【 《大時代》補遺】方芳原本唔使死 仲出庭告丁蟹
0507 23:16



《大時代》影片截圖


眾《大時代》演員，以及監製、編審等等靈魂人物，每次受訪，例必談及方家四兄妹及四隻蟹墮樓三場戲(其中一場係楊羚跳樓)。當時係話《大時代》92年首集7點半時段一出街，開場未幾四隻蟹已經掟晒落街，觀眾狂投訴，故方家兄妹被掟落街一幕即使拍咗，當時都係出唔到街，要等第40集先可以喺方展博回憶中重現。

今日吳詠紅同邵仲衡及楊羚齊上nowTV《娛樂審死官》受訪，吳詠紅透露，原來方芳呢個角色，最初係唔使死。

吳詠紅話:「原本我角色係唔使死，仲會上庭告秋官(丁蟹)，點知有日返公司攞劇本，見到韋家輝，嗰陣見佢有個睡袋擺喺工作室，覺得好得意，佢仲同我講:『芳芳，我唔想你咁快死，寫寫下覺得要死晒先好，唔係唔夠張力。』韋家輝佢真係投入到可以同一個唔熟嘅演員講咁多，我先至知成功背後真係要好努力同投入得好緊要。」

至於嗰場墮樓戲，吳詠紅一早已有心理準備，只係冇諗過一拍拍三日，最後仲cut埋。「出街第一集就俾人投訴，楊羚死又投訴。拍嗰陣唔記得係喺7樓定10樓，跳嗰陣有我、青雲同李麗珍，三個平排推，一齊跌落街，垂直落，都真係幾驚，而且唔止拍一次，仲要拍唔同反應。最後冇出到街，係有啲失望，但冇辦法。」






http://hk.apple.nextmedia.com/enews/realtime/20150507/53714491