文/Cantonese Chan

兩廣粵語係咪蝗語？或者講，兩廣粵語係咪異化咗？呢個課題，本身係冇乜討論價值嘅。但我驚訝嘅係，練乙錚、陳雲、曾焯文等等竟然都喺度講緊呢套嘢，甚至乎上升到「香港粵語先至係正統」，有感於部份持有「華夏道統論」嘅文化人疑似「谷精上腦」，以及一班支持者似乎欠及冷靜思考，小弟決定喺度簡單講下呢個問題。

首先講下詞彙。如果話，兩廣粵語吸收普通話用詞係異化、係蝗語，噉香港口語夾雜咁多英文豈不是「鬼話」？以前我都同過啲香港華夏論嘅人拗過，話香港嘅英文詞彙係自主吸收，而兩廣嘅普通話藉詞係推普之下嘅產物。然而，詞彙嘅嘢，吸收就係吸收，討論係自主吸收、定抑話被動吸收，祗能夠話係戇撚鳩。而且香港有好多專有名詞，喺普及教育開始就唔係用中文嚟教，呢個係由英治時期一直延續到九七之後，乜噉都叫自主吸收？就算係自主吸收，在地嘅人，亦都要有消化外來詞嘅自覺；但而家，香港人吸收嘅新詞彙，好多都係消化不良。

何謂消化不良？簡單啲講，由廣州一口通商開始，粵人吸收嘅新詞彙，唔止讀音上粵音化，就連書寫都係以中文書寫，譬如巴士、威士，甚至係為外來詞造字，好似【車立】、領【衤太】、車【軚】、【舦】盤，但香港近幾十年嘅外來詞，又有幾多係口講粵音化，書寫中文化？甚至係創建一套表音文字嚟應付外來詞、【口了】【口能】字亦都不為過，我唔係話兩廣有呢個本事，不過香港有其自主性，官方都唔去規範粵語書寫，民間亦都冇廣泛民意去重視粵語入文；就算話由香港增補嘅粵語用字，都不過係為咗應付差佬落簿以及法庭記錄，尤其是差佬落簿，簡直就係錯字連篇，根本係有咗增補嘅粵字都冇官方進行規範；就算係喺廣東，法庭記錄都會因實際情況允許口語入文，目的係避免供詞失真，喺呢個層面上我唔知香港同廣東有幾大區別。

再講返吸收北方詞彙嘅問題，如果香港人近年唔係大量吸收普通話詞彙，陳雲都唔會寫「中文解毒」喇！就舉網台嘅例，我聽開嘅熱血時報，大亨黃洋達多次強調要抵抗匪語，但做節目時嘅用詞卻異常哽耳，只不過大亨用嘅唔係大陸普通話用詞，而係台灣國語用詞，譬如「衰到貼地」講成「差到跌渣」、「發嬲」講成「發飈」、「網絡」就講成「網路」；而鄭松泰博士就成日將「用咗幾多時間」講成「花咗幾多時間」。

雖然大陸普通話同台灣國語係分開發展咗幾十年，但始終都係同一種語言——「北方官話」。而最緊要嘅，就係佢哋都係書面語嘅詞彙、語法框架，你自細係用呢套框架書寫，你嘅口語就冇可能維持到純粹嘅粵語表達，不過係用粵音去讀官話用詞噉解。

可以講，今時今日開咪同揸筆搵食嘅人，四五十歲以下嘅普遍都存在一個問題，就係「粗口+書面語」：喺允許講粗口嘅情況下，通常就係喺書面語嘅用詞度加入粗口助詞，以提高口語嘅成份，而以往生猛劈撚嘅廣府話根本就少之又少，唔信嘅話可以聽下陶傑做節目，喺用詞上對比下，你哋就會發現自己同才子嘅差距。

隨便講埋語音同語文政策，其實都係啲亞媽係女人嘅道理，譬如話對於廣東人而言，分辨粵語片區嘅口音係常識，但香港人竟然係連外江佬口音同粵語口音都唔識區分；怪唔知，會出現黃秋生扮葉問學錯四邑口音嘅笑話（葉問係南海佛山人，講嘅係南海話），對於自己嘅母語竟然無知至此，甚至仲有人話兩廣嘅人講嘅係蝗語，其實係咪將四邑、東莞嘅口音當咗係北佬口音？更加唔好講，香港竟然出現何文匯式嘅「正音運動」，竟然仲笨實到全港嘅主流傳媒都去跟，常言道，要死都唔好死喺自己手上吖嘛。「文匯正音」對於香港讀音嘅影響就大咯，譬如香港人好多時都將民主亞伯個名讀成「李柱明」，但「彭志銘」依然係讀番正音，莫非香港人啲名好似日本人噉有訓讀嘅？又譬如話「核心價值」個「核」字係文讀，而「欖核」個「核」字就係白讀；你哋搵番啲片，有幾多人係將「核（Hat6）心價值」讀成「核（Wat6）心價值」？

至於香港嘅語文政策，就更加係不容樂觀。法定語文所講嘅中文，喺口語上冇指明係「粵語」（Cantonese）；而所謂嘅兩文三語，根本就漠視咗粵文嘅存在，以致普及教育唔教粵文、測驗考試寫粵文都當錯；而新移民獲取香港永久居民身份之後，根本唔使考粵語，我講嘅唔止係由大陸審批嘅大陸新移民，住滿七年嘅所謂「外籍人仕」亦都係一樣。噉究竟香港同兩廣有啲咩唔同？咪就係少啲北佬、官員主要係本地人囉。

最後，可能有人會話，呢篇嘢同嗰啲「沒有誰比誰更高尚」有咩分別？而事實就真係「冇話邊個比邊個正統」，尤其家陣啲韃子殺到，兩廣祗不過比香港靠北邊少少啫，如果仲喺度掛住爭正統，就好一陣南明嘅味道。

（文章略有修改）

註：

1.曾焯文：羊城殲粵語，香港危危乎

http://localpresshk.com/2014/07/putonghua-in-fatshan/

2.練乙錚: 「方言」論．「膠」和「撚」．粵語v「香港話」

http://1in99percent.blogspot.jp/2014/02/v.html



粵民時報Aug 26th 2014