阿明又嚟喇，不過唔係黎明，而係深水埗明哥！費清聽到，一直喺慈善核心內圍嘅明哥，佢嘅新店將會喺6月中至月底嘅weekend開張！而且，仲請咗一個全城最知名嘅食家題字㖭。

明哥派飯派到街知巷聞，為人熟悉嘅係正店－北河街北河燒臘飯店，另一間大南街副店之前被業主加租，3月底結咗業，好彩善有善報，對面街業主謝林讓咗個舖位畀佢延續善舉。不經不覺原來間舖都裝修得七七八八啦。
明哥新舖唔係「餐廳」咁簡單，因為會用社企方式經營，會自負盈虧，換句話講會盡量降低食物價錢，希望基層市民只需要花合理價錢就可以食好西，而且有心人捐出嘅飯票，100%去番有需要人士身上，唔似出面一啲慈善機構，大筆錢去咗行政費。
所以，新店名都要別不同啦，費清八到，唔係叫X記或XX茶餐廳，而係叫「北河同行（深水埗）」。個名代表咗明哥心願，希望大家一齊行善，而（深水埗）代表明哥想呢間係第一間，將來遍地開花，例如北河同行（元朗）、北河同行（天水圍）．．．
聽到明哥心願，費清都心頭一暖，相信好多人都會被感動，仲包括蔡瀾！話說明哥偶像係蔡瀾，好想搵佢題字，明哥朋友四出聯絡，終於搵到蔡san。二人素謀面，但好忙嘅蔡san即刻爽快應承，大筆一揮，就為明哥新店留下墨寶，亦為飲食界留下美事。明哥梗係想佢可以去剪彩，而蔡san一向都好撐小店㗎，但雙方仲未落實。
香港多好慈心人，早前報導過新舖裝修費貴，之後好多人主動向明哥免費提供不鏽鋼爐具、磁磚、LED照明系統及電視機等，仲有匿名善長捐咗一批分體式及掛牆冷氣，值十幾萬㗎，明哥都好感動同感恩。
如果大家都跟明哥行善，不妨留意吓facebook專頁「深水報」，負責人ming哥做1600熊貓嘅義工時認識仲明哥，之後不時幫佢宣傳。ming哥話明哥新店將來都會有義工分享會，詳情可以留意吓「深水報」update。facebook專頁「深水報」https://www.facebook.com/Shamshuipost/
明哥仲有做其他善事，Kiehl’s Loves Hong Kong限量版系列6月1日推出，邀請明哥、盛智文、譚玉瑛、及林樹鑫(SK Lam)影咗啲短片講本土文化，而今次慈善紀念品收益，將全數捐畀專搞本地文化嘅「文化葫蘆 (Hulu Culture)」作慈善用途。





http://hk.apple.nextmedia.com/realtime/news/20160531/55165082