HKGalden學術臺
發表文章發起投票
JR同東京地下鐵完全合體嘅車站——綾瀨

作者:劉病已

理論上,綾瀨站有兩條唔同公司營運嘅路線:一係東京地下鐵嘅千代田線,二係JR東日本嘅常磐線。兩條線分別係咁嘅:

(千代田線)町屋↖         ↗北綾瀨(千代田線)
         =北千住==綾瀨=
(常磐線)南千住↙         ↘龜有  (常磐線)

當然,就咁睇冇乜特別——香港地鐵都係咁,荃灣線同觀塘線分別由荃灣同調景嶺去到太子,一齊行到去到油麻地之後,又分道揚鑣去中環同黃埔(就嚟去到啦 )。

但係唔係咁。

你去到綾瀨站之後,首先會發現綾瀨站唔係兩個站,而係得一個站。佢又係一個JR站,又係一個(喺地面嘅)地鐵站。你可以買到JR飛,又可以買到地鐵飛。

而最攞命嘅係,如果你要去北千住,你幾乎(我唔肯定 )只得一種車可以搭——一架上面有地下鐵logo嘅車。咁說好的JR呢?如果我得張JR pass咁點算?

答案就係——坐啦,呢架車又係地下鐵,又係JR,你想搭咩都係上呢架車。簡直係波粒二象性嘅現實化身啊!

但跟住你又會發現,呢個方向嘅多數列車都係去代代木上原(即是千代田線嘅終點),而冇任何一架車可以去到南千住。係一架都冇!

咁想去南千住可以點?你可以去北千住轉車囉 (不過喺北千住又有兩種車可以轉

原來常磐線雖然係一條線,但簡單嚟講係分咗做兩條線。一條就咁叫常磐線(或常磐快速線),一條叫常磐緩行線

常磐線本身係由上野去仙台嘅(不過東日本大地震之後中間斷咗),所謂常磐線,就係畀你長途運輸嘅——例如上野去水戶,就一定係常磐線。

而係近東京嘅地區,常磐線有時會飛咗某啲站(例如南千住),但如果你喺上野想去南千住嘅話,等多一兩班車都會等到停南千住嘅。

但如果你喺上野嘅常磐線月台,係永遠都等唔到去綾瀨嘅車嘅。所有常磐線列車都會飛咗綾瀨站。點解嘅?

因為綾瀨屬於常磐緩行線,而常磐緩行線係由北千住出發,經綾瀨、龜有去到取手嘅。呢條線會停一啲常磐快速線永遠唔會停嘅站(即係綾瀨之類),而且係站站停。

即是話,如果你喺綾瀨想搭常磐快速線,就要搭常磐緩行線去北千住,或者去另一方向嘅松戶,再轉常磐快速線。

而更有趣嘅係,呢條「常磐緩行線」,經常係由千代田線嘅列車做埋。即是話,一架喺代代木上原出發嘅千代田線地鐵,去到北千住開始變咗地鐵同JR嘅混合體,過咗綾瀨之後,又會變咗一個純粹嘅JR列車。

個情況就好似由柴灣出發嘅港島線,去到鰂魚涌之後就飛咗中間啲站,喺銅鑼灣停一停之後,再去到金鐘先繼續站站停到堅尼地城。咁中間啲灣仔/天后/炮台山/北角點算?唔驚,由將軍澳線做埋,即是由寶琳出發嘅將軍澳線,過咗鰂魚涌之後,會身兼埋港島線,一路去到金鐘。

咪住!

漏咗個北綾瀨站喎!!

咁係咪即係,由代代木上原出發嘅列車,有時會駁去取手,有時就去北綾瀨?

錯,如果你要去北綾瀨,惟一嘅可能係先去綾瀨,再轉一架專門去北綾瀨嘅列車(呢架列車會不斷往返北綾瀨同綾瀨)。

但雖然代代木上原同北綾瀨之間冇任何直通列車,但喺路線圖上面,佢哋係同屬一條千代田線,完全睇唔出其實係分咗兩條線

最後係,咁我喺綾瀨上車,車錢點計先?

簡單嚟講,你喺咩站出,就當你搭咗咩。例如你去秋葉原,如果係喺地鐵站出,就計地鐵錢(當你喺北千住轉日比谷線)。如果喺JR出,就計JR錢(平啲,當你喺北千住轉常磐快速線再喺上野或日暮里轉求其一條JR線)。

而最後嘅最後係,如果淨係喺綾瀨去北千住,係會計你JR價錢嘅——因為平啲

(北千住又係一個好複雜嘅站,廢事講。而佢同南千住雖然都係有常磐線、日比谷線同TX線經過,但兩個站嘅設計好唔同
Good8Bad2
2016/04/29, 10:33:41 晚上
本貼文共有 0 個回覆
此貼文已鎖,將不接受回覆
發表文章發起投票