今晚黃秋生頒發「最佳導演」時金句連連，狂抽政改水，佢一上台就話:「今晚真係好猛，係呀又係我，我仲企喺度o架，香港電影人嘅生命力真係好頑強嘅，我相信香港電影都係，金像獎都係，我今日嚟係頒最佳導演，照舊都有個故事，本來係頒男主角，我話好丫頒比劉青雲 ，唔錯呀，佢今年2個提名窄啲啦，兩個提名梗係威水過一個提名，不如頒比個冇提名架啦好冇?條數緊係咁計架嘛。」

秋生又話:「大佬咁你想點，咁啦，你未試過做司儀，由頭嘢講到尾，你講嘢咁危險咁踩界，講錯一兩句咪人unfriend就唔好啦。我話『車，咁你又搵我』，啲人就係鐘意你痴痴哋，但你又痴唔晒，我話『唔得，我一定要做司儀』，問女主角啦，男配角啦，我要真...係做司儀!」此時全場拍手，亦有人於台下大叫「真普選」。

秋生又繼續抽水話:「不如咁丫，有商有量，試下最佳導演，袋住先啦，我哋睇下提名名單。」呢2分鐘嘅秋生Solo，幾乎係全晚頒獎禮最多金句嘅環節呀!



http://hk.apple.nextmedia.com/enews/realtime/20150419/53651030