【全城丁蟹效應】重播《大時代》逾41萬觀眾睇 「全盛期」藍潔瑛超正


《大時代》重播全城追睇，「丁蟹效應」暫時未知影唔影響大市，不過就影響到大台收視，噚日大台重播《大時代》第一集，最高為6.4收視為一開始丁蟹掟仔落街嗰一幕，重播第一集平均為5.6收視，即最高收視逾41萬人收看，平均則有超過36萬觀眾收看。

喺凌晨時段有咁多人睇，「丁蟹」同「方展博」確係魅力沒法擋，為今年最高收視嘅凌晨時段節目，演「方進新」嘅劉松仁今日接受《蘋果》訪問表示：「經典之作是永恆不衰，值得回味！有幸能在那個年代參與這經典之作。」

噚晚《大時代》重播即引起唔少網民喺討論區「推到完場」，唔少網民大讚當年呢套劇嘅配角及老戲骨都好勁，包括演丁蟹母親「何賤」嘅黎宣、演香港大毒梟「周濟生」嘅劉江、演總華探長「龍成邦」嘅曾江、演華人會第一屆主席「陳萬賢」嘅江毅，而女角演「慳妹」周慧敏、「龍紀文」郭藹明、「方婷」李麗珍及「羅慧玲」藍潔瑛，均係當年「全盛時期」嘅女神級索女，自然有吸睛之處，唔少人仲大讚藍潔瑛演技好，難怪當年被封靚絕「五台山」。

不過，好多網民批評大台重播《大時代》居然冇整字幕，令佢哋覺得好唔方便，留言指凌晨播神劇「開大聲少少已經俾人鬧」、「又無字幕，又聽唔到，都唔知點睇」，更有網民表示：「《來生不做香港人》、《導火新聞線》、《選戰》係咪神劇我唔敢講，但一定寫實過呢套野。」旋即被網民圍插，反問佢「0依家冇股市咩」、「你咁講法冇得講，一套咁舊嘅劇點樣寫實」。

有部份網民更睇得好肉緊，指為何打死人畀錢就解決到，又有網民留言罵丁蟹，寫道：「丁蟹根本唔識教仔，佢自己都話自己讀得書少。」總之面對神劇，就連一向踩大台嘅網民都要「跪低」。

轉貼自: http://hk.apple.nextmedia.com/enews/realtime/20150421/53656082