http://hk.apple.nextmedia.com/news/art/20160421/19580190
祟英甚至港獨情緒升溫下，舊時月光特別明亮，連那些年嘅人和事，都份外順眼兼有親切感。而英女皇呢，至今仲係唔少港人心目中嘅事頭婆，事頭婆今日90歲大壽喎，作為香港市民，點可以唔做啲表示，其中本地收藏家兼藝術家伍龍威就以7,000幾個歐洲針章，創作一幅超過兩米高嘅巨型英女皇肖像畫，同事頭婆賀壽。
伍龍威同八方講，話英女皇嘅傳奇在於佢嘅應變，「佢面對戰後嘅英國、面對君主立憲制出現、面對屬土相繼獨立，佢好似可以隨住時代變更。」

皇家鑄幣局出重量級紀念幣

整個創作過程歷時3、4個月，用咗逾7,000個歐洲針章，選擇參考相片後，就洗淨同風乾針章，再分類排色，構圖後插針落板。伍龍威坦言好想將作品變成事頭婆生日賀禮，講句Happy Birthday，「我相信佢係代表咗某個時代嘅香港，係好多土生土長香港人嘅一份思憶。」佢計劃下月喺灣仔舉辦個人藝術展，展出約60件作品，當然包括英女皇肖像畫。

英國皇家鑄幣局亦特別推出「英女皇90大壽」紀念幣做賀禮，包括重達一公斤、刻有FULL OF HONOUR AND YEARS嘅紀念銀幣，正面設計由英女皇御准嘅藝術家Christopher Hobbs設計，正中刻有「EIIR」。國際金錢（香港）有限公司發言人話，紀念幣皇冠圖案為女皇加冕時所戴嘅聖愛德華皇冠。背面圖案則採用上年先出爐嘅英女皇第五代肖像，據聞有啲貨都冇晒貨咯。


【7,000針章畫】■伍龍威以7,000多個針章製作女皇肖像畫，參考相片要慈祥、莊嚴、高貴和善。