國大革命前所有舊貴族同佢地既特權
佢下令全國農民補交佢係呢廿年流放時未收過既稅

十年破產十年革命十年征戰 今日法國除左你呢個死肥佬仲有D咩呢
你仲有咩可以係呢個國家身上搾壓到出黎呢
係維也納塔列朗聽到路易十八所作所為都不禁搖頭嘆息
呢條死肥佬...遲鈍 自我中心 只知享樂不知恩情 不記教訓只記仇恨 佢個國家唔亡就有鬼啦...

不過係呢個和平既亂世 無論係巴黎定維也納都冇人反省自身既罪行
繼續享受佢地最後盛宴
會議冇野討論 佢地只係係到跳舞

係地中海個個不知名小島 島上個個矮仔食人魔皇帝
攞住份法國報紙睇住佢地既報導笑左一笑
...我既人民需要我啦...

1815年2月26日拿破崙避開英法海軍嚴密監視帶住一千個侍衛係法國南部儒安港登陸
路易十八聽到只係哈哈大笑 有厄爾巴皇帝唔做走返黎法國送死啊!?
就派左內伊帶六千人去逮捕佢
臨走前內伊向路易十八承諾 我雖然係拿破崙以前條靚...
但佢為法國人民帶黎莫大既苦難!!而家仲有面返黎挑起事端!?我一定會將呢隻食人魔困係鐵籠到拖返黎!!

3月14日內伊帶住呢六千人追到去拿破崙面前
六千枝槍口對住拿破崙一個人 只要有一個人開槍事件就可以了結
拿破崙!!你白紙黑字承諾放棄王位 而家先黎反口!?
拿破崙冇回應內伊指責 佢只係打開佢既上衫 露出佢既心口 慢慢走向內伊既軍隊
你地願意射殺自己既皇帝既...咁就開槍啦...
六千人只要有一槍 事件就可以了結 但係一槍都冇
相反六千人中只要有一個離開隊伍 全部人就拋低自己既職務去勇抱佢地既小伍長
VIVE FRANCE!!VIVE NAPOLEON!!
最後只係剩低內伊一個企左係到
內伊...我會好似係莫斯科個時咁接見你
...陛下...!!我都係逼不得已先會跪係個條死肥佬面前咋!!我一直都係效忠於你架!!


拿破崙歸還


https://youtube.com/watch?v=ffeOvwBYkf4


15日那不勒斯國王繆拉見奧地利無意承認佢既王位就趁拿破崙越獄後向奧地利宣戰
17日大不列顛及愛爾蘭聯合王國 奧地利帝國 俄羅斯帝國 普魯士王國 瑞典王國 荷蘭王國 萊茵邦聯組成第七次反法同盟
20日係人民同軍隊既前呼後湧下拿破崙返到佢既首都巴黎 而個條死肥佬就再次流亡匆忙逃入荷蘭南部根特 即以前既奧屬尼德蘭
拿破崙恢復法蘭西帝國政治制度 任命拉法葉為上議院議員 達武為陸軍大臣
5月20日繆拉被奧地利軍擊敗逃入科西嘉

呢個時候荷蘭駐有威靈頓帶領既十一萬英荷聯軍 另外仲有布呂歇爾岩岩帶住十二萬普魯士軍趕到
後面仲有反法各國動員百萬大軍逼向法國邊境
拿破崙希望可以重演多次奧斯特里茨戰役 以一場決定性既勝利瓦解反法同盟
6月14日佢就帶住十二萬人分兩路攻入荷蘭
一路係拿破崙親自帶領既右路係16日里尼戰役擊退左布呂歇爾既先頭部隊
之後拿破崙搵左條友叫格魯希帶三萬人去追擊向北逃跑既普魯士軍 自己就向西支援另一路
同日係左路既內伊係四臂村遇上左威靈頓既主力 兩軍交戰不分高下
但係夜晚威靈頓收到布呂歇爾被擊退既消息擔心自己陷入包圍就主動向北撤退
內伊諗住帶騎兵追上去 點知突然落起大雨 就咁比英軍擺脫左

呢晚威靈頓帶住六萬英荷聯軍退入一條小村過夜
條村叫窩打老

窩打老戰役前三軍進軍路線

窩打老村南面再有條村叫蒙·桑·讓 英荷聯軍既指揮部設係呢到 再南面有座東向西既小山丘
山既南面再有多三條村 從西向東分別係烏古蒙 拉海聖 帕佩洛特
17日七萬法軍從南面趕到 係再更南面既另一條村普朗斯諾瓦展開陣形 係佢既右翼又有另一條村叫弗里歇魯孟

威靈頓將佢既軍隊匿係山既後面 然後係烏古蒙同拉海聖各擺幾百人做防守
守係呢兩條村既英軍唔係以某D實質戰鬥為目的而駐紮既
威靈頓將佢地擺係到只係防止法軍偵察隊爬過後面座山睇到山後英軍佈陣
因為英軍呢種配置係南方既拿破崙向北望過去就只見到三條小村 一排山丘同一望無際既麥田
雖然拿破崙爬上普朗斯諾瓦D村屋屋頂可以見到山後既蒙·桑·讓同入面既英軍
而法軍既偵察隊兜過座山都會撞上英軍既側翼
但拿破崙無辦法確定山後英軍既配置同人數 唯一可以肯定既就係佢地就係個到

18日朝早 連綿兩日既大雨終於係琴晚結束 但土地依然濕潤泥濘
為等待土地乾固 拿破崙將預定9點開始既進攻推遲到11點
陛下叫格魯希返黎一齊夾擊英軍會唔會好D呢?
唔洗 英國佬呢班水手邊識打陸戰架 我一個人都搞得掂 我怕就怕普軍擺脫格魯希追擊夾攻我地
傳令落去叫格魯希無論如何都要纏住佢地 唔好比佢地黎到呢到同英軍會合

進攻時間一拖再拖 土地既濕度都仲未令拿破崙滿意 但時間拖得愈耐普軍同英荷聯軍會合既可能就愈大
而且拿破崙因為年老同係厄爾巴島上休養生活令佢痴肥 精神不振 同痔瘡
佢而家連馬都騎唔到只可以攤係到等人將情報送上門 而佢就只係想盡快了結呢場仗搵個地方抖下

11點半拿破崙下令兩翼既法軍踩住泥濘前進
右翼負責包抄英軍既左翼截斷英普間既連繫 左翼則向烏古蒙發動佯攻務求將英軍既預備隊引入呢到
最初攻向烏古蒙既法軍好快趕走左英軍既守軍 但英軍係烏古蒙村後通往蒙·桑·讓既小路源源不絕加入支援烏古蒙
見烏古蒙既英軍不斷澎漲 拿破崙都將成個左翼倒晒落去
烏古蒙村變成萬幾人對萬幾人既大混戰

見英軍右翼係烏古蒙被拖住 拿破崙放心開始進攻中路
12點法軍炮火齊發射擊山後既英軍
但英軍都匿係山後 加上土地潮濕泥濘 炮彈只係直插入泥土中做唔到片石既效果
一輪炮擊後法軍右翼操向帕佩洛特

法軍先行既步兵攻佔左帕佩洛特之後 騎兵緊隨其後衝上兩軍之間個座山
呢個時候法軍先第一次見到英軍既佈陣 六萬英荷聯軍密密麻麻遍佈山後
法軍第一波騎兵被英軍密集火力擊退 但再幾輪衝鋒後法軍騎兵從中路將成支英軍陣地劏開
威靈頓即刻放出騎兵應戰 兩堆騎兵你推我撞
撞撞下法軍騎兵被撞左落個戰壕入面跌個人仰馬翻
英軍步兵見機圍上去將法軍騎兵打靶咁射

跌入戰壕中既法軍騎兵

撞冧左法軍騎兵之後英軍騎兵繼續衝
衝過左座山 衝過拉海聖 最後直撞向陣容整齊既法軍本隊
威靈頓即命傳令員吹響撤退既喇叭 但吹都吹唔返黎最後成支騎兵全軍覆沒
呢個時候勝利既天秤似乎已傾向拿破崙 突然右翼既偵察兵傳黎惡耗
普魯士軍出現係東面三個鐘頭路程外!!
咩話!?普魯士軍!?點解會黎到架!?格魯希係到做乜7架!!即刻落令比格魯希叫佢即刻同普魯士軍交戰!!無論輸贏點都要同我拖住佢!!
仆街啦...普軍黎到左右夾攻冇得打啦...總之係普軍黎到之前搞掂英國先話唔定有得打!!
內伊!!我將成支中路交比你!!同我盡快盡快!!攻佔拉海聖!!啊!!!!唔...唔掂...我痔瘡...!!

英軍騎兵衝鋒

4點內伊好快就攻陷左拉海聖 呢個時候佢爬過座山見到下面英軍中路變得鬆散
雖然唔知發生咩事但總之佢覺得機不可失 佢見後面冇人落命令比佢 身為拿破崙第一勇將既佢即刻帶晒全部騎兵衝向英軍本陣
點知佢一衝向座山見到既係廿個當年拿破崙係埃及排過既步兵方陣 而且每個方陣中間仲有幾碌大炮
如果有炮兵支援方陣其實係好脆弱既 但法軍炮兵都被山丘阻擋
內伊既騎兵直衝向英軍方陣 然後一輪子彈刺刀法軍不敵潰逃
但想走咩 方陣既步兵就會讓出空間比大炮轟炸法軍騎兵
但兜返轉頭英軍步兵又會砌返個方陣出黎
幾輪衝鋒後法軍騎兵全滅 就死剩內伊一個
內伊就連佢隻馬都死埋 佢一個人揮舞住軍刀穿插於方陣同屍體中間不斷大嗌
過黎啊!!同我死過啊!!知唔知我係邊個啊!?我係法國既帝國元帥米歇爾·內伊!!過黎睇下法國既帝國元帥係點戰死啊!!

法軍騎兵衝擊英軍步兵方陣

中路既步兵都跟住爬過座山 點知一爬上山頭一直匍匐係山下既英軍突然彈出以近距離射擊法軍
幾輪射擊後法軍最後一輪步兵衝鋒都被擊退 呢個時候六萬普魯士軍已經到達窩打老戰場
布呂歇爾下令以刺刀攻入法軍右翼既弗里歇魯孟 之後係村中架起大炮掃射整個戰場
6點英軍重奪拉海聖 7點普軍攻佔法軍後方普朗斯諾瓦
呢個時候格魯希先收到向普魯士軍進攻既命令
窩打老戰役拿破崙以七萬人對兩倍於已既反法聯軍 戰役以兩邊各死二萬人告終
但拿破崙已經再搵唔到二萬人黎支持佢啦

普軍攻入普朗斯諾瓦

法軍投降


https://youtube.com/watch?v=HAb4U6Pfl84


6月21日拿破崙逃返巴黎
咩話!?打輸左!?你山長水遠走返黎就係為左引入外國入侵架!?
我地動議罷免拿破崙既帝位!!
拿破崙個細佬議員之一既呂西安就拍枱話啦
動議罷免人民既皇帝係背叛祖國背叛人民既行為!!
係議會既角落 一個係政界沈寂左二十年既老人家平緩開口
佢為左佢個人既榮耀征戰全歐洲 為我地帶黎三百萬同胞既死亡 呢個皇帝憑咩代表國家民族呢?
全場人都望過去呢把最權威既聲音 佢係年屆六十既革命老英雄拉法葉侯爵
拉法葉都咁講...冇錯!!罷免啊!!罷免!!拿破崙係法國既暴君!!

6月24日拿破崙宣佈退位比佢個仔弗朗索瓦·夏爾·約瑟夫·波拿巴為拿破崙二世
不過呢個時候既佢同佢啊媽係奧地利享緊福
因為塔列朗係維也納開緊會 今次由富歇籌組臨時政府向反法同盟投降
反法同盟向陸軍大臣達武承諾唔會追究跟隨拿破崙既法軍將士 達武率軍向反法同盟投降
7月7日反法聯軍進入巴黎 路易十八再次復辟

拿破崙逃出巴黎後繼續向西走
只要比我搵到個港口上個船走到天腳底就再冇人可以搵到我!!嗯...去邊到好呢...冇錯!!美國我比個咁多人情佢佢一定會保護我既!!
但比佢去到海邊 水平線上已經浮滿英國既戰艦
上黎啦矮仔...我地等你好耐啦...
7月15日拿破崙被英國海軍HMS柏勒洛豐號逮捕 俄羅斯普魯士堅持要將呢隻違背諾言破壞和平既食人魔拖去打靶
拿破崙係船上苦苦哀求英王佐治三世庇護佢 最後英國佬將佢流放到大西洋更偏僻更不知名既小島
聖赫倫那


https://youtube.com/watch?v=-l6bX5aEdqE

10月13日繆拉被奧地利逮捕處死

11月20日波旁法國同反法同盟簽訂1815年巴黎和約
法國回復到1790年疆界
拿破崙流放至聖赫倫那島 並唔會得到任何資助
法國須賠償七億法郎予反法同盟
反法同盟係法國邊境駐紮十萬軍人三至五年 費用由法國承擔

內伊作為波旁王朝既軍人 帶領軍隊叛投侵略者被控以叛國罪送上軍事法庭
法庭上佢既律師為佢辯護
內伊既出生地已經係維也納會議中歸入普魯士領土所以內伊唔係法國人係普魯士人咁佢既背叛就唔構成叛國罪
聽到呢到內伊即刻彈起身 邊個話我唔係法國人!?我係法國人!!我從來都係法國人!!
12月7日內伊叛國罪成判以槍決
行刑人為佢用黑布蒙眼
唔洗啦 你唔知我幾十年士兵生涯都一直係直視子彈架咩?
士兵們!!呢次係我最後一次向你地落命令!!聽到我既命令就即管射向我既心臟啦!!我為法國打過一百場仗未有一次調轉過槍頭!!我抗議我既判決!!開火!!

1821年5月5日拿破崙過身終年51歲

拿破崙遺容

今次我地終於擊敗科西嘉食人魔啦!!
十幾廿年既混亂証明左共和主義同民族主義只係世界和平既破壞者
只有神聖既君主先可以保護人民既幸福!!
我地要聯合起全歐洲既君主消滅民族同共和主義為歐洲帶黎永遠既幸福!!

1815年10月一個囚犯因為偷麵包被判入獄二十年後終於獲得釋放


https://youtube.com/watch?v=e6jp_MKI_6w


下集維也納會議同梅特涅體制

終於到民族國家興起

巴打撐你！

博羅金諾果場真係睇到o哂嘴,竟然唔追擊

滑鐵盧果場好似話拿破崙係最後關頭都無俾帝國衛隊出擊,所以先打唔穿英軍防線,最後被夾攻先輸,其實係咪

內伊同繆拉都好撚勁,繆拉俾佢丟低一條友斷後都死唔去,內伊係滑鐵盧打到咁又死唔去

格魯希呢條友係邊柒到出來架 搵番d老部下出來帶好過啦

崙仔之後法國好似再唔到條友打起嚟有霸氣咁

Robespierre, 繼續努力........

講一講1812-1815年的音樂發展，音樂本身就不是獨立，而是與歷史進程有關....

因為拿破崙喜愛音樂，而當時最佳宣傳/洗腦工具就係歌劇，所以要求係所有佢佔領的地方宣傳這些French Grand Opera。這類French Grand Opera 一般都有4-5 Act, 比那時的Italian Opera 長多2-3 Act。

當然那時歌劇亦只有分正劇, 喜劇 以及Italian Opera。正劇就是那類 French Grand Opera. 1804年拿破崙為皇時，亦指令 Jean François Lesueur。

當中大部份正劇都是講述英雄以及歷史打敗敵人的事跡，都是側面歌頌拿破崙。
Ossian, ou Les Bardes, by Jean François Lesueur, in 1804
Joseph en Egypte, by Étienne Nicolas Méhul, in 1807
La Vestale, by Gasparo Spontini, in 1807
Fernand Cortez, by Gasparo Spontini, in 1809

而當時被排濟的著名作曲家例如 Beethoven 及 Schubert....
Beethoven當時1814年聾左都創作了 the Wellington's Vitoria, Op. 91, 去讚揚威寧頓打勝仗


https://youtube.com/watch?v=mczvfByofiw


Schubert 甚至係1815年為 Goethe 譄寫 Der Erlkönig, 魔王; 很多人相信都與拿破崙有關。


https://youtube.com/watch?v=5XP5RP6OEJI


同時，因為工業革命 及 法國大革命造就更多人發戰難財，亦令更多人懷念自己國家，免受法國文化的侵入，所以更加開始左個人感受，民族意識；而不再應該為宮廷服務，1815年亦成為了浪漫派音樂的開始。

大家要多些討論，否則恐怕你想看都未必會有人寫.....

印象中有人講過滑鐵盧係場一流既戰役但俾個二流既將領贏咗

strong post leave name

天馬行空BB 一鍵留名！

博羅金諾果場真係睇到o哂嘴,竟然唔追擊

滑鐵盧果場好似話拿破崙係最後關頭都無俾帝國衛隊出擊,所以先打唔穿英軍防線,最後被夾攻先輸,其實係咪

內伊同繆拉都好撚勁,繆拉俾佢丟低一條友斷後都死唔去,內伊係滑鐵盧打到咁又死唔去

格魯希呢條友係邊柒到出來架 搵番d老部下出來帶好過啦

你睇清楚斷後個個係邊個?

博羅金諾果場真係睇到o哂嘴,竟然唔追擊

滑鐵盧果場好似話拿破崙係最後關頭都無俾帝國衛隊出擊,所以先打唔穿英軍防線,最後被夾攻先輸,其實係咪

內伊同繆拉都好撚勁,繆拉俾佢丟低一條友斷後都死唔去,內伊係滑鐵盧打到咁又死唔去

格魯希呢條友係邊柒到出來架 搵番d老部下出來帶好過啦

你睇清楚斷後個個係邊個?

sor,原來都係內伊 咁好揪

巴打留低繼續寫 ?
睇文先!

博羅金諾果場真係睇到o哂嘴,竟然唔追擊

滑鐵盧果場好似話拿破崙係最後關頭都無俾帝國衛隊出擊,所以先打唔穿英軍防線,最後被夾攻先輸,其實係咪

內伊同繆拉都好撚勁,繆拉俾佢丟低一條友斷後都死唔去,內伊係滑鐵盧打到咁又死唔去

格魯希呢條友係邊柒到出來架 搵番d老部下出來帶好過啦

你睇清楚斷後個個係邊個?

仲有拿破崙係百日復辟時已經冇幾個老將肯返黎跟佢
窩打老時成班新仔係到行行企企等拿破崙點
但拿破崙自己身體又唔係好
內伊打拉海聖時已經帶埋帝國衛隊出去架啦
但個時普軍已經去到法軍側翼
法軍點打都冇救架啦

Robespierre, 對我上面那篇短文有無回應呢?

所有想打俄羅斯既霸主都失敗

reading