日本漫畫《死亡筆記》累積銷量逾3,000萬本，曾拍成電影都大受歡迎，日本NTV電視台信心十足開拍全新連續劇《死亡筆記》，今次電視台大擔起用窪田正孝大旗扮演夜神月，20歲型男山崎賢人就挑戰L一角，加埋33F水着女星佐野雛子扮演彌海砂，鐵定聽日開播，NTV正喺澀谷車站展開宣傳攻勢，佐野雛子都狂拍水着寫真造勢，連山崎賢人都爭取曝光率谷劇。


「現代版L」山崎賢人積極谷劇。




水着女星佐野雛子扮演彌海砂，近日都頻晒33F上圍。


始終珠玉在前，電視台自從公開陣容同埋造型後，廣大觀眾更加覺得舊版選角比較適合，無論係藤原龍也演嘅夜神月、松山研一嘅L、戶田惠梨香扮演嘅彌海砂，對影迷來講真係最佳配搭。

原著Fans呢排越鬧越激，事關新版故事內容改到不似原形，彌海砂忽然變女團成員，本來係天才嘅夜神月就慘變追捧彌海砂嘅宅男粉絲，班原著迷唔嬲就假。

本來有唔少網民打算透過日劇《死亡筆記》嘅電視台官網不吐不快，點知網站就將留言內容自我審查，經篩選負面評論後，最後只留番有讚冇彈嘅留言。

http://hk.apple.nextmedia.com/enews/realtime/20150704/53931676