大家好 小弟今日終於成功申請膠登帳號啦
因為之前一直喺外國讀書 冇咩機會可以申請到帳號
直至回到老家 終於搵到ISP郵件好開心

不過你哋應該覺得我好渣


好啦 言歸正傳
第一次開post就喺講故台真係幾大壓力
事先聲明…如果故仔唔好聽記得要話我知
咁我就可以改進下

而呢個故仔我會定位佢係科幻同懸疑
主角係一位剛剛考到心儀大學嘅男仔 叫Zackery
故事從佢喺開學之前 有一次同小學朋友游完水 行入更衣室開始
至於甜呢…就先觀察一下各位巴絲鐘唔鐘意我嘅寫作風格先再決定啦

更新時間大約會係3-4日內
當然如果大家都鐘意嘅話我會更有動力啦
但係…乜我似啲咁幸運嘅人咩





第1話

脫離現實的開始！參加《狼來了》遊戲？


咦…？停電！？一行入更衣室就停電…WTF？唔通連個天都唔鐘意我？剛剛同班小學同學游完水，仲諗著話等陣去嘆個下午茶，難得當年嘅暗戀對象YUKI都有嚟…雖然平日冇刻意扶阿婆過馬路，但我從來都冇做過啲咩陰濕嘢，點解停電呢啲黑仔嘢都會中招。其實臨近冬季，淨係著著條泳褲，個身又濕濕地，你都咪話唔凍…

唉…算啦，既然唔發生都發生咗，作為樂天派嘅我，唯有面對現實啦。唔記得幾時，有位老師同我講過，其實人係有夜視能力嘅，睇嚟兒家用得著啦。我集中精神，希望可以搵到反光比較強嘅實物，同時運用學咗四分之一年嘅救生技巧(P.S. 水上救生)，我慢慢張開雙手，開始摸黑…

等等！有啲唔對路…我記得剛剛先游完水都只係兩點幾，更衣室冇理由會連一啲光線都睇唔到，連一啲透光位都冇？而且冇理由冇人沖緊涼，但係真係靜到連一啲水聲都聽唔到。行咗幾步，咩都摸唔到，如果繼續亂咁行就太危險啦。係咧！更衣室阿叔呢？雖然平時唯一諗起佢嘅時間就只有個儲物櫃打唔開嘅時候，今次真係第一次感覺到我有幾需要佢哋。

我大叫：「阿叔，唔好意思啊！兒家停電我咩都睇唔到，可唔可以過嚟幫下手？阿叔！？」

「…」

等咗有成分鐘，完全感覺唔到有咩動靜。其實重新諗返起行入更衣室果下，的確係有啲奇怪，應該話成件事發生得太快。如果我行入更衣室果刻就停電，冇門嘅更衣室入口應該仲會有光線喺我背後射入嚟。但無論我轉幾多次身，望向邊個方向，我一啲光都睇唔到。

然後我突然有個諗法…唔通我盲咗！？游個水就盲咗？唔係掛？無論香港公共游泳池嘅水質有幾咁差，都唔會整盲人掛…？除此之外我真係諗唔到有咩原因。我都有睇唔少科幻片，如果我係科幻片嘅主角，我諗兒家發生緊喺我身上嘅嘢真係好好解釋。但我好清楚我喺現實世界，點都唔會發生啲咁嘅事…點都唔會……

……

人，總係鐘意去同事情搵原因，有咩事發生咗，就要逼自己搵一個自己認為係正確嘅事實去相信。大多數都係憑自己過往嘅經驗，運用自己擁有又唔足夠嘅知識，去判斷。現代社會嘅進步，卻因為一班知識層面唔同嘅群組互相產生矛盾…

頂！我喺度諗緊咩…我咪又係其中一個。面前發生緊嘅異常，超出自身知識層面嘅異常，可能都係時候，叫自己去接受…

成日都幻想自己係奇幻世界入面嘅主角，今次終於有足夠嘅「道具」比我幻想下啦。

um...通常事件發生都有一個意義或者目的，但我諗現階段唔需要顧慮太多，因為喺一個完全唔知道發生緊咩事嘅情況底下，根本咩都做唔到，就連保護自己嘅能力都…

我應該先好好重新整理一下。兒家眼前漆黑一遍，異常安靜，所有光線喺極短嘅時間完全消失。如果周圍所有事物除咗我之外全部變成靜止嘅狀態，就可以解釋到點解會咁安靜。但更有可能嘅係我已經唔喺更衣室，經過一輪摸黑嘅動作話我知，我身邊非常空擴，所以呢個可能性唔高。再諗返起剛剛叫阿叔嘅時候亦都感覺唔到回音，我諗我應該冇錯，呢度係一個大空間…

由於各種線索不足，根本唔足夠資料解釋當前發生緊嘅事，可以整理嘅我諗就係得咁多。但既然呢個異常有佢存在嘅意義或者目的，而我又係被需要嘅一份子嘅話，背後策劃嘅人、組織或某樣嘢，一定會透過一啲途徑聯系我，話我知。當然，或者我根本身不由己，但現階段可以得出嘅結論，就係耐心等候…

就當我抱著呢個心態嘅時候，一把電腦語音合成嘅聲音隨即響起…「Z0002參加者情緒已經穩定，開始安排下一個程序。」

果然…

隨着語音嘅結束，喺我面部嘅高度，一個細小嘅綠色燈光出現喺我面前。

如果有光發出，咁果個位置應該存在某種實體。我等咗一陣，確認咗冇其他嘢發生之後，我就用手慢慢摸去果個位。

咦？係一棟牆，但明明我頭先摸咗咁耐咩都摸唔到，點解…

「嘟~」突然響咗一下電子聲，一股白色嘅光線照隨即射入我眼球。太突然啦！頭先喺黑暗嘅環境過咗一段時間，兒家有燈光真係好唔習慣。當我慢慢睇清楚嘅時候，發現離我身邊都圍著白色嘅牆，形成一個只有一間細睡房大細嘅正方體房間。我正面對著一棟門，我睇返剛剛綠色發光嘅燈果個位置，原來係一個好似用電子密碼嘅門鎖上面嘅指示燈。但鎖上面冇任何數子鍵盤，取而代之嘅係一個手掌形狀嘅圖案，感覺好似果啲高科技嘅掌紋感應門鎖。而光係從牆外面透射入嚟，所以正確啲嚟講，唔係白色嘅牆，而係牆外面有白色嘅光射入嚟。

剛剛我應該係摸到牆上嘅門鎖，然後周圍開始有燈光。等等先…頭先好似有把合成語音咁嘅聲話咩參加者情緒已經穩定，睇嚟就係等緊我冷靜落嚟先比下一步指示我。咁即係話我就係參加者Z0002？

為咗搵到答案，我嘗試重新將隻手放上去門鎖上面…

奇怪咧…完全冇反應嘅…

就喺呢個時候，突然聽到一把尖叫聲：「啊~~~」

喺我仲未搞清楚尖叫聲嘅主人係邊個嘅時候，門突然自動向左移動打開，一個滿面鮮血嘅女仔突然沖咗入嚟，我成個人被佢撞低咗。我霎時間唔知比咩反應好，我呆咗…

然後佢先出聲：「快…快啲鎖埋棟門！」

「吓…？」

「再唔鎖門就嚟唔切㗎啦！」

「嚟唔切做…」

都未等我講完個"咩"字…佢就拉起咗我隻手，然後拍咗喺個門鎖上面。電子合成語音隨即響起：「是否啟動門鎖系統？」

我望一望個女仔，然後個女仔望著我肯定咁點頭…雖然我唔知係咪有用，但我都試下講出口：「啟…啟動…」

「已確定，門鎖系統啟動。」

從合成語音確認咗果個咩門鎖系統已經啟動之後，電子門自動向右移動關閉。我再次望向個女仔，佢即刻從緊張嘅情緒中鬆咗一口氣。

咦…原來睇真啲，係個短髮正咩…睇落只有十八、九歲，比我矮少少，係我鐘意嘅類型…而且血跡佈滿T-suit同熱褲，加上可憐嘅表情真係令我更加有護花嘅沖動…

為咗了解現況，我先問口問：「你冇事啊嘛？究竟發生咩事…？」

「你終於到啦…Zac...外援者…」

「外援者…？」

「我哋兒家只有五分鐘時間，所以你兒家咩都唔好問，專心聽我講！」

「五分鐘？點解只有五分鐘？五分鐘之後會…嗯啊…」

佢突然錫咗我一下…

「你要相信我！」

「…」

「冷靜啲聽我講…」

初吻就咁冇咗，你叫我點冷靜啊？！

「對唔著…我冷靜啦…」

「嗯…你兒家被強制參加一個叫做『狼來了』嘅遊戲，你唔可以拒絕。而你兒家身處喺你自己嘅房間，而出面有一個大約有一個籃球場大細嘅廣場，廣場上計埋你間房，一共有八間圍著。每間房間都可以由房間主人用門鎖系統將房間鎖上，時間為五分鐘，但房間入面必需只可以有房間主人一個，門鎖先可以啟動。啟動期間冇任何方法可以進出房間，五分鐘過後門就會自動打開，唔可以再關埋。遊戲進行嘅方法好簡單，遊戲開始之後廣場中央就會出現一隻『狼』，而身為『羊』嘅我哋就要係要避開『狼』，直至遊戲完結。」

「咁點解你入咗我間房之後，我又可以鎖到門嘅？仲有，避唔過隻『狼』會點？點先為之遊戲結束？」

「只要我地喺一個鐘頭之內避過『狼』，遊戲就會結束，『羊』就會贏。但如果全部『羊』都比『狼』捉到，『羊』就會輸。」

「所以兒家遊戲開始，我哋要避開『狼』，然後就會贏？輸咗會點？」

「其實正確啲嚟講…你並唔係『羊』，遊戲已經開始咗五十分鐘，而結束前十分鐘，外援者會作為『牧羊人』加入，即係你，負責保護『羊』。你係遊戲入面唯一一個可以對抗『狼』嘅玩家，而且有特權可以比一隻『羊』同你同時入你嘅房間然後鎖門。所以我需要你嘅幫忙。如果比『狼』捉到，或者違反規則，後果就係死，除咗繼續參加遊戲，我哋冇其他選擇…」

佢話會死…？老實講，某程度上我冇覺得有幾驚訝，因為自從脫離現實嘅果一刻開始，我就知道有各種可能發生各種事，無論有幾荒謬…大概喺短時間之內我都唔會得到我想要嘅答案，但如果真係好似佢講咁樣，會搞出人命，睇嚟先專心挨過遊戲最後十分鐘比較重要…

「唔好意思，我仲係唔係好明…究竟比『狼』捉到嘅定義係咩？我又有咩能力可以反抗佢？」

「『狼』…其實就係一個手握電鋸嘅殺人狂，極具攻擊性。只要佢見到你就會毫不猶豫咁攻擊你，被佢當場捉到就只有死路一條…」

「即係話『狼』會殺死我哋！？唔好介意我好奇問一下，八個房間八個人，兒家已經死剩幾多個…？」

「計埋我哋…一共兩個…」

「吓！？咁你認為我有咩方法可以對抗一個已經殺咗六個人嘅電鋸殺人狂啊？我只係啱啱游完水嘅普通人嚟㗎咋，身上就只有一條泳褲…」

「因為根據遊戲規則，『狼』唔可以殺你，所以喺佢殺你嘅前一刻，佢就會立刻被處罰，你係唯一一個唔會被狼殺死嘅人。當然如果所有『羊』都比佢殺哂，你都係會輸，然後被處罰。」

「係咪即係話，除咗遊戲規則之外，我嘅人身安全根本冇保障…？」

「就嚟冇時間，你聽我講，我嘅戰術就係由你企喺門口守著房間，因為佢唔可以攻擊你，只要你攔著『狼』，喺房間入面嘅我就唔會被攻擊，咁我哋兩個都可以贏，明唔明白？」

「我明，但佢用嘅係電鋸喎！？而且我可能根本就唔係你講果個咩外援者，你肯定佢唔會…咩我？」

「相信我…因為…我就算犧牲自己都絕對唔會害你…」

呢一剎…我覺得佢嘅表情，佢嘅回答，就係最好嘅保證…估唔到我條命竟然會賭喺啲咁虛無嘅嘢上面…

「嘟~」門鎖聲又再響起

「門鎖系統即將解除，門將不能再次被使用。」

喺我正前方，房間入面嘅唯一一棟門，眨下眼就消失咗，冇任何聲音同痕跡留低，係真真正正嘅「消失」！喺我仲未接受到呢個超現實嘅情景嘅時候，眼前出現一個拎著電鋸，狼頭人身嘅怪物。就好似捕獵者發現獵物一樣，唔會放棄眼前嘅良機，佢以跟強壯嘅體形唔相乎嘅速度衝埋嚟，睇嚟我今次都十死九傷啦…

實在太可惜啦…我嘅人生竟然會以呢種形式結束！阿媽，對唔著…我從來冇盡過孝子嘅責任，真係生件叉燒好過生我…阿爸，我都對你唔著…你供到我上大學，但係我已經冇機會報答你啦…

就喺我合埋對眼，準備迎接人生最後一個階段嘅時候，耳邊嘅電鋸聲慢慢減小。

咦…？我慢慢擘大眼，睇清楚眼前發生緊嘅嘢。

一個狼頭喺接近嘴嘴嘅距離哄埋嚟望著我…

「嘩！」

當我大腦翻譯完我眼睛所接收嘅信息嘅時候，我嚇到跌咗落地，坐咗喺地板上面。

「嗚嗚~」

「狼」突然發出奇怪嘅叫聲，然後重新啟動電鋸，準備攬過我嘅身體繼續向前行，而我後面嘅係…

「唔好比佢過嚟丫！！！」

係佢，果個奪走我初吻嘅女仔！為咗我嘅春天，點可以就咁就放你隻怪物過去！

「唔駛驚，我一定唔會比佢過到嚟嘅！」

我即刻轉身伸出兩隻手抱著「狼」嘅大腿，用力向反方向拉！

「嗄啊~~~！」

「放…放開…我！」「狼」用奇怪嘅語調命令我。

「你同我出去！」

我用盡全身嘅力氣拉咗佢出去，然後推低佢。好在，體能方面我都唔算弱，用盡全力，對方又唔可以輕易反抗嘅話，呢個遊戲實在太簡單啦！

「嗚啊…啊啊…」

「狼」又再次發出奇怪嘅叫聲，好似開始發嬲咁。我立刻重新守著房間嘅門口，兩隻手分別捉著左右兩邊門口嘅邊緣。

「哼！我睇你點入嚟！」


「遊戲時間餘下最後五分鐘。」

就喺呢個時候，熟悉嘅電子合成語音再次響起，宣告遊戲時間就快結束。睇嚟我都冇咩好怕…

「剩低呢五分鐘就由佢就咁過啦好嘛？反正你又入唔到去，我哋又唔駛死，大家都無謂再浪費力氣」

「…」「狼」保持沈默。

「你話啦狼先生，我講得有冇道理先？」

「千其唔好鬆懈丫！愈臨近遊戲結束，佢就愈大壓力，到最後佢話唔定會為咗要殺我搞到發癲…」

我擰轉頭問個女仔：「發癲？咩意思？」

「小心啊！」

就喺我以為「狼」已經無力挽回勝算嘅時候，佢大力咁拉咗一下電鋸，隨著恐怖嘅電鋸聲再次響起，佢又再衝埋嚟。今次完全睇唔出佢有任何猶豫，就好似就算要殺咗我都要衝入房咁。

今次我都心知不妙，但都即刻同短髮女再次確認：「喂…你唔係話佢唔可以攻擊我㗎咩？」

「佢…如果佢發癲就好難講…對唔著啊…我唔知佢為咗殺我竟然會做到咁嘅地步㗎…對唔著啊…嗚嗚…」

「吓？！」呢句話我冇講出口，可能係因為我仲未有勇氣面對死亡，亦都可能係因為我唔想喺已經驚到喊嘅女仔面前過份示弱，所以我用最後嘅時間選擇再次合埋對眼。同上一次唔同嘅係，今次時間過得好慢，我聽得好清楚電鋸聲同腳步聲，好似感覺得到電鋸同我身體之間嘅距離咁，果種劃破空氣嘅感覺…

「可能比電鋸劈死係世界上最豪快嘅死法…」

遺言，亦都係我最後嘅感想…然後我張開雙手…

前方傳嚟一陣怪物嘅豪叫聲：「嗚啊~~~~~！」


……

原來死咗之後嘅感覺係咁舒服嘅…身體從來都未試過好似兒家咁放鬆…人生真係短暫，從小學到中學完結之前我比人灌輸嘅概念就係要讀書、讀書同埋死讀書，只要上到大學就唔駛擔心日後嘅生活。直到考公開試前幾年，我先知道原來日後要行嘅路比我想象中複雜咁多。好在搵到所謂嘅夢想，有一個目標可以比我奮鬥，終於能夠喺大學讀到自己想讀嘅科目。然後呢？仲鬼有然後咩！然後咪就係喺入學前唔知點解比電鋸殺人魔殺咗囉！唉…真係唔好叫我向閻羅王報告，唔係實比佢笑死…

「喂…」

估唔到一講曹操，曹操就到…睇嚟我都係時候歸西啦…

「喂！你啊！」

喂！人都死咗啦喎！仲駛唔駛咁惡啊！留返少少尊嚴比死者好喎！

「喂丫…」

咦…等等…有人喊緊…？

「喂！有個女仔因為擔心你而喊啊！你仲唔醒，係咪男人嚟㗎？」

「嗯…嗯…？」

身體…好似慢慢有返感覺…我嘗試慢慢擘大眼睛：「嗯…？」

我見到佢就跪喺我旁邊…喊緊…

「你做咩喊啊…？喔…原來你最後都死咗…」

「死你個頭！你仲生勾勾，有排都未死得，定還是你兒家就想死返一次？」

佢隔離有一個男人企咗喺度，好高大，全身都着到黑色，十足十一個職業特工。

「你暈咗足足成個鐘。」

「我…？」

「你仲記唔記得自己叫咩名啊？」

「我…只係記得我英文名叫Zackery...」

「um...睇嚟佢仲需要啲時間…」個男人對著個女仔講。

「我想問…」

「我知你有好多問題想問，你起身先，好好整理一下思緒，我哋慢慢再講。」

「喔…」

「我叫阿Ken，佢係慧欣。」

「Zack你好…」

我記得…佢好似一早就知道我叫Zack…錯覺？


center]++++++++++++++++++++++++++[/center]

唔知大家鐘唔鐘意呢？
下一話將會揭曉更多設定