朱慧敏（Queenie）同EO2成員彭懷安Eddie拍拖3年幾，今年2月宣布結婚，但係Eddie多次被人影到背住同其他女玩得親密，不過每次朱慧敏都會撐Eddie，而喺今日，又有報道影到Eddie「疑似」（頭盔mode)又偷食喇。

報道指上個月4號，Eddie偕一長腿女現身北角買白酒，仲去埋女方屋企。On the way嗰陣，女方一副低胸裝戰鬥格，一把蹺實Eddie，兩人好似連體嬰咁行，即使Eddie個頭光到反晒光，離到遠遠都望到，照樣旁若無人，期間女方仲將下巴「晾」咗喺Eddie膊頭上，十足十熱戀中嘅情侶，之後更索性雙雙到女方屋企深宵談心。

事件爆出之後，Eddie就喺微博回應呢件事。佢就喺微博話：「對於今日有關本人夜蒲報道，其實每次發生此類事件，都要Queenie為我作出回應，作為未婚夫的話，實在深感抱歉。

「雖然每次外出亦會向對方匯報，而Queenie對我亦百分百信任，但被拍到此類令她尷尬的照片已經不只一次，每次Queenie都要為我解話，實在為她造成煩擾；勿論每次報道是否完全是事實全部，我實在忽略了從她角度出發，忽略了要保護她的部分。

「所以，從此以後我會檢點，盡我所能避免Queenie再受到不必要的煩擾，這次令各位關心我們的朋友擔心，在此說聲對不起，這對不起，更特別是要對Queenie。」

咁樣樣，Eddie同該名戰鬥格女子成晚流流長做咗啲乜？身份又是誰？「勿論每次報道是否完全是事實全部」，咁事實之全部又係乜？至於朱慧敏，暫時未有回應。

更離奇嘅係，網民睇完Eddie段回應之後，就話：「聽這語氣，證明你是真犯了錯誤了。」、「你哋兩個要好好，唔好負咗佢。」、「好好幸福下去 快娶她。」、「要好好的對Queenie。我們很愛她的。」係咪好離奇？

亦有人話:「偷吃過第一次就會有第二次。不相信咯。」、「以後就可以背著來做了對嗎？」12個留言裡面得兩個係咁，其他都係撐Eddie。

係咪好離奇？

http://hk.apple.nextmedia.com/enews/realtime/20150515/53742154