改篇自高登連載小說嘅片《壹獄壹世界‧高登闊少踎監日記》，正所以「飲水思源」，套戲未正式上，但就喺上周六搞咗個「高登優先場」，請咗近300個高登巴絲去睇。


張松枝同張建聲都係集郵目標

一眾演員王宗堯、張建聲、黃光亮、姜皓文、崔碧珈、林芊妤(Coffee)、張松枝和周祉君，仲有原作者小姓奴都有出席，高登User個個啲名唔嚇得都睇得，張建聲大大聲叫署名「張美妮唔扯旗」、「x你個大老尾」現身，令現場一眾巴絲笑爆。而劇中一眾演員都成為高登巴絲嘅集郵對象。


王宗堯話：「高登仔係第一批我睇到嘅觀眾反應，係我最想睇嘅。我上過佢哋forum睇，佢哋對於蕭生拍嘅高登網絡小說有啲反感，佢哋成日因為某啲事情覺得蕭生唔代表佢哋，但其實我想話俾佢哋聽，我哋公司一路都想拍好高登嘅高登電影，今次睇到佢哋嘅反應係好值得鼓勵。呢套戲令我哋好自豪，因為我哋公司有一套至到目前為止係我認為係最實淨、好好睇、而且每個演員都做得好好嘅戲。」


張建聲就話：「今日見到好多高登巴打之後，我發覺天外有天，人外有人，佢哋嘅user name同真人好不同，男女都有好大分別。」


大受巴絲歡迎、影相影唔停嘅黃光亮就好感動:「咁大個仔未試過，呢個機會好難得，我都出奇，總之有條龍跟住我。今日睇戲嘅感覺係我唔當佢係觀眾，當係大家一齊做嘅電影。」


小姓奴(左)都有出席

http://hk.apple.nextmedia.com/enews/realtime/20150518/53750771