旅遊臺
發表文章發起投票回覆
下一頁
冰島夏日環島自駕遊
第一次嚟哩度出遊記。除咗想出吓相之外,都想講多少少今次個行程計劃。
今次喺冰島用咗十日時間由 Reykjavik 揸車去到 Keflavik ......
遊記將不定期更新。

Good 39Bad 3
26/11/16 10:24 PM
引用快速引用

本貼文共有 113 個回覆
#adore#
#126/11/16 10:30 PM
引用快速引用
留名#adore#
#226/11/16 10:31 PM
引用快速引用
#326/11/16 10:32 PM
引用快速引用
#good#
#426/11/16 10:38 PM
引用快速引用
今年六月,正直冰島嘅初夏季節,我同埋幾個朋友喺冰島由 Reykjavik 出發,用咗十日時間揸車去到 Keflavik #yup#

先講吓出發前嘅準備功夫,我哋係喺今年一月頭開始認真計劃個行程嘅,諗住喺六至八月冰島夏季嘅哩幾個月過去玩。

首先係訂機票,格過幾間航空公司同旅行社,最後格到芬蘭航空嘅來回經濟客位最平,航班要經芬蘭赫爾辛基轉機。當時大約喺一月尾,我哋見六月頭出發嘅話,芬航嘅經濟艙價位大約係 $ 7~8,000 左右,如果六月尾出發嘅話,差唔多時間機票嘅價位就升到九千尾到過萬。查返冰島到六月嗰陣啲天氣已經唔係太差,相差幾個禮拜張機票要俾貴差唔多二千文,於是就決定六月頭成行嘞。

當時我哋其中一個團友因為一啲事要遲我哋一個月先可以確定成行,結果我哋喺二月頭嗰陣訂嘅機票就盛惠每位港幣 $7,993 大元,遲啲訂機票嗰位朋友到二月尾上芬航個網站睇返,發覺同一航班嘅票價已經升到 $ 9,118。不過芬航啲機票票價原來都幾浮動吓,到佢真係訂嗰陣啲票價又跌咗幾百,最後佢三月頭訂到嘅票價就盛惠港幣 $8,720。寫哩篇遊記嗰陣身痕八卦吓上芬航睇番,見到出年六月頭差唔多時間嘅航班啲票價大約係七千中左右。所以哩張機票早訂同遲訂,票價都可以有一千幾百嘅差別㗎。

搞掂咗機票,跟住就到租車嘞。租車嚟講,除咗比較車租嘅價錢外,我覺得保險都係一個好重要嘅考慮嚟;喺冰島租車通常會見到下面哩幾種嘅保險項目:

CDW (Collison Damage Waiver) 同 SCDW (Super Collison Damage Waiver) 哩兩樣就比較大路,主要係保炒車所引至嘅賠償。除咗冰島之外,喺好多其他國家租車都有哩兩隻保險買嘅。

SADW (Sand and Ash Damages Waiver) 或者 SAAP (Sand & Ash Protection),喺冰島有時會出現風沙暴,特別係喺冬季,如果唔好彩碰上,就有可能成部車俾啲風沙刮花;哩隻 SADW/ SAAP 就係保部車俾風沙損壞嗰陣嘅賠償。

GP (Gravel Protection),喺冰島就算係最好揸嗰條一號公路都有少部份路段係啲冇舖平瀝青嘅爛路嚟,而且好多景點都要通過啲幾得人驚吓嘅崎嶇山路先去得到。GP 就係保部車嘅車身、擋風玻璃同車頭燈喺行哩啲崎嶇路段時俾路上啲石仔揩花撞淤嗰陣嘅賠償。

TP (Theft Protection),雖然冰島係世上數一數二治安好嘅國家,不過整體治安點掂都好,都唔代表擔保一定冇賊嘅;萬一部車真係唔好彩俾人偷咗,就要靠哩隻保險理賠嘞。

參考咗好幾個講去冰島自駕嘅遊記,發覺當地一間舖號叫 [url=http://www.bluecarrental.is]Blue Car Rental[/url] 嘅租車公司都幾多人幫襯同寫佢啲評價都唔差,另一間 [url=http://www.reykjavikrentacar.is]Reykjavik Rent a Car[/url] 見佢喺網上嘅評價亦係唔錯;查實我格價嗰陣主要都係比較哩兩間租車公司。基於相同車款同配套 (例如 GPS、Extra Driver),同可以買嘅保險都盡量買齊哩兩個考慮,計番 Blue Car Rental 比 Reykjavik Rent a Car 嘅價錢就平咗大約 6%,不過 Reykjavik Rent a Car 嘅 SADW、GP 同 TP 嘅自付額都係 0 (Zero Excess),剩係 SCDW 我哋重要負責 ISK 75,000 嘅自付額 (寫哩篇遊記嗰陣我去 Reykjavik Rent a Car 個租車網頁度睇返,發覺佢有個 Deductible 0 ISK 嘅 SCDW 選項;如果冇眼大睇過龍嘅話,我哋租車嗰陣應該重未有哩個 Zero Excess 嘅 SCDW 保險選項買嘅)。

而 Blue Car Rental 嘅 SAAP、GP 同 SCDW 都有自付額重要係都幾貴吓,GP 重要唔包擋風玻璃損壞,剩係 TP 係 Zero Excess。當時亦另外加多間舖號叫 [url=http://www.reykjavikcars.com]Reykjavik Cars[/url] 嚟比較做個參考,哩間見網上就比較少人提,佢個車租同 Reykjavik Rent a Car 差唔多,SCDW、GP 同 SAAP 都有自付額不過個自付額就平過 Blue Car Rental,TP 都係 Zero Excess。

三間比較過之後我嘅結論係,雖然 Reykjavik Rent a Car 嘅車租貴咗少少,不過佢啲保險嘅保障就比較優勝。最後決定去馬幫襯哩間,整咗部 Subaru Outback 4WD,10 日租金連保險 GPS 加個 Extra Driver,盛惠 ISK 205,860。

今次喺冰島嘅十日九夜行程,總共要預訂八個地方嘅住宿。我哋到三月頭先開始搞,查實都已經有少少遲,嗰陣好多心儀嘅民宿都已經客滿。最後全部住宿都係經 Booking.com 預訂,算幾好彩哩次八間住宿都冇乜點中伏,間間都基本上係乾乾淨淨瞓得舒服嗰隻,之後寫到行程嗰陣再詳細講吓每一站住宿嘅資料。

錢方面,今次去冰島我哋一毫子現金都冇換過,全程食住行買嘢就算係過收費隧道都係碌卡搞掂。查實出發前幾日我試吓記低 [url=https://www.landsbankinn.is]Landsbankinn[/url] 嗰陣個 Notes Rate,想話比較吓如果喺香港換定美金或者歐羅再過到去換冰島現金使個匯率好啲吖,定還是碌卡個匯率好啲。不過返到香港睇返銀行月結單啲交易匯率,發覺查實啲匯率日日單單都唔同,好難做到好準確嘅比較。不過大至上我哋喺嗰邊碌卡最好同最差嗰個匯率比我出發前記低嗰個 Notes Rate 差別都只係 1% 左右,差別查實好細。考慮番碌卡比較方便,同埋換現金嘅話返香港前又要將啲用剩嘅現金換番美金歐羅哩啲嘅麻煩,我覺得去到嗰邊主力碌卡使錢應該會比較好啲。

今次喺冰島玩咗十日,加埋芬蘭轉機喺赫爾辛基玩咗大半日,返到香港埋數計番哩次行程平均每人各項嘅使費就係咁:
機票 : HK$ 8,174
住宿 : HK$ 5,655
租車 : HK$ 3,244
入油 : HK$ 657
其他交通費用 : HK$ 127
超市購物 : HK$ 613
外出用膳 : HK$ 991
景點入場/ 活動費用 : HK$ 2,384
其他雜項 : HK$ 81

平均每人總計 HK$ 21,926,咁多日食住行玩嘅基本使費加埋每人盛惠 HK$ 22,000 有找。

衣著方面,冰島喺六月哩啲時間嘅氣温變化都好大,我哋試過喺幾度嘅氣温之下行冰川同啲重係舖住雪嘅山徑,猛太陽嗰陣亦可以暖到就咁著件短袖 T 恤都冇問題。所以嗰邊夏天著衫都係嗰句 ~ 要洋蔥式,易除易著方便適應比較大嘅温差。除咗衣著之外,我覺得鞋亦係一個好重要嘅考慮嚟。嗰邊行好多景點都要踩過啲又濕又鬆軟嘅泥地同雪地,經常行到一腳都係泥濘,所以一對防水防滑嘅行山鞋係好重要。另外如果諗住去行冰川嘅話,可以嘅話最好著啲高筒款式嘅行山鞋過去,事關行冰川用嗰對冰爪係要綁喺啲高筒款式嘅行山鞋上面,如果著去嘅鞋款唔啱綁哩啲冰爪,就要花多幾草嘢港幣另外租對高筒鞋嘞。

雖然我哋租車有租埋 GPS 地圖機,不過我去旅行已經習慣一定會裝定個離線地圖喺電話度。今次帶過去用嘅係一隻叫 [url=http://maps.me/en/home]maps.me[/url] 嘅免費離線地圖,哩隻 App Android 同 IOS 都有支援,可以直接喺電話下載分區嘅離線圖資。佢啲圖資基於 Open Street Maps,佔用嘅記憶空間好細,不過地圖嘅資料就好齊全,好多 Google Maps 冇嘅山徑路線佢都有好準確嘅圖資。另外哩隻地圖軟件可以基於景點、油站、停車場等等嘅類別作離線搜尋,特別係佢嗰個洗手間搜尋類別真係非常之幫到手,除咗經常幫我哋解決啲急需解決嘅問題之外 ,重幫我哋慳返唔少入收費洗手間嘅費用添。

去冰島玩自駕,有兩個網站基本上每日都應該上去望一望嘅。一個係 [url=http://weather.tengja.net]weather.is[/url],哩個網站可以睇到冰島唔同地區嘅 6 日天氣預報。另一個 [url=http://www.road.is]road.is[/url] 就係睇冰島分區嘅路況,例如邊啲路段係爛路 (gravel road),邊度封路,同各種極端天氣例如大雪,風暴引至邊啲路段嘅路況轉差難行等等嘅資訊,都可以喺哩個網站度睇到。

準備功夫做得九九十十,亦差唔多到出發嘅日子嘞。時間係 2016 年 6 月頭嘅一個零晨,我哋一行四人坐上芬航嘅一班 AY070 號班機,先向芬蘭嘅赫爾辛基進發。
#526/11/16 10:51 PM
引用快速引用
啲圖 :O
#626/11/16 10:52 PM
引用快速引用
[img]圖片網址[/img]
#726/11/16 10:53 PM
引用快速引用
圖應該識出嘅,不過原來哩度出 link 唔可以將條 link 收喺段文字入面 #oh#
#826/11/16 11:05 PM
引用快速引用
我哋坐嘅哩班機係零辰 00:25 嘅夜機嚟,班機準時出發。我哋由香港去赫爾辛基機程大約 14 個鐘,上機冇耐就開始派飯,食完飯冇耐就熄燈瞓覺。哩班芬航班機剛剛轉咗用 A350 客機,機倉個內籠都好新淨吓。



班機到赫爾辛基之前會再派早餐,食完個早餐磨多兩個零鐘,大約朝早六點鐘就到達赫爾辛基嘅 Vantaa Airport。雖然我哋嘅目的地係冰島,不過因為冰島同芬蘭都係申根國家,所以我哋係喺芬蘭哩度過海關嘅。



過咗海關之後就係申根區同內陸線嘅候機區,如果轉機夠時間嘅話,查實可以由哩度落樓出去巴士站或者火車站搭車去赫爾辛基玩一陣,玩完返機場再過一次行李檢查就可以返嚟哩個候機區繼續等上機。



不過哩程轉機時間唔夠 3 個鐘所以我哋冇咁樣出去玩。我哋之後回程嗰程嘅轉機時間就多好多,哩部份之後講到去赫爾辛基嗰段行程嗰陣先再詳細講吓。



我哋喺候機區哩度周圍行行企企睇吓啲舖頭咁,等 08:45 出發去冰島嘅班機。



哩次去冰島嘅班機都一樣準時。上機之後只會派杯嘢飲冇派嘢食,機程就大約三個鐘,朝早九點幾我哋就到達 Keflavik Airport。



感覺冰島機場入境區哩度似商場多過似機場;我哋預約咗租車公司喺機場哩度攞車,喺商場哩度攞返件行李再行出去機場大堂,第一件事先要搵租車公司嚟湊我哋嘅職員。



租車公司啲人嚟遲咗少少,我哋喺機場大堂四圍蕩咗陣都唔見租車公司啲人,正想揾舖頭諗住買張電話卡打電話俾佢哋嗰陣佢哋先嚟到。



佢哋係先揸車到機場,再接我哋去佢喺機場附近嘅舖頭度攞車嘅。查實間舖離機場大堂唔遠,由機場大堂步行過去嘅話行大約十分鐘都去得到;哩篇 Blog ~ http://chiwawah.blogspot.hk/2016/11/2016_22.html 入面有個地圖,地圖有圖釘記低咗喺機場附近哩間租車公司、同哩日去咗幾個地方嘅準確位置。

去到佢舖頭辦妥租車手續攞咗部車,之後嘅第一站先去 Reykjavik 我哋哩日入住嗰間民宿附近諗住先泊低架車。



Reykjavik (雷克雅維克) 應該係冰島唯一有收費泊車區嘅市鎮嚟,哩個網站 ~ http://www.iheartreykjavik.net/2015/01/parking-in-reykjavik/ 有個詳細嘅列表列出雷市唔同嘅收費泊車區嘅收費時段同費用。



查實我哋哩個時間去到民宿係重未夠鐘辦入住手續嘅,第一站去嗰度嘅主要原因係哩間民宿剛好喺 Reykjavik 嘅收費泊車區外面,喺嗰頭附近可以免費泊低部車,跟住我哋就可以喺附近行吓街食完個晏,到夠鐘 check-in 先返民宿,諗住入到屋之後唞吓再煮個早啲嘅晚飯,食完再揸車出去已經過晒收費泊車時段,咁就慳返唔使煩搵現金散銀泊車嘞 #yup#



泊低架車之後第一站先去行吓 Hallgrimskirkja 穿梭機大教堂,哩個景點距離我哋住嗰間民宿只係隔條街咁近。喺教堂行咗陣,跟住就沿住海傍方向行,一路行吓街一路搵吓晏晝哩餐有乜啱食。



結果撞咗入去海傍附近一間食炸魚嘅餐廳,唔知係冰島近年多咗華人嚟哩度旅行定還是哩度本身都興食飯,哩間嘢啲套餐好多都可以跟飯上,估唔到嚟到冰島第一餐就有飯食 :D



哩頭搞掂咗晏晝嗰餐,嗰頭就要諗定一陣夜晚嗰餐點搞嘞。哩日晚飯諗住喺民宿度自煮,所以食完晏就沿住海傍行過去附近一間 Bónus 超市上貨嘞。

講開超市,喺冰島都有好多 grocery store 嘅店舖品牌,例如 Bónus、Krónan、Nettó、Víðir、Nóatún、Hagkaup、Samkaup Úrval、Samkaup Strax、Kaskó、10-11、Kjarval、Melabúðin、Sunnubúðin、Pétursbúð 同 Kjötborg 等等。喺 Reykjavik、Selfoss 同 Akureyri 哩啲比較大嘅城市,比較容易搵到好似 Bónus 同 Krónan 哩類大型超市;大型超市賣嘅貨品種類比較多,價錢亦通常會比較平。而去到東南部,東北部啲比較細嘅市鎮要買餸煮飯就要幫襯啲好似 Samkaup 哩類比較細嘅 grocery store 嘞。哩啲細啲嘅舖頭有時啲價錢會比大超市貴啲啲;雖然凍肉蔬菜生果飲品零食都可以買到,不過貨品選擇就比大超市少。哩次行程我哋經過幾間 Samkaup 都有賣埋漢堡包熱狗薯條之類嘅熟食,亦可以借到洗手間方便。旅途中要搵個平靚正嘅地方食啲熱嘢同愒一愒腳嘅話,除咗油站以外,哩啲細超市都係一個唔錯嘅選擇嚟。

查實喺哩次行程同個廚房相關嘅嘢基本上都唔係好關我事 #hehe# ,所以趁住我啲團友走去搵啲俾一般人食嘅嘢嗰陣,我就走咗去發掘啲喺超市入面可以買到嘅冰島傳統極限食材。



首先俾我搵到哩包 Hákarl ~ 傳說中嘅冰島臭鯊魚肉,佢本身係格陵蘭鯊嘅魚肉嚟。新鮮嘅格陵蘭鯊魚肉含有一種叫三甲胺氧化物 (亦啫係尿素) 嘅毒素,食咗會出現腸胃不適痾嘔肚痛小兒驚風外感發冷無名腫毒四時感冒腰酸背痛小便不暢前列腺發大眼叮噹發嘔竇發雞盲飛蚊症發耳賺眼啤啤鬼鼠肉拜拜肉痴孖筋長短腳鴨那腳主婦手~un~un~腳香港腳等等嘅症狀。哩啲鯊魚肉要經過四至五個月時間嘅發酵同晾乾處理,等肉裡面嘅尿素分解成阿摩尼亞先至食唔死人。不過豐富嘅阿摩尼亞亦等於濃烈嘅尿餲味 xx( ,所以哩隻 Hákarl 並唔係一般嘅難食咁簡單,佢係全球數一數二極具挑戰性嘅暗黑極限食材嚟。



跟住又俾我搵到另一包 ~ 就咁睇個包裝估唔估到係啲乜東東嚟呢 ~ 冇錯,就係一個羊頭,Svið 烤羊頭查實係冰島一道傳統嘅名菜嚟。Svið 嘅食法,係先將羊頭上面嘅皮肉用刀叉刮落嚟食,刮到個羊頭開始見骨嗰陣,再用刀叉撬開佢個咀再割佢條脷落嚟一啖咬落去,跟住撐開佢雙眼皮,再用匙羹挖佢隻眼珠出嚟再一啖咁含落個咀入面 [yipes] …… 哩種豪邁得嚟帶一點野性,放蕩得嚟帶一點不羈嘅食法,亦係冰島一道充滿原始風味嘅暗黑料理嚟。



好多去冰島玩嘅人都會專登去當地嘅餐廳,特別係喺 Hofn 嗰頭,試試冰島一隻叫 Langoustine ~ 挪威海螯蝦,(好多台灣博客會叫佢做冰島龍蝦) 嘅美食。查實除咗去餐廳可以食到 Langoustine 之外,亦可以去超市買返嚟自己煮嘅。今晚哩餐晚飯我哋就喺超市買咗包,返民宿用佢整咗個海鮮焗飯嚟試試嘞。

#926/11/16 11:22 PM
引用快速引用
留名 [bouncer]
#1027/11/16 12:10 AM
引用快速引用
#adore# #adore# 自駕
#1127/11/16 12:12 AM
引用快速引用
#adore# #adore# #adore# #adore#
#1227/11/16 12:21 AM
引用快速引用
哩日自從落機以後,一直都係天陰陰,不過到我哋喺民宿食完晚飯嗰陣,個太陽就忽然間出返嚟。見又有陽光,加上到夜晚九點幾哩啲時段雷市市中心已經冇晒泊車限制,於是大伙兒一於喺臨瞓前揸車出去兜陣風。

哩篇 Blog 有個互動地圖 ~ http://chiwawah.blogspot.hk/2016/11/2016-solfari-harpa-hallgrimskirkja.html,記低咗哩晚我哋去嗰幾個地方嘅準確位置。



哩啲日落時份睇風景就當然係沿住海邊搵靚景喇,我哋第一站先去 Sólfarið (Sun Voyager) 睇吓嗰座維京船雕塑。



據說哩度係當初第一批維京人到達冰島上岸嘅地方嚟,不過到低係邊個睇見啲維京人喺哩度上岸,又識將件事記錄落嚟留傳後世,咁就不得而知嘞 :o)



喺維京船影飽相,繼續沿住海邊揸車過去 Harpa Concert Hall。哩座音樂廳嘅建築主體係由丹麥建築師事務所 Henning Larsen Architects,同埋冰島建築師事務所 Batteríið Architects 共同設計,外觀部份就由丹麥出生嘅冰島裔藝術家 Ólafur Elíasson 負責。



全棟建築由不規則形狀嘅強化玻璃同鋼根結構組成;據說哩度到咗夜晚,通過燈光照射映照水光倒影,哩座建築嘅外觀就會變到好似一個七彩珠寶盒一樣。可惜六月嚟到冰島根本就冇夜晚 ^3^ ,哩座 Harpa 係咪真係會變七彩寶盒我哋就不得而知嘞。



哩座音樂廳正正係喺 2008 年嘅全球金融風暴開始嗰陣興建,當年冰島政府宣布破產,到 2009 年整個計畫差啲停擺。



不過後來冰島奇蹟地走出金融風暴,短短 3 幾年間當地經濟又再次站穩陣腳,而哩座音樂廳最後亦順利完工。



喺音樂廳入面隔住塊玻璃睇咗陣海邊日落,睇完已經係夜晚十一點幾。



原本諗住哩日可以去埋珍珠樓睇吓風景先返歸嘅,不過見已經咁夜,最後決定都係放棄哩個景點先返民宿休息瞓覺,希望完成個環島行程之後,到回程返嚟雷市嗰日先再補番哩個景點。





不過返到民宿門口始終唔係好舍得個咁靚嘅日落,見座穿梭機教堂都係隔幾條街咁近,於是快手快腳行埋過去補番幾張藍天日落相。



喺教堂出面同第一次見面嘅午夜太陽講聲晚安,朝住日落餘暉慢慢行返去民宿,是日哩個連汁都撈埋嘅行程亦就此完結。
#1327/11/16 12:36 AM
引用快速引用
一鍵留情 椰酥顯靈!
#1427/11/16 9:42 AM
引用快速引用
#adore#
#1527/11/16 10:09 AM
引用快速引用
#1627/11/16 10:10 AM
引用快速引用
:P :P :P
#1727/11/16 10:22 AM
引用快速引用
#adore# #adore# #adore#
#1827/11/16 10:28 AM
引用快速引用
#adore# #adore# #adore#

#1927/11/16 11:00 AM
引用快速引用
:P
#2027/11/16 12:32 PM
引用快速引用


#2127/11/16 12:39 PM
引用快速引用
Too long, back home read
Leave name first
#2227/11/16 12:41 PM
引用快速引用
先留名 #hoho#
#2327/11/16 12:52 PM
引用快速引用
#good# #good# #good#
#2427/11/16 1:03 PM
引用快速引用
LM
#2527/11/16 1:03 PM
引用快速引用
秒後自動載入第 2
下一頁
發表回覆
請先登入以發表回覆