亞視新聞部副採主陳國揚今日現身亞視總台，交代噚日亞視《六點鐘新聞》獨家報道之經過。陳國揚認為，員工處於被動情況，覺得亞視有變動、變化係好事。陳國揚表示噚日得悉消息時真係有點開心，形容員工一直坐過山車，由上年11月至現在已經坐過山車，被問何時坐完，陳國揚：「好難講!」

問及當獲得聲明時，亞洲新聞部有否向香港電視或王維基求證，再作出報道？陳國揚表示：「不如咁睇一件事先，譬如大家嘅公司出一份聲明，稱有人事變動，大家會唔會走去立即求證？明白大家對做新聞嘅求證係好需要，過去亞視都發出過一次(誤報新聞)事件，希望大家知今次呢份聲明係由公司管理層直接講出嚟。」又表示如果屬單方面公佈發出這份聲明，認為問題不大。

主理新聞部嘅亞視高級副總裁劉瀾昌今早受訪時，亦謂:「呢個係單方面意向，公司決定想賣俾王維基，但王維基係咪接受。」、「新聞一定要搶」，更揚言唔擔心影響亞視新聞部公信力。

講番陳國揚，對於有指王征被罵兩次跣亞視這種字眼，陳國揚解釋：「唔方便評論王生(王征)佢想點樣，或者啲陰謀論嘅睇法係點，我個人睇法係新聞唔可以玩，係絕對唔能夠玩，無論係當時錯咗一次之後，係今次情況嚟睇，我希望都係畀到準確嘅資訊畀大家，而唔係當係一個工具，絕對唔係工具。」

不過，陳國揚覺得唔可以猜測管理層利用亞視新聞部:「只可以講今次係公司發出聲明，真係用公司名義出。」問及會否認為是愚人節禮物，陳國揚話：「今日係收拾心情嘅好日子。」

http://hk.apple.nextmedia.com/enews/realtime/20150401/53590268