梅媽（覃美金）欠租金半年被收回跑馬地住所，而搬去北角新居，佢再向法庭申請從遺產中拎約18萬嘅搬屋費用及新屋租金，今日佢由男友人陪同下到高等法院聽判決，梅媽戴上口罩、行動緩慢，問到大仔梅啟明為何唔陪同出席，梅媽話：「各有各病。」

原本梅媽得5萬元生活費，當中2萬元用來支付跑馬地住所租金。判決中破產管理署冇反對，由新住所租金合約生效日，將會為梅媽交3萬6千元嘅租金，生活費維持不變，但梅媽反問法官話：「可唔可以每月扣10萬俾我？」但法官拒絕，更謂呢個係法律，並唔係法官鍾意點做都得，法官只係執行法律，法律喺頭上，並非喺櫈下，稍後時間會有書面裁決。

梅媽離開法庭時，不滿裁決，佢話：「3萬元生活費做得乜？食得乜？叫我唔好食呀？我依家食豬（筲），要去買平菜，平嘢食。」被問到佢花咗好多錢喺官司，梅媽話：「佢哋食我唔使食？以前12萬自己交租，乜都唔使欠，唔使求人。」提到遺產剩錢不多，梅媽反話：「賣樓賣完一間又一間，冇人簽紙都賣，冇錢？邊個使呀？最後一間賣到億幾，我一毫子分唔到。依家想(祭)我，即刻瞓著可以分錢，我一日喺度都分唔到。」

案件編號：HCMP2981/2004







http://hk.apple.nextmedia.com/enews/realtime/20150428/53681293