自問由613事件上膠登上到依家, 由ABC管理時嘅每日五百至千幾會員常駐 (唔好問我點解知, 果時登入會員個數係公開), 曾經問鼎香港頭一千網站, 日日有人發佈笑料。到膠流流管理時嘅二、三百常駐會員, 會員日日內鬥, 自製插件因各個原因無曬功能, 再到依家ICE時代得番百幾人係到, 究竟膠登發生咩事?

我好早好早之前已經反對果堆咩內務長同版規嘅成立。但次次發生咩事, 膠流流、ICE及一眾政務友(有D走左有D仲係到)都以「改善論壇」為由, 規則加下又多D, 加下又多D。大家睇下依家膠登似咩? 你地睇下似咩? 依家堆咩內務長咩版規煩複到無人明, 會員就內鬥到死淨堆厚面皮不知廉恥。然後, ICE掛住NIMDA個名要一意孤行要摺埋膠登開一個新嘅政治向論壇。

你唔好同我講NIMDA都想做所謂嘅「改名」, 你地究竟知唔知NIMDA係點重新起膠登架? 613事件當日, 我第一次入黎果時, 依到只係一個得註冊, 登入, 開POST同回覆嘅網站。吹水台版面只係得4、5個NIMDA同ABC係到testing嘅post, NIMDA同ABC只係想搵番昔日係舊膠登嘅快樂吹水時光, 佢地係無諗過613事件及後嘅1112, SIM卡事件會突然有一堆政治難民湧過黎, 然後攪到佢地2個要開夜車1個月去緊急起好成個膠登。

依到已經再見唔到輕鬆D嘅POST, 日日都係一大堆政治同會員內鬥POST。而且會員質素真係已經差到插入地底, 例如有位叫咩琴咩咩嘅「內務長」, 個格同CY一樣咁鍾意同人鬥氣。同佢講野除左鬥氣之外係無邏輯架, 唔夠人講就一句「唔駛理佢」走左去, 我都唔知點解膠登一眾會員可以揀到依D梁振英級數嘅極品出黎。唔好問我又做咩唔投, 我已經講得好清楚, 依堆規則由DAY1開始就唔應該存在。

原本我已經係諗住膠登改左名先走, 既然依家係要摺起膠登, 依到又已經搵唔番以前嘅感覺, 我真係諗唔到仲有咩原因要留係到受氣。唔好又講埋D婆婆媽媽嘅「膠登係你女人黎架」。如果依個邏輯成立, 我應該一直留係高登同林早信日日做愛。我要去搵一個可以快樂吹水嘅地方, 依唔係一個管理員事事干預嘅論壇。

最後一句, 希望支持起新嘅政治論壇嘅人身心快樂, 唔好俾我睇死你地開完1年, 就好似社民連分裂左個人民力量出黎咁。你知架啦, 膠登本身已經唔多人, 依家起新嘅政治論壇走一堆人, 到時政治爭論分裂再走一堆人, 我驚你地到時變死城就唔好啦。