太古城道/ 太裕路交界, 路口有一棵大榕樹. 係呀, 有氣根嗰棵.

冇爛, 冇窿, 冇蟲, 有好多雀仔. 居然冇嘢.

樹原本應該冇嘢. 不過, 當所有樹都有嘢, 要諗嘅唔係逐棵吊命延壽, 而係調轉去研究健康嘅異數, 好似牛痘.

行去樹下面睇, 見到樹根生到好出, 幾大範圍 (半徑 2m 幾) 都冇鋪地磚, 行人唔需要迫到踩過樹腳;
樹冠好大, 但仲未去到馬路;
有風吹過, 南面有個開口位冇建築物遮住太陽, 東西北都係馬路.

水、火、土、風四元素
唔能夠太乾太濕;
日光充足;
土壤合適, 地面地表地底空間足夠;
氣候適宜, 空氣流通、清新

般含道四樣都差. 半山以至全港, 絕大部份街道樹都係.


呢個問題已經唔能夠解決, 就係香港建築密度太高. 半山建築物幾十年前唔係起得咁高.

北角健康隔離幢大廈拆咗 (以前玉郎、星島斜對面), 行過覺得比較開揚, 但其實就算成幅地做成公園唔起樓, 都已經係外國嘅高密度. 北角幾十年前除咗係小上海, 仲係報館集中地, 不過後來地價太貴, 全部搬去工業區, 仲有D出版機構喺北角工業大廈, 以前中間通窿, 依家英皇道汽車入口縮細同泊車. 舊時仲有好多甘草演員住, 或者樓上開班教唱歌等等.

講起玉郎中心: http://news.stheadline.com/dailynews/headline_news_detail_columnist.asp?id=339074&section_name=wtt&kw=197

可以去外國城市參考, 根本冇人起到咁高咁密. 倫敦屋矮, 後園 (內園) 可以種樹. 就連大陸開口埋口十三億都比香港開揚得多.


香港市區住宅區, 實際人均密度去到每平方公里六萬 -- 連旅客近八百萬人, 當中近七百萬塞入百幾平方公里港九新界市區 -- 係外國主要城市三至十倍, 上海、紐約嘅兩倍以上, 冇綠化, 學校細, 醫院、社區設施嚴重不足, 加上工時長、私家車太貴, 唔可以住市郊, 白領都要住棺材房.

起高少少根本冇用, 只會令人遷回香港九龍, 人口密度更高. 除非住宅大廈可以起到五百至二千層高, 住到你唔住, 咁香港市區就可以釋放空間去起公園. 但五百層高嘅大廈高過大帽山一截, 二千層仲高過拉薩, 拔地而起, 真係遮天閉日.

根本唔駛搞咩土地問題, 係因為冇得搞!

香港今日之痛苦, 始於英國割地太少, 而又太有吸引力. 一割就割到去廣州, 大如英國一個郡, 天下太平.

樹亦可以被視作一個生活環境嘅 indicator, 樹生長唔到, 人亦唔會健康. 香港已經去到死亡階段.


港大開心公園有冇種過另一棵樹? 想種木棉? 細葉榕? 種嘅位置會唔會變? 駛唔駛填高一D, 或者挖大一D?

養隻啄木鳥或者蜥蝪會唔會食咗蟲仔? 以前成日喺樹下面攤抖, 成日有蟲跌落個身