MBTI，你可能聽過，可能未聽過
其實聽佢個英文名Myers-Briggs Type Indicator都知，佢係將人根據佢哋嘅性格分類嘅。
咁佢點嚟嘅呢？
呢個model係根據容格(心理學家，佛洛依德嘅徒弟，但係最後不和分手)嘅理論而寫成嘅。佢覺得人面對呢個世界嘅角度，可以分成四個。
咁呀Katharine Cook Briggs 同埋佢個女Isabel Briggs Myers就運用呢套理論製造咗一套測驗，係二戰嗰陣俾啲女人做嘅。咁佢哋做完之後就方便搵適合佢哋嘅war-time jobs。呢個測驗越做越大，最後就變成咗MBTI啦。
MBTI之不過大約將人做咗一個分類，每個人就算佢個MBTI相同，但係淨係代表佢哋以同一個方法面對/經歷呢個世界，未必代表佢哋性格會非常之相似，因爲一個人嘅性格仲有好多嘢可以影響。人亦都冇辦法就咁分成16類。

咁講返個測驗啦。MBTI入面有四個大分類。

Extraversion (E) vs Introversion (I)
呢個唔駛講都知啦，就係外向內向囉

Sensing (S) vs Intuition (N)
嗱，呢個就難解啲啦，而且每個人都係佢哋嘅混合體，睇在邊個佔得比較多。
sensing唔係感性咁解，sensing係依賴自己經歷過嘅嘢，更加中視五感嘅意思。我覺得似比較現實嘅人。
咁Intuition呢，就係指一個人比較鍾意諗嘢，鍾意考慮未來多過過去，鍾意睇一樣嘢入面嘅hidden symbol，睇嘢會留意嗰樣嘢俾你嘅印象，多過個樣嘢本身。

Thinking (T) vs Feeling (F)
呢一項就同你點樣做決定有關。
Thinking係講做決定時會比較中視事實同原則，但係唔代表比較聰明。佢會尋找件事背後嘅真理，分析好處壞處，之後作出理性嘅決定。個人同他人嘅願望唔可以影響我嘅抉擇。
而Feeling呢，就係着中個人同埋身邊嘅人嘅感受，不過唔代表比較感性。做決定嘅時候會由其他人嘅角度出發，為佢哋做最好嘅選擇，而且保持諧和。其他人會覺得呢個人會關懷人，而且好圓滑。

最後就係Judging (J) vs Perceiving (P)
呢個睇你點樣生活同面對呢個世界。係唔同情況下，我哋可能有唔同嘅反應。比如一個人内心可以好open-minded (即為P)，但係面對其他人或者事物可以好有條理 (即為J)。咁係呢到，我哋會以後一個作準，姐係點樣面對呢個世界。
Judging做嘢係好有計劃嘅，一早決定好曬有咩要做，而且會寫低to-do list。佢哋會提早做要做嘅嘢，唔做deadline fighter，而且鍾意先工作後玩樂。
Perceiving就好flexible，樂於面對新事物同資訊。每當有新嘢發生佢哋都可以好自然咁面對，冇乜planning。寓工作於娛樂係最好嘅工作辦法。Deadline可以刺激到我。

咁每個性格到有一個英文字代表佢，將佢哋砌埋，呢個就係你嘅MBTI性格。
大家可以試下估我係咩性格

咁大家可以做個test

http://o3o.cc/mbtitest/mbtitest66
呢個係中文版

http://www.16personalities.com/free-personality-test
呢個係英文版
我會prefer英文版嘅