下面會有好多字，算係遺言啦
不過唔好誤會，我唔係想人挽留我
睇完你地就會明白

由高登過咗嚟膠登一年有多
由初時搞音樂臺嘅活動、搞膠登學院、搞賭波聯......
到後來搞膠登改革
再到依家幾乎無處不在......
我諗入嚟哩個POST嘅，唔多唔少都對我有D認識

或者你地會記得，我成日無啦啦提起女朋友，令你地覺得好煩
但我諗你地亦都會記得，我總係將女朋友講得好好，好到令人唔信
點解我會咁做？
冇錯，你地可以話我係放閃
但我之所以成日提喺嘴邊，係因為我自豪，
佢有好多野令到我好開心，令我覺得自己猶如天之驕子，我實在忍唔住同各位分享

好耐之前，我有提過，佢唔鍾意我上咁多網
其實我都理解嘅，因為現實世界仲有好多野等住我去做......
曾經我都真係嘗試過上少D
但後來遇到膠登改革，加上得到ADMIN對小弟嘅信任
令我喺度搵到自己嘅價值
到依家，更加因為習慣而越上越多......

今日我又激嬲咗佢
今次絕對係我唔啱
為咗氹返佢，我應承佢以後都唔上膠登......
嚟緊佢可能好快會沒收我嘅Account，順便睇下我平時鳩噏D咩
我相信，佢都會睇到哩個POST

過去一年，我知我都得罪過唔少人
我煩、我固執、我自大、我囂張、我奸狡......
但我對女朋友有幾忠心、有幾愛錫，相信同我較為相熟嘅巴絲打都係有目共睹

咁多位，
喺你地講完「熱烈地彈琴熱烈地唱 」、「竟然係真野 」同埋「你條仆街都有今日 」之後
我請你地都講返句正面嘅野嚟支持下我......
或者幫我講返句好說話，請佢原諒我
等我可以安然淡出
可以嗎？

最後，
哩度有D人係我要特別多謝嘅
唔點名喇，哩D野在心中就得，自己對號入座啦
首先係一直以嚟都信任我嘅人，儘管我係一個爭議人物，你地都選擇支持我、相信我，我好感動
仲有就係一班成日唔瞓教聽我吐苦水同陪我鳩噏嘅夜鬼，好開心有你地陪我夜晚趕deadline、陪我溫書、陪我吹水
好多謝你地