由六月開始，我就積極參與膠登改革嘅項目，
當時有唔知邊個提出過「MOD制」嘅概念
但哩個「搞階級」嘅制度並唔係由我提出，
而當時，Void都大概接納咗哩個idea，但最終都冇實際行動過
而嗰一排，由於洗版問題嚴重，我地嘅討論範圍都係圍繞版規同罰則

去到六月尾，我一直用會員身份，喺膠登不斷參與同站務／膠登未來有關嘅討論
亦都發表咗唔少意見
之後，膠流流同我取得聯絡，
佢搵我幫手搵D料，同埋同我講「改革」嘅事
後來我答應佢，一次過整合哂膠登一年來所有同站務發展有關嘅留言
於是，我由上年嘅post開始逐個睇，睇哂所有留言，
然後將所有相關嘅內容copy哂出嚟，然後分類
我搵哂D料出嚟之後，admin同另一位巴打都再幫手再分類
用咗好多好多個晚上做出嚟嘅野，大概就係「三大內務方案」嘅雛形
各位睇哩幾個方案好似冇乜特別，
但我係用咗幾十個鐘，將站務臺所有留言睇哂，盡可能兼顧哂大多數人嘅意願，同埋避免各意見間嘅矛盾做出嚟
當然後來都修改同debug過無數次

去到七月頭，唔知係admin誤會我嘅動機定係咩，
佢問咗我幾條好似interview咁嘅問題，仲問想唔想幫手，
其實我到依家都唔知，佢當時係想問我想唔想做admin? 定係想點我嚟做空降mod? 定係純粹問一問？
我當時有D驚訝，因為我冇諗住會咁；亦有少少開心，因為睇嚟admin都幾睇得起我
anyway，我當時即時拒絕咗，當然亦都打咗好多字，仲用紅字幫佢highlight重點，唔信問一問ZEN
雖然唔知做乜，但我表明拒絕做admin、拒絕有bam人權、拒絕做mod，
理由係：我搞咁耐改革，都係想實現膠登民主，想會員有得自己決定，我點可以做D違背理念嘅事
唔信問下ZEN
我只答應佢，我可以唔接受特殊權力地幫佢手做下苦力野

之後，我就一直幫佢做苦力
佢有問過我好幾次，要唔要俾個title我，或者話俾返少少credit我
我每一次都拒絕，一來唔想令會員更加覺得我博上位；二來唔想因為我個名而令各位否決幾個內務方案；三來選舉在即，唔想令人誤會我／admin嘅動機

如果有人哩一刻認為我正在試圖感動人嘅，咁請你諗一諗，點解我唔喺選舉前講哩番說話
如果有人哩一刻認為我部署幾個月係為咗要權力嘅，咁請你諗一諗，我為乜而做咗咁多額外嘅野
當時投票支持「三大方案」通過嘅你，亦請你諗一諗，到底你當日係為咩而投下支持嘅一票

今次落選，我失望，但唔意外
開始時，我一度覺得杯麵／飄揚／咖哩飯／孫大炮／發現號 會互相爭票，最終我有機會漁人得利
後來，有民調結果同埋有好多候選人冇哂聲氣..我就知道，各位要妥善處理手上嘅三票根本唔難..
最終，無論理由係咩都好，落敗就係落敗
套玩法係我寫嘅，無論錯在制度定係錯在我自己，都冇得怨

各位恥笑完之後，我想再提多大家一次
諗一諗，當日為乜野支持內務改革
為花生？為膠登？為民主？
如果你理念同我一樣，希望可以有完善同有系統嘅制度，令膠登仔能夠共同建立最接近理想嘅膠登，
希望你可以堅持落去，好好善用手上嘅野，唔好為一時花生，犧牲咗哩套制度

最後，對於投咗票俾我嘅人，我好多謝你地
感激你地嘅聲音，亦都理解你地嘅沉默
anyway, 有你地對我嘅支持，我會繼續堅持自己嘅信念，用其他途徑繼續為各位做野
多謝你地

最最最後，臨出post望一望吹水臺，
我好似忽然醒咗..
原來我真係not the only one