| 發表文章 | 發起投票 |
【歷史台】探本溯源：膠登仔都睇得明既西方上古史入門
如果大家有印象的話，小弟曾經響呢度發佈過西史系列文章《超級工程：羅馬是怎樣建成的》及《漫談荷馬史詩中的歷史背景》，而家就等小弟帶大家探本溯源，追溯西方歷史的源頭，簡單咁介紹比大家知關於西方上古史既一切。
一切從農業開始
農耕既起源，一直都係考古學家非常關心既議題，因為農耕的出現，對文明的誕生起了舉足輕重的作用。響人類未曾馴化動植物之前，採獵式的生活係常態。然而原始的採獵式生活不足以支撐文明既誕生，因為大家都可以想像到採摘、打獵有幾耗時間同埋投入產出比例有幾低。然後到左新石器時代，大約公元前9000年(距今11000年前)，幾今日中東一處叫Hilly Flanks既地方(涵蓋今日土耳其南部、敘利亞同伊拉克等地區)，人類首先開始耕種、建造大型建築及聚居於城市內。呢個相比起採獵時代係一個本質上既飛躍。例如土耳其南部接近1萬年前所建既哥貝力克巨石陣Göbekli Tepe，單件石柱既重量就達到20公噸，見證住新石器時代遠古先人既鬼斧神工，甚至有能力建造如此巨大既宗教建築。而同樣位於土耳其南部，距今約9000年前既加泰土丘Çatalhöyük，近10000人口開始聚居於大型村寨之中。呢個亦都標誌住城市既誕生，亦都係世界上最早出現的城市。
哥貝力克巨石陣Göbekli Tepe：新石器時代的居民如豎立數十噸重的T形石柱，至今仍然是個謎
加泰土丘Çatalhöyük考古發掘現場
加泰土丘復完圖，全盛時有多達1萬人口在其中生活
從11000年前農業出現在Hilly Flanks地區起，農業一路向西擴張。至距今約9000年前擴張至歐洲東南部，呢個亦都係歐洲農耕史既開端。大約7000年前西歐開始耕種，6300-5800年前農耕技術擴散至北歐，全歐洲進入農耕時代，為將來出現響歐洲既文明奠下基礎。
農業從Hilly Flanks一路向西擴張的地圖
雖然農業對人類文明發展好重要，而且最早的農耕文化有能力建造例如哥貝力克巨石陣之類今人驚嘆既建築物，但值得注意既一點係農業既出現並唔代表出現文明。新石器時代的文化要再經歷數千年既發展，先至符合歷史學家對文明所提出既要求：文字、金屬工具、大城牆。所以文明既出現，要比農業既出現遲大約5-6000年。關於文明響兩河流域、埃及同希臘既出現，就留待下一集再同大家探究。
未完待續
21
1本貼文共有 0 個回覆
此貼文已鎖，將不接受回覆
| 發表文章 | 發起投票 |