亞洲電視台慶5月29號舉行，自從今年4月1號行政會議否決亞視申請免費電視牌照續牌，財政不足嘅亞視隨時玩完，更有指進入倒數階段，盛傳台慶係亞視生死存亡前夕，執行董事葉家寶近日曾表示要揀亞視聽日台慶執笠，讓佢光榮結業，生忌同時變「死忌」。



不過喺台慶前夕，葉家寶喺大埔總台接受《蘋果》獨家專訪時卻改口風，佢指聽日亞視一定唔會執笠，透露近日有潛在買家洽商中，若然成事獲揼水，亞視即使冇電視牌照仍然不死。


談到亞視不死之謎，葉家寶樂觀地謂：「近排我哋接觸咗新買家，傾得成就有轉機，分秒變化中。亞視免費電視時代終結，亞視可以變成網絡電視台，甚至製作公司，佢有不死發展空間。所以我唔認同今年係亞視最後一個台慶，佢只算亞視免費電視牌照嘅最後一次台慶啫。」


葉家寶喺訪問中又話，亞視聽日個台慶，只係播出由幾十名現職藝人同舊將參與嘅錄影紀念節目《亞視光輝歲月：58周年台慶日》，由晚上9點播到10點半，輕輕鬆鬆個半鐘。葉家寶話選擇慳皮度過，係為咗出五月份嘅糧。今日亞視公關透露，聽日，即台慶日，將以自動轉帳形式，發放五月薪金。

最近出面又有風吹話有買家有興趣買亞視，亞視公關就回應:「有關公司股權轉讓的洽談正積極進行中，亞視對傳聞不予置評。」

http://hk.apple.nextmedia.com/enews/realtime/20150528/53787260