隨住北戴河開波同93大閱兵臨近，天津爆炸呢Ｄ奇奇怪怪既新聞只會愈黎愈多。雖然大家都好討厭共產黨，但香港係大陸身邊亦係不爭既事實，要有認識先可以免受其害。而家整個權鬥懶人包，希望大家醒目Ｄ，睇路行。

講權鬥前首先要講清楚，係權鬥既世界係冇是非對錯之分，亦無忠奸可言，講既只係利益分配不均而鬥爭。另外權鬥下既棋子，亦無永遠屬於同一陣營，即係話今日可以係江派，聽日可以係習派，所以請大家唔好同黃飛鴻鬥石堅既心態黎看待中共權鬥。

講番正題，而家中共中央主要分兩派：江派同習派。要搞清楚所謂阿爺，即係中央其實係由七個政治局常委組成，江派同習派係三對三。
江派有：張德江，劉雲山，張高麗。
習派有：習近平，李克強，王岐山。
第七個係冇特別派系，代表鄧小平家族利益既俞正聲。

張德江：江派常委既首腦，管人大同港澳小組，而港澳小組下屬係港澳辦。即係話理論上梁振英直屬頂頭上司就係張德江。而人大既８３１決議，拍板既亦都係佢。

劉雲山：管中宣部，即係所謂宣傳機器，包括中央電視台，人民日報，環球時報，網絡媒體監控等等都在其轄下。雨傘運動導火線既果本白皮書，就係中宣部既傑作。

張高麗：國務院排名第一既副總理，即只要李克強有咩事不在國內，就由佢署任總理工作。

習近平：國家主席，軍委主席，控有黨政軍大權。代表紅色血脈，即開國功臣集團利益。目前以反貪防腐為手段進行清黨工作。

李克強：國務院總理，團派利益代表，暫時與習近平利益一致，輔助習近平穩定國內經濟民生。近日股災萬億救市即其傑作。

黃岐山：中紀委書記，負責黨內肅貪工作，為習近平手中的尚方寶劍，以貪腐名義進行排除異己之事。

講完兩派分工，就可以講講佢地點解要鬥得你死我活。需知習近平既無毛澤東之魅力，亦無鄧小平之軍功，卻行清黨之事，顯然佢背後有好強大既政治能量支持。而支持習近平既，就係同毛澤東長征過，上過井崗山既開國功臣後人，即係紅二代。紅二代認為只有佢地先可以享有特權，猶如當年清朝既滿人一樣，認為江山係屬於佢地，所有人都只係佢地既私產，因此對於身為地方諸侯入主中央既江澤民，竊奪改革開放既利益有強烈仇憎，因此佢地認為要打倒江澤民，從新制定屬於紅色特權二代既規則。

咁你會問，兩派相鬥關香港差事？事實上，兩派角力既其中一個戰場就係香港。

梁振英上台，其實係土共奪權，取得董建華支持，繼而取得習近平支持，推翻江系欽點培養十年既預定特首唐英年。梁振英上台係有四大任務：
１，模糊邊界令中港地理融合
２，推行國教令中港意識形態融合
３，推翻三權分立破壞司法獨立令中港制度融合
４，消滅言論自由令中港資訊融合

梁振英上台，係因為向中央拍手口可以完成以上任務，但實情係第１項惹黎一連串醜聞，第２項惹黎十幾萬人示威反國教。即係話１同２係失敗收場。係呢個情況，為左穩固自己既權位，身為政治投機者既佢睇到兩江習兩派權鬥而對港立場既分岐。習派希望香港穩定，可以無後顧之憂地收拾江派。江派希望香港亂，以分散習派精力，更希望香港動亂，可以伺機而動反攻江派。所以梁振英以張德江為靠山，企圖制度動亂撕裂香港。由白皮書開始，到８３１人大決議引發雨傘運動，到暴力清場與否，甚至去到股災波及香港大跌市，甚至到而家梁振英仍不停制造撕裂，顯示香港其實深受兩派權鬥既影響。

而即將舉近既北戴河會議，更加係兩派決戰既最後戰場，所以天津爆炸我唔敢講背後係冇黑手，但可以肯定既係呢Ｄ奇奇怪怪既事將會陸續有黎，希望大家可以睇路啦