旅遊臺
發表文章發起投票回覆
上一頁下一頁
冰島夏日環島自駕遊
第一次嚟哩度出遊記。除咗想出吓相之外,都想講多少少今次個行程計劃。
今次喺冰島用咗十日時間由 Reykjavik 揸車去到 Keflavik ......
遊記將不定期更新。

Good 42Bad 4
26/11/16 10:24 PM
引用快速引用

本貼文共有 139 個回覆
去左咁耐 [banghead]

我寫嘢寫得好慢又唔專心 :D ,我估今次要去到年中先去得完

今年4個月暑假仲未諗到去邊 [banghead]

暑假有 4 個月放咁多 [yipes] 乜家陣返學咁幸福 #adore#
#10122/01/17 1:09 PM
引用快速引用
去左咁耐 [banghead]

我寫嘢寫得好慢又唔專心 :D ,我估今次要去到年中先去得完

今年4個月暑假仲未諗到去邊 [banghead]

暑假有 4 個月放咁多 [yipes] 乜家陣返學咁幸福 #adore#


ive 嘛 #lol#
#10222/01/17 1:12 PM
引用快速引用
出到依加都仲有,膠登仔好有錢成日去到長旅行O:-) #adore#
#10322/01/17 11:33 PM
引用快速引用
哩日朝早煮完個靚嘅早餐食,跟手執拾好行裝,大約九點零鐘就出發開始我哋喺冰島第 6 日嘅行程。離開民宿嗰陣我哋將條門匙放返入單位地下個信箱度就可以。

哩篇 Blog ~ http://chiwawah.blogspot.hk/2017/01/2016-gufufoss-stora-viti-crater.html ~ 入面個地圖就記錄咗哩個朝早我哋到過幾個景點嘅位置,首先第一站係喺 Egilsstaðir 附近一個細細啲嘅瀑布叫 Gufufoss;就咁睇地圖由 Egilsstaðir 去嗰度來回都不過係大半個鐘車程又唔係好遠,加上哩日又冇乜特别要趕嘅行程,於是就諗住揸車去 Diamond Circle 之前去埋嗰度睇吓喇。



點知真係天有不測之風雲,人有霎時之蛋撻,出車冇幾耐途中竟然起大霧 ,當時嘅能見度我估得廿幾尺。喺咁嘅視野之下唯有以極低車速慢駛,結果為咗睇哩個瀑布仔足足浪費咗我哋差唔多兩個鐘時間。



睇完瀑布回程行返上一號公路,我哋就直向 Diamond Circle 進發嘞。喺 Diamond Circle 近 Reykjahlíð 附近一帶有好幾個同地熱相關嘅景區;哩日我哋嘅計劃就係喺夠鐘出車返 Husavik 嘅民宿之前,哩啲景區去到幾多個得幾多個。



第一站先去 Krafla 地熱景區,哩度係冰島東北部著名嘅火山區嚟,到現今為止哩度總共有過 29 次嘅爆發紀錄,而家陣哩度就成為冰島一個地熱發電廠。景區入口係一個用管道做結構嘅拱門,亦係哩個景區嘅一個地標嚟。



入咗景區之後我哋先去睇哩度一個火山口湖 Stóra Viti,Stóra Viti Crater 係喺 1724 年嘅一次 Steam Explosion 嗰陣形成,冰島語 Viti 係地獄嘅意思,Stóra 就解作細小。查實哩個火山湖風景嚟講就真係冇乜特别,就係一個火山口中間一灘水咁。

睇完火山湖跟住再去第二站 Leirhnjúkur Lava Field 火山熔岩區。除咗諗住嚟哩度行一轉火山之外,查實我重滿懷希望可以嚟到借個洗手間用一用嘅,事關我個地圖話我知哩度有個公眾洗手間可以一用。嚟到停車場泊低架車,的確喺 Leirhnjúkur 起步點嘅哩個停車場有個公眾洗手間,可惜唔知乜原因哩個洗手間係上咗鎖入唔到去,嚟到見到咁嘅環境實在係有少少失望。根據我喺地圖上所睇到嘅資料,唔計哩個去不到的洗手間,喺 Diamond Circle 以南,就近 Reykjahlíð 一帶嘅地熱景區中可以借到免費洗手間嘅地方,應該就只係得 Reykjahlíð 市內一間 Samkaup 小型超市,同埋喺 Mývatn Natural Bath 入面嘅接待處大堂先有。



嚟 Leirhnjúkur 主要係要行山,不過哩度行嘅並唔係一般嘅山,哩度查實係一個火山,重要係一個活火山嚟。哩度係上個世紀喺 1975 - 1984 年一次名為 Krafla Fires 大型火山爆發當中嘅一處爆發源頭嚟。



而喺上世紀嗰次爆發後數十年嘅今日,我哋就可以喺哩度沿住依然噴出蒸氣同陣陣硫磺氣味嘅山徑,一窺當年爆發後遺留落嚟嘅火山地貌。



由停車場行入去地熱區之前,先要經過一大片舖滿地衣嘅山路。雖然我哋嚟到冰島嘅哩個時間已經算係冰島嘅旅遊旺季,但係一路行嗰陣,我哋只係可以遠遠咁見到前方有幾個人行梗,從而確定我哋行梗嘅地方係安全同埋冇行錯方向。



如果去到冬季淡季嘅時間,四圍人影都冇隻,冇明確路牌不特止,連一條明顯嘅路徑都睇唔到;如果喺咁情況之下嚟到嘅話,我好懷疑我哋到時夠唔夠胆咁樣行入去哩啲咁荒蕪嘅地方。



哩度啲雪地有部份嘅地方又鬆又厚,行嗰陣要盡量行啲見到鞋印,確定之前有人行得過嘅實雪雪地先會比較安全;我哋一路行間唔時都可以見到啲自然塌陷嘅雪洞;我朋友就試過唔跟鞋印走行去兩邊比較寬闊嘅雪地,結果兩嘢就踩中鬆雪,成隻大肶插晒入啲雪入面。



差唔多行咗半個鐘,終於行到一段感覺比較冇咁荒蕪嘅木棧道。



木棧道兩旁係啲一直冒煙嘅火山岩石。



條木棧道亦日久失修,部份路段已經開始解體。



木棧道嘅一邊盡頭,係一個細細嘅泥漿池。



出發前揾資料嗰陣,見有啲遊記話哩個泥漿池似公仔麵個商標喎。



不過我哋哩日到步可能個泥漿池比較滿,唔係太出到公仔麵 logo 個型出嚟 。



我見好多遊記嘅行程喺嚟到哩度之後就會回頭返停車場,不過查實由哩個泥漿池開始向西面重可以行入一段比較遠嘅山徑,更加深入咁欣賞到哩度嘅火山地貌。



上面個地圖係由 Open Street Maps 度抄出嚟嘅,顯示咗哩段山徑嘅路線。查實之前喺準備篇都有提過,因為 maps.me 嘅圖資係基於 Open Street Maps,哩個包含詳細山徑路線嘅 Open Street Maps 地圖可以經 maps.me 喺電話度顯示,亦支援 GPS,所以我哋可以跟住 maps.me 顯示嘅 GPS 位置行入去哩段山徑;而 Google Maps 嘅圖資就冇哩啲咁詳細嘅山徑路線可以參考嘞。



喺冰島大部份嘅山徑都冇興建明顯嘅人工道路,以免破壞景區原本嘅地貌。



要判斷安全嘅步行路線,好多時就係靠插喺地上一碌碌咁樣嘅木條去辨認。我哋沿途跟住地上哩啲木條,向住 Leirhnjúkur 一處高地進發。



哩段山徑沿途可以睇到比較多五顏六色嘅地貌,哩啲地貌係因為地面上積慮嘅各種硫化物而形成。



由公仔麵泥漿池大約行咗半個鐘,就到達 Leirhnjúkur 一處高地嘅位置。



哩個高地嘅位置有兩個觀景點,不過喺兩個觀景點睇到嘅風景查實唔係有太大分別。



喺哩個高地可以 360° 無阻隔咁遠望 Leirhnjúkur 四周嘅地貌。



我哋喺哩個高地 hea 咗陣,跟住就沿住地圖嘅路線行返去停車場度。



返到停車場已經差唔多晏晝四點,我哋先揸車去到 Reykjahlíð 市內一間 Samkaup 小型超市,哩間超市附設有一個公共洗手間。之前都有提過,我估哩個洗手間應該係 Diamond Circle 以南一帶嘅地熱景區中最就腳嘅一個嚟。



除咗可以借洗手間方便之外,哩間超市外面亦有幾張枱櫈可以俾遊客喺度歇一歇腳;我哋哩個朝早出發前準備定咗啲三文治做哩日嘅午餐,於是就喺哩間超市出面簡簡單單搞掂餐晏晝佢,食飽再順便入去超市入貨買埋哩日夜晚嘅糧餉嘞。
#10426/01/17 11:23 PM
引用快速引用
出到依加都仲有,膠登仔好有錢成日去到長旅行O:-) #adore#

喺冰島都係得嗰十日,唔算係長旅行喇。
出到依加都仲有得出只係因為我寫得慢唔關有冇錢事,
你要明白哩個世界上有啲嘢係用錢都買唔到嘅,例如出極都重有得出嘅體質 ~
#10527/01/17 10:47 PM
引用快速引用
一場嚟到米湖 (Mývatn) 哩度,就點都冇理由唔去吓哩度著名嘅米湖溫泉 (Jarðböðin við Mývatn / Mývatn Nature Baths) 浸番轉嘅。我哋由嗰間 Samkaup 超市開車出發,沿住 1 號公路大約行 5 分鐘車程,就開到 Mývatn Nature Baths 出面一個停車場,哩篇 Blog ~ http://chiwawah.blogspot.hk/2017/01/2016-myvatn-nature-baths.html ~ 入面個地圖就記低咗哩度嘅位置。



哩度個接待處比我想像中骨子企理好多,除咗買飛入場嘅櫃位之外,哩度重有間細細嘅紀念品店,有餐廳同一個都幾乾淨嘅公眾洗手間。



先睇睇嚟哩度浸溫泉嘅價目表。



餐廳似係主要賣啲輕食,我哋冇真係幫襯過,不過我估佢啲份量當正餐咁食嘅話應該唔會夠飽。



巡完出面個場,跟住大伙兒就科水入場換衫沖涼嘞。我哋已經帶定泳褲泳衣毛巾哩啲架生,所以唔使另外俾錢喺哩度租,齋計入場費盛惠每位成人 ISK 4,000 大元,哩度嘅入場費比 Reykjavik 嗰邊嘅 Blue Lagoon 相宜好多。





同日本啲温泉一樣規舉,先要沖乾淨個身先可以入去温泉池度浸。





哩日個天比較陰,所以氣温都唔係太高,我估大約都係得十度左近。





沖完身濕住身咁行出室外都幾凍吓,所以一出到室外好自然就會第一時間衝入去啲暖啲嘅池水入面。





查實啲池水唔係話真係好熱,叫做暖暖哋但又唔會浸到紅都面晒標晒汗嗰隻咁。





啲池水都有少少硫磺味但唔係話好重嗰隻;喺冰島哩十日時間裡面,感覺上 Diamond Circle 哩度啲水質嘅硫磺味係最重,喺 Reykjahlíð 一帶就算唔係行入去啲噴晒煙嘅地熱景區,都時不時會覺得喉頭有一陣硫磺味;就算係離開地熱區比較遠嘅 Husavik,我沖涼嗰陣都覺得啲水輕輕有一陣硫磺味,沖涼沖極個身都係滑潺潺咁。



我哋晏晝 5 點幾鐘入場浸,大約浸到 7 點鐘大伙兒就離場出車向 Husavik 哩晚入住嘅民宿進發。
#10630/01/17 11:24 PM
引用快速引用
我哋由 Mývatn Nature Baths 出發沿住 87 號公路行車,大約旁晚八點就到達我哋哩晚入住嘅民宿 Gamli Skólinn Húsavík。



跟住又到睇樓嘅時間嘞,我哋喺 Húsavík 哩一站入住嘅哩間民宿係一座兩層高嘅物業嚟,我哋就住喺地下嗰層嘅一個單位度,房租一晚盛惠 ISK 44,707 大元,哩篇 Blog ~ http://chiwawah.blogspot.hk/2017/02/2016-gamli-skolinn-husavik.html ~入面個地圖就記錄咗哩間民宿喺 Húsavík 嘅位置。



哩間民宿係今次冰島行程中我認為質素最正嘅一間嚟,先睇睇個客飯廳,一句講晒又大又企理。



到個廚房嘞,哩次個廚房終於唔係開放式廚房,重要個廚房嘅空間都幾大吓。入面啲設備好齊全,各式爐具洗碗碟機一應俱全,杯碟餐具都打理得好乾淨。



哩間屋總共有三間房,每間房都可以瞓兩個人。



房間啲床鋪亦係雪白新淨打理得相當之企理。



浴室嘅設備亦係光潔亮麗,有乾淨嘅毛巾供應,熱水供應充足夠熱,浴盤去水亦冇乜問題。唯一有少少美中不足嘅就係哩度只得一部洗衣機分俾全橦樓嘅所有單位共用;我哋喺哩度住兩晚,兩晚部洗衣機都有人用梗完全揾唔到機會洗衫。好彩之前喺 Egilsstaðir 嗰站洗咗轉,唔係嘅話就可能要嚟到哩度開夜車等洗衫喇 。



巡完間屋跟住我哋就開始煮飯嘞。



哩晚食完個飯已經差唔多夜晚 11 點,本來諗住食飽飯跟住出去海邊行吓順便影個靚嘅日落。



點知執拾吓啲碗碟再咪咪嚤嚤咗一陣,行到出海邊個太陽已經落咗山。



Húsavík 實在係一個風景相當之唔錯嘅小鎮嚟,去 Diamond Circle 玩嘅話,我覺得揀 Húsavík 哩度做落腳點住番佢一至兩晚會係一個相當之唔錯嘅選擇嚟。



喺海邊嘅碼頭周圍行咗陣,到差唔多夜晚 12 點我哋先舍得返民宿沖涼瞓覺,哩日嘅行程亦就此完成嘞。
#10703/02/17 9:36 PM
引用快速引用
開始我哋喺 Diamond Circle 嘅第二日行程嘞,哩日朝早陽光充沛,我哋先喺民宿度食過早餐,大約朝早九點零鐘出車,第一站先去 Ásbyrgi Canyon 打個白鴿轉。Ásbyrgi Canyon 係一座馬蹄形嘅峽谷,哩座峽谷嘅總長度有 3.5 公里,高度有 100m。



我哋沿住 85 號公路開車再轉入去 861 號公路,大約朝早十點到達,嚟到先喺比較接近 Botnstjörn Lake 嗰邊嘅一個停車場度泊低架車。



喺哩個停車場側邊有個都算係幾乾淨吓嘅洗手間,話時話想喺香港領匯啲商場度揾一個差唔多咁乾淨嘅洗手間我估都唔容易,喺啲咁嘅荒山野嶺度嘅一個洗手間都可以做到咁嘅衛生程度,都不得不佩服冰島人同冰島啲遊客嘅公德心同自律。喺停車場側邊有一條可以通往 Botnstjörn Lake 嘅小徑。



我哋沿住哩條小徑行過去 Botnstjörn Lake,喺湖邊一個木搭嘅觀影台度停低睇吓風景影吓相咁。



由哩個觀景台可以沿住另一條小徑,行去湖嘅另一邊一個位置高少少嘅觀景台。



喺哩兩個峽谷底部嘅觀景台度睇到嘅景色都只係普普通通冇乜特别,要睇到 Ásbyrgi Canyon 最雄偉嗰個馬蹄狀嘅峽谷形態,查實要經一條來回大約三小時步行路程嘅山徑,行上峽谷嘅頂部先可以睇到,可惜我哋哩次冰島嘅行程排唔到時間去行哩段山徑。



喺 Ásbyrgi Canyon 係咁兒行過一轉,跟住就出車踩去下一站、今日我哋行程嘅主菜 Dettifoss 嘞,離開 Ásbyrgi Canyon 之前我哋經過一嚿叫 Eyjan 嘅巨石。



好多嚟到哩度嘅遊客都會喺哩度附近一個停車場停一停車幫嚿石影返張相嘅,不過我哋就懶少少只係中途放慢啲啲部車喺車度影完相就踩油鬆人。
#10805/02/17 4:16 PM
引用快速引用
下一站嘅 Dettifoss 黛提瀑布,喺一座位於 Jökulsá á Fjöllum River 嘅瀑布,哩條河流係一條由南至北延申嘅河流,喺河流東面同西面嘅岸邊都有可以觀賞瀑布嘅位置。如果係諗住去西岸嗰邊睇瀑布嘅話就要經 862 號公路入去,東岸就由 864 號公路入。

寫出嚟好似好複雜,查實睇吓哩篇 Blog ~ http://chiwawah.blogspot.hk/2017/02/2016-dettifoss-selfoss.html ~ 入面個地圖應該會易明好多。我哋由 Ásbyrgi Canyon 嗰邊離場,本來係諗住轉入去比較近一陣返 Húsavík 嗰條 862 號公路嘅,點知跟住部 GPS 指出嗰個位置完全揾唔到嗰條公路,搲咗一陣頭先識得上 road.is 查吓發生乜事。

冰島啲公路嘅基建重未係好完善,好多公路嘅路況都唔係咁好,加上嗰邊時不時都會出現一啲極端嘅天氣,喺冰島人生路不熟咁去玩自駕,查實每日都應該上一上 road.is 同 weather.is 睇睇當日嘅天氣同計劃會經過嘅路段有冇啲乜嘢特别嘅狀況先至為之穩陣。可能我哋去嗰排嘅天氣都唔算係好差,一時大意出發前冇睇清楚當日嘅路況,喺現場揾唔到路嗰陣上網一查,先發現原來嗰日 862 號公路嘅北面入口同埋 864 號公路嘅南面入口都封咗路。事關當日朝早嘅天氣都算係風和日麗,哩次封路我估比較似係同啲道路改善工程有關唔多似關天氣事。



查實 862 同 864 號公路喺冰島冬季嗰陣會經常封路,寫哩篇遊記嗰陣係二月冰島嘅冬季,我上 road.is 望一望,已經見到入去 Dettifoss 嗰四個入口,只係封剩 862 號公路南面入去 Dettifoss 嗰條路。如果哩一日想由 Húsavík 入去 Dettifoss 睇瀑布嘅話,就要兜一條比較遠嘅路線,經 87 號公路轉去 1 號公路,由 862 號公路嘅南面入口入去嘞。



嗰日我哋見 862 號公路嘅北面入口行唔通,咁唯有轉去 864 號公路嘅北面入口嘞。查實 864 號公路嘅路況都唔係好掂,沿途見前面啲車部部都行到飛沙走石沙塵滾滾咁。我哋由 Ásbyrgi Canyon 起程計大約搞咗成個鐘,到晏晝十二點幾終於到達 Dettifoss 附近嘅一個停車場。

未講瀑布之前,想先講吓一隻非常之討厭嘅昆蟲 ~ Icelandic Black Flies (又名為 Midges),夏天嗰陣哩隻 Black Flies 有機會喺米湖 Lake Mývatn 一帶大量咁出現。我哋喺 Diamond Circle 哩幾日就碰上好多哩啲 Black Flies,而當中喺 Dettifoss、Námafjall 同 Dimmuborgir 一帶特別犀利。查實出發前都睇過一啲遊記有講過哩隻 Black Flies,不過可能我睇過嗰啲好多都係冬天去睇極光嘅遊記,比較少講盛夏季節嗰陣嘅情況,所以出發嗰陣都冇特別為意 Lake Mývatn 喺夏天嗰陣啲 Black Flies 係可以多到咁得人驚嘅地步。

哩隻 Black Flies 大約係一隻蚊咁上下大隻,佢哋唔會咬人,不過當有數十甚至過百隻烏蠅喺眼前同耳邊嗡嗡聲咁飛嚟飛去,重要驚佢哋唔知幾時會飛咗入去自己個耳窿同鼻窿入面,嗰陣嘅情況真係非常之咁討厭。查實如果早知嗰邊咁多哩啲烏蠅仔嘅話,出發之前我哋就會上網買定個好似哩啲咁嘅樣、可以笠住個頭嘅蚊網先過去。當時我哋冇哩啲蚊網喺手上,真係太多烏蠅嗰陣,就唯有揾件衫包住個頭擋一擋佢哋。



講完烏蠅入返正題講返個行程先,泊好部車之後,我哋一路趕烏蠅一路向住 Dettifoss 嘅方向行過去。



唔使睇地圖,跟住個路牌所指嘅方向望過去,遠遠就已經睇到瀑布啲水花,就咁遠望見到啲水花嘅氣勢,就已經知道哩座瀑布唔係少嘢。



Dettifoss 黛提瀑布位於冰島東北面嘅 Jökulsárgljúfur 國家公園米湖區附近。



哩座瀑布不單止係冰島最大嘅瀑布,亦係歐洲流量最大嘅瀑布嚟。



哩座瀑布嘅源頭係嚟自 Vatnajökull Glacier 菲約德勒姆冰川,水流就流入 Jökulsárgljúfur 峽谷。



我哋見個瀑布啲水花咁澎湃,重諗住行到去瀑布前面嗰陣,會好似我哋第二日行程喺 Gullfoss 嗰陣咁大大條彩虹擺咗喺座瀑布前面。



可惜哩日嚟到嘅時間唔係好夾,我哋面向瀑布嗰陣身處背光位置,陽光嘅角度唔啱嘅話,喺瀑布前面就唔會睇到彩虹。



面向瀑布背光,亦啫係話背向瀑布就係正光位啦,果然回頭一望,原來條彩虹走咗去瀑布前面嘅 Jökulsárgljúfur 峽谷度。



Dettifoss 嘅水流夾雜住好多由冰川沖落嚟嘅沉澱物,所以啲流水會有少少灰白色。



睇完澎湃嘅 Dettifoss,跟住轉場去附近另一個位於 Dettifoss 上游嘅瀑布 Selfoss。



雖然話係喺 Dettifoss 附近,不過由 Dettifoss 行過去都要行半個鐘時間。通往 Selfoss 嗰段路都幾崎嶇吓,一時要跨過啲大大嚿嘅岩石,一時就要踩過啲鬆軟嘅雪地同泥地,會踩到一腳都係泥濘。



Selfoss 位於冰島北部一條名為 Jökulsá á Fjöllum 嘅河流,哩條河嘅水流途經 Selfoss、Dettifoss 同 Hafragilsfoss 等幾個瀑布,到進入一個名為 Öxarfjörður 嘅海灣之後,河水就流出北冰洋。



雖然哩座瀑布嘅落差得大約十米,只係 Dettifoss 嘅十分之一都唔夠,不過佢嘅闊度就超過 350 米。



因為喺河流嘅東西兩邊岸都可以睇到 Selfoss 唔同嘅形態,好多人就會比較喺邊面岸睇哩座瀑布會比較靚。當然哩個問題嘅答案可以係好見人見智,不過因為喺東岸可以睇到 Selfoss 最闊嗰邊嘅瀑布,一般人都會覺得喺東岸望過去嘅瀑布睇落會比較壯觀。



查實哩點我都係返到香港,寫哩篇 Blog 睇返啲資料嗰陣先留意到,當時因為由 Ásbyrgi Canyon 揸車去嘅話,經 862 號公路入去西岸嗰邊回程比較近嘅關係,原本我哋係諗住行條近啲嘅路入去西岸嗰邊嘅,之但係因為條 862 號公路封咗,我哋焗住要兜條遠路入去東岸嗰邊 ~ 可能真係天意俾個機會我哋去睇個靚啲嘅風景都未定嘞 。



睇完瀑布,到晏晝兩點半我哋揸車原路返去 Húsavík。返到 Húsavík 襯住重有少少時間,我哋喺鎮入面一間 Nettó 超市補充咗少少糧餉,之後再返民宿食個快嘅下午茶,义返飽電準備一陣出海觀鯨嘞。

#10912/02/17 4:08 PM
引用快速引用
瀑布影得好靚,用咩effect #adore#
#11013/02/17 12:41 AM
引用快速引用
瀑布影得好靚,用咩effect #adore#

嗰兩張相主要係長時間曝光同 HDR。
長時間曝光就影嗰陣落塊 ND filter 減光。
因為咁玩長曝只可以用 Manual Mode,所以 HDR 要手動,由 over expose 到 under expose 大約影 7 到 10 張相,再喺 Photoshop 用 Google Nik 將幾張唔同曝光嘅相組合返做一張 HDR。
#11115/02/17 10:19 PM
引用快速引用
瀑布影得好靚,用咩effect #adore#

嗰兩張相主要係長時間曝光同 HDR。
長時間曝光就影嗰陣落塊 ND filter 減光。
因為咁玩長曝只可以用 Manual Mode,所以 HDR 要手動,由 over expose 到 under expose 大約影 7 到 10 張相,再喺 Photoshop 用 Google Nik 將幾張唔同曝光嘅相組合返做一張 HDR。


仲以為長時間曝光就得 [banghead]
#11215/02/17 10:22 PM
引用快速引用
今次我哋係幫襯一間舖號叫 Húsavík North Sailing 嘅觀鯨團出海,我哋參加嘅係一個名為 Whales, Puffins and Sails (NS-2) 嘅船團,船程來回大約四個鐘,途中會先去一個可以睇到 Puffins 嘅小島,跟住再去睇鯨魚,船團收費就盛惠每位 EUR 100 大元。哩間公司重有另一款都大路嘅觀鯨團,團名係 Húsavík Original Whale Watching Tour (NS-1),哩個團同我哋參加嗰個主要嘅分别係冇咗睇 Puffins 嘅行程,船程就少咗一個鐘,團費亦平啲盛惠 EUR 78 大元。

North Sailing 喺夏季每日都有幾班觀鯨團出海,見佢哋啲團出得咁密所以我都冇喺出發去冰島之前預約出團,諗住去到冰島等睇到當日嘅天氣預報嗰陣先揀個比較好天嘅日子出團。我哋喺 Húsavík 會逗留兩晚,到步冰島之後睇天氣預報見我哋喺 Húsavík 第二晚嘅天氣似乎比較好,於是我哋喺去到 Egilsstaðir 嗰晚先上 North Sailing 嘅網站預約哩一日嘅船團。



大約晏晝四點零鐘,我哋由民宿出門行過去位於海邊碼頭一間 Húsavík North Sailing 嘅辦事處度,出示佢哋覆返我嗰個確認電郵,跟住佢哋櫃位就會印返張正式用嚟上船嘅船飛過我,咁我哋就可以揸住哩張船飛去碼頭嗰邊準備上船嘞。



睇過天氣預報先出團哩個決定事後睇嚟就相當之正確嘞,哩日晏晝嘅天色比起之前一日嘅真係正好多。



景色靚除咗因為天氣好之外,查實 Húsavík 本身亦係一個風景相當之優美嘅小鎮嚟。



就算唔係為咗出海觀鯨,如果去開冰島北部嘅話我都會推薦喺 Húsavík 哩度停一站住返佢一至兩晚;喺哩次冰島之行嘅咁多個中途站當中,我覺得 Húsavík 哩度係我住過風景最靚感覺最舒服嘅一個城鎮嚟。



講返個觀鯨團,我哋上船之前要先著起一件由個團供應嘅蛤乸衣 (啫嗰啲一件過衫連褲嘅保護衣),件蛤乸衣主要係用嚟防水同保暖嘅。我哋出海嗰日嘅天氣唔差,起航之後都冇乜風浪。不過我睇過一啲遊記講話個網主跟哩啲觀鯨團出海唔好彩遇上風浪,結果喺船上搞到暈晒船浪,對鞋又俾啲沖上甲板嘅浪花濺到濕晒。起航後大約行咗大半個鐘船程就開始見到個天空啲雲越嚟越厚,同開船嗰陣藍天白雲嘅天色完全唔同晒 。



我哋首先到達一個小島嘅附近去睇小島對出海面上嘅 Puffins。查實野生嘅雀鳥一般都怕人,條船駛向啲有 Puffins
聚集嘅位置嗰陣啲雀就自然會散開,所以船同雀此終會保持住一個幾遠吓嘅距離;因為咁哩次睇雀嘅體驗同我哋早兩日喺 Borgarfjörður 嗰晚就相差好遠嘞。



不過捕野生生態哩家嘢就永遠冇話保証去到就一定有得睇嘅,如果我哋喺 Borgarfjörður 嗰晚睇唔到 Puffins 嘅話,咁哩次船程就會變成我哋今次冰島行程中唯一一次睇到 Puffins 嘅機會;所以値唔值得俾多幾嚿水喺哩個觀鯨嘅船程當中順道去睇埋雀,哩個我覺得都係幾見仁見智㗎。我哋追 Puffins 嘅船程大約十零分鐘,睇完雀跟住條船就會向住追蹤鯨魚嘅航程進發嘞。



睇完雀之後行咗大半個鐘船程,忽然間聽到船上其他團友一陣騷動嘅聲音,原來遠處海面終於出現鯨魚嘅蹤影嘞。



之後船嘅周圍時不時都會發現鯨蹤,不過啲鯨魚同我哋嘅距離都重係好遠吓。



查實哩啲距離已經係我本來嘅預期,此終係野生嘅生態,喺香港嗰啲中華白海豚嘅觀賞團好多時出咗海之後都係食白果返歸,就算有海豚出現多數就係喺啲咁上下嘅距離度睇到。



不過再過多陣,我哋開始發覺啲鯨魚出現嘅位置越嚟越接近 ;開頭啲鯨魚接近嗰陣好多都出現喺啲背光嘅位置度,不過我估我哋揸船嗰位船長都相當醒目,好快佢就將條船駛去正光嘅位置度方便我哋影相。



聽船員大哥後來嘅解說,我哋哩日見到嘅好大機會係 Minke Whales 同 Humpback Whales 哩兩隻品種嘅鯨魚嚟。



座頭鯨 Humpback Whales 嘅蹤跡主要係分布喺從南極冰緣到北緯 65 度一帶嘅海面。座頭鯨係一個有遷移習性嘅物種,佢哋每年遷徙嘅路程長達 25,000 公里。



由 11 世紀到 1930 年代末,小鰛鯨 Minke Whales 都係巴西、加拿大、中國、格陵蘭、日本、韓國同挪威捕鯨漁民嘅獵殺對象;當時捕鯨嘅活動急劇增加,直至 1986 年先至普遍地受到禁止。但係日本同冰島嘅漁民仍然繼續以科學研究嘅理由去捕獵小鰛鯨,而挪威亦喺 1993 年重新展開捕鯨嘅活動。



不過跟據哩個團嘅船員大哥對我哋嘅解說,好多去冰島玩嘅遊客誤以為鯨魚肉係冰島嘅傳統菜式因而貪得意走去餐廳試食,而事實上喺冰島大部份嘅鯨魚肉都係由外地遊客所消耗,冰島嘅本地人已經絕少會食鯨魚肉。所以各位如果有機會去冰島玩嘅話,就唔好再貪得意走去試食鯨魚嘞,事關冇人去食鯨魚哩啲無謂嘅獵殺活動先至會有停止嘅一日㗎。



講完鯨魚跟住同大家繼續觀鯨嘞,我哋今次查實都有少少運,有好幾次啲鯨魚直情係喺我哋條船嘅側邊度蒲頭,同我哋做解說嗰位船員大哥都話佢喺 Húsavík 哩度帶觀鯨團帶咗五年,哩日咁嘅觀鯨盛況佢都係第一次見咁話 。



不過之後我哋喺 Varmahlíð 嗰站嘅民宿度同一對美國嚟嘅夫婦吹水,佢哋話之前一日佢哋都喺 Húsavík 度好近咁睇到鯨魚;咁到底係剛啱我哋出海嗰兩日撞啱有班鯨魚出 ~觀人團~ 所以佢哋游到咁近嚟睇我哋,定還是查實個個團出海都一般可以咁近睇到鯨魚,只係個位船員大哥不嬲都係咁吹五年一遇嚟氹啲客開心,咁就不得而知嘞。



我哋大約晏晝 17:30 由 Húsavík 嘅碼頭開船出發,到黃昏 20:30 條船就開始回程嘅航程嘞。



哩段回程嘅航程都唔只係齋望住個海等返歸咁悶 ~ 首先船員大哥會同啲團友試玩吓張開船上嘅船帆。



玩過出海揚帆之後,船員大哥就拎啲預先準備好嘅熱朱古力同肉桂卷出嚟俾我哋食嘞 。肉桂卷哩家嘢係芬蘭一款幾出名嘅小食嚟,原本諗住去到赫爾辛基嗰朝早點都要喺火車站整返杯咖啡配件肉桂卷做早餐試吓嘅,點知嚟到 Húsavík 哩度就已經有機會試到哩款小食。



到大約夜晚 22:30 我哋返到民宿,頭先出發前咁早食過一餐,返到嚟就梗係要整返個消夜先至沖涼瞓覺啦。未食消夜之前我就先整返杯冰島嘅特色小食 Skyr。我見好多講去冰島嘅遊記啲人都話食哩杯嘢食到上晒癮,日日都要整返杯先至安樂,不過我食過就覺得杯嘢並冇啲人講到咁好食;哩杯嘢嘅口感同乳絡差唔多,不過淡而無味,我就要撈啲生果落去幫杯嘢添返啲甜味先至食得慣。



食完杯 Skyr 冇幾耐,我朋友煮飯嗰陣諗住用個煱烘一烘啲麵包,佢一時重手整得燶咗少少啲麵包出咗啲煙,點知嗰少少煙就整著咗屋入面一個好敏感嘅火警鐘。警鐘一響當堂嚇到全屋樓上隔離嘅住客衝晒出嚟 ~ 搞到咁大鑊唯有一路沙冧一路揾辦法整停個警鐘啦,好彩啲同屋好快就幫手揾到個警鐘嘅控制面板撳返停個警鐘。



開咗場咁别開生面嘅六國大封相,再繼續煮埋個飯,食完哩餐消夜結果又係搞到零晨先有得沖涼瞓覺,而哩一日嘅行程亦就此順利完成嘞。
#11305/03/17 3:44 PM
引用快速引用
#adore#
#11404/04/17 11:23 PM
引用快速引用
d 相咁 pro o既~~~
#adore#
#11505/04/17 11:59 AM
引用快速引用

咁白痴o既~~
睇樣真係有用.
點解唔係車路騎頂過 [sosad]
或者埋入地......
#11605/04/17 12:02 PM
引用快速引用
:o)
#11707/05/17 1:49 AM
引用快速引用
去完未 ???
#11807/05/17 1:57 AM
引用快速引用
留名跟進#hoho# #hoho#

#11907/05/17 1:59 AM
引用快速引用

咁白痴o既~~
睇樣真係有用.
點解唔係車路騎頂過 [sosad]
或者埋入地......

人哋景點地標哩家嘢 .......
#12009/05/17 6:07 AM
引用快速引用
去完未 ???

冰島就重要去多一排,不過剛剛去完一轉美國西岸返嚟,為免喺嗰邊 On99 蕩失路所以個 blog 啲 update 要停一停,家陣返到嚟先繼續。
#12109/05/17 6:12 AM
引用快速引用
開始我哋喺冰島第八日嘅行程嘞,哩日我哋諗住喺夠鐘離開 Diamond Circle 出發去下一站嘅民宿之前,盡可能走訪位於 Reykjahlíð 一帶嘅地熱景點。

哩篇 Blog http://chiwawah.blogspot.hk/2017/05/2016-namafjall-hverir-hverfjall-crater.html 入面個地圖記錄咗我哋哩日到過嘅地方,我哋哩日嘅第一站係位於 Námafjall Hverir 嘅 Mud Pots。



Námafjall 係冰島東北部近米湖嘅一座山,哩座山喺 Kraftla Volcano 附近,位置正正就喺火山嘅地熱區之中,而 Hverir 就係位於 Námafjall 嘅一處熱泉地帶嚟。



嚟哩度主要係想睇吓附近一帶嘅地熱景觀,首先哩度有幾個 Fumarole ~ 火山噴氣孔。哩啲 Fumarole 會噴出含硫化物嘅蒸氣,亦因為哩啲含硫化物嘅氣體令到哩度嘅硫磺氣味特别濃烈,係真係臭到有啲作嘔嗰種嘅感覺 。



地面上嘅泥土經過化學作用,變成紅橙黃綠乜顏色都有嘅五彩地貌。



除咗 Fumarole 之外,Mud Pots 亦係另一個值得嚟到睇吓嘅有趣自然現象。



當 Fumarole 含硫化氫嘅氣體同地面上嘅水份產生化學作用就會形成硫酸,哩啲水份中嘅硫酸會慢慢溶解四周嘅泥石形成泥漿,地熱將哩啲泥漿煮滾,結果就形成我哋家陣見到滾吓滾吓嘅 Mud Pots 嘞。



亦因為哩啲 Fumaroles 同 Mud Pots 不斷釋出嘅硫化物,哩度嘅地面都係五顏六色咁,幾得意。



哩度嘅空氣中除咗有好濃烈嘅臭蛋氣味之外,周圍亦有大量之前講過嗰啲 Black Flies 喺我哋身邊飛嚟飛去,四周圍又臭又多烏蠅嬲住,結果我哋忍耐嘅極限唔過半個鐘 ,影夠相就離場去下一站。

下一站 Hverfjall Crater,距離 Námafjall Hverir 不過係幾分鐘車程。



哩個亦係一個偽火山口 ~ Pseudocraters 嚟,行上去火山口段長命斜都幾甘吓㗎。



所謂偽火山口,啫係睇起上嚟雖然好似一個真嘅火山口,不過個窿唔係由於岩漿噴發形成,而係因為熾熱嘅岩漿流入潮濕嘅地方例如沼澤、湖泊或者池塘嗰陣,通過熔岩熱力引起蒸汽爆炸而形成嘅獨特地貌。



上到火山口嘅頂部望返落去,可以見到四周亦有啲細啲啲嘅 Crater。



我覺得哩啲 Craters 喺火山口邊沿望落去就係窿一個冇乜特別,反而居高臨下遠遠咁望過去先至睇得出哩啲 Craters 獨特嘅形態。



喺 Hverfjall Crater 山頂逗留咗十零分鐘,跟住我哋就行返落去停車嘅位置,出車踩去哩日嘅第三站 Dimmuborgir。
#12209/05/17 6:22 AM
引用快速引用
Dimmuborgir 喺一個遍佈著火山活動特有地形嘅一個景點嚟,話說二千三百年前,喺 Þrengslaborgir 同 Lúdentsborgir Crater 一次嘅火山爆發,當時岩漿流入位於 Dimmuborgir 嘅一個湖度,湖中嘅水份被岩漿蒸發,水蒸氣由岩漿冒出,當岩漿喺咁嘅狀況之下冷卻凝結,最後就形成家陣喺 Dimmuborgir 所見咁一座座岩柱咁嘅地貌。



喺哩啲岩柱當中有好幾條互相交錯嘅步道,而其中一條步道中有一座形狀比較奇特、名為 Kirkjan 嘅岩洞。



嚟到 Dimmuborgir 嘅遊人好多都會嘗試從場內縱橫交錯嘅步道當中尋找 Kirkjan 嘅所在,而尋找嘅過程就好似玩梗一個迷宮遊戲一樣。



查實如果冇乜準備過就咁行入去 Dimmuborgir 嘅話,要揾到 Kirkjan 絕對唔係一件容易嘅事。不過我哋用梗嗰個 Maps.Me 離線地圖有晒哩度啲步行徑嘅準確路線同 Kirkjan 嘅準確位置。



揸住張貓紙入場玩,咁要揾到 Kirkjan 就完全冇難度嘞 。



我哋揾 Kirkjan 途中見到另一個差唔多樣嘅岩洞,我喺出發前睇人哋啲遊記嗰陣都見過有人誤以為哩個岩洞就係 Kirkjan。



揸住張貓紙咁嚟玩,唔使一個鐘我哋就 KO 咗哩個迷宮,揾到哩座傳說中嘅 Kirkjan Lava Cave 嘞 。



冰島語 Kirkjan 係 “Church” 教堂咁嘅意思,至於點解叫哩個岩洞做 “Church”,睇睇佢嘅長相應該唔難明白。



以前啲冰島人有鋪癮好鍾意將啲喺霧中睇唔清楚嘅事物屈佢做精靈,喺 Dimmuborgir 哩度嘅柱狀岩亦曾經係哩啲被屈嘅對像嚟。



亦因為哩啲小精靈嘅傳說,Dimmuborgir 曾經被古時嘅冰島人認為係連接人間同地獄嘅地方。



北歐挪威基督教嘅傳說中,Dimmuborgir 喺撒旦登陸嘅地方,冰島語 Dimmuborgir 就係「黑暗堡壘」咁嘅意思。



大約晏晝兩點我哋行返出 Dimmuborgir 嘅出入口,諗住出車返去 Reykjahlíð 嗰間 Samkaup 借個洗手間用一用順便喺嗰度食埋個晏。不過嗰度啲烏蠅真係太多太討厭,去完個洗手間發覺實在係頂唔順啲烏蠅嘅滋擾,最後大家決定都係喺車入面簡單咬兩啖生果乾糧頂住個肚先,去到 Akureyri 先再揾地方補飛。
#12317/05/17 11:25 PM
引用快速引用
#love#
#12417/05/17 11:30 PM
引用快速引用
去咁撚耐???
#12517/05/17 11:43 PM
引用快速引用
秒後自動載入第 6
上一頁下一頁
發表回覆
請先登入以發表回覆