「佔中不代表我」FB群組今日上載一段，長達6分48秒嘅片，由7名中學生講述支持政府方案理據。面對鏡頭，眾學生有點緊張，有人攬實書包，有兩個拎埋貓紙。王喜留言謂:「好想看看他們手上那張紙^_^」





有學生說，政府前後已就政改進行八次諮詢，相信政府真正有心聽市民意見，而且通過政改對民生及政治都有極大益處，若今次否決，下次未必再有機會啟動政改。有學生以為梁國雄係政府議員，又指摘議員拉布搞亂政改。

有學生表示「唔可以一步到位，一下就話想要就要」；有學生就說，由專業人士揀出來之特首候選人更較市民所選的可信可靠；亦有學生表示即使香港無民主，亦唔代表香港唔可以發展落去。片中其中一名學生還說:「其實呢個機會係一個好難得嘅機會，由500萬人揀一個特首出嚟。」


片中各同學觀點：

陳同學：
「我對於新出嚟嘅政改方案，我覺得已經好足夠，咁因為前後已經做咗八次諮詢啦，話長唔長話短又唔短，但係都起碼俾我哋市民知道，政府係有心聽市民意見。」
「你好難搵到一個個個都鍾意嘅方案。我覺得政府喺八次諮詢入面，同學民又傾過，同唔同嘅議員亦都開始傾，我覺得政府喺呢方面上已經做得足夠啦。」
「我覺得民主呢樣嘢唔可以一步到位，一下就話想要就要，係要經過漫漫時間，係需要一個進程，慢慢逐步嚟，而唔係一次我想去我想要咁我就要去揮霍呢個民主。我覺得所有嘢都要循序漸進，唔需要一步到位，即刻想要普選就普選。」

羅同學：
「作為一個中學生，我覺得政改方案對我哋個社會同民生都有極大益處嘅。因為政改方案相比以前，我哋根本連投票嘅機會都冇，我哋連參與機會都冇。但係喺依家，我哋有一人一票嘅機會選特首。」
「中央所任命嘅官員，或者建制，或者泛民都可以有一個權益去選出佢自己嘅理想人選。因此我哋都可以有機會去選番自己嘅特首，真真正正去參與呢個政改方案。」

吳同學：
「呢個方案係一個好好嘅方案嚟嘅。其實呢個機會係一個好難得嘅機會，由500萬人揀一個特首出嚟，我覺得呢個係一個，好好嘅，俾市民嘅一個機會啦。今次否決咗，下次未必再有機會，或者可能要等好耐好耐啦。我覺得要一步一步，唔可以一步登天啦。」

黎同學：
「對香港民主嚟講已經係好好嘅一步喇。即使話香港過去冇一個好實質民主嘅社會，但係香港係咪真係唔可以發展落去呢？」

麥同學：
「政府有候選人俾你揀，有二至三個咁樣揀啦，又俾市民再咁樣揀啦，佢已經篩選咗啲人去通過立法會呀，不同組別界別去搵人出嚟，咁樣就會好啲啦。」
「市民覺得咁樣係限制咗市民去揀咩呀咁，但係我相信政府喺選擇候選人時都係經過專業嘅意見，因為畢竟俾佢哋投票嘅人士都係好多專業界人士，好似教育界律政界醫學界」
「如果俾市民選，雖然佢哋反應好激烈咁話我要求普選，我自己揀人出嚟之後我又要揀番(指提名權及投票)，但咁樣嘅程序有少少麻煩，同埋你可能候選人咁多嘅話你選擇都會難啲啦。」
「中央係有自己嘅政策，佢哋都話唔可以咁樣。佢哋(泛民)爭取咁耐，我覺得佢哋爭取係啱，但爭取咁耐都唔得嘅時候，我覺得普選可能都係跟番政府嘅普選。」

鄧同學：
「咁好似上一屆特首選舉，梁振英唐英年何俊仁去選，何俊仁原來唔係諗住填補特首個席位嘅。咁其實有好多議員係用一個拉布嘅行為去搞亂呢個政改……政府嘅運作。因為一啲政府議員好似梁國雄嗰啲搞事嘅議員呢，佢令到立法會批案嘅速度係減慢咗好多，同埋拖慢咗立法會通過議案嘅時間，大大咁影響咗香港嘅發展。」

錢同學：
「幾個方案已經做咗咁多次諮詢啦，同埋我覺得已頗為詳細同全面，應該要接受。因為我認為俾著以前嘅小圈子選舉，依家已經可以市民一齊投票參與啦，咁已經係一個好大嘅進步。」

http://hk.apple.nextmedia.com/enews/realtime/20150509/53720835