陳小春噚晚與楊千嬅及林家棟，擔任金像獎大會司儀，小春表現欠佳遭全城圍插，網民狠批佢要睇貓紙兼口窒窒，其間以半鹹淡普通話講「六舊腹肌」時，更疑似爆粗添﹗今日小春同太太應采兒（丁丁）出席樂視網劇宣傳活動，小春認衰準備不足，而丁丁就努力護夫。

對於擔任司儀表現欠佳，小春就話：「要口齒伶俐大把人，搵我預咗窒0架啦，件事係家棟叫我參與，我做得好開心，負評正評呢啲，我冇接觸好耐，我有我做，你有你講，我好enjoy。」

咁講「六舊腹肌」講到好似爆粗喎，小春輕鬆回應：「黃渤嗰part....家棟只係提六塊都得嘅，點會呢？白痴都唔會喺台上講粗口啦，何況係個屬於香港一個咁嘅活動。」

不過佢亦坦承自己準備不足：「家棟叫我做主持時，我都有考慮，佢話得0架喇，有佢喺度，我係香港電影一份子，做下啦，我認我係窒嘅，加上我近十幾日都喺深圳開工好忙，係準備不足，好彩家棟熟內容。」


http://hk.apple.nextmedia.com/enews/realtime/20150420/53653241

小春擔任司儀捱批 丁丁護夫：
搵得佢嚟，唔會期待佢係黃子華...

陳小春噚晚喺金像獎頒獎禮擔任司儀，惜表現欠佳，除咗忘詞口窒窒及睇貓紙外，仲疑似爆粗，遭網民狠批表現欠專業，而小春今日偕老婆應采兒（丁丁）出席活動時，直認準備不足。

而應采兒對於老公被全城圍插，則出言力挺護夫，應采兒話：「搵得佢嚟，唔會期待佢係黃子華，大會搵得佢，就係要口窒同搞笑，佢以前做節目都行呢個路線。稿係咁寫，唔通佢爆肚咩？演戲之嘛。」咁係咪感心痛？丁丁笑謂：「玩一日之嘛，聽日又一條好漢啦，到呢個年紀唔怕畀人玩啦，而且大家咁耐冇見，當一個慶祝活動啦。」

http://hk.apple.nextmedia.com/enews/realtime/20150420/53653349