旅遊臺
發表文章發起投票回覆
上一頁下一頁
冰島夏日環島自駕遊
第一次嚟哩度出遊記。除咗想出吓相之外,都想講多少少今次個行程計劃。
今次喺冰島用咗十日時間由 Reykjavik 揸車去到 Keflavik ......
遊記將不定期更新。

Good 40Bad 3
26/11/16 10:24 PM
引用快速引用

本貼文共有 116 個回覆
用腰羅定克朗方便d?

嗰邊只可以用冰島克朗買嘢,我喺嗰邊冇用過現金,由去超市買餸到報團去玩活動都係齋碌卡,返到香港張信用卡月結單入面所有喺冰島買嘢嘅交易都係用冰島克朗結匯。
帶歐羅現金過去嘅話應該要先去當地嘅銀行唱返冰島克朗嘅現金先至有錢使;嗰邊就算係啲主力做遊客生意嘅舖頭例如報冰川團同騎冰島馬嗰啲,我都未見過有標過歐羅或者美金嘅報價;一般情況之下應該好難可以喺冰島直接用歐羅買嘢的說。

果然cashless:-(
冰島有無octopus/debit card之類既野
#7618/12/16 10:21 PM
引用快速引用
用腰羅定克朗方便d?

嗰邊只可以用冰島克朗買嘢,我喺嗰邊冇用過現金,由去超市買餸到報團去玩活動都係齋碌卡,返到香港張信用卡月結單入面所有喺冰島買嘢嘅交易都係用冰島克朗結匯。
帶歐羅現金過去嘅話應該要先去當地嘅銀行唱返冰島克朗嘅現金先至有錢使;嗰邊就算係啲主力做遊客生意嘅舖頭例如報冰川團同騎冰島馬嗰啲,我都未見過有標過歐羅或者美金嘅報價;一般情況之下應該好難可以喺冰島直接用歐羅買嘢的說。

果然cashless:-(
冰島有無octopus/debit card之類既野


嗰邊啲集體運輸冇香港咁發達,八達通嗰隻運作 (啫好似台灣悠遊卡或者南韓 T-Money 嗰啲) 我就唔多覺有嘞,嗰邊喺 Reykjavik 坐市內巴士好似都只係可以俾現金同埋重係不設找續嗰隻。
最近似我哋用過嘅就咪係啲入油卡,我哋喺嗰邊都係用大路嘢買 N1 卡,不過哩隻查實只係 Prepaid card,揸乾咗張卡冇得再入錢充值,不過叫做除咗入油之外,都可以喺 N1 油站啲便利店買吓嘢咁。
雖然好似有啲牽強,喺嗰邊用嗰張電話卡都叫做有啲啲似八達通嗰類預付充值嘅運作嘅 #lol#
#7718/12/16 11:08 PM
引用快速引用
食完飯繼續沿住一號公路進發,大約半個鐘車程就到達我哋哩日入住嘅民宿 Sólheimahjáleiga Guesthouse,哩篇 Blog ~ http://chiwawah.blogspot.hk/2016/12/2016-dyrholaey-reynisdrangur-vik.html ~ 入面個地圖就記錄咗由哩間民宿去到 Vik 哩段路之間,我哋到過嘅幾個地方嘅位置。我哋先喺民宿辦理入住手續同放低啲行李,之後再繼續向 Dyrhólaey 進發。

由 1 號公路 Ring Road 轉入去 Dyrhólaey 嗰條 218 號公路嘅尾段係一條碎石爛路嚟,哩段行車路應該係我哋今次成個冰島行程當中,揸過最得人驚嘅一條車路嚟;哩條路窄不特止重要係好崎嶇吓,行車嗰陣架車左搖右擺咁,不過總算無驚無險 安全到達哩個景點附近嘅一個停車場。



由停車場可以行過去 Dyrhólaey 一個都幾廣闊吓嘅空地,空地嘅四周查實都係臨海嘅崖邊,沿住崖邊居高臨下可以睇到 Dyrhólaey 幾度著名嘅風景;當我哋行到崖邊嘅一處遠望,首先睇見嘅係一條長長嘅黑沙灘。



由黑沙灘哩邊行過去另一邊嘅崖邊,可以望到一座巨大嘅 Rock Arch;查實哩度就咁睇張相同喺現場睇嗰個感覺係好唔同,哩座 Rock Arch 實際上係非常之巨型,當時我行到崖邊第一眼望到哩座巨石嗰陣,真係有少少震憾嘅感覺㗎;夠膽嘅話查實由嗰個空地度係有陸路可以行上去哩座 Rock Arch 上面,不過我膽細離遠望吓就已經夠晒皮喇 。



我哋四圍行嗰片空地中間有一座孤單的燈塔,亦係嚟到 Dyrhólaey 哩度例必要影番張相嘅景點嚟。



除咗上面講哩幾個景點之外,夏天喺 Dyrhólaey 哩度亦有機會可以睇到一種喺冰島棲息嘅著名海鳥 Puffins;不過我哋今次嚟到唔多夠運,個場巡過一圈我哋連雀毛都揾唔到一條 。



行完 Dyrhólaey 之後嗰站本來應該係先去 Reynisdrangur 會比較順路,不過因為之後嘅行程我哋要到隔日嘅晏晝先夾到時間地點去超市上貨;喺 Vik 有間 Kjarval 黃昏 6:00 pm 就收檔,而哩間 Kjarval 就係我哋哩兩日行程中路過最後一間可以補充糧草嘅地方嚟;為免太晏去到摸門釘,於是就算行多一轉回頭路都好,我哋都要先去一轉 Vik 入貨,入完貨再揸返轉頭去 Reynisdrangur 繼續行程。

上齊貨跟住就上返車開 GPS 機準備出發去下一站喇;喺部 GPS 機度輸入好目的地嘅資料之後,我哋就發覺嗰部 GPS 機顯示嗰條路線好似有啲唔妥咁,由 Vik 去 Reynisdrangur 部 GPS 機會教我哋行一條冇公路編號嘅山路 (下圖橙色路線);嗰條山路望埋去好斜吓同埋成條路都係啲碎石路嚟,哩條路嘅路況比我哋之前去 Dyrhólaey 嗰段 218 號公路更差。見條路咁嘅環境加上見地圖顯示哩段路程都唔係短,於是我哋決定都係避一避哩條爛路轉行第二條路比較穩陣。



查實哩次冰島嘅旅程當中,我哋間唔時都會碰到哩種狀況,就係部 GPS 機有時會基於最短路線嘅運算,指咗去啲好偏僻好難行嘅路段。對自己嘅駕駛技術同部車嘅性能有信心嘅話就幾爛嘅路都當然可以照行喇,之但係好似我哋咁比較想行得穩穩陣陣嘅話,出發前就最好先上 road.is 睇清楚可以去得到目的地各條路線嘅選擇,預先計劃好可以避開啲 unpaved road 嘅行車路線。

我哋由 Vik 開車,先經 1 號公路再轉去 215 號公路 (上圖紅色路線),哩段路程雖然比嗰條無名嘅爛路遠咗少少,不過全程都係啲已經鋪靚晒嘅柏油路,行車嚟講會安全好多。大約揸咗半個鐘嘅車程,我哋就到達哩日行程最後嘅一個景點 Reynisdrangur 嘞。出發之前刨資料嗰陣,對 Reynisdrangur 嘅印象係一個人煙稀少而寧靜嘅海邊石灘嚟,點知嚟到發覺哩度直頭熱鬧過假日嘅淺水灣 。



嚟 Reynisdrangur 哩度主要係睇奇石;我哋泊好架車之後就向住海邊嘅方向行過去,沿途首先見到嘅係一座玄武岩;哩度啲遊客嚟到個個都爬上去嗰座玄武岩嘅石柱上面影相,有啲就直頭打晒躉喺上面呆坐看海,喺嗰度要搵個無其他人嘅靚位影張相查實都唔係容易。



座玄武岩對出有個石灘,石灘後面有個玄武岩洞,據講話哩個岩洞係由於長年累月嘅風蝕而形式成。



由武岩洞望向海邊,可以見到兩座玄武岩石柱屹立喺海浪之中。



嚟到冰島,識留名嘅一定係咁留 #yup#



由石灘哩度可以遠遠望見我哋之前喺 Dyrhólaey 睇到嗰座 Rock Arch。Reynisdrangur 哩度啲風浪查實都好大吓,聽講話曾經有遊客就喺石灘哩度俾大浪捲走咗。

喺 Reynisdrangur 逗留咗大約一個鐘,見都差唔多到晚飯時間,大伙兒就出車返去 Vik 揾地方開飯嘞。喺出發前已經刨過吓啲資料,見 Vik 有間舖號叫 Víkurskáli 嘅餐廳好似都幾抵食。



喺哩間餐廳前面有個 N1 嘅自助加油站,我哋見部車都差唔多冇咗半缸油,本來係諗住嚟到哩度食飯之餘順便打返爆個油缸嘅。點知我哋嚟到嘗試插卡開油槍嗰陣,發覺先前買嗰兩張 N1 卡竟然兩張都開唔到支油槍;查實出發前刨資料嗰陣我都見好多人提及過 N1 油卡失靈哩個情況,勢估唔到喺冰島第一次入油就俾我哋碰上,認真黑仔;不過都算不幸中之大幸我哋哩次重有半缸油頂住,可以等第二日去到下一個油站先入油問題都唔係太大。查實喺冰島自駕嚟講,每次見油缸冇咗一半咁上下,就最好準備定要揾油站入油;我哋哩次環島嘅行程有時一整日都只係經過一兩個油站,如果好似我哋哩次咁撞啱個油站啲設施玩嘢失靈又同時唔夠油踩到去下一個油站嘅話,到時都會相當頭痕。



入唔到油咁唯有先喺附近泊低架車準備入餐廳開飯嘞,入餐廳之前見到餐廳出面嘅空地有一大片魯冰花田,於是大伙兒又喺度影咗陣相先入餐廳開飯。



哩間餐廳除咗賣漢堡包餐之外,亦有幾款碟頭飯可以選擇。查實揀哩間餐廳最主要嘅原因都係因為哩度夠平,百零文港幣就可以搞掂一餐晚餐,喺冰島嚟講應該算係相當之抵食。



食完晚飯已經差唔多夜晚八點,食飽之後我哋就出車揸返去位於 Sólheimahjáleiga 嘅民宿休息,哩日嘅行程亦就此完成嘞。
#7827/12/16 10:17 AM
引用快速引用
好靚

#7927/12/16 10:19 AM
引用快速引用
又係未開始講新一日嘅行程之前先講吓喺 Sólheimahjáleiga 入住嘅哩間民宿 Sólheimahjáleiga Guesthouse 係點環境。

都係計劃行程嗰陣太遲訂住宿,喺哩區附近揾唔到啱心水得嚟又有廚房嘅民宿,所以哩晚入住嘅民宿係間只有獨立浴廁嘅套房嚟。唔知係咪因為冰島南部冇乜大城鎮,啲旅遊住宿嘅供應比較緊張嘅關係,我發覺由 Vik 去到 Hofn 哩段路啲住宿價格比冰島其他地區貴好多,一間咁樣嘅雙人套房每晚房租就要 ISK 25,045。



喺我哋入住嘅套房出面有個共用嘅大廳,喺大廳度有微波爐同水煲可以煲吓水同叮個快嘅熱食。房內有三張床位,我哋兩個人用一間房嚟講都唔算係好迫。



哩度啲床鋪毛巾同浴室設備都算乾淨;哩間民宿嘅房租有包早餐,可惜我哋哩日要倒塔咁早出發,食唔到哩個朝早民宿供應嗰個早餐 。
#8031/12/16 12:37 AM
引用快速引用
哩日係我哋成個冰島行程當中最 Chur 嘅一日,朝早六點幾鐘就要執好行李上車出發。哩日上晝我哋喺 Skatafell 預約咗個冰川健行,不過喺行冰川之前想先去 Skatafell 附近一個叫 Svartifoss 嘅地方睇一個玄武岩瀑布。我哋由 Sólheimahjáleiga 嘅民宿出發,沿住一號公路開咗兩個幾鐘嘅車程,大約朝早九點就到達 Skatafell 嘞。Skatafell 嘅遊客中心有個好大嘅停車場,如果嚟玩冰川健行嘅話就通常會喺哩個停車場度泊低架車,再去位於停車場四周嘅冰川團辦事處度報團。

不過我哋出冰川團之前要去睇咗 Svartifoss 先,睇返哩篇 Blog ~ http://chiwawah.blogspot.hk/2016/12/2016_30.html ~入面個地圖,喺 Skatafell 嗰個停車場附近有個細啲嘅停車場,由 Skatafell 遊客中心嘅停車場沿住一條好短嘅 9896 號小路,就可以開到嚟哩個停車場嘅位置。



由哩個停車場起步,大約要步行三十分鐘先可以去到 Svartifoss 瀑布嘅位置。查實由停車場哩個位置有條 9897 號車路可以揸到一個比較接近瀑布嘅位置,如果可以用哩條行車路嘅話行去瀑布嘅時間可以減少十幾分鐘。可惜因為安全同環保嘅原因,哩條行車路已經封咗唔俾車行。





咁我哋就唯有喺停車場側邊一個山徑嘅入口開始行,沿住一條河流向上游嘅方向進發。



行去 Svartifoss 途中會經過另一個叫 Hundafoss 嘅瀑布。



上面個地圖係 Open Street Map 嘅一個截圖嚟,maps.me 用嘅 Open Street Map 圖資喺行山路徑方面比 Google Maps 詳細好多,就好似哩段行去 Svartifoss 嘅山徑咁,Google Maps 只係空白一片剩係得目的地嗰個瀑布嘅位置,而 maps.me 就可以清楚睇到通往瀑布所有山徑嘅位置,邊個位置係分岔路邊個位置過河都一目了然。



我哋跟住地圖所示嘅山徑路線,大約喺之前講嗰條 9897 號車路盡頭嗰個位置附近有條橋可以行過河道嘅另一邊,我哋就喺哩個位置先過橋去河道另一邊嘅山徑,跟住繼續沿河道上游嘅方向進發。



行咗十零分鐘,開始遠遠望見 Svartifoss 啲玄武岩嘞。



行去瀑布嘅山徑唔算太難行,加上沿路都見到啲行梗去同離開瀑布嘅同路人經過,知道前面條路應該冇乜危險嘢,所以哩段山路都行得幾放心。



再行多陣,已經好清楚見到瀑布所處嘅山谷嘞。



終於到達瀑布嘅位置,瀑布嘅四周都有木橋棧道觀景台等等方便遊客嘅設施。



Svartifoss 斯瓦蒂佛斯瀑布,冰島語字面嘅解釋就係 "黑色瀑布"。



哩個瀑布特別嘅地方係瀑布水流兩邊柱狀玄武岩結構嘅崖壁;我哋第一日喺 Reykjavik 去過嗰座穿梭機教堂嘅設計靈感,聽講話都係嚟自哩啲柱狀岩六角形嘅結構咁話 (好似係,除非唔係)。



我哋預算可以停留嘅時間唔多,一嚟到就要快手快腳擸架生起壇影相。



一搞掂就要立即執嘢走人,回程就試吓由嗰條封咗嘅車路行返去我哋停車嗰個位置。
#8131/12/16 12:43 AM
引用快速引用
高質
#8231/12/16 12:54 AM
引用快速引用
我哋出發去冰島之前已經預約定哩日朝早十一點出發嘅冰川團;朝早十點半我哋由停車場揸車返去 Skaftafell 嘅遊客中心,起行之前重有半個鐘時間俾我食埋個早餐先出發 。

去冰島行冰川嚟講,我估 Skatafell 應該算係其中一個最熱門嘅地方嚟。我哋出發前格過兩個喺 Skaftafell 嘅短途冰川團,一個係Icelandic Mountain Guide 嘅 Blue Ice Experience,而我哋幫襯嘅就係另一間舖號叫 Glacier Guides 嘅 Glacier Wonders 冰川團。查實哩兩間嘢出團嘅種類同價錢我覺得差别唔大,幫襯 Glacier Guides 主要係因為佢哋哩個初階團喺朝早十一點出發,比較夾到我哋當日嘅行程時間。哩個團全程來回大約三個半鐘,團費就盛惠每位 ISK 10,990 大元。

我哋出發之前已經上網辦好晒預訂手續同用信用卡俾咗錢,喺 Glacier Guides 個辦事處只要出示返之前印定喺網上報團嗰張通知單比辦事處啲職員核對就可以。不過因為行冰川用嗰對冰爪要綁喺高筒嘅行山鞋度先可以著得舒服,我哋咁多個都冇著哩款行山鞋,所以每人要科多 ISK 1,000 租對啱綁冰爪嘅行山鞋。



出發前啲工作人員會幫我哋每個人度啱冰爪嘅尺碼,然後連埋支冰斧咁樣一套俾我哋各自揸手,擸齊架生就準備上車出發嘞。



見我哋成個團都係初次行冰川嘅小學雞,大會特別安排咗一部校巴載我哋去冰川 。



架校巴由遊客中心出發,大約開咗十零分鐘就到達一個通往 Falljökull Glacier Tongue 嘅起步點嘞。



起步點同冰川都有一段距離,我哋先要行一段咁樣嘅山路先可以到達冰川入口嘅位置。



大約行咗半個鐘去到一條水流都幾急吓嘅河道前面,河道中間搭咗一條簡陋嘅木橋。



領隊喺河道前面停低俾我哋影一陣相,同提醒我哋要影相嘅就務必喺哩個安全嘅位置影飽佢,一陣過橋嗰陣就千萬唔好再拎起部相機免生危險。過咗條河再行上一度斜坡,由落巴士嘅起步點計大約行咗半個鐘,終於到達冰川嘅入口嘞。



入冰川之前當然要先著返對冰爪喇;領隊會先示範綁冰爪嘅步驟,我哋跟住示範嘅方法綁好對冰爪,跟住就起步行上去冰川上面嘞。上咗冰川地帶之後,領隊會先簡單咁講解吓啲例如點喺冰川上斜落斜之類嘅安全步行方法。查實哩度嘅冰川講景色靚嚟講,就老老實實的確係嘛嘛;一來可能係我哋去嗰日天陰陰咁冇乜陽光,我哋又只係行個初階級嘅行程並冇行到去冰川好入嘅地帶,加上嗰度嘅冰川夾雜住好多沙石,望落去就完全唔係印象中一大片又白又藍咁嘅冰川景象。



領隊沿途都會講解吓啲同冰川有關嘅自然景象,例如哩堆沙泥就係由於冰川向下推進而形成嘅 Jökladrýli (Dirt Cones)。



哩啲 Dirt Cones 可以係腳邊細細一堆嘅沙石,亦可以形成一座巨型嘅山丘。





去到一個冰洞前面,領隊又會表演吓將嚿石仔掟落去冰洞入面,由粒石仔撞到洞底嘅聲音俾我哋感受吓腳下嘅冰川有幾厚幾深。





剩係我哋哩個初階團去到都分咗兩個小隊嚟行,加上其他唔同公司嘅團隊,所以喺冰川時不時都會遠遠咁見到其他嘅參觀隊伍。



途中領隊會帶我哋行過冰舌嘅邊沿。



行行吓遠望見到有一隊全部帶晒頭盎嘅,應該係玩啲比較高階行程嘅團隊嚟。



抬頭望向冰川嘅上方,係一大片好似水晶一樣嘅藍色冰川。



睇資料如果係玩啲比較長途嘅高階團嘅話,就會用半日到一日嘅時間,行到去哩啲遠望好似一支支水晶咁嘅冰川嘅位置。



成個喺冰川上面嘅行程大約係一個鐘,回程離開冰舌之後,領隊會帶我哋返去之前過河嗰個位置除低對冰爪。



跟住沿之前行過嘅山徑步行,返去接我哋回程嗰架校巴停車嘅位置。



坐校巴返到遊客中心已經係晏晝三點鐘。喺冰川團嗰間辦事處度還返啲設備之後,辦事處啲人員會每人派杯熱朱古力俾我哋補補身 。查實哩日嘅行程我哋排得有啲趕,我哋行完冰川之後都唔夠時間坐低食晏,只係喺停車場度係咁兒食咗啲乾糧頂一頂肚,跟住就要開車趕去下一站嘅 Jökulsárlón 嘞。
#8302/01/17 3:36 PM
引用快速引用
我哋沿住一號公路向下一站進發,中途有個 N1 油站,要先去嗰度打返爆個油缸。上回咪講到我哋喺 Vik 嗰陣想用 N1 卡入油但喺啲卡失靈入唔到油嘅;嚟到哩個油站結果發覺啲入油卡依然係唔掂 ;好彩哩個油站有職員駐場,揾佢哋搞咗一大輪,結果佢哋係打電話揾返佢哋啲後勤人員幫手重新激活返啲入油卡先用得。咁嘅話啫係啲入油卡原本賣嗰陣佢哋後台系統嘅記錄本身已經有問題,一係可能張卡根本未激活,亦可能係賣嗰陣唔知因乜原因張卡嘅存款值變成零 。

查實出發前已經睇過好幾個講去冰島嘅遊記入面都有提過哩類 N1 卡失靈嘅情況;通常遊記啲樓主都會建議多買幾張面值細啲嘅入油卡旁身,以防萬一其中有張失靈嘅話都有多張卡頂檔。我哋早兩日買入油卡嗰時都係基於哩個考慮買咗兩張面值 ISK 3,000 嘅入油卡。不過哩次入油發覺 ISK 3,000 唔係好夠用;我哋部車個油缸嘅容量大約有 60L,入晒一張面值 ISK 5,000 嘅入油卡都係差少少先入得滿半缸油,所以之後我哋都係買啲面值 ISK 5,000 嘅入油卡嚟用。



除咗打散咁嚟買入油卡之外,我覺得每次買完入油卡之後最好都去油站啲控制台度試試啲入油卡。要檢查啲入油卡有冇問題,可以先將啲入油卡喺控制台度掃一掃,之後只要撳到入去上面哩個畫面嘅話咁張卡就應該冇乜問題嘞;跟住唔使入油就咁撳 Cancel (Hætta) 出返晒啲畫面拎返張卡就可以。

哩次入完油之後我哋再喺油站補充返幾張面值 ISK 5,000 嘅入油卡,喺油站啲控制台度試過晒確認啲入油卡全部用得冇問題之後,就上車直踩到下一站嘅 Jökulsárlón 嘞。
#8402/01/17 4:25 PM
引用快速引用
Jökulsárlón 係冰島最大嘅冰川湖,哩個冰川湖嘅南邊近海岸線有個出海口,沿住一號公路有一條行車橋橫過哩個出海口嘅河道。喺哩條橋嘅東面同西面近出海口有幾個停車場,哩篇 Blog ~ http://chiwawah.blogspot.hk/2017/01/2016-jokulsarlon.html ~ 入面個地圖就標示咗哩幾個停車場嘅位置。

嚟 Jökulsárlón 當然係為咗睇湖面上嘅浮冰喇 ~ 咁圍住湖邊咁多個停車場嘅位置當中,到低邊個位置睇浮冰係最正嘅呢?



出發之前我刨過嘅遊記一般都講話喺橋東面嗰個停車場位置嘅湖邊,應該係比較理想嘅觀賞浮冰嘅位置嚟;而以我哋去到當日親身嘅觀察嚟講,似乎亦係咁嘅情況。



我哋大約晏晝四點幾揸車到達東面嗰個停車場。



哩個停車場亦係附近啲 Jökulsárlón Boat Tours 上落船嘅位置嚟。



喺冰島我覺得有兩個景點就咁睇相係感受唔到現場睇嗰份震憾嘅感覺,一個係喺 Dyrhólaey 嗰座 Rock Arch,而另一個就係 Jökulsárlón 哩個冰川湖嘞。



查實我之前喺飛嚟冰島嗰程機上面都曾經喺空中俯瞰望見哩個冰湖,嗰陣見到冰湖上面好似唔係好多冰塊。



跟住喺行冰川嗰陣同一位台灣嚟嘅冰川團團友吹水,佢亦係早一日去過哩個冰川湖,都話唔係睇到好多冰塊。



本來哩次去都有少少打定咗個輸數,諗住可能真係到夏天天氣熱嘅關係,未必有好正嘅冰湖景色睇到,不過好彩今次嚟到都可以睇到好多幾巨型嘅冰塊。



綜合以上嘅觀察,我估喺 Jökulsárlón 要睇到壯觀嘅冰塊,查實都要睇到步嗰陣剛啱有幾多冰塊由冰川度沖咗落個湖度又未流出大海,所以嚟哩度有冇靚景睇查實都要講少少運氣㗎。



出海口條橋西面岸有幾個停車場,Google Maps 就冇標記到哩幾個停車場嘅位置,不過 maps.me 嘅 Open Street Maps 圖資就有記錄到哩幾個停車場嘅詳細位置。



一來覺得喺橋西邊嗰幾個停車位置嘅岸邊未必會睇到太大差别嘅風景,事關目測見湖上嘅冰塊都係比較接近東面岸哩邊嘅湖畔。



二來最重要都係時間,事關之後我哋重要去民宿辦入住手續,跟住再去 Hofn 食晚飯。



如果大晏起錨離場嘅話驚去到 Hofn 啲餐廳打晒烊冇地方食飯咁就麻煩,所以我哋都冇揸車過去橋西面啲停車位置,直接停咗喺橋西面嘅沙灘度。

Jökulsárlón 嘅冰塊由冰川湖經出海口流出大海,好多時啲冰塊會由出海口沖到橋東西兩邊嘅沙灘上面,所以一般遊客喺冰川湖睇完浮冰之後,都會去哩兩邊嘅沙灘碰吓運氣,睇吓有冇機會可以近距離咁喺沙灘上面接觸到哩啲大型嘅冰塊。



可惜我哋哩次去到嗰陣海邊冇乜大嚿嘅冰塊沖到上沙灘上面;喺哩度停留咗一陣,見冇乜收穫於是我哋再去橋東面嗰個沙灘停一陣睇睇個環境,點知哩邊沙灘直頭想揾粒冰粒睇吓都冇 。



大約喺 Jökulsárlón 留到晏晝五點半,我哋就出車向 Hofn 嘅方向進發嘞。我哋喺 Hofn 附近預訂咗哩晚落腳嘅民宿,未去 Hofn 開飯之前,我哋先去民宿辦理入住手續同放低啲行李。

喺民宿安頓好啲家當,跟住就出車去 Hofn 開飯嘞。Hofn 係冰島有名嘅龍蝦小鎮嚟,哩度食小龍蝦大路嘅有兩間餐廳喺網上係比較多人推薦嘅,一間係 Humarhöfnin Veitingahús,而我哋哩日幫襯嘅就係另一間都出名、舖號叫 Kaffi Hornið 嘅餐廳。



哩間餐廳嘅地方唔係好大,我哋去到嗰陣雖然都幾多人客,不過又幾好彩剛啱有吉位,唔使點等位一陣間就有位坐。



查實喺講我哋到步第一日喺 Reykjavik 嗰集都有提過,哩隻小龍蝦應該係一隻叫 Langoustine ~ 挪威海螯蝦嘅生物嚟。哩隻蝦種同我哋喺香港食開嗰啲龍蝦並唔係同一種類,不過好多台灣嘅遊記博客都叫咗哩種蝦做冰島龍蝦。



今年九月喺深圳有人因為進食一隻小龍蝦引致橫紋肌溶解症 ~ http://hk.apple.nextmedia.com/realtime/news/20160908/55620014 ~入咗廠,嗰隻小龍蝦據報導原來同我哋喺冰島食到嘅都係相同種類嘅海螯蝦嚟。當然就算品種係屬於同類,喺挪威出產同深圳出產肯定品質同衛生方面會有好大出入,食嚟講喺冰島食哩隻小龍蝦我覺得就應該唔會有乜大問題嘅。不過以食味嚟計,我個人就覺得哩隻小龍蝦並冇網上啲人講到咁正;啫唔係話佢唔好食,不過亦唔係話正到味皇食一啖跟住大哎 “好好味呀” 嗰隻咁囉。

反而嗰餐食到其中一味小龍蝦配羊扒入面啲羊扒我就覺得相當之有驚喜嘞;老老實實喺冰島食哩味羊扒之前,我真係唔知道羊扒原來係可以嫩口到咁嘅地步 。因為我哋同行有朋友好怕羊肉嘅騒味,所以除咗喺 Hofn 食嘅哩餐之外,我哋都冇喺其他地方或者喺超市買過羊肉食。如果本身食得羊嘅話,強烈推薦羊肉哩家嘢去到冰島真係好值得多啲去探索一吓。



食完飯我哋去咗 Hofn 海邊一處觀景位置度吹吓海風;到大約夜晚九點我哋由 Hofn 回程返民宿休息,哩日緊湊嘅行程亦就此完滿結束嘞。
#8505/01/17 11:52 PM
引用快速引用
#good# #good# #good# #good#
#8606/01/17 12:11 AM
引用快速引用




#8706/01/17 12:31 AM
引用快速引用





C
o
p
y

&

P
a
s
t
e ... (喺屋企用枱面部電腦寫哩篇嘢嗰陣。)

不過喺冰島嗰陣有時都要用個 Google Translate 認字,例如喺超市唔識字但又想知揸住嗰包係牛肉定係羊肉嗰陣,咁情況就要靠部電話喺 Google Translate app 度打冰島文譯返英文或者中文。
通常電話啲輸入法可以改第二啲語文嘅鍵盤,例如 LG 內置嗰個 ~ 設定 => 語言及鍵盤,或者 Go 輸入法都有哩家嘢。
#8806/01/17 1:58 AM
引用快速引用
#bye# ok bor
我去中歐兩星期都係 2 weeks

#8906/01/17 4:34 PM
引用快速引用
#bye# ok bor
我去中歐兩星期都係 2 weeks

抱歉 [sosad] ,不過睇完真係第一時間諗起哩幅圖 ^3^ ~



between,
久幾廿年前第一次去歐洲其中一站就係瑞士,嗰陣上山滑雪冇搽太陽油,落返城塊面甩皮甩到好似科學怪人咁。
近哩幾年就都諗過吓想去捷匈奧,不過都重未去得成。
#9006/01/17 9:49 PM
引用快速引用
又睇睇我哋喺 Hofn 哩站住嘅民宿係點環境,哩一站嘅民宿同上一站一樣都係冇廚房設備嘅。哩間民宿嘅舖號叫 Seljavellir Guesthouse,民宿位置離 Hofn 唔係好遠,由 Hofn 揸車過去唔使十分鐘車程。



我哋住嘅係哩隻雙人房,之前嘅篇幅都有提及過,喺冰島南部啲住宿好似都係偏貴,哩隻雙人房嘅房租一晚就要 ISK 25,887 大元。



哩度啲房間嘅裝修睇落相當之新淨,床鋪浴廁都打掃得乾淨企理,衛生嚟講算係做得相當之唔錯。不過佢哋個浴室花灑位同坐廁中間只得一塊玻璃隔開,前面冇浴簾擋住啲水,沖完涼之後就會成個洗手間濕晒,哩度就要扣少少分嘞。



房租包埋個早餐,早餐款式都係啲大路嘢好似麵包肉食蔬菜粟米片牛奶果汁嗰啲啦,食物質素都算唔錯嘅。唯一有少少唔老黎嘅係嗰度放餐碟張枱上面俾我見到幾隻瓜咗嘅烏蠅瞓咗喺枱上面。不過後來我哋去到 Varmahlíð 嗰站都住過一間本身打理得幾乾淨但依然係一屋烏蠅嘅民宿。我估冰島喺夏天只要係啲人煙冇咁稠密嘅地方,都有機會出現四圍都係烏蠅嘅情況 (重未計喺 Dettifoss 或者 Reykjahlíð 嗰啲俾幾十隻烏蠅嬲住嘅盛況,哩部份就講到 Diamond Circle 嗰段行程先再詳細講),真係好介意嘅話就要揾返啲比較旺嘅大城鎮落腳嘞。



之前一日個行程排得比較 chur,所以哩日我哋會安排個行程 hea 返少少平衡吓。哩日食完早餐執返好啲行李上車,我哋朝早九點幾先起錨離開民宿。
#9108/01/17 3:41 PM
引用快速引用
:P
#9208/01/17 3:54 PM
引用快速引用
哩日我哋去到下一站喺 Egilsstaðir 嘅民宿之前都冇乜好特别嘅景點要行,都係途中揾啲叫做有少少嘢睇嘅地方停一停攤抖吓;哩篇 Blog ~ http://chiwawah.blogspot.hk/2017/01/2016-egilsstair.html ~ 入面個地圖就記低咗哩個朝早我哋停留過啲中途站嘅位置。

哩日第一個中途站係一處海邊嘅地方嚟,原本都冇諗住咁早就停第一站嘅,不過行過見哩度好多車泊咗喺度,大家心諗咁多人都喺度停車嘅話,跟大隊點都會有少少嘢睇呱 ~



嚟咗冰島咁多日,到哩日先醒起要幫我哋今次冰島團嘅第五位團友,哩部 Subaru Outback 4WD 影吓相。喺哩度海邊散咗一陣步,跟住就上返車繼續沿住一號公路進發嘞。



跟住第二個停站係喺 Djúpivogur,喺哩度停一停主要係因為想借個洗手間鬆一鬆 。喺 Djúpivogur 哩度有個碼頭,碼頭附近有個免費嘅洗手間;Djúpivogur 嘅位置大約就喺 Hofn 去到 Egilsstaðir 哩段路途嘅中段,所以哩個洗手間係哩段路程中一個幾熱門嘅停站位置嚟。



喺哩個洗手間過冇幾遠嘅一處海邊有一個名為 Eggin í Gleðivík 嘅藝術擺設,哩個由冰島藝術家 Sigurður Guðmundsson 創作嘅戶外裝置,由 34 隻巨蛋代表 34 隻冰島嘅本地雀鳥;有機會去到嘅話,可以留意吓當中有一隻蛋係比其他蛋大隻啲嘅,嗰隻蛋所代表嘅雀鳥名為 Red Throated Diver,係 Djúpivogur 嘅市鳥嚟。喺 Djúpivogur 攤抖夠,跟住我哋就上車一鼓作氣直踩去 Egilsstaðir 度嘞。

由 Hofn 去到我哋嘅下一站 Egilsstaðir,頭一段路主要係沿住海邊嘅 1 號公路行進;到一處叫 Bberufjörður 嘅峽灣附近,就可以選擇轉行一條比較近嘅 939 號公路,向北面行一段路再接返上 1 號公路;如果行哩條路線,由 Hofn 去到 Egilsstaðir 就大約要行 187 公里。

而另一個選擇,就係繼續沿住海邊兜一條比較遠嘅路線全程行 1 號公路去到 Egilsstaðir;如果行哩條路線嘅話,由 Hofn 去到 Egilsstaðir 就要行 247 公里,路程比行 939 號公路多咗 60 公里。

不過 939 號公路係一條出名難行嘅公路嚟,我喺網上睇過幾個遊記直頭係用 "死亡 939" 嚟形容哩條公路;雖然查實咁嚟形容哩條公路係誇張咗少少,事關我睇過啲有關哩條 939 號公路行車嘅 Youtube 片段,見哩條路雖然崎嶇不過唔似有好危險嘅路段;不過基於安全至上哩個原則,我哋就選擇避開哩條 939 號公路情願行遠少少。查實除咗哩段路線之外,我哋出發前都有上去 road.is 查返我哋計劃行走嘅路線當中邊啲路段有 Gravel Road,可能嘅話我哋都會盡可能避開哩啲難行嘅路段。



上面個截圖係我出發前喺 road.is 下載嘅一幅路況圖嚟;當時除咗 939 號公路係 Gravel Road 之外,查實 1 號公路轉向北面之前都有一段 Gravel Road 要行。當時我嘅考慮就係既然都諗住安全至上避開啲 Gravel Road 嘅話,咁就無謂避一段唔避一段,於是索性再兜遠少少,經 96 號公路轉入 92 號公路;行哩條路線由 Hofn 去到 Egilsstaðir 就要行 299 公里,比起行 939 號公路要行多個零鐘嘅車程。



大約晏晝三點終於到達 Egilsstaðir,未去民宿辦理入住手續之前,我哋先去附近一間 Bónus 超市上貨,跟住就諗住去民宿搞入住手續同擺低啲行李嘞。
#9312/01/17 10:17 PM
引用快速引用
我哋之前入住嘅民宿間間都有個接待處,咁好自然跟住 GPS 地圖嚟到第一件事就諗住揾個接待處喺邊啦。之但係嚟到見到哩度得個停車場四圍人影都冇隻 (停車場對面重要係一個墓地嚟)。我哋喺停車場度搲晒頭,搲咗陣先醒起我出發前出咗電郵去每間預訂咗嘅民宿度,知會聲我哋將會大約乜時間到步,以防預訂嗰陣有乜錯漏可以出發前拆掂佢;而當中大部份民宿嘅回覆都係話收到我個電郵同提返佢哋接待處嘅辦工時間之類咁,之但係哩間民宿就比較特别,佢哋係覆咗個電話號碼過我,叫我一到步就打電話俾佢。



諗到哩度我先醒水識得拎個電話出嚟;打完電話同佢哋講話我哋到咗嗰個停車場之後,就見到民宿嘅負責人由停車場四周嘅其中一座大廈度行出嚟。原來哩檔民宿出租嘅係啲多層住宅嘅單位,因為屋苑本身冇地舖樓層可以做接待處,所以嚟到只可以用電話聯絡民宿嘅負責人出嚟帶我哋入屋。哩間民宿嘅舖號叫 AtHome Apartment,位於 Egilsstaðir 市內,房租一晚盛惠 ISK 32,204 大元,哩篇 Blog ~ http://chiwawah.blogspot.hk/2017/01/2016_21.html ~ 入面個地圖就記錄咗哩間民宿嘅位置。



哩晚我哋落腳嘅哩間民宿地方非常之咁寬敞,三間大房有 twin beds 亦有 double bed。



客飯廳地方亦相當闊絡,一個客廳做得兩間香港啲劏房豪宅。



飯廳係一個開放式嘅廚房,加一張放喺客廳前面嘅大餐枱。



浴室嘅空間一樣好大,哩度嘅床鋪毛巾同浴室設施都算幾乾淨。



重有哩個洗衣房,整咗兩部洗衣機同一部乾衣機。原本我哋係諗住入屋放低啲行李,煮個簡單嘅下午茶,大約晏晝 5 點零鐘就出發去哩晚嘅行程。點知一見到個咁正嘅洗衣房一個二個都掛住洗衫唔肯起錨,最後搞到六點幾成七點先舍得出發 。
#9421/01/17 4:36 PM
引用快速引用
正皮支持#hoho#
#9521/01/17 4:38 PM
引用快速引用
都夜嘛嘛成六點幾七點咁晏到底我哋重要出發去邊呢?查實哩日夜晚我哋計劃去 Borgarfjörður Eystri 碰吓運氣,希望睇到喺冰島只可以喺夏天嗰兩三個月先有機會一見嘅一種雀鳥 ~ Puffin ‧ 北極海鸚鵡。哩篇 Blog ~ http://chiwawah.blogspot.hk/2017/01/2016-borgarfjorur-puffin.html ~ 入面個地圖就記錄咗由 Egilsstaðir 去到 Borgarfjörður Eystri 嘅一段行車路線。
咁晏先出發除咗因為掛住洗衫唔肯起錨哩個原因之外,另一個主要嘅原因係我出發前睇過一啲資料,話 Puffin 嘅習性係日間要出海揾食,大約到夜晚七八點咁上下先放工歸巢;而我哋去 Borgarfjörður Eystri 捕嘅主要係啲鳥巢嘅位置,所以諗住晏少少出發嘅話睇到雀嘅機會或者會大啲啲咁。



由 Egilsstaðir 去 Borgarfjörður Eystri 大約要個半鐘頭車程,而哩段車程都算係有少少難度㗎,諗住自己揸車去嘅話要考慮吓司機對自己嘅駕駛技術有冇信心嘞。哩段路除咗途中兩段沙塵滾滾嘅沙石爛路之外,重有一段又爛又斜又多彎同啲彎都有少少急嘅山徑,山徑旁邊又冇圍欄,如果碰啱啲大風或者大雨嘅日子,行哩段路我估會有少少危險添㗎。



由上面嘅路況圖可以睇到,揸車去 Borgarfjörður Eystri 嗰條 94 號公路中途要通過兩段 Gravel Road,之後近住 946 號公路就係嗰段比較難行嘅山徑;過咗哩段山徑之後再過冇幾遠會經過海邊嘅一條漁村,到大約傍晚八點,我哋就到達位於哩條漁村附近嘅一個觀鳥點嘞。



喺 Borgarfjörður Eystri 有一個 Puffin 同其他海鳥嘅聚居地,而當地人就喺哩個雀群聚居嘅位置起咗啲方便到訪遊人觀鳥嘅設施。



我哋可以沿住一條木搭嘅樓梯行上去觀鳥點上面嘅一座平台,喺平台上面可以望見近岸有一座小島。



喺哩座小島上面可以見到好多巢洞,而各種水鳥就係喺哩啲巢洞入面度居住。



我見當中大部份嘅巢洞都係俾啲海鷗佔領咗,不過喺少部份嘅巢洞度都重可以見到幾隻 Puffins 嘅蹤影。



雖然都叫做如願見到 Puffins,不過哩座小島離開觀鳥點都重係好遠吓,唔可以好清楚咁睇到佢哋 。



喺觀鳥台上面唔係有太大收獲,嚰咗陣我哋就行返落去岸邊,諗住再碰吓運氣睇吓會唔會剛啱有 Puffins 喺岸邊度停留。



我哋跟住喺觀鳥台附近一個小型碼頭度捕咗陣,嗰陣我間唔時見到有一兩隻 Puffins 喺頭頂飛過,細心望清楚啲 Puffins 嘅飛行路線,發覺有啲原來係飛向我哋泊車嘅位置嗰度。





於是大伙兒行返過去我哋泊車嘅位置,再細心觀察咗一陣,先發現啲 Puffins 原來係遠在天邊近在眼前 。





就喺我哋泊車位置前面一個石坡上原來都有 Puffins 居住嘅巢洞,哩度啲 Puffins 有時會喺啲巢洞度趷個頭出嚟,而哩啲巢洞距離地面只係大約十零廿尺。





喺哩個位置睇 Puffins 嘅距離雖然已經近咗好多,可惜一來哩晚啲陽光唔係好夠 (嗱我冇打錯字,我嚟到冰島好幾個夜晚都係好好陽光㗎),二來影 Puffins 嘅哩個位置剛啱係背光位,光線環境唔係太理想,影出嚟啲雀相此終都係差咗少少 。





大約夜晚九點幾,見都唔似會揾到更有利嘅位置捕雀,於是大家就收拾架生起錨回程返歸嘞;到約莫夜晚十一點我哋先返到 Egilsstaðir 嘅民宿,而哩日嘅行程亦就此完成。
#9621/01/17 4:42 PM
引用快速引用
去左咁耐 [banghead]
#9722/01/17 10:56 AM
引用快速引用
去左咁耐 [banghead]

我寫嘢寫得好慢又唔專心 :D ,我估今次要去到年中先去得完
#9822/01/17 12:56 PM
引用快速引用
留名

#9922/01/17 12:57 PM
引用快速引用
去左咁耐 [banghead]

我寫嘢寫得好慢又唔專心 :D ,我估今次要去到年中先去得完


今年4個月暑假仲未諗到去邊 [banghead]
#10022/01/17 12:58 PM
引用快速引用
秒後自動載入第 5
上一頁下一頁
發表回覆
請先登入以發表回覆