阿爺暴力救市無所不用其極，超乎你想像。今早滬指低開，一度跌逾3%穿咗3400點重要關口，新華社即刻10點鐘左右出新聞稿，話公安部副部長孟慶豐帶隊操上證監會，要查惡意賣空！嚇到股民即刻唔敢沽貨，A股大幅回升！

網上有傳，雖然話係針對惡意賣空，但公安會查股民6月以來所有成交紀錄，睇下有冇沽空，犯下危害國家安全大罪；甚至有傳言話，如果今日你仲夠膽賣貨，有可能被拘留！公安威力無窮，嚇到今日幾乎所有A股上升，只有兩隻被限制交易的ST股下跌。

情況有幾誇張？因為驚畀公安拉，今日冇人夠膽沽貨，A股總共得2800隻，有超過1200隻A股升停牌，扣除1500隻停緊牌股份，即係話今日超過95%可交易股份，通通被逼升停。至於幾隻大價權重央企股，表現就較落後，滬指只升5.8%。成交就只有9500億，為幾個月來最低。話時話，如果有人用枝槍指住你，你估仲有幾多人有興趣買股票？