我唔知post喺咩台好，好似呢個台最相關⋯

首先，我自從中六起就開始減少食肉，減少嘅意思係除左海鮮之外其他肉唔食，而豬牛羊雞就大概一個月食3-4次（有時係茶記無碟頭飯係無肉我先會食），到而家維持左兩年。

咁點解我會咁做？因為我中四果時睇過記錄片話麥記KFC為左量產d雞而令佢地生活環境好差。但果時我自己都成日比藉口自己令自己唔多點理，而呢d藉口亦係宜家社會上支持肉食文化嘅人嘅論調：

1.蔬菜、微生物都有生命
2.弱肉強食
3.打死曱甴你又接受到？
4.食肉先營養均衡
5.根本唔須要諗，這是文化
6.反正佢地已經死左，唔食係浪費（呢個係我從朋友口中聽過最無腦嘅講法，稍後解釋）

但係呢d人有部分又會反對皮草、狗肉，你問佢地食狗同食豬牛羊有咩分別？佢地答：

1.狗是寵物、豬是食物（可能汲及文化同心理因素）
2.這是文明（無進一步解釋）

我睇完呢d論調，我覺得好無奈，因為某程度上大部分盲目擁抱肉食文化嘅人都誤解左部分（我相信好大部分）唔多食肉嘅人嘅諗法。因為呢d論調係基於所有食素嘅人都係因為眾生平等（佛教果套），但至少我本身就係一個相信自然主義多過眾生平等嘅人。

首先，我覺得減少食肉最主要嘅理由係減少對肉類嘅需求，減少又點？其實肉食文化令到肉類需求大增，令到人類以極不人道嘅方式對待動物，例如養雞、養豬場嘅環境極細，佢地連走動嘅空間都無，每日被狂灌抗生素，體重重到唔正常，搞到胸骨壓斷，痾屎要原地痾，排泄物積聚所發出嘅ammonium(?)令佢地眼睛同食道灼傷，而乳牛則一出世要母子分離（注意：佢地係哺乳類動物），被過度擠奶而出現關節炎、乳房炎（？）等。呢d都只係冰山一角，都仲未講羽絨嘅鵝毛係點得番嚟同埋動物被屠宰時有可能仲未死/失去意識。（全部喺書/紀錄片睇番嚟）

世界的確係弱肉強食，你能唔能夠對獅子講眾生平等，但我地喺食肉嘅同時真係有需要令動物受咁大痛苦？唔係我地睇唔到，佢地嘅痛苦就唔存在。而正正係因為我地對肉類嘅需求無限大，呢種情況先會出現。所以剛剛話有d人覺得唔食肉係一種浪費根本就係本末倒置，因為係你（社會）對肉類有咁大需求先有咁大供應亦先有咁多浪費。

另外，食素亦好環保，又可以增加糧食供應（詳情自己搵書睇，我都係睇番嚟）

少食肉亦有利於健康，你睇下d鬼佬幾肥就知（有研究指出多食紅肉會增加某類疾病嘅風險，但我唔係專家所以無把握講）

總結一下，對我嚟講少食肉係因為動物在生果時真係好痛苦，如果大家都可以減少食肉同重視動物權益，增加多d cruelty free嘅肉類供應同埋動物權益嘅監察，呢個世界會變得更美好。

題外話：我會食海鮮係因為出街食飯，尤其茶記真係無素食，而海鮮直覺上生前受到嘅痛苦無咁多，而我呢兩年入面亦試過完全破戒，但最後都可以回歸到接近食素，你可以話我係一個偽君子（我都覺得我自己係），但我已經踏出左第一步，亦喺度摸索緊一種更好嘅生活方式。

不喜隨便插，我想知多d唔同意見