無綫由昨日凌晨開始重播23年前由韋家輝監製的經典劇《大時代》。雖然不知道「丁蟹效應」能發揮多少威力影響股市，但該劇以倒序法說故事，一開始丁蟹因輸股票要與四子「攬死」，逐一掟蟹落樓的場面極其震撼，令收視高開6.4點，逾41萬觀眾收看，平均則為5.6點，約36萬觀眾收看，比起上周《衝》結局篇平均5點收視還要高，成今年深宵收視之冠。

劉青雲飾演的方展博和丁蟹確實魅力難擋，秋官亦有捧自己場睇重播，昨日在電話中說：「自己都驚，成套劇鋪排得好好。呢套係一套神劇，首要功勞都係韋家輝啦，每個角色都有追看性。」不過，秋官直言曾疑慮接演丁蟹角色：「20幾年前，翻睇仍然咁好睇，因為節奏感好強，完全唔覺得係舊嘢，家未必可以拍得咁好。當年韋家輝搵我時都有疑慮，因為我一直以來演大俠，擔心做得好就好，做得唔好就會破壞形象，搞到兩頭唔到岸。不過韋家輝之前做過《誓不低頭》編審，已做出好材料，能夠帶動觀眾情緒，令我有信心接拍《大時代》。」

最後被丁蟹打死的「方進新」劉松仁慶幸有份參演，昨透過短訊說：「經典之作是永恒不衰，值得回味！有幸能在那個年代參與這經典之作。」劉松仁昨晚到九展出席活動，問到《大時代》重播有否捧場？他說：「冇，瞓咗，唔記得呢回事。今早收到風話收視OK，呢個經典嚟。」網上瘋傳他在劇中求老闆不要炒魷的片段，被網友勁讚演技好，松哥說：「嗰段OK，自己第一次睇都喊，我都覺得幾好，主要係劇本、製作、對手都好，劇本好可以帶你入戲，拍攝時好開心。」

劉青雲昨透過助手回覆：「知道有6點收視好開心，但因為今日開早班，噚晚睇唔到，基本上冇乜翻睇亦冇上網睇，知道咁受歡迎好開心。」飾演丁蟹兒子丁益蟹的陶大宇昨出席活動時說：「已經唔係第一次重播，但每次重播外間都反應好大。」對周一股市急瀉，大宇說：「呢個效應真係幾邪！」

不少網民一邊追睇，一邊在討論區「推到完場」，單是兩個貼文已累計逾10萬人觀看，亦好多人建議在黃金時段播放，更多人驚嘆藍潔瑛當年好索且演技出色，當時29歲演19歲學生妹夠清純。不過亦有人投訴聽不清藍潔瑛部份對白，重播居然冇字幕！女神級索女「慳妹」周慧敏、「龍紀文」郭藹明、「方婷」李麗珍等亦屬看點，周慧敏昨說：「呢部劇係我演戲工作上一個大轉捩點，但首播以後冇再完整睇過，慳妹經歷變糢糊，昨晚特意再睇。」


http://s.nextmedia.com/realtime/a.php?i=20150422&s=7018882&a=53658850