啲人成日話，男人無論幾多歲，都係鍾意啲廿歲嘅！咁呢，媽咪姐覺得每個人都有選擇嘅自由，只要你「受得起」咪得囉！

嗱，好似前電視小生「危危乎」咁，以前有個拍劇撻着嘅多年圈內女友「騰騰震」，本來好好地。點知「危危乎」一返大陸做嘢，就玩到癲，話咁快同個做得佢個女嘅北方佳麗搞上，撇甩正印。又話咁快北方佳麗有咗，o氹到「危危乎」結婚，落埋香港等攞身份證。然後故事嘅發展大家估到嫩妻有嘅係青春，愈睇愈覺得老佢一大截嘅「危危乎」唔順眼。

有次俾媽咪姐個 friend喺牙醫診所撞到佢兩公婆睇牙，親眼見住嫩妻不斷大聲呼喝「危危乎」，嫌佢做嘢手腳慢呀，點佢快啲去攞車呀。嘩！真係成間診所啲人都俾佢嚇一嚇，跟住即時認出俾人鬧嗰個係「危危乎」，再揞住半邊嘴笑囉。

據媽咪姐個 friend描述，「危危乎」係全程頭耷耷，唔敢駁嘴㗎！講真吖，做人要有自知之明。你估，人人都係賭王咩。

邊個係「危危乎」？
1.眼細細。
2.以前演警察，幾得 C9歡心㗎。

邊個係「騰騰震」？
1.眼大大。
2.演警察都好 OK呢。
================================================
直頭開曬名
不過早幾日先報「危危乎」帶帽