推

推

1804年1月1日經過六年既戰爭
法國殖民地聖多明各趁法國內亂時成功爭取獨立為海地共和國成為美洲第二個獨立既國家
然後歐洲就陷入十年既戰亂中
1808年拿破崙連廢兩個西班牙國王由自己個細佬約瑟夫·波拿巴取代王位
然後西班牙又陷入另一場戰亂中
係佢地美洲既殖民地因為半島戰爭失去左宗主國既聯繫 佢地既總督成為當地唯一既話事人
當地既需要成為總督唯一既考慮 如果發生暴動佢地都洗旨意會有軍隊黎鎮壓

當年拿破崙身後既隨從玻利維係1808年返到佢老家委內瑞拉總督區
佢趁西班牙陷入半島戰爭就開始帶領佢既同胞打遊擊戰抵抗西班牙既殖民統治

1810年5月18日拉普拉塔總督區首都布宜諾斯艾利斯 一支英軍帶黎左佢地國王被推翻既消息
最初拉普拉塔總督試圖向公眾隱瞞西班牙既形勢 但好快謠言就滿天飛
群眾係政府門口聚集要求脫離西班牙 軍隊同政府拒絕向總督效忠
最後5月25日拉普拉塔總督宣佈脫西班牙獨立建立拉普拉塔聯合省

幾個月後9月16日西班牙另一個殖民地 新西班牙總督區多洛雷斯市半夜
一個神父米格爾·伊達爾戈·伊·科斯蒂利亞走上教堂敲響大鐘嘈醒左全村既人
三百年前班西班牙佬搶走左我地既土地你地願唔願意搶返返黎!?你地願唔願意自由!!
¡¡殺晒班賊仔!!¡¡viva México!!

雖然伊達爾戈一年後就戰死 但獨立既戰火已經遍及全個新西班牙總督區
佢地更係1813年發表獨立宣言同憲法
但好景不常 兩年後美洲既人民以為可以乘歐洲動盪揭竿而起時 歐洲既戰亂就已經結束
斐迪南七世返回西班牙王位 而西班牙既軍隊亦隨住斐迪南七世既復辟進駐到新西班牙總督區
新西班牙革命都轉入遊擊戰中
1814年9月18日全歐洲既王公貴族齊集維也納商討世界既"和平"

西班牙殖民地從北到南:新西班牙總督區 新格拉那達總督區 秘魯總督區 拉普拉塔總督區

話說當年拿破崙侵俄失敗後係第六次反法同盟中 英俄奧普呢四大拿破崙受害者決定係維也納會探討永遠消滅法國侵略既對策
呢場唔係D咩正式既國際會議 最初只係呢四個國家既吹風會
但奧地利皇帝弗朗茨一世 外交大臣梅特涅親王
英國外交大臣卡蘇里子爵 駐法國大使威靈頓公爵
俄羅斯皇帝亞歷山大一世 普魯士國王腓特烈·威廉三世
呢班全歐洲最有權勢既人聚集係一座城市入面就自然引黎左一班狂蜂浪蝶
全歐洲王公貴族不論親法反法 仲有各種利益團體
佢地都黎到維也納希望係呢四強瓜分歐洲時可以分一杯羹 又或至少可以保得住自己既利益

起先英俄奧普為抑制法國再次侵略既可能
佢地四國準備開一套嚴苛既條件比法國 然後再塞一個佢地四國都可以控制既人做法國國王
係佢地四國既會議室外 塔列朗正為將會發生既陰謀惴惴不安
但我地法國可以點呢...我地係戰敗國...全歐洲針對既目標...
呢個時候竟然有條友直接衝埋黎拍響會議室既大門
喂屌你啊!!我地全歐洲既代表黎齊晒呢到 你地四國諗住自己玩晒啊!?
塔列朗就諗到計啦
西班牙既代表唔好咁嬲住 佢地四國有佢地重要野傾咪由佢地傾囉 不如我地又另開間房傾我地自己想傾既野啊?
塔列朗就帶住西班牙仲有瑞典 葡萄牙既代表同埋一絲奸笑走入另一間會議室
係門後 梅特涅都發現法國佬係到組織緊不下於自己既陰謀
...仆街...反而比法國佬爭取到一個外交舞台...與其比佢係到建立另一個外交中心不如將佢納入自己之下啦
咯咯 塔列朗~好耐冇見啊~乜你條扑街仲未死架~當年雅各賓派冇斬到你真係睇漏眼啦 咩你班友咁屈DUP係到開會啊?不如入黎同我地一齊開啦
不過梅特涅強顏既歡笑只係狠狠咁撞上左塔列朗既冷屎忽
??我係到同西葡瑞既代表傾得好開心啊 我地呢D敗者同弱者邊有資格同你地D大國一齊坐啊?不過...如果你咁堅持既話...我建議先由我地八國開個預備會傾下往後會議細則先?
梅特涅向塔列朗奸計妥協 佢將四國會議擴張成八國會議並將正式議期拖延到11月1日先開幕
並且往後會議規則都須經八國會議同意先生效 到時塔列朗就可以用大量小眾利益黎平衡四國既野心

11月1日維也納會議正式召開 佢地第一個要解決既就係各個比拿破崙推翻既王國既王位啦
既然路易十八可以坐返法國王位 咁各國都可以搵返佢地本來既王室去恢復王位啊
就咁與會各國就提出第一條仲裁原則 叫正統原則
根據正統原則各國承認1789年前封建領地劃分係正統王朝 各國有義務維持各國王室正統秩序
咁問題黎啦 丹麥同瑞典代表舉手 咁挪威既王位呢?
我地係1814年簽基爾條約將丹麥既挪威割左比瑞典 咁姐係丹麥既王室係挪威既王室正統?

之後佢地又拋出第二個原則 叫補償原則
所有係反法戰爭中有出過力既都可以得到領土賠償
講到呢到會場就陷入瘋狂 所有代表都抆出刀仔撲向歐洲地圖
十年拿破崙戰爭除左丹麥有邊個國家冇同法國佬開過拖呢?

睇見會場既氣氛梅特涅就放心啦
你地爭啦 你地班小國爭黎爭去最後都係要搵D大國黎撐腰主持大局 到時就係我奧地利擴張既機會...!!
梅特涅懶懶閒咁睇住呢班小國吱吱喳喳係到為領土爭拗時會場中突然響起一把雄亮既聲音
我要薩克森!!
想要成個薩克森!?邊撚個咁撚大想頭!?梅特涅驚愕望過去 原來係普魯士國王腓特烈·威廉三世
我要繼承老祖腓特烈大王遺志吞併全個薩克森呢隻拿破崙既走狗!!
呢下梅特涅先知自己玩大左
自三十年戰爭以黎神聖羅馬帝國早已名存實亡 但哈布斯堡靠貴族聯姻仍可以係德意志保留相當既影響力
就憑呢D影響力都足夠比奧地利換個招牌重建神聖羅馬帝國 咁奧地利都仲可以保住歐洲第一大國個位
但如果比普魯士吞左薩克森 普魯士就會一躍而成德意志第一大國左右奧地利既號召力
而且奧地利失去左控制德意志機會之餘仲會係北面比兩個新興強國普魯士同俄羅斯包圍再加埋南面既鄂圖曼
到時唔好話做第一大國 直情係亡國邊沿啦

睇住腓特烈·威廉三世呢隻粗人係到拍枱拍橙 梅特涅聽到冷汗直標
嘈夠未啊你隻死軍佬!!論貢獻我先最大啊!!我都未攞賠償啊!!
係救世主啊!!終於有人出黎制止腓特烈·威廉三世 梅特涅即刻望過去邊個係佢潛在既盟友
我要波蘭!!係全個啊!!
原來係個個包住白人皮膚既蒙古人 俄國皇帝亞歷山大一世
腓特烈·威廉三世打蛇隨棍上大嗌
波蘭同薩克森我地要硬架啦!!邊個阻我地打邊個!!
聽到呢到梅特涅已經嚇到雙眼反白口吐白泡
...天亡奧地利啊...
呢個時候有人拍拍佢膊頭貼埋佢耳邊
俄普既事我唔會坐事不理...
真係奧地利既救世主!?唔會又係黎搵我老襯架下嘛...?
梅特涅擰轉頭 企佢後面既係英國外交大臣卡蘇里子爵
俄普既問題我地不如開間房再傾啊?
見梅特涅同卡蘇里好似基佬咁雙雙離開會場
塔列朗敏銳既觸角話比佢聽個到先係主戰場 塔列朗又吊住佢兩個尾跟埋出去

係歐洲大陸我地英國冇任何利益 我地係衷心咁希望見到你地既和平 如果有任何一國破壞歐洲既勢力均衡我都會視佢為拿破崙
咁你諗住點?就憑我地兩個對上俄羅斯普魯士?以貴國係拿破崙戰爭既投放我非常懷疑你個立場可以有幾堅定
咁如果加埋我呢? 塔列朗推門行入黎
我願意用萊茵河東岸既萊茵蘭換取薩克森獨立 咁你地會用咩報答我?

...俄普似乎想係你身上鑿一筆...我覺得佢地太貪心啦
仲有教廷...佢地話想要返阿維農喎...都九唔搭八既
就咁有我地三個仲夠唔夠做?
英法奧簽訂密約如果俄普強行吞併波蘭薩克森將會聯合向俄普宣戰

三國簽完密約就前後腳離開間房
但到梅特涅行出去就見到亞歷山大一世企左係到 用捉姦在床一樣既眼神望住自己
你三個係到傾D咩?
冇啊...見塔列朗個菊花幾白滑就借黎玩下...
波蘭單野你會支持我個呵?係既話我唔介意割幾忽比你
...波蘭將會作為完整既國家而存在 但我地唔介意同俄羅斯共同管治波蘭既
唔得 就算係共管我地俄羅斯都要有優先權
亞歷山大...你以為我地奧地利唔夠你抽?就算係隻抽我地都未驚過
梅特涅要搞清楚情況既係你 我地俄羅斯百萬大軍停駐係全歐洲前拿破崙既領土上面!!我係完全諗唔到理由要撤兵!!只要開句聲我得到既將會比拿破崙更多 如果你唔將波蘭交出黎咁連你老闆個位都唔洗要!!
係咩?咁你就唔好得把口啦
梅特涅講完就轉身離去 留低羞憤既亞歷山大一個
...人黎啊!!同我準備出兵!!我要打9呢班異教徒比佢地見識下我地俄羅斯天威!!
佢個外交大臣聽到即刻制止佢
唔好啊陛下!!你肯傾既你既土地一定會有增加 你要打既就係同全歐洲過唔去 到時你就成為第二個拿破崙隨時得不償失啊

到亞歷山大一世死死氣返去會議聽時只見腓特烈·威廉三世流晒口水對住張歐洲地圖 隔離有塔列朗同卡蘇里對住萊茵蘭手指指
咁你而家諗住點?
亞歷山大一世強擠起笑容宣佈 我願意返到1789年前咁同奧普兩國平分波蘭!!
就咁佢地又拋多條仲裁原則出黎 叫勢力均衡原則
最後再加多條圍堵法國原則
就靠呢四條原則與會各國總算畫出一幅新既歐洲地圖出黎

1815年6月9日窩打老戰役前九日維也納會議通過決議
奧地利得到蒂羅爾 薩爾茨堡 伊利里亞 捷爾諾波爾 拉古薩 倫巴第 威尼斯 重建托斯卡納大公國 摩德納公國 建立倫巴第-威尼托王國由奧地利皇帝擔任國王
荷蘭得到奧屬尼德蘭 部分盧森堡大公國 尼德蘭聯省共和國改為尼德蘭聯合王國 由奧良治-拿叟家族出任國王同盧森堡大公 荷蘭以盧森堡大公名義參與德意志邦聯
普魯士得到薩克森北部 但澤 萊茵蘭 瑞屬波美拉尼亞 另一部分盧森堡大公國
英國得到開普殖民地 多巴哥 錫蘭 毛里求斯 愛奧尼亞 特立尼達 赫爾戈蘭
法國得到塞內加爾
薩丁尼亞王國重奪皮埃蒙特 尼斯 薩伏伊並吞併熱那亞共和國
教皇國復國但阿維農 孔塔-弗內森歸法國
波旁家族帕爾馬支系建立盧卡公國
拿破崙個老婆瑪麗·路易莎得到帕爾馬公國 皮亞琴察和瓜斯塔拉公國 死後由波旁家族帕爾馬支系繼承
那不勒斯及西西里國王費迪南多四世返回王位 那不勒斯及西西里國王合併成兩西西里王國 那不勒斯及西西里國王費迪南多四世改名為兩西西里國王費迪南多一世
漢諾威升為王國 將勞恩堡公國割讓丹麥 但獲得明斯特主教區 東弗里西亞
巴伐利亞 符騰堡 巴登 黑森-達姆施塔特 拿叟係萊茵邦聯時期得到既領土得到承認
巴伐利亞再獲得萊茵-普法爾茨 維爾茨堡公國 法蘭克福大公國
黑森-達姆施塔特將西伐里亞割讓普魯士但獲得萊茵-黑森
華沙公國分成三份 最大份波蘭會議王國由俄羅斯皇帝出任國王 跟住波茲南大公國由普魯士國王出任大公 最細係克拉科夫自由市由奧地利保護
三十八個僅存既神聖羅馬帝國諸侯組成德意志邦聯 奧地利做主席 副主席係普魯士
與會各國保證瑞士中立
開放萊茵河及多瑙河為國際航道
反對奴隸貿易

維也納會議後歐洲國界

臨散BAND前亞歷山大一世又彈出黎發神經
實在太美好 實在太感動啦!!我地歐洲千幾年既戰亂因為一個拿破崙就將全歐洲既國家團結起黎締造永久既和平
呢D一定係上帝既恩賜要我地耶教各教派永結同心既旨意啊 因此我提出所有歐洲既國家成立一個神聖同盟確保歐洲永遠既幸福!!
哇好偉大!!好感動啊!!我地都要加入!!
各國代表都爭相係神聖同盟上簽字
亞歷山大一世睇見都好滿意 哼哼...我簡直係歐洲既救世主...
簽完神聖同盟之後維也納會議終於正式解散
各國代表一離開會場就係到交頭接耳
...條俄國佬係到UP乜9啊...
...佢係咪標完童黎啊...

等D人走晒之後亞歷山大一世攞起張神聖同盟睇
有三個國家冇簽名
英國 教廷 鄂圖曼

英國代表卡蘇里係眾人既歸途上截住左梅特涅
雖然亞歷山大一世係神神地 但我覺得有D野都值得我地參考
...你意思係...?
不如我地加埋俄普四大國建立一套歐洲協調制度 每兩年定期聚埋一齊商討歐洲既秩序咁先係真正既和平
嗯冇錯 一言為定 咁我地兩年後再會

但9月26日法國首相塔列朗返到巴黎時大選岩岩結束
一班比國王更保王既超保王黨係402席入面攞左350席
呢班貴族同教士組成由阿圖瓦伯爵查理·腓力帶領既超保王黨霸佔議會連路易十八都管佢地唔到
首先查理·腓力向塔列朗開炮話佢參加過革命要佢下台 如果唔係自己就帶班貴族流亡出國
咁路易十八就搵黎塞留公爵阿爾芒-埃曼紐爾·迪普萊西接任首相
跟住呢班超保王黨仲未滿意
佢地再係全國各地搜括所有同國民公會有關支持過拿破崙既人 用私刑虐待同處死佢地
每日都有自己鄰居神秘消失或橫死街頭 法國人經歷第二次白色恐怖

黎塞留公爵阿爾芒-埃曼紐爾·迪普萊西

1817年3月4日前美國駐法國大使占士·門羅當選美國總統

經過兩年既和平後1818年9月30日英俄奧普如約係亞琛再次召開會議
因為黎塞留公爵說服反法同盟提早撤兵換取減少兩億法郎賠償令法國提早還清1815年巴黎和約欠款
英俄奧普同意法國加入結成五國同盟
另一個議題就係自拿破崙已黎南美洲既亂局
佢地搞既獨立運動明顯係我地五國同盟所反對既民族主義同共和主義
但目標係隔成個大西洋既南美洲 距離咁遠範圍咁大就憑我地五國要點處理呢?
亞歷山大一世條神棍又彈起啦
為左我既弟兄!!擁有歐洲最大陸軍既我地願意出兵幫手鎮壓!!
!?!? 聽佢一講又挑起左卡蘇里同梅特涅既神經
今日西班牙出事你就擺隊兵係西班牙 聽日唔知邊到出事你又擺隊兵過去 遲下成個歐洲仲唔比你玩晒!?
話係咁話姐...但我地要點拒絕佢啊...
卡蘇里就開口啦 亞歷山大啊 我地五國同盟成立旨在維護國際既和平 南美洲既叛亂始終都係西班牙既內政我地不宜介入既...
哦...原來係咁...咁簡單啦我地五國成立一支常設既聯合軍隨時準備鎮壓各地既叛亂咪得囉
腓特烈·威廉三世!?!?死軍佬咁撚多口...咁既橋你都諗得出叫我地點反駁啊!?
OK!! 卡蘇里又開聲 只有陸軍係唔夠既...如果再加支聯合海軍就完美啦
咩話!? 亞歷山大一世 腓特烈·威廉三世 黎塞留公爵聽到就一齊拍枱
而家全歐洲得返你地英國有海軍之嘛!!要建立聯合海軍咪姐係你英國既海軍囉!!
如果建立聯合海軍唔得既 聯合陸軍既野我都唔支持啦 歐洲既野你地自己玩飽佢五國同盟我退出
英國既態度令亞歷山大一世更扯火 你唔鎮壓既搞呢個同盟出黎做乜9啊!?我地係上天派落黎!@#$%^&*...
梅特涅出黎打完場 算啦算啦 大家唔好拗得咁薑 有咩我兩年後再傾過好冇?
到最後亞琛會議咩都傾唔出就結束左

話說係拿破崙戰爭時英國既紡織業非常好景 佢地用好高人工請左好多人入工廠
但拿破崙戰爭結束後英國既紡織業就泡沫爆破 再加上英國政府為保護當地農業而向入境農產品增收關稅
英國既低下層生活百上加斤但又有冤無路訴
話雖英國係當時最民主既國家 但英國既選民基礎係比功能組別仲要細
只有一年交得起三十磅地稅既男人先買得起一票
選區係中世紀畫落黎既 有D選區已經冇人住都可以選到十幾個議員 有D新興城市住左幾萬人但一席都冇
而且選舉仲要係記名投票 姐係班選民一個個行上台公開講自己投票比邊個
當時英國所謂既民主不過就係班有錢佬圍內既遊戲

1819年8月16日曼徹斯特有六萬人係彼得盧聚集要求改革選舉制度
政府既回應就係搵騎兵揮住馬刀衝入人群 做成十五死六百幾人傷
舉國嘩然 屌你呢到彼得盧咋 你以為窩打老啊!?在野既輝格黨當然咬住唔放
雖然唔關佢事但身兼下議院領袖既外交大臣卡蘇里都不得不為政府辯護
佢地係暴民!!佢地抵死!!
咁就比輿論咬上左
卡蘇里係維也納牛太耐以為自己係梅特涅呢到係奧地利啦!!
卡蘇里同對面海D暴君聯手打壓我地英國既民主改革!!
自此卡蘇里係英變成過街老鼠

彼得盧屠殺

3月23日德國一個保守劇作家奧古斯特·馮·科茨布係美茵茨被一個民族主義既大學生暗殺
雖然事後個學生被作為殺人犯處死 但梅特涅就唔係咁認為啦
佢認定呢件係件政治事件要求德意志邦聯從制度上阻止呢D事情再發生
9月20日梅特涅係卡爾斯巴德會見德意志邦聯各國代表
佢係到提出卡爾斯巴德法令要求德意志邦聯各國禁止學生既秘密組織 校方有責任監察學生既言行
所有出版物必須先經政府審查 美茵茨成立特別委員會調查呢件暗殺事件
與會代表聽到就嘈啦
呢到係德意志"邦聯"!!唔係神聖羅馬"帝國"!!你區區一個主席係到擺咩款!!未得會員國通過咩法律都唔準立!!
如果你地唔通過呢條法律既我地奧地利會單方面執行!!
比奧普兩國嚇一嚇德意志邦聯無奈承認卡爾斯巴德法令

12月17日玻利維攻入委內瑞拉總督區波哥大建立大哥倫比亞共和國
至此西班牙係南美洲既殖民地都所餘無幾 而家歐洲人係南美洲最大件既殖民地就係葡萄牙既巴西
1820年1月1日一支從南美洲返國既西班牙軍隊發動兵變要求斐迪南七世恢復當年約瑟夫·波拿巴訂立既1812年憲法
伴隨住兵變馬德里既市民都發起暴動 斐迪南七世就好似路易十六咁被軟禁係王宮中由自由派組成政府

大哥倫比亞共和國總統西蒙·玻利維

係佢既鄰國葡萄牙 因為當年拿破崙攻入里斯本
葡萄牙布拉岡薩王室逃亡巴西將巴西升為王國成立葡萄牙-巴西-阿爾加維聯合王國 葡萄牙本土由反攻西班牙既英軍接管
係英國管治下葡萄牙反而淪為英國既殖民地 大量英國商品湧入葡萄牙摧毀當地經濟
係1820年英軍撤出後葡萄牙各地都發生暴動 里斯本既群眾要求國王若昂六世從巴西返國

1月29日英王佐治三世病逝 佢個仔佐治四世繼位

佐治四世

1820年開始法國國王路易十八既身體愈黎愈差 呢個時候執政既都係佢細佬超保王黨領袖阿圖瓦伯爵查理·腓力
因為路易十八冇仔生所以死後將會傳位比佢細佬 法國人都已經可以想像等緊佢地既將會係點樣既管治
不過好彩查理·腓力得兩個仔 大仔昂古萊姆公爵路易·安托萬 細仔貝里公爵查理·費迪南 而且佢地兩個都冇仔生
如無意外只要忍死晒呢四條友 法國王位就會傳出波旁家族以外
而波旁家族以外繼承順位最個個人 依然係個個
前奧爾良公爵路易·腓力·平等個仔 現任奧爾良公爵路易·腓力
雖然當年佢背叛左革命 而佢老豆亦因佢而死 但佢返國後依然係自由派既代表人物
只要等到波旁家族四條仔都死晒 佢就會成為眾望所歸既國王
意外偏偏就發生 2月14日貝里公爵查理·費迪南個老婆傳黎懷胎九月既消息
波旁暴君有後啊!!
因為呢個消息引黎左個憤青係巴黎歌劇院暗殺左貝里公爵查理·費迪南
事後查理·腓力為拱固王權係6月12日通過兩票法將議會既議席增加一倍
新增既議席由每省最有錢既人選出 呢班人往往就不外乎就係貴族

然後到7月係兩西西里有個叫燒炭黨既秘密組織發起暴動威逼費迪南多一世通過同西班牙1812年憲法一樣既憲法
而且燒炭黨既暴動仲不斷向北蔓延逼向奧地利既倫巴第-威尼托王國

11月9日兩年之期又到 不過呢兩年過得絕不和平 梅特涅都急不及待要召開呢場特拉波會議
西班牙 葡萄牙 兩西西里都染上左"法國毒"啦!!我地要快D鎮壓唔係我個倫巴第-威尼托就冇啦!!
咁上次西班牙出事又唔見你咁緊張!?我話左呢D野要趁早鎮壓架啦!!
冇錯亞歷山大!!上次係我錯 快D借D兵黎比我鎮壓!!
咩話!?唔預埋我一份!?我又跟!!
腓特烈·威廉三世!!我就知道全歐洲最珍惜和平既人係你!!英法你地點啊!?
東歐專制三國將目光投向卡蘇里同黎塞留
...呃...呃...呢層...呃...
卡蘇里見黎塞留欲言又止有口難言咁佢都心裡有數
上次我已經講過我地英國參與歐洲協調目的只係維護歐洲既和平 任何國家既內亂都只係佢地既內政 恕我坦白講如果有任何國家諗住趁呢D機會去擴張自己既勢力咁我不如退出啦
冇錯!!我地法國都自身難保啦!!我地冇咁既閒情去鎮壓 亦唔會比你地介入我既內政 更加唔會比你地趁呢個機會去介入其他國家既內政!!
講完卡蘇里就帶埋黎塞留走啦

梅特涅咁而家你諗住點?
...我約左兩西西里國王費迪南多一世係萊柏克會面 有咩我地係個到再講...
1821年1月26日俄奧普同兩西西里王國召開萊柏克會議
會上費迪南多一世痛陳燒炭黨呢班再世雅各賓點樣迫害無助既王室欺壓無辜既平民 要求各國盡快出兵平亂
拿 佢自己話架 唔係我地侵略佢啊 我地一齊出兵義大利!!
話口未完另一個義大利國家薩丁尼亞王國國王維托里奧·埃馬努埃萊一世係3月12日被燒炭黨趕落台
佢拋低份退位詔書比佢細佬卡洛·腓力切就匿入自己座深山古堡入面

而俄奧普三國仲係萊柏克討論緊點鎮壓緊燒炭黨時 法國毒更傳染到佢地估唔到亦管唔到既地方
2月4日鄂圖曼蕃屬既瓦拉幾亞當地東正教既塞爾維亞農民發起叛亂反抗穆斯林既管治
呢遍農民叛亂既火仲一直燒到去隔離摩爾達維亞既羅馬尼亞人到
佢地好快就趕走左殘暴無能既鄂圖曼官僚同軍隊 然後再向北面同為東正教既弟兄俄羅斯求助

仆街...咁撚大個鄂圖曼...小小一個巴爾幹都鎮唔住話冧就冧...?冇左鄂圖曼俄羅斯身邊咪又少一個威脅!?咁我奧地利以後要點算啊!?冇錯!!係俄羅斯!!絕對唔可以比佢介入!!
梅特涅收到巴爾幹叛亂既消息即刻去搵亞歷山大一世再三懇求佢千祈唔好出兵
卡蘇里亦支持梅特涅既立場 之後俄羅斯就撤走駐瓦拉幾亞大使 然後鄂圖曼無能但係殘暴既官僚同軍隊又返返黎啦

但係鄂圖曼係巴爾幹北部屠宰緊東正教農民叛亂時 巴爾幹南部又出事
3月26日巴爾幹北部兵敗既叛軍南逃入希臘 希臘農民群起響應
鄂圖曼蘇丹為阻嚇巴爾幹既叛亂就下令屠殺全國既希臘人
但佢自己冇兵去鎮壓 咁佢就搵黎埃及總督穆罕默德·阿里出兵 蘇丹答應事成後比敘利亞佢做獎勵
穆罕默德·阿里就派佢個仔去帶兵將希臘人捉晒返埃及做奴隸
到而家呢串巴爾幹叛亂係歐洲世界眼中唔係雅各賓暴民挑戰神聖君權 而係天主教弟兄反抗穆斯林暴政
係五國同盟仲未為呢場叛亂黎得切反應之前 歐洲各地既平民都組織起志願軍操向希臘對抗鄂圖曼
卡蘇里又出黎指責志願軍多事破壞和平
嘩...呢條友有冇冷血到咁啊...邊個捧佢上台架...咁撚多人死唔見你死...

7月葡萄牙國王若昂六世終於走返葡萄牙 而巴西就留低佢個仔佩德羅做攝政
9月15日墨西哥第一帝國宣佈成立
12月14日路易十八搵左個超保王黨既維萊爾伯爵讓-巴蒂斯特·紀堯姆·約瑟夫·馬里·安內·塞拉凡接替黎塞留做首相

1822年1月1日希臘共和國臨時政府宣佈成立

國際上一邊抵制俄奧普鎮壓人民 返到國內卻被人民指罵為專制暴君既走狗
下議院領袖兼外交大臣既卡蘇里係政壇上處處碰壁內外不是人情緒愈發狂躁
到佢老豆死埋佢終於痴左線 8月12日卡蘇里自刎而死
佐治·坎寧接任下議院領袖兼外交大臣

佐治·坎寧

又返到葡萄牙 若昂六世返國後為滿足葡萄牙商界既要求 佢就將同葡萄牙平等既巴西王國扁返做殖民地
巴西攝政佩德羅抗議葡萄牙既做法 若昂六世就下令廢除巴西所有王室機構同要求佩德羅接受再教育
9月7日佩德羅召集巴西既軍隊宣佈獨立
不獨立 毋寧死!!你地支唔支持!?

佩德羅宣佈巴西獨立

10月20日五國同盟再召開維羅納會議
拿破崙不過係冧左七年...點解歐洲...世界都愈壓愈亂架...
話左邊到有人做反我地就要即刻出兵鎮壓架啦!!係你地英法奧三國剩係識係到互相猜忌同內鬥!!唔理啦總之我要出十五萬兵鎮壓西班牙!!
邊到有仗打邊到就有我!!如果俄國出兵我一定跟!!
亞歷山大一世!!腓特烈·威廉三世!!你兩個係歐洲最東面諗住點去歐洲最西面啊!?我奧地利同德意志邦聯絕對唔會比你地既軍隊踩過去架!!
講到尾你咪就剩係識得內鬥!!
算啦 我退出啦
對俄奧普既爭吵一直沈默既會議新人佐治·坎寧終於開聲
老實講 共和主義同民族主義對我地英國根本冇任何威脅 相反我地對歐洲大陸既反抗運動一直抱持憐憫態度 如果歐洲協調只係一種反人民既保守制度 咁恕我退出啦
...佐治·坎寧...!!你走啊!!你走左唔好返黎!!第日你地英國出事唔洗旨意我地會幫你鎮壓!!
鎮壓?好笑啦 比你地呢D人管治唔做反先奇啦 我地光榮既英國邊似得你地 而家唔係你地孤立我 係我對你地既光榮孤立!!
佐治·坎寧講完閂門就走
關於西班牙叛亂既問題請都容我拒絕俄普既建議 我地法國一向都反對介入外國內政 而且西班牙既叛亂只係我地波旁家族既家事 我地亨利四世既後人自己會解決!!
講完連維萊爾都走埋
咁唔洗傾啦?巴爾幹單野我郁硬鄂圖曼!!
最後連亞歷山大一世都走埋
梅特涅精心設計既"和平"只係經過七年三場會議就崩潰

12月1日巴西攝政佩德羅加冕為巴西帝國皇帝佩德羅一世

佩德羅一世

1823年4月7日昂古萊姆公爵路易·安托萬帶領法軍進入西班牙擊敗西班牙軍恢復斐迪南七世既權力
呢件事唔只係一場反君權運動既失敗 更代表兩支波旁家族權力既復興
西班牙將會係法國支持下鎮壓南美洲獨立運動 而法國更隨時有可能重建歐陸霸權
佐治·坎寧而家先黎後悔自己搞散左歐洲協調 冇左歐洲協調我地可以係邊到搵人牽制法國佬呢...?
佐治·坎寧寫左封信比大西洋另一邊歐洲以外既國家
亞美利堅合眾國總統占士·門羅

你願意咁大個南美洲都屬於一個國家?你希望你門口永遠紮左支西班牙同法國既軍隊?如果你願意有所行動既...我地英國會支持你
占士·門羅睇完封信之後佢個國務卿約翰·昆西·亞當斯就插口
唔洗理佢 而家歐洲咩局勢啊 英國佬想搵你過橋咋
...但南美洲對我地黎講的確係個隱憂...
佢話我地有所行動既佢地都會支持啊嘛...咁我地咪比D行動佢睇囉
12月2日占士·門羅上國會發表國情諮文
歐洲係歐洲人既歐洲 美洲係美洲人既美洲...我地唔會卷入歐洲既鬥爭中 同樣我都唔希望歐洲人介入美洲既內政...簡單黎講...美洲個場我睇既!!任何干預美洲事務既人就係同我地美國佬過唔去!!

1824年9月16日路易十八病逝 佢細佬阿圖瓦伯爵查理·腓力繼位為查理十世

查理十世

1825年12月1日俄羅斯皇帝亞歷山大一世駕崩 佢膝下無兒但好在有兩個細佬
不過佢個大細佬係奧斯特里茨掩護佢逃走打到重傷既君士坦丁大公因為娶左個平民老婆所以認為自己唔適合繼承皇位
咁佢就讓左個位比佢細佬尼古拉 但尼古拉又認為自己做細既無資格坐個位
佢兩兄弟推黎推去推左兩個幾星期都冇人肯坐個位
呢個時候就有班軍官密謀推翻君主制 又或至少逼新皇帝簽份憲法

17日尼古拉繼承皇位為尼古拉一世 九日後加冕
26日三千俄國官兵操向尼古拉一世既加冕禮場地 沿途大嗌"君士坦丁大公或者憲法!!"
尼古拉一世知道就搵左一萬人去鎮壓 全部殺晒
而家連俄羅斯呢D鄉下地方都惹埋法國毒 所有國家都忙於鎮壓自己既內亂
而更攞命既係英俄對"調停"希臘獨立戰爭既意欲愈黎愈強大 梅特涅全心希望可以重建歐洲協調制度係自己主導下調停巴爾幹問題
但係冇左歐洲協調制度就代表梅特涅要靠佢一個人來回英俄兩國間去說服兩 而且英法俄既領袖都係同自己毫無交情既新人
不過係佢奔走於兩國時 外交中心早已經轉移到去英國

尼古拉一世

十二月黨人

1827年4月10日佐治·坎寧當選英國首相
7月6日英法俄三國係倫敦就巴爾幹問題達成共識簽訂倫敦條約共同出兵援助希臘
8月8日佐治·坎寧病逝威靈頓公爵接任首相
10月20日英法俄三國聯合海軍駛入愛琴海係納瓦里諾海戰擊敗鄂圖曼海軍 斷絕鄂圖曼係希臘既支援
為報復俄羅斯 鄂圖曼封鎖達達尼爾海峽 俄羅斯正式向鄂圖曼宣戰 尼古拉一世誓要摧毀吞併呢個腐爛既帝國
唔好啊!!鄂圖曼唔襟打架!!一郁就冧架!!鄂圖曼關係我地奧地利生死存亡既利益 但我地又唔敢幫拖...唔該各位大佬高抬貴手啊!!!!
冇錯你講得岩 我剩係想要希臘姐 鄂圖曼冧檔對我冇好處
最後對奧地利伸出援手既又係英國
英法將鄂圖曼趕出希臘之後就撤兵 1829年9月14日俄羅斯係各國調停下同鄂圖曼簽訂亞德里亞堡
鄂圖曼承認瓦拉幾亞 摩爾達維亞 希臘自治 多瑙河口割讓俄羅斯 俄羅斯可自由通行博斯普魯士海峽 達達尼爾海峽

納瓦里諾海戰

因為維穩卻愈維愈亂 因為希臘獨立而推冧左鄂圖曼 因為鄂圖曼既衰弱而令全歐反目
梅特涅精心設計既和平不堪一擊 佢全心保護既奧地利更係變得風雨飄搖
而要塞要從內部攻破 給予梅特涅最後一擊既偏偏係就當代最專制既暴君

下集1848年歐洲革命


https://youtube.com/watch?v=-qkf0fLU2Ao

推

推

我唔明啊,點解瑞士可以做到永久中立國又無人打柒佢

我唔明啊,點解瑞士可以做到永久中立國又無人打柒佢

因為有名滿天下既瑞士傭兵同埋地理條件 瑞士山多易守難攻

推

留名

推

留名

打得好辛苦
巴打

巴打

下集咁快講到1848
再前少少法國同比利時會唔會講