「5蚊哥」之所以得名，全因佢最鍾意講：「有冇5蚊俾我搭車？」呢位「伸手黨」多數喺大埔巴士總站同地鐵站搵食，扮冇錢搭車而問途人拎「散紙（零錢）」。佢曾被網民「推上報」，又被踢爆原來「乞」到嘅錢會用嚟賭博或買飲品。

今日（6月21日）有市民於Facebook上載短片，指5蚊哥再次喺大埔巴士站出沒，早前被指嗌價升至8蚊嘅佢，可能因為「搵食艱難」，今次由5蚊劈價至1蚊。當佢一路問等車途人「有冇一蚊散紙」，行到去揸機市民面前，有市民話：「還錢先丫！」5蚊哥即時黑面，轉身敗走。

有網民笑稱今次減價可能係「父親節優惠」，又指拎1蚊散紙都幾高難度，因為多數人唔會留毫子喺身，不過亦有人話「呢啲有手有腳嘅垃圾，一毫都比多佢啦」！

片:
http://nextplus.nextmedia.com/news/latest/20150621/216926