記: 記者
曾: 《大時代》編審曾謹昌

記：點睇近年電視劇？o依家劇情經常離不開BBQ、打邊爐，被批評膠劇。

曾：我近年好少睇港劇，做編劇總希望唔理rating，度啲自己未度過嘅嘢，所以呢個問題我唔識答，除非家管理層扼殺得好緊要，我覺得所有編劇都唔鍾意重覆，除非你當做麥當奴或者一份朝九晚五工作，咁就冇得好講，但咁唔係創作，係車衫。


記：點睇王維基？

曾：我覺得佢唔係講到咁勁，要打冧TVB，唔係憑你一個王維基，你要搵優秀過TVB嘅人返嚟，夠唔夠膽搵徐克、杜琪峯、王家衛拍一部？夠唔夠膽搵麥當雄做成個台話事人？唔係你去諗，係你去搵，搵到咪叻，咁我就會覺得勁，而家你又係搵TVB啲人，你憑乜嘢睇唔起TVB啲劇？你叻啲咩？我又唔覺得你叻過邵逸夫喎。

http://hk.apple.nextmedia.com/enews/realtime/20150429/53683698

ATV鹹魚咁，不如死咗佢算

記：以前TVB氣氛好，但近20年似乎冇劇拍得住《大時代》。

曾：我覺得係環境問題，當年我哋個鬥心係好想自己係一個好叻嘅人，贏rating要贏到盡，o依家都唔知要贏啲乜，亦冇假想敵。冇競爭係一個非常重要原因，因為上頭唔會畀咁多資源你，唔會要求咁高，冇資源下想做好，係好辛苦。


記：亞視被釘牌，王維基又攞唔到免費牌，點睇o依家香港電視行業？

曾：亞視可能執咗先仲好，好過喺度吊住條命，然後大家去爭個牌。ATV鹹魚咁，不如死咗佢算。免費電視台唔拍劇真係死梗，一定要製造劇集外銷，好似TVB劇集影響全球華人，多幾個電視台梗係好啦，但我係悲觀㗎，而家多咗internet，做電視台係好辛苦。

http://hk.apple.nextmedia.com/enews/realtime/20150429/53683656

丁蟹等於中共？曾謹昌：我哋一定冇諗過

記：有人話韋家輝作品都有個隱藏主題，《大時代》係「執迷」。

曾：各自解讀，我哋純粹想搞一個好好睇嘅戲，我可能恃住同韋家輝熟，希望創作我可以話事多啲，佢係強勢監製，冇人夠膽話佢唔得，我又係比較強勢嘅創作人，咪有小小同佢拼，喺度橋過程同佢博命，即係鬥，佢度一條橋我度一條橋，其實都OK，但總會問對方有冇再好啲，大家將腦入面所有嘢攞晒出嚟做一個劇。


記：有人話部劇有政治隱喻，丁蟹等於共產黨，丁蟹掟仔落街靈感源自六四？

曾：我哋一定冇諗過，一部好戲，涵蓋面好大，喺邊個位切入去，你都總有嘢解釋到出嚟。當年都有視評話《大時代》係講共產黨，一隻大蟹帶住4隻小蟹咪5星旗囉，我哋睇完啼笑皆非。



記：今次重播掀起全城熱話，覺得係乜嘢原因？

曾：原因好簡單，真係好好睇。重播咁大迴響，我真係覺得神奇。家睇番，當年失手可能係節奏去得太快，冇聽兩句對白已經唔知跟住發生乜嘢事，唔適合阿媽食緊飯洗緊碗睇。


記：TVB開電影版贊唔贊成？覺得有冇得搞？

曾：有得搞，但唔知佢點搞，你唔同《Laughing Gor》有件case喺度，《大時代》係一個整體，好難去抽一條線或者生一件事出嚟，至多係搞丁蟹前傳。將個古仔再拍一次咁有乜好睇？不如睇電視？

http://hk.apple.nextmedia.com/enews/realtime/20150428/53683013


丁蟹原型真有其人 原屬意萬梓良演出



《大時代》重播都可以掀起熱潮，最近甚至被解讀成有政治隱喻，網民面對監製韋家輝固然係「有神快拜」，但《大時代》編審曾謹昌亦是製造神劇其中重要一員，佢跳出電視圈加入電影界，成為周星馳御用編劇，作品有《食神》、《少林足球》、《功夫》及近日周星馳執導的《美人魚》等，52歲嘅曾謹昌近日接受本報訪問，親身拆解《大時代》。

記: 記者
曾: 《大時代》編審曾謹昌

記：點解開拍《大時代》，用股票市場做故事背景？

曾：TVB 25周年台慶劇，搵韋家輝監製，我有幸做編審，我識韋家輝好多年，大家編劇出身，但《大時代》係佢做監製之後第一次合作。佢度倫理好犀利，《誓不低頭》真係天下無敵，我自己就鍾意比較宏大啲，我就建議韋家輝不如搞個大啲戰場──股票，喺TVB搭個聯合交易所，夠唔夠膽？股票真係可以一夜之間富貴、一夜之間閉翳，真係一個大時代。

記：有傳丁蟹角色其實係古代大俠，所以搵做慣大俠嘅秋官演出？

曾：我可以話你知，丁蟹係有原型，我真係識得咁嘅人，佢唔係呢行，發生嘅事亦唔係咁，但真係咁嘅個性，呢種人你係度唔到，創作出嚟就好假，所以鄭少秋乜嘢大俠全部假嘅！最初唔係諗住搵鄭少秋，係諗住搵萬梓良（萬子），因為佢好大隻，真係可以一拳打死你，幾似丁蟹。但究竟係萬子唔得搵秋官，抑或發覺秋官更好，呢個我唔敢肯定，過程我冇參與。後尾睇番，誤打誤撞搵秋官效果重好，萬子做，你只會相信佢係一個偏向狂躁症嘅人，未必做到鄭少秋呢種：「我真係好無辜！」

http://hk.apple.nextmedia.com/enews/realtime/20150428/53682898


記：丁蟹掟仔落街、楊羚被姦之後有性病又跳樓自殺，之後青雲幾兄妹重俾人掟落街，去到咁盡，想挑戰電視尺度？

曾：唔係挑戰電視尺度，係挑戰自己。其實我哋度嘢已經度到唔理（尺度），直情唔記得咗。第一場跳樓戲係韋家輝心願，佢認為個劇咁開一定最勁。黑社會掟玲姐一家落街嗰場，韋家輝開出嚟個題目係點死最恐怖，結果度咗兩日。一班黑社會要整死你，點樣最恐怖？又諗過劈，又諗過開槍同搵車撞死，我話冇嘢恐怖得過赤手空拳逐個逐個掟你落去，結果佢收貨。

大家度嘢亢奮到癲癲哋，痴咗線，大家唔衰得，日日嗌交，唔講友情，大家係日日都唔開心，好似鬥氣咁，但後尾睇番，係將件事越推越好，去到好盡，所以呢部劇好難拍得番，因為冇兩個狂人。其實後尾去到都幾不擇手段，強姦完人之後仲要搞到人有性病，驚唔夠盡，再領多嘢（跳樓自殺），去到我唔隊冧你全家我唔姓曾嗰種感覺。呢個戲就算唔用visual，齋講都好慘，好多場係我執稿時重新寫，好似玲姐喺醫院餵楊羚食嘢，我寫稿時都滴濕幾張稿紙。


記：劉松仁疊報紙叫老細畀次機會，寫劇本時計算晒催淚效果？

曾：一定計到。呢段戲所有創作人員冇份參與，百份百韋家輝功勞，係佢寫，你睇《誓不低頭》，佢係無限呢啲橋，最擅長。頭5集好多場戲係佢寫，後35集就好多場戲係我寫。

http://hk.apple.nextmedia.com/enews/realtime/20150428/53682928



記：點解安排松哥咁早死？

曾：唔係劉青雲點出場？松哥肯客串，係監製嘅魅力，加上個劇本佢唔會懷疑，好多演員最緊要劇本好，唔一定做男主角，如果套戲爛，畀你做男主角冇意思，家摷番出嚟，都有人話神級表現，咁就值啦。不過當年韋家輝說服咗藍潔瑛好耐，最初第一稿，玲姐本來係親生阿媽，藍潔瑛話實在生唔出、實在過唔到自己嗰關，生咗李麗珍、劉青雲，所以改咗變繼母。


記：慳妹原型係一位女編劇？

曾：係，重喺呢行，唔講得，但冇份參與《大時代》。


記：部劇原本夜晚7點35分出街，但第一集掟仔落街出街輿論壓力太大，所以調去9點？

曾：出街一個禮拜之後調去9點，兩個原因，第一因為投訴，第二因為收視唔係想像中咁好，以前收視好勁啲劇有40點，但《大時代》好似得30、31點，所以將佢調去當年9點非黃金時間。


記：就因為第一集掟仔落街太多投訴，所以楊羚跳樓同青雲幾兄妹被掟落街鏡頭cut晒？

曾：係，censor（審查）過太恐怖。


http://hk.apple.nextmedia.com/enews/realtime/20150428/53682965

記：傳聞韋家輝為咗射穿TVB龍門，所以出街第1集當日先拍掟仔落街戲，然後即剪即播，等內部審查唔切？

曾：記得跳樓戲係出街前幾日拍，係時間好緊迫，唔係為咗要過審查。


記：「股票必勝法」*邊個設計？

曾：係韋家輝寫，呢度根本亂寫，後尾嗰段都砌唔番落去。我都問：「你點砌番成一首必勝法呀？」冇人知點解，亦冇打算去諗得明，因為羅樂林傻㗎嘛，佢咪由傻嘅方向出發。


記：劇情影射李嘉誠、何鴻燊、霍英東（三大富商），李福兆（陳萬賢），呂樂（龍成邦）？

曾：絕對，因為呢班人最代表70年代，講聯交所你唔講李福兆咁講乜嘢？


記：最愛金句、場口同角色？

曾：《大時代》我花咗好多時間寫，冇話鍾唔鍾意，反而深唔深刻就有，好似玲姐死嗰一段，我執個劇本好投入，《容易受傷的女人》首歌都係我諗埋。另一場係丁蟹法庭自辯，我直情鬼上身咁，丁蟹想講乜嘢，我係完全唔需要諗。




*「股票必勝法」全文:

貪心輸錢贏　輸血不輸錢　人人去輸血　殺人不打風
落雨去離島　離家飲煉奶　見人分遺產　出獄嫌錢腥
快樂冇人格　出家冇人工　攻而無不克　戰無不勝矣

http://hk.apple.nextmedia.com/enews/realtime/20150428/53682984