我唔明點解有啲人會咁鍾意網絡欺凌。

我無講錯。
係，我喺一兩年內會變性。
都已經食咗荷爾蒙差唔多半年了，胸C了、股大了、皮滑了、腰瘦了。
至今都未做過任何手術，冇整過容。本身冇喉核。


出櫃四個月了，自然識好多新朋友（圈外圈內都有），自然都冇咗啲舊朋友。
男人唔再同我講咸濕嘢，女人開始同我傾女人嘢。;)

我啲朋友話我個樣都唔差。
我唔明點解啲香港人係都要當我哋做性工作者。
大佬呀，我係大學生呢㗎。你都未必係啦。

仲有，我平時係入女廁（反正你都唔會發覺得到），
因為唔想入男廁俾人非禮或強姦，我咁樣入男廁都會好怪。
其實我入洗手間無非都係想做完大小事之後洗手補妝走人啫。。。
偷拍、入廁格換女裝打飛機嗰班係變態，唔係變性人囉。。。

有時覺得香港人喺呢方面真係好補守，覺得歧視我哋係啱。
其實都唔怪得你哋。要怪就怪班傳媒，成日將我哋講成怪物咁。
（講真，其實我自己都唔覺上電視嗰啲其中某幾個真係PASS得到做女人囉。）
其實我哋咪又係人嚟啫。
同埋有一類變性人（我在內），心理性別係天生個囉，冇得怪我哋個播。。

最初我喺我十六歲嗰年因為俾佢哋發現我偷食咗一兩個月荷爾蒙同佢哋講。我媽聽咗之後喊咗成日。
之後佢哋搬我部電腦出廳、斷絕我同其他圈內人嘅所有聯繫、日日夜夜係咁煩我、帶我去啲所謂嘅基督教心理醫生做「轉換」，
基本上係軟禁我，同埋早一派自殺嘅Leelah Alcorn無分別。

果陣時候我被逼收埋自己，好痛苦。
跟住我係上年生日同佢哋喺SKYPE正式出櫃（因為我喺外國住）。

佢哋當時H反應都係差唔多，又話要CUT晒我所有生活費，又話要同我斷絕關係。
我當時好絕望（因為喺青春期開始食荷爾蒙先至唔會搞到我個樣不男不女），爭啲去咗吊頸。

之後上年九月我偷偷哋開始睇醫生、做心理評估、開始正式食處方荷爾蒙。
始終我個外貌會有變所以當要同佢哋講聲。佢哋個陣時開始知我唔係玩下玩下。
佢哋今次冇阻止我，但係我哋冷戰咗一兩個月。

直到我喺啱啱過咗嗰個元旦前夕，我喺FB度公開出櫃。
屋企人睇到，佢哋H態度先至有變軟。而家都開始接受我呢個事實。

我已經係個SYSTEM申請咗喺稱呼上要用「Ms.」同埋我個女仔名。
而家我上堂時，啲教授都係用我個女仔名稱呼我。
（反而用返我嗰男仔名嘅話會好怪）

補充：鍾意男仔嘅變性女同同性戀男係有分別嘅，唔好將SEX同GENDER混埋一談。我好希望啲人有一日識得學會尊重。我見到有好多露骨留言，我希望你知自己基本上係喺度性騷擾緊我，希望你收歛一下。
有問題即管問啦！


[ 本帖最後由 womc 於 2015-4-9 03:59 AM 編輯 ]



http://www.discuss.com.hk/viewthread.php?page=1&tid=24527217