旅遊臺
發表文章發起投票回覆
上一頁下一頁
冰島夏日環島自駕遊
第一次嚟哩度出遊記。除咗想出吓相之外,都想講多少少今次個行程計劃。
今次喺冰島用咗十日時間由 Reykjavik 揸車去到 Keflavik ......
遊記將不定期更新。

Good 39Bad 3
26/11/16 10:24 PM
引用快速引用

本貼文共有 113 個回覆
冰島日照時間有幾多個鐘[banghead] ???

哩個網站 ~ http://www.timeanddate.com/sun/iceland/reykjavik ~ 可以查到 Reykjavik 每日嘅日出同日落嘅時間。冰島日照最短嗰日大約喺每年嘅 12 月 21 至 22 日,嗰兩日早上 11 點半就日出,到晏晝 3 點半日落,日頭大約得 4 個鐘時間。
每年 6 月 15 日係冰島嘅永晝日,嗰日完全冇日落。其餘喺六月嘅日子都係大約零晨 3 點左近日出,零時左近日落,每日差唔多有 21 個鐘日照。
我哋喺六月頭嗰兩個禮拜過到去,嗰陣雖然會有日落但係太陽落山之後都唔會天黑的說,太陽落山之後個天都重係紅卜卜咁;查實每年 5 到 8 月嗰邊夜晚都會係咁嘅狀況。
#5110/12/16 9:51 PM
引用快速引用
#adore#
#5210/12/16 9:53 PM
引用快速引用
The Refuck ing of Chi Na 一鍵留名
#5310/12/16 10:11 PM
引用快速引用
#good#
#5410/12/16 10:15 PM
引用快速引用
哩日金圈之旅嘅天氣相當好,全日都陽光普照 。我哋去到 Gullfoss 嗰陣,遠遠望埋去已經見到大大條彩虹掛咗喺座瀑布前面。



Gullfoss 古佛斯瀑布,又名黃金瀑布,係冰島第二大嘅瀑布嚟。哩個瀑布係屬於一種兩階段式嘅段差瀑布,瀑布分為兩部分,高度分別係 11 米同 21 米。



低啲嗰層瀑布旁邊有一條小徑可以行上去高啲嗰層瀑布嘅前面,不過哩條小徑同條瀑布之間嘅距離真係好近,行過嗰陣都好難避免會輕輕整濕個身。



冰島啲超市大部份都收得好早,哩日重要預足夠時間去到 Selfoss 買餸煮飯,嗰邊有間 Krónan 超級市場到夜晚八點就會收檔。我哋喺 Gullfoss 逗留咗差唔多一個鐘,見時間差唔多就動身出車 ,沿住 35 號公路向 Selfoss 進發嘞。哩篇 Blog ~ http://chiwawah.blogspot.hk/2016/12/2016-gullfoss.html ~ 入面個地圖就記錄咗哩段車程嘅路線同沿途啲景點嘅位置。

喺去 Selfoss 嘅途中會經過兩個景點,可以快手快腳落車影張相打個卡。首先到達嘅係 Skálholt Church;不過我哋真正有興趣嘅查實唔係哩間教堂,而係佢旁邊一間冰島傳統嘅草屋。



冰島一年當中超過一半時間都係冰天雪地,所以當地人喺起屋嗰陣都會諗好多唔同嘅辦法去保持室內溫暖;現代嘅方法就係例如靠地熱水源為居室加熱,多用鐵皮作為建屋嘅外牆物料,令房屋更易吸收陽光嘅熱力等。古時冰島未有哩啲現代嘅建屋物料同技術嗰陣,就靠草屋 Turf House 哩種獨特嘅建屋方法嚟保持居室嘅溫暖嘞。



喺草屋哩度係咁兒逗留咗陣,跟住就繼續沿住 35 號公路向下一站 Kerið Volcanic Crater 進發嘞。



嚟到 Kerið 入口先發現原來哩個景點要俾錢先有得入場,入場費就盛惠每位 ISK 400 大元 。



查實哩次行程中計劃咗會去嘅咁多個 Crater 當中哩個 Kerið 算係比較細嘅一個。



不過個 Crater 細查實都有個好處,哩度係我哋唯一一個夠胆行到去坑底湖邊嘅一個 Crater 嚟。



可以行得落去主要有兩個原因,一來就係哩個 Crater 嘅面積比較細喇,二來哩度都整咗啲步行路徑同階梯,方便啲遊人行落去坑底嘅湖邊度。



之後去嗰啲 Crater 就冇哩啲設施嘞,如果要好似哩度咁走到落去坑底嘅話都會係一件幾危險嘅事情嚟㗎。

睇完 Kerið 火山湖哩日嘅行程基本上完成,我哋繼續沿住 35 公路進發,臨入城之前轉返入 1 號公路 Ring Road 就到達哩晚落腳住宿嘅地點 Selfoss 嘞。到達 Selfoss 之後先去哩晚落腳嘅民宿辦理入住手續同放低啲行李,跟住就出車去附近一間 Krónan 超市上貨買定哩兩日嘅糧草嘞。



講到超市又分享吓就我哋所見喺冰島嘅一啲街市行情啦 。出發前刨資料,見有個網站講話喺冰島買餸要平嘅話就最好幫襯大城市嘅大型超市例如係 Bónus 同 Krónan 嗰啲;我哋喺冰島去每間超市買嘅嘢多數都唔同,想印証哩個講法真唔真,要做比較查實都唔容易。喺冰島我哋買得最多嘅應該係香蕉,以香蕉嚟講,就我哋所見 Bónus 賣得最平,唔同地點嘅幾間 Bónus 都係賣 ISK 259/kg,喺 Selfoss 嘅 Krónan 同 Vik 嘅 Kjarval 都賣 ISK 269/kg;喺 Husavik 有間 Nettó 就賣得最貴,要 ISK 279/kg。

除咗香蕉,我哋亦有喺唔同嘅超市買過蕃茄;我哋喺 Akureyri 一間 Bónus 買 500 克蕃茄要 ISK 359,喺 Reykjahlíð 一間 Samkaup Strax 同樣買 500 克蕃茄就要 ISK 380。以哩啲少量嘅資料嚟睇,的確有機會係幫襯大型超市會比較平,特別係 Bónus 哩間超市好似係零舍抵買啲咁。如果有得揀嘅話,去到冰島不防多啲去 Bónus 同 Krónan 哩兩間大啲嘅超市入平貨。

另外一般人都會認為冰島嘅物價偏貴,咁如果講話去餐廳食飯嘅話就一定係㗎嘞,好普通一餐 fish & chips 平均每位落樓都要港銀嚿幾水,好少少嘅餐廳食一餐兩三嚿水係好平常。之但係如果係自己餐飯自己煮嘅話又係點情況呢?我又記低咗喺冰島嘅一啲超市物價做咗少少比較。

[*]喺冰島買過芹菜 ISK 260/kg,啫大約 HKD 10.9 一斤,寫哩篇遊記嗰排喺香港啲街市格價見芹菜一斤賣 HKD 12。
[*]喺冰島生菜買過 ISK 160/kg,大約等於 HKD 6.7 一斤,香港街市價就大約 HKD 10 一斤。
[*]西蘭花喺冰島買過 ISK 379/kg,大約係 HKD 15.9 一斤,香港街市價大約 HKD 12 一斤。
[*]包裝粟米喺冰島買過包 300 克包裝盛惠 ISK 198,大約 HKD 13.7 一包,香港超市嘅包裝粟米轉返同等重量就大約 HKD 18。
[*]青提子喺冰島買過包 500 克特價 ISK 350,啫大約係 HKD 24.2,香港佳寶同等重量就賣 HKD 13.2。
[*]雞塊喺冰島買過包 ISK 964 /kg,啫大約 HKD 30.2 一磅,香港超市咁上下樣嘅雞柳就賣 HKD 20 一磅。
[*]煙肉喺冰島買過包 ISK 1,598 /kg,大約 HKD 110.4 /kg,香港超市就賣 HKD 147 /kg。
[*]喺 Akureyri 一間 Bónus 買過包肉眼扒盛惠 ISK 3,998 /kg,啫大約 HKD 276.2 /kg;我用肉眼判斷咁上下質素嘅肉眼扒香港超市就賣 HKD 227 /kg。
[*]最後係杯麵,我喺冰島食過一杯 Thai Choice Cup 盛惠 ISK 179,啫大約 HKD 12.4 一杯,香港啲印尼舖頭咁上下樣嘅南亞杯麵就賣 $6 一杯。

睇返上面啲物價比較,似乎喺冰島肉食方面一般都賣得比香港貴,不過好多蔬菜類食物就比香港嘅超市同街市平。拉返勻嚟計,自己煮飯就點計都會比起去餐廳食平一大截喇。
#5511/12/16 2:12 PM
引用快速引用
瀑布好正 [bomb]
#5611/12/16 2:35 PM
引用快速引用
唔識揸車係咪好難去呢啲景點 :-(
#5711/12/16 2:36 PM
引用快速引用
唔識揸車係咪好難去呢啲景點 :-(

家陣只係講到第二日 Golden Circle 哩度,啫大約係冰島西部近首都一帶嘅哩啲地方,如果講到哩度為止嘅景點嘅話,查實唔揸車完全唔係問題,喺 Reykjavik 跟啲 local tour 去就可以。
大約係我之後講到 Day 4 打後嘅行程,啫逆時針咁數冰島南部、東部、北部到西北部哩段環島嘅路線,揸車去嘅話會方便同可以用少好多時間去完成個行程。

如果唔揸車嘅話另一個方法可以考慮坐巴士,喺香討嗰邊我見過一個巴士環島嘅遊記 ~ http://www.discuss.com.hk/viewthread.php?tid=25894499&page=1 我覺得幾值得參考吓嘅。
坐巴士嘅問題係啲巴士線停邊個站停幾耐幾點開邊班哩啲唔係自己話到事,就得條巴士線又未必就到喺啱嘅位置揾到住宿。特別係唔夠假期個行程時間太短唔夠鬆動位嘅話,坐巴士環島好容易就會 plan 到好似嗰位樓主咁站站趕鴨仔咁趕,好似一日之間由 Reykjavik 踩 450 公里去到 Hofn,之後一日又 450 公里去 Akureyri,中間站站都 20 分鐘跑一個瀑布咁嘅狀況。
坐巴士去又要每個景點有個合理啲嘅時間去玩嘅話,所花費嘅行程時間應該會比揸車去長一截。另外巴士站同想去嘅景點或者住宿點之間有時未必夾得咁應,中間可能要步行 (或者靚仔靚女嘅可以截順風車) 接駁,都會花多啲時間同體力。
如果可以攞足夠長嘅假期同埋好早好早咁諗好晒個 Plan,體力又應付到嘅話,只要預早計劃好晒住宿同交通,坐巴士我估都應該係可行嘅。

重有一個遊記我喺高登嗰邊睇過嘅,係全程踩單車同露營環島,不過哩隻對我嚟講就直頭係另一個層次嘅玩法嚟喇。
#5811/12/16 4:18 PM
引用快速引用
高質學術post一鍵留榮!

#5911/12/16 4:19 PM
引用快速引用
冰島克朗係咪係北歐四國都通用嫁??? [banghead]
#6011/12/16 4:45 PM
引用快速引用
冰島克朗係咪係北歐四國都通用嫁??? [banghead]

唔得呱吓化 ~
丹麥用丹麥克朗,芬蘭用歐羅,瑞典用瑞典克朗,挪威係挪威克朗,張張啲公仔都唔同喎好似。
#6111/12/16 5:10 PM
引用快速引用
未開始講哩日嘅行程之前,又先睇睇我哋喺 Selfoss 哩一站入住嘅哩間 Gesthus Selfoss 係點環境。



哩間民宿係一座獨立屋嚟,房租一晚盛惠 ISK 38,400。



我哋訂民宿嗰陣網上資料應該係寫間屋有一間房有一張雙人床,一間房就有兩張單人床嘅,不過實際入住嗰陣就發覺原來間屋有三間房,多咗間有張雙人床嘅房。



哩間屋算係我喺冰島住咁多間民宿當中值得推薦嘅其中一間,首先四個人住三間房咁自然會覺得間屋好寬敞啦。



除咗空間夠之外,間屋亦執得好企理,廚房浴室床舖毛巾都好乾淨。



間屋出面有個露台,露台度安裝咗個 hotpot,不過我哋食完晚飯已經幾夜,早啲瞓覺比較緊要,所以都冇時間試試開著佢嚟浸吓。



間屋喺大廳度有個開放式廚房,廚具杯碟一應俱全,最正嘅係個廚房有部洗碗碟機,朝早整完早餐將啲碗碟放晒入去開機就走得,唔使自己洗碗,慳返好多時間。
#6218/12/16 1:24 PM
引用快速引用
:O
#6318/12/16 1:43 PM
引用快速引用
食完早餐,我哋沿住 1 號公路開車,向冰島南部嘅景點進發,第一站我哋先去 Seljalandsfoss 睇瀑布;哩個 Blog ~ http://chiwawah.blogspot.hk/2016/12/2016-seljalandsfoss-skogafoss.html ~ 入面有個地圖記錄咗哩段行程嘅路線。

Seljalandsfoss 塞里雅蘭瀑布最主要嘅特色,就係喺瀑布嘅後面,懸崖嘅底部有一條可以俾遊人穿過瀑布後面嘅小徑。



查實如果行程安排到嘅話,最好可以喺晏晝黃昏時分先嚟睇哩座瀑布;事關喺黃昏同時天晴又有陽光嗰陣,斜陽嘅光線可以射到入去瀑布後面,咁喺瀑布後面條小徑度望返出去,就可以睇到一幅由瀑布水流襯托住嘅日落美景嘞。



可惜我哋嘅行程時間就唔到,哩次喺朝早嚟到,日照嘅角度唔係好夾,睇唔到哩座瀑布最靚嘅一面。



行入去瀑布後面嘅哩條小徑嗰陣,我本來已經有晒心理準備預咗要濕身㗎嘞,不過哩次濕身嘅程度都依然出乎晒我嘅意料之外。



同埋哩條小徑都好崎嶇吓,有啲路段我要手腳並用先平衡到行過去,結果由個瀑布後面出返嚟嗰陣我不單變咗隻落湯雞,重搞到一雙手一褲腳都係泥濘 。



喺 Seljalandsfoss 北面冇幾遠查實重有個喺山洞入面嘅瀑布名叫 Gljúfrabúi,由 Seljalandsfoss 嗰個位置行過去大約都係行十零廿分鐘咁上下。



不過要睇哩個瀑布嘅話就要澗水行入去一個山洞入面,行入去山洞嘅哩條路徑感覺上有少少危險,都只係行程嘅頭一段諗落無謂咁快就搏到咁盡,最後我哋都只係喺山洞口影吓相冇行到入去。



行完 Seljalandsfoss 我哋就沿住一號公路開車去下一站睇另一個瀑布 Skógafoss 彩虹瀑布。我哋喺 Seljalandsfoss 嗰陣一路都係天陰陰咁冇乜陽光,到我哋開車離開嗰陣個藍天又慢慢走返出嚟。



沿住一號公路開車去 Skógafoss 途中見到好幾座又高又翠綠嘅山巒,加埋啲藍天白雲襯托住,個場景望落實在係冇得頂 。



Seljalandsfoss 同 Skógafoss 哩兩座瀑布相距唔係好遠,行咗大約半個鐘車程咁上下,我哋就到達哩日行程嘅第二站 Skógafoss 斯科加爾瀑布嘞。



哩座 Skógafoss 嘅水源係源於冰島南部嘅 Skógá River,瀑布闊 25 米,落差 60 米。因為瀑布底部長年都有大量水花濺起,只要有陽光嘅日子都可以喺哩座瀑布度睇到彩虹,所以哩座瀑布又名為彩虹瀑布。



喺瀑布底部影咗陣相,跟住我就沿住瀑布旁邊一條梯級行上去瀑布頂度睇吓嘞。



行上去瀑布頂嘅途中可以沿住一條山徑行過去睇一座人面石,不過嗰條山徑望落去有啲得人驚我唔敢行過去 ,我同行兩個朋友就比較大胆行咗過去影相,上面張相係喺朋友本相薄度借返嚟嘅。



喺瀑布頂有個地台用鐵網做結構嘅瞭望台,企喺上面睇風景都會有少少腳軟嘅感覺㗎。



喺哩個瞭望台度可以居高臨下咁望到 Skógá River 兩旁一大片綠油油嘅營地。



我哋喺瀑布頂影飽相落返山腳嗰陣都差唔多到食晏嘅時間,見瀑布對出啲營地有枱有凳,於是就喺營地哩度食埋個自備嘅晏晝飯先出發去下一站嘞。
#6418/12/16 4:56 PM
引用快速引用
🐧
#6518/12/16 4:56 PM
引用快速引用
吸引#adore#
#6618/12/16 4:57 PM
引用快速引用
wow:O
#6718/12/16 5:07 PM
引用快速引用
#adore#
#6818/12/16 5:26 PM
引用快速引用
留名 #adore#

#6918/12/16 5:28 PM
引用快速引用
keep it up #yup#
#7018/12/16 5:28 PM
引用快速引用
黎呢度貼冇人睇:-(
#7118/12/16 6:36 PM
引用快速引用
用腰羅定克朗方便d?
#7218/12/16 6:38 PM
引用快速引用
黎呢度貼冇人睇:-(

又唔係咁差吖哩度 ~
查實都只係諗住想出文嗰陣搲兩句計傾吓,等寫 Blog 嗰陣寫得冇咁悶咁啫。
#7318/12/16 9:41 PM
引用快速引用
#yup#
#7418/12/16 9:42 PM
引用快速引用
用腰羅定克朗方便d?

嗰邊只可以用冰島克朗買嘢,我喺嗰邊冇用過現金,由去超市買餸到報團去玩活動都係齋碌卡,返到香港張信用卡月結單入面所有喺冰島買嘢嘅交易都係用冰島克朗結匯。
帶歐羅現金過去嘅話應該要先去當地嘅銀行唱返冰島克朗嘅現金先至有錢使;嗰邊就算係啲主力做遊客生意嘅舖頭例如報冰川團同騎冰島馬嗰啲,我都未見過有標過歐羅或者美金嘅報價;一般情況之下應該好難可以喺冰島直接用歐羅買嘢的說。
#7518/12/16 10:17 PM
引用快速引用
秒後自動載入第 4
上一頁下一頁
發表回覆
請先登入以發表回覆