認真，識拍拖一定係同小毒西拍拖。

各位留意吓大學入面的靚仔教授（if any），佢地學生時代嘅相通常個樣好薯好老土。因為佢地將大部分時間投資喺讀書上面，將青春嘅浪漫愛情放喺後面。而呢種人通常對興趣、目標都好有堅持、心無旁騖，唔會輕易放棄。作為認真發展嘅對象，呢種性格其實好可靠。

同埋，通常小毒西都識好多嘢。例如我認識嘅毒拎入面，唔少人音樂品味、造詣都好好，或者會睇好多書，可以同妳傾上至天文下至地理嘅話題。就算係打機，其實好難打得好，需要例如戰略、反應力、手腦協調之類嘅能力。至於動漫，其實故事議題通常都好有深度，涉獵到好多哲學、社會或者科學議題，比起一般人睇嘅荷里活大片有深度得多。

最重要嘅一點係，因為小毒西根本無乜女仔埋身，擺喺妳身上嘅心思自然會多咗。因為缺少戀愛經驗，佢地會對難得既愛情珍而重之，唔會玩弄妳感情，仲會努力記得妳講過嘅無聊野。而唔洗講，妳send message俾佢，佢肯定會即覆，唔會同妳玩埋啲無聊遊戲。佢地都會好願意同妳分享自己幾時會做咩，同時因為無其他競爭者嘅關係，妳根本無機會呷醋，仲會好有安全感。

另外，通常男性變得成功之後，一嚟自信多左，二嚟多咗女仔欣賞，愛情觀就會更加審慎揀擇。簡單嚟講，就係難度系數高咗：佢可能會質疑你點解睇中佢，同時都會多咗競爭者。而掉轉，如果妳喺佢仲未閃閃發光嘅時候已經識得欣賞、珍惜佢，佢會更加感激妳。好似係。

http://eros.vjmedia.com.hk/articles/2015/03/10/90563