為咗多數奧斯卡斯度巴打，咁我唯有繼續作啦

第七章 聯歡會之準備
終於測完驗，多得亦希幫我惡補，令我嘅數學成績都算見得人。為咗多謝佢，我決定送份聖誕禮物比佢，但係我又諗唔到送咩喎，所以我諗住遲少少搵芷瑩商量商量。
入翻正題先，其實今日係學校為咗比我哋準備聖誕聯歡會嘅假期黎嘅，所以我哋都要喺今日準備曬，包括佈置課室，準備零食同遊戲，仲有禮物。咁我哋就分咗幾組，我當然係同芷瑩，亦希一組啦。我哋係負責買零食同埋食零食嘅，呀唔係我哋食，應該係大家一齊食嘅，嘻嘻。
前一日嘅夜晚，我就約咗佢哋去學校樓下嘅斜路等，之後再一齊去李x誠嘅百街買零食。我哋拎咗兩部手推車，一部係芷瑩推嘅，一部係亦希推嘅，而本小姐，當然係唔駛推啦。
之後我就一下企咗上去連接車碌嗰條處度，叫亦希推我行。但係佢叫我唔好咁小學雞，不過佢都係推咗我行。
行到去零食部嗰陣，我對眼立即發光，之後我不斷咁將啲零食放入車仔入面，而車仔亦都好快變咗坐小山。
芷瑩見到之後話:[乜班會有咁多錢咩？]
我輕鬆咁回答:[佢哋會交翻錢㗎啦，反正佢哋都要食嘅，係咪？]
亦希一聽到我依句，就即刻加把口入黎:[其實係你自己想食咋嘛？]喂，你點可以咁講！
我脹起塊面話:[緊係唔係啦，係全班，係全班一齊食！我一啲都唔為食㗎！]
亦希又串我:[咁你試下唔好食，你忍到口嘅，我咪信你囉，哈哈]
我不甘示弱:[好呀，睇下點！]
芷瑩見到我哋係度互串，就話冇我哋咁好氣，去廁所。
之後我同亦希去咗雪糕部，之後佢無啦啦唱:[我最愛食的雪條叫做Banana，食Banana唔駛用叉㗎...（下刪二十字）]
[喂，你傻咗呀？]佢依然冇理我。算，我知佢已經入咗自high mode。我就拎起咗一個新出嘅蘋果味雪糕，亦希突然由佢嘅世界翻翻黎，仲問:[乜你好鍾意食蘋果味嘅嘢㗎？]
我就:[係呀，做乜？]
[其實我都係。]
[但係你啱啱先話你鍾意Banana咋喎。]
[狗up你都信？]
[信㗎~]
[你太易信人喇~]
[係呀，人人都係咁講嘅。]
之後我用自己錢買咗個頭先個蘋果味雪糕。
亦希話佢都想食，我就叫佢自己比錢買，佢又話佢冇錢，叫我比佢食一啖，我當然借機引佢啦。
最後，佢襯我望緊手機嗰陣偷食咗一啖，我知道咗之後緊係鍾佢幾磓啦，佢話:[幾好味吖，又便喎，有幾可幾磓可以換到一啖雪糕？]
其實，如果你真係想食嘅，我點會唔比你吖。不過，我要聽曬我話咁解姐，因為你食咗我口水尾~呵呵。

用女方角度寫文搞到我以為gay故

用女方角度寫文搞到我以為gay故

男同女㗎 唔是gay

留名

遲咗少少 請勿亂屌

第八章 聖誕節嘅神秘禮物
話說聖誕聯歡會已經完咗，我哋亦都玩得好開心，但係因為交換禮物嗰度係抽嘅，所以老師話唔駛買咁貴。聯歡會完咗就放假lu~~
仲有三日就到平安夜，我一定要係平安夜約到亦希同我倒數！不過首先我要準備聖誕節禮物。但係我真係諗唔到送咩比佢，所以就打咗比芷瑩:[hi~芷瑩]
[hi~打比我做乜呢？一定唔會係空穴來風啦]
[比你發現咗添，其實係咁嘅，你知啦，就快到聖誕節，咁緊係要送禮物啦]
[哦~我明喇，你係咪想送禮物比王亦希呢？]
[知就好啦，但係我諗唔到送咩比佢，所以先打算問下你意見...]
[咁有幾難姐，你用絲帶綁起自己，之後跳入個大禮物箱度，再叫佢黎開咪得囉~]
[痴線，咪玩啦，我覺得咁已經好難囉，有冇其實意見呀？]
[咁咪最簡單嘅溫柔牌頸巾囉~]
[er...其實我唔識織頸巾㗎 哈哈]我好自卑。
[咁你要快啲學喇得翻二日咋。]
[你識織呀可？]
[點會唔識]嚴重自卑中...
[咁你依家得唔得閒？]
[得呀，你想學嘅就快啲黎啦 ]我聽到佢已經不停咁笑我。
到咗佢屋企之後我就立即開始學點織，原來佢都織咗比佢鍾意嘅男仔，睇黎個男仔有福喇，連我嘅好姊妹都鍾意佢。
原來織頸巾係咁難㗎！！
我好辛苦先織到一半，因為中途不斷織錯，要不停咁拆過同重織，真係搞到我心力交瘁...
我用永不言敗嘅精神，終於將依條雪白色嘅頸巾織好。我依家真係好滾動呀！！！簡直可以用有血有淚黎形容，呀唔係，其實冇血同淚，得汗同汗。
而芷瑩，佢其實係我織到一半個陣已經織好咗，佢嗰條係粉藍色嘅。
啱啱遇着剛剛，我一織完佢就打黎喇，佢係邊個？我唔會同你講佢係亦希，呵呵。
[喂？豬仔？]
[依家邊個係豬呀？]我比佢激死啦！
[邊個應咪邊個係囉~]
[咁算啦，我收線]玩我，等我玩翻你啦。
[咁又唔好，大人唔好嬲，係我錯。其實我打黎呢，係想問...]
[問咩姐？]我扮唔耐煩，而芷瑩就一路聽一路笑
[我想問你平安夜嗰日得唔得閒呀？]佢快到一輪嘴咁講，我差啲聽唔到。
[你想約我呀？排隊先啦，嘻嘻]我自己都係度笑
[乜原來豬都有人要㗎咩？唉，咁算囉]之後佢又唱起lonely lonely christmas嘅歌詞[Merry, Merry Christmas Lonely, Lonely Christmas]又比佢玩翻轉頭添！
[咁朕就比你插隊啦，咁幾點同邊度等？]我想扮cool咁問，但係都掩飾唔到我嘅興奮。
[中午12點火車站3號月台等]我聽得出佢都好興奮。
如是姐，又到咗平安夜嘅朝早。

其實仲有我

仲有人㗎？咁好囉

第九章 平安夜不平安（上）
終於到咗我最期待嘅日子喇！十二月二十四號，今日可以去同亦希二人世界呀！我一邊唱住me&u（http://m.youtube.com/watch?v=_Ndihu8F9_g）一邊彈下彈下咁出門口。
我今日冇化妝冇扎辮，正所謂:簡單就是美。我着咗件白色嘅恤衫，短袖嘅，唔算太透，之後外加一件都係白色而且比較透嘅披肩。仲有一條短到去大脾中間嘅牛仔褲再加埋黑絲（我着絲襪係因為火車啲坐位好凍，會凍親隻腳）同好精緻嘅耳環，簡直係perfect，嘻嘻。
我同佢就係火車站到等，我見佢着住黑色短袖衫，海藍色風褸，牛仔長褲同船襪，真係好型仔。
因為時間尚早，所以我哋決定去又一城踩冰，時間啱啱好，因為佢係開1點至3點，我哋去到啱啱12點9。由於又一城商場同地鐵相連，所以我哋唔駛出外面。
點知，原來我伏已中，明明已經係冬天㗎啦，點解個商場仲要開冷氣呢？仲要開到咁鬼凍，想人哋變冰條咩。咁我唯有抱起雙手黎取暖啦，不過我個身都仲係狂震。
亦希真係好細心，佢一見到我抱手，已經知我覺得凍，仲將佢着緊嘅風褸除比我。雖然我着咗佢件風褸係會好暖，但係咁樣佢就會好凍。
我好驚我整病佢，所以我同佢講:[唔駛喇，其實唔係太凍㗎咋，嘻嘻~]我希望用笑聲黎掩飾尷尬，因為我拒絕咗佢嘅好意。
我唔會同你講，其實我係第一次踩冰。而亦希就照舊，運動全能，咩運動都識。我哋着好鞋之後，就正式開始我哋嘅踩冰之旅。
佢好輕鬆就落咗去個場到，搞到我以為好易，我一踩落去，已經仆到四腳朝天。亦希除咗扶起我，仲不停咁笑我，話我手腳唔協調。我真係好嬲，好想喊，我都有自專㗎（其實我好眼淺）我唔想采佢，但係......我已經比佢帶到去場中間，對於第一次踩冰嘅我，又點會識得溜翻去？所以我唯有等佢帶我翻去，之後先唔采佢。
溜咗冇幾耐，佢就問我:[駛唔駛休息一陣呀？]不過我以一聲:[哼！]黎回應佢。佢知我仲嬲緊，咁佢唯有氹黎我。
[皇上，大人有大量，大人不記小人過，你就放過小人啦，你唔好嬲啦。]
[你咁姐係話我老姐？]
[我唔係話你老呀，我嘅意思係你高高在上，唔會咁小氣呀。]之後佢都氹得我好開心
[算啦，今次朕就原諒你！唔准再有下次呀。]
[微臣不敢，微臣不敢。]之後佢仲教識咗我溜冰添。