香港電視娛樂(now TV)早前獲發免費電視牌照12年，勢同無綫(TVB)爭客仔，今日就有周刊報道，由TVB過檔now TV嘅製作部總經理及副總經理劉家豪及梅小青，係今年同下年都有拍劇計劃，其中一套就係以TVB高收視劇《溏心風暴》班底開拍嘅《黃金風暴》。

劉家豪同梅小青都承認接觸過夏雨、李司棋、關菊英同米雪等人，話大家一齊食飯時，都講起當年拍《溏心風暴》同《家好月圓》嘅回憶，就提議不如再合作，尤其係佢哋有啲已經冇約在身，套劇就預計下年中就開拍。

報道表示，司棋姐話如果開拍一定唔會甩底，不過就要早啲通知佢度期，同埋條件係菊姐要一齊拍佢先會拍，而「大鮑」夏雨就話舉腳贊成，仲話如果下年落實開拍，佢推晒所有工作都會接《黃金風暴》。


http://hk.apple.nextmedia.com/enews/realtime/20150502/53696570